Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Julio kata 2015

 LICHUWINAN TUKU WI KXMAKNI REVISTA | LA TLAN NIALH LU NALAKGAPUTSAKAN

Lilakgaputsakan tuku nitlan nalanikan

Lilakgaputsakan tuku nitlan nalanikan

Alona wan: «Akxni kkgaxmata patrullas, lu kpekuan chu lakapala kkan niku tlan naktatsekga. Pero asta anta na lu kpekuan. Chu tlakg chuna kmakgkatsi akxni ni kkinchik kwi, anta niku ni anan niku naktatsekga. Akgtum kilhtamaku xaktlawama ktiji, ktsukulh kgaxmata patrullas. Ktsukulh tasa chu nila xakjaxanan. Titaxtulh akglhuwa hora xlakata tlan xaktakaksli. Chu amakgtum tsukupa makasanankgo patrullas».

Alona

Ni kajwatiya tiku wilakgolh niku anan guerra pekuankgo. Akgtum liʼakxilhtit, akxni kinkamakatsinikanan pi chatum xalak familia o chatum amigo kgalhi akgtum lipekua tajatat max lu nitlan nalimakgkatsiyaw. Amakgapitsi lilakgaputsakgo akxni lakpuwankgo tuku nala kilhtamaku nema aku mima; max kakgalhskinkan: «¿La natawila kakilhtamaku niku nalatamakgo kinkamanan chu kinatanatna? ¿Lhuwa guerras naʼanan, nalaktlawakan katiyatni chu lhuwa tajatat?». Wa xlakata ¿tuku tlan natlawayaw xlakata uma tuku lilakgaputsayaw?

Biblia wan: «Tiku skgalala akxilha tuku nitlan chu tapanuni» (Proverbios 27:12, La Palabra de Dios para Todos). Akgtum lu tlan tastakyaw, ¿nixlikana? chuna la akxni kuenta tlawayaw xlakata nitu nakinkaʼakgspulayan, na tlan kuenta natlawayaw kintalakapastaknikan  chu chuna la makgkatsiyaw. Lilakgastan niku latlawanikan tuku nitlan, asta noticias niku limin tuku lipekua, tlawa pi lu nalilakgaputsayaw chu nachuna xlakata kinkamanankan. Akxni ni akxilhaw umakgolh tuku nitlan ni kaj ni akxilhputunaw tuku nitlan, wata na kinkamakgtayayan. Dios ni tlawalh kintalakapastaknikan xlakata nalimatsamayaw tuku nitlan, wata tuku xaxlikana, tuku xaʼakgstitum, tuku makgtayanan chu tuku tlan. Komo chuna natlawayaw, «Dios nti masta ntakaksni» tlan nakinkamamakgkatsiniyan (Filipenses 4:8, 9).

LU XLASKASKINKA ORACIÓN

La akxilhwi pi xaxlikana takanajla kinkamakgtayayan xlakata ni lu nalakgaputsayaw. Biblia kinkawaniyan pi akxni natitaxtuyaw tuku nitlan putum kilhtamaku katlawaniw oración Dios (1 Pedro 4:7). Tlan naskiniyaw pi kakinkamakgtayan chu kakinkamaxkin liskgalala chu ni napekuanaw xlakata natlawayaw tuku tlan, chu liwana nakatsiyaw pi xla kinkakgaxmatniyan «nkaxatu kawa ntu kskiniw» (1 Juan 5:15).

Avi, tawi xchixku

Biblia kinkawaniyan pi «xapuxku yunu nkatuxawat», wamputun, tiku akgchipananit, wa Satanás chu ni wa Dios (Juan 12:31; 1 Juan 5:19). Xlikana tuku xlichuwinama Jesús, akxni lichuwinalh xlakata Akgskgawini chu kinkamasiyanin naskinaw: «Kakinkamalakgtaxti ntu nitlan» (Mateo 6:13). Xlakata oración tlan kinkamamakgkatsiniyan. Alona wan: «Akxni ktsuku kkgaxmata pi makasanankgo patrullas, kskini Dios pi kakimakgtayalh xlakata ni lu nakpekuan. Nachuna, kinchixku kintachuwinan kteléfono chu akxtum ktlawayaw oración. Uma tlan kimamakgkatsini». Xlikana tuku wan Biblia: «Kintikukan Dios lakatsu kalakgaliya wakg lata ti takilhanij», putum tiku xliputum xnakujkan skinikgo xtamakgtay (Salmo 145:18).

¿WI TAKGALHKGALHIN?

Anta kTaʼakgchuwin xalak Sipi, Jesús kamasiyanilh kstalaninanin naskinkgo kxʼoracionkan: «Kamilh mintamapakgsin» (Mateo 6:10). Wa xTamapakgsin Dios namasputu putum kilhtamaku tuku lilakgaputsayaw. Jesucristo, tiku «xPuxku Takaksni» wa Dios laksaknit, xlakata «[na]masputu guerra kxlitilanka katiyatni» (Isaías 9:6; Salmo 46:9). Dios «juez nalitaxtu klhuwa kachikinin [...]. Ni katilalitalachipalh espada akgatunu kachikinin, chu nialh katitlawakgolh guerra». Nachuna, «ni katianalh tiku nakamakgapekuan» (Miqueas 4:3, 4). Familias «natlawakgo chiki chu anta natawilakgo; chu nachankgo uvas chu nawakgo xtawakat» (Isaías 65:21). Chu nachuna «ni chatum lataman nawan: “Ktatatlay”» (Isaías 33:24).

Xlikana, maski lu kuenta natlawayaw, nila tuku natlawayaw (Eclesiastés 9:11). Max wilaw anta niku ni kilitawilatkan chu nachuna kilhtamaku. Chu, chuna kitaxtu, latamanin maski nitu tlawakgonit nikgo guerras, latlawanikan tuku nitlan chu tajatat. Pero ¿ni xlilat uma la kitaxtu?

Millones latamanin nalakastakwanankgo chu kaj wa Dios katsi la xlilhuwa. La uku, wilakgolh kxtalakapastakni Jehová asta akxni nachin kilhtamaku nalakastakwanankgo «xlipaks nti aknukgoy [o kaʼakgtapukanit]» (Juan 5:28, 29). Xlakata uma takgalhkgalhin, Biblia wan: «Uma ntakgalhkgalhitin xtachuna xkgatxtokgat putakutnu ntu lakatanks, chu luwa tliwakglh» kgalhiyaw (Hebreos 6:19). Chu Dios kawilininit «xaliʼukxilhtit lantla mpaks nalikanajlanikgoy» xlakata malakastakwanilh Jesucristo (Hechos 17:31).

La uku, asta tiku liskujmakgo xlakata naskujnanikgo Dios na lakgaputsakgo. Tuku kamakgtayanit Paul, Janet chu Alona ni lu nalakgaputsakgo, xlakata wi tuku tlawakgonit, skinikan xtamakgtay Dios kʼoración chu lu nalipawankan xtamalaknun Dios nema nalimin kilhtamaku nema aku mima. Max nachuna nakinkaʼakgspulayan, xlakata Biblia wan: «Chu wa Dios nti mastay ntakgalhkgalhitin, luwa xatakgatsin tapaxuwan, chu ntatanksni nkakalixajni» (Romanos 15:13).