Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 BIBLIA KALAKGPALINILH XLATAMATKAN

Tlakg nitlan la xaklima kilatamat

Tlakg nitlan la xaklima kilatamat
  • KATA AKXNI LAKACHILH: 1952

  • PAÍS: ESTADOS UNIDOS

  • ATANU: LU XALUKU XWANIT

LA XAKLAMA:

Kstakli niku xlamakgolh tiku lixkajni xlikatsikgo anta kLos Ángeles (California, Estados Unidos), lu xkalakgapaskan xlakata kstakgo drogas chu lhuwa pandillas xʼanankgo. Akit xlichatiy xakwanit lata kilikgalhchaxankan.

Akxni aktsinajku xakwanit, kintse xkinkalinan kxtamakxtumitkan evangélicos. Pero akxni ktsukulh staka, tuku xlichuwinankan anta kaj xakkgaxmata chu nichuna xaktlawa. Domingos xakkatakilhtlin tiku anta xtlikgo uma takanajla, pero putum semana kaj xakan kfiestas, xakwa drogas chu katiwa tiku xakkatatalakgxtumi.

Lu xaluku xakwanit chu katuwa tuku lakapala xaklisitsi. Katuwa tuku xaktakgsa wa xaklitalatlawanan xlakata tlan xaktlajalh tiku xaktalatlawama. Ni lu kimakgtayalh tuku kkatsinilh ktakanajla, wata tanu tuku xaktlawa. Xakwan: «Malana malakgaxokgenama, chu akit xlakskujni». Akxni ksputma kata tutumpuxam, akxni xakkgalhi max 18 kata, ktsukulh lakgati tuku xlakpuwankgo políticos nema xkalimapakuwikan Panteras Negras, lu xkalakgapaskan xlakata xkamakgtayakgo nitu nakatlawanikan latamanin. Chu na kmakgtapakgsilh chuna la makgapitsi lakgkgawasan tiku xkgalhtawakgamakgolh xlakata nachuna xlakpuwankgo. Makglhuwa, klakkaxwiliw xlakata naklakatakinanaw, wa xlakata kʼescuela ni xtawila clases.

Pero ni kajwatiya uma tuku xaklakaskin. Kaj lakapala kintasitsi kimatlawilh tuku lu nitlan. Akgtum liʼakxilhtit, akit chu kiʼamigos xakanaw kcine xlakata nakakxilhaw películas nema lichuwinan tiku nitlan xkalikatsinikan skujnin xalak África anta kʼEstados Unidos. Xlakata nitlan klimakgkatsiw tuku nitlan xkatlawanikan, ktsukuw katalatlawayaw xalakglhmumukgon lakgkgawasan tiku xwilakgolh kcine chu xakanaw kkachikinin niku xwilakgolh tiku lakglhmumokgon xlakata nakkalaktayawiliyaw.

Ama kilhtamaku, kinatalan chu akit xkinkalilakgapaskanan xlakata xaktlawayaw tuku nitlan chu xakkatakgalhiyaw taʼakglhuwit mapakgsinanin. Chatum kintala tiku xaʼaktsujku xmakgtanuma kʼakgtum pandilla nema lu nitlan la xkalilakgapaskan chu akit xakkatalalin. Tlakg nitlan la xaklima kilatamat.

BIBLIA LAKGPALILH KILATAMAT:

Xnatlatni chatum amigo xtatayananin Jehová xwankgonit chu kiwanikgolh pi xakkataʼalh kxtamakxtumitkan. Xapulana akxni kkilalh kakxilhwi pi xlakan nixtachuna xwankgonit la amakgapitsi latamanin. Putum xkgalhikgo xBibliajkan chu  xmaklakaskinkgo. ¡Asta tiku tlakg laktsujku xmastakgo xtaʼakgchuwinkan! Lu kaks klilakawa akxni kkatsilh pi xtukuwani Dios wa Jehová, nachuna xmaklakaskinkgo akxni xlichuwinankgo (Salmo 83:18). Maski xwilakgo latamanin xalak lhuwa kachikinin, liwana xtasiya pi ni xlalaksakpaxki.

Xapulana, ni xaklakaskin nakilimakgalhtawakgekan Biblia, pero xaklakgati xakan ktamakxtumit. Akgtum tsisni, akxni xakwi kʼakgtum tamakxtumit, makgapitsi kiʼamigos ankgolh niku xtlakgnama akgtum grupo chu makgnikgolh chatum kgawasa akxni laktayawikgolh xlakata makglhtikgolh xchamarra xaxuwa. Lichali, xlichixkutnamakgolh tuku xtlawakgonit. Asta akxni kalinka kxlakatin mapakgsinanin xtasiya pi ni kuenta xtlawakgo. Atsinu ni putum nialh xʼamakgo taxtukgo kpulachin. ¡Lu klipaxuwa xlakata ni kkataʼalh! Wa xlakata klakpuwa naklakgpali kilatamat chu ktsukulh likgalhtawakga Biblia.

Xlakata xaklaksakpaxkinan, makgapitsi tuku kakxilhli tuku xtlawakgo xtatayananin Jehová kaks kimalakawanilh. Akgtum liʼakxilhtit, akxni chatum xtatayana Jehová tiku lhmumokgo xwanit alh kʼatanu país, katamakgxtakgli xkamanan akgtum familia tiku tsitsekge xwankgonit. Nachuna, akgtum familia tiku xalhmumokgo makgamakglhtinalh chatum kgawasa tiku xatsitsakga xlakata xputsama niku natawila. Uma liwana kimakanajlinilh pi xtatayananin Jehová makgantaxtikgo tuku wa Jesucristo nema wi kJuan 13:35: «Wa yuma nakalilakapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit». Xakkatsi pi xaktekgsnit xaxlikana natalan.

Akxni ktsukulh likgalhtawakga Biblia, kkatsilh pi kililakgpalit kintayat xwanit. Kliskujli xlakata ni xaktalatlawanalh, pero xlikana chuna kilitlawat xwanit (Romanos 12:2). Tsinu tsinu ktsukulh talakgpali chu enero kkata 1974 ktamunulh chu xtatayana Jehová kwa.

Kliskujli xlakata ni xaktalatlawanalh, pero xlikana chuna kilitlawat xwanit

Asta akxni xaktamununita chuntiya xakliskujli xlakata xakmachokgolh kintasitsi. Akgtum liʼakxilhtit, akgtum kilhtamaku akxni xakkalakgapaxialhnamaw makgapitsi familia xlakata nakkalitachuwinanaw Dios chu kakxilhli pi chatum kgalhana xlima xʼestereo kimputlaw. Lakapala kstalanilh. Akxni atsinu xtsankga xlakata xakmataxtukli makgalh estereo chu chuntiya kgosnalh. Akxni kkalitachuwinalh amakgapitsi la kmakglhtinampa kiʼestereo, chatum xtatayana Jehová kiwanilh: «¿Tuku xtitlawa komo xtimataxtukti?». Uma takgalhskinin kimalakpuwanilh pi xwijku tayat nema kililakgpalit xwanit.

Octubre kata 1974, ktsukulh putum kilhtamaku skujnani Dios. Max akgtum ciento horas akgatunu papaʼ xakkamasiyani amakgapitsin latamanin xlakata Biblia. Alistalh kiwanika pi xakalh skuja niku pulalinkan xtaskujutkan xtatayananin Jehová anta kBrooklyn (Nueva York). Kkata 1978 ktaspitpa kLos Ángeles xlakata xakkuentajtlawalh kintse, xlakata xtatatla. Titaxtulh akgtiy kata, ktatamakgaxtokgli Aarhonda. Xla lu kimakgtayalh akxni xakkuentajtlawamaw kintse asta akxni nilh. Alistalh kinkawanikan pi nakanaw kʼEscuela Bíblica de Galaad xla Watchtower. Akxni sputli uma curso, kinkamalakgachakan la misioneros kPanamá, anta niku la uku kwilaw.

Lata akxni ktamunulh, min kilhtamaku tuwa kmakgkatsinit nakmachokgo kintasitsi. Tuku ktlawa wata ktamakgatlini xlakata ni naktalatlawanan o kmachokgo kintasitsi. Lhuwa latamanin, chu nachuna kimpuskat, kiwanikgo pi lu tlan la klikatsi chu asta akit kaks klilawakan. Ni klakpuwan pi kiʼakstu klakgpalilh kintayat. Liwana kkanajla pi wa xlitliwakga Biblia nema tlawa pi katalakgpalilh latamanin (Hebreos 4:12).

TUKU TLAN KINKITAXTUNINIT:

Biblia kimakgtayanit pi tlan naklatama chu kimasiyaninit pi ni naktalatlawanan. Nialhti klaktayawili, wata, la uku kkamakgtaya latamanin xlakata nalakgapaskgo Dios. Asta klimakgalhtawakgalh Biblia chatum tiku makgasa ni xaktalaʼakxilhputun akxni xakanku kʼescuela chu akxni lixkajni xaklikatsi. Akxni xtamununita, akxtum ktawilaw kʼakgtum chiki chu la uku chuntiya amigos akinin. Asta la uku, kimpuskat chu akit kkamakgtayanitaw tatipuxam latamanin xlakata xtatayananin Jehová nawankgo.

Lu kpaxtikatsini Jehová xlakata kimaxkilh tlan latamat, chu kkgalhi xaxlikana natalan.