Xkuentajkan latamanin xlakata nakalakgmin tuku nitlan. ¿Chuntiya namasta talakaskin Dios pi latamanin namapakgsinankgo kKatiyatni? Ni. Chuna la akxilhnitawa, nialh makgas wi tuku natlawa xlakata nakamasputu mapakgsinanin chu tuku nitlan tlawakgonit chu xlakata la nitlan limaklakaskinkgonit limapakgsin. Tiku Malakatsukilh Katiyatni chu latamanin, lakaskin pi kakatsiw pi nialh makgas wi tuku natlawa. ¿La kinkawaniyan uma tamakatsin nema lu xlakaskinka?

Kalakpuwanti pi napina paxialhnana. Max pulana xʼakxilhti akgtum mapa chu xputsa tukuya tiji nachipaya. Alistalh, akxni pimpata, akxilha pi tuku wi ktiji xtachuna tuku wi kmapa chu niku nalakpintilhaya. Chuna nakatsiya pi talakatsuwipat niku pimpat. Xtachuna la akgtum mapa, Dios kinkamaxkinitan xTachuwin, Biblia. Anta talichuwinan tuku nalatilha xlikalanka katiyatni akxni atsinu tsankga xlakata namin lisputni. Chuna la titaxtu kilhtamaku, akxilhaw pi tuku lama kkakilhtamaku xtachuna tuku wan Biblia. Uma kinkamakanajliyan pi lisputni tlakg lakatsu wi.

Biblia wan pi akxni nina chin nawan lisputni, wi tuku lu nitlan nala kkakilhtamaku. Ama kilhtamaku, latamanin naʼakxilhkgo pi wi tuku nalatilha chu tuku nipara amakgtum chuna lanit. Kaʼakxilhwi makgapitsi tuku nala nema lichuwinan Biblia.

1. LU NITLAN NATAWILA CHU TAʼAKGLHUWIT KPUTUM KATIYATNI Tuku xwankanit pi nala nema wi kMateo capítulo 24 lichuwinan liʼakxilhtit nema limasiya pi pulaklhuwa tuku nala. Chuna la xwankanit, tuku nala nalimasiya «akxni talakatsuwinita xlisputni kakilhtamaku», chu alistalh «namin lisputni» (versículos 3 chu 14). Makgapitsi tuku xʼama litasiya wa guerras, tatsinksni, natachiki tiyat xlikalanka katiyatni, lhuwa nalatlawanikan tuku nitlan, niti nalapaxki chu naʼakgskgawinankan ktakanajla (versículos 6 asta 26). Xlikana, putum kilhtamaku anankgonit uma. Pero, putum uma akxtum nakgantaxtukgo akxni nina min lisputni. Nachuna, na akxni nakgantaxtukgo akxni nala umakgolh pulaktutu tuku lichuwinankanit.

2. NAKGALHIKGO NITLAN TAYAT Biblia wan pi «[k]xaʼawatiya kilhtamaku» xla uma xalixkajni kakilhtamaku tlakg xʼama talhuwi nitlan tayat. Anta wan pi latamanin «xakstukan nakapaxkikan, napaxkikgo tumin, nachixkuwitnankgo, tlanka nakamakgkatsikan, nitlan nalichuwinankgo Dios, ni nakgalhakgaxmatkgo xnatlatnikan, ni napaxtikatsininankgo, namakgxtakgnankgo, ni napaxkinankgo, nila wi tuku nakatalakkaxlakan, nalimawakanankgo tuku nitlan, ni namachokgokgo tuku nitlan tlawaputunkgo, xalak luku, ni napaxkikgo tuku tlan, naʼakgskgawinankgo, xalaktsakat, lu lanka nakamakgkatsikan, tlakg napaxkikgo wa tuku nalipaxuwakgo nixawa Dios» (2 Timoteo 3:1-4, Traducción del Nuevo Mundo, TNM). Xlikana pi umakgolh tayat ni aku tsukukgolh, pero «xaʼawatiya kilhtamaku» lu nitlan chu tlakg nitlan xʼama tawila. Wa xlakata Biblia wan pi umakgolh kilhtamaku «lu tuwa nawan». ¿Lakpuwana pi la uku latamanin na watiya kgalhikgo uma tayat?

3. LU NITLAN NATAWILA KATIYATNI Biblia wan pi Dios nakamasputu «tiku lakglakgalhimakgolh katuxawat» (Apocalipsis 11:18). ¿La talakglakgalhima Katiyatni la uku? Chuna la tlawakgolh kxkilhtamaku Noé: «Tiyat nitlan tawilalh kxlakatin xaxlikana Dios, chu katiyatni litatsamalh tuku nitlan. Chu Dios akxilhli katiyatni chu, ¡kaʼakxilhti!, lu nitlan xwi». Wa xlakata, akxni kalichuwinalh tiku nitlan xlikatsikgo, Dios wanilh Noé: «Nakkatamalakgsputukgo katiyatni» (Génesis 6:11-13). ¿Akxilhnita pi lamaw kkakilhtamaku niku tlakg nitlan tuku latlawanikan? Chu ni kajwatiya uma, la uku lama tuku ni makgtum akxilhaw: tuku limakgninankan  nema tlawakgonit latamanin tlan namasputu katiyatni chu putum latamanin. Chu tuku tlakg nitlan, latamanin atanu la lakglakgalhimakgo Katiyatni: tsinu tsinu masputumakgo tuku tlawa pi kaʼanalh latamat: un, pupunu, chu atanu.

Kalakpuwanti uma: akgtum ciento kata nema titaxtunit, ¿xkgalhi chixku tuku tlan xkalimalakgsputulh putum latamanin? Ni. Pero la uku kgalhi. Chuna la xlilhuwa kgalhikgo tuku limakgninankan chu la talakglakgalhinit kakilhtamaku chuna limasiya. Chu tuku tlakg nitlan, latamanin tasiya pi ni akgatekgskgo tuku nitlan kitaxtu chu nila machokgokgo tuku nitlan limin la lakapala taxtumakgo tuku xalaksasti. Pero, ni xlakan katilakkaxtlawakgolh Katiyatni. Dios wan pi akxni latamanin tiku nitlan likatsikgo nina a masputukgo latamat kKatiyatni, Dios nakamasputu umakgolh latamanin.

4. NATALICHUWINAN DIOS XLIKALANKA KATIYATNI Atanu liʼakxilhtit nema lichuwinalh Mateo wa pi xʼama tatlawa tuku nitu xtachuna: «Umakgolh xalakwan xalaksasti tamakatsin xla xtamapakgsin Dios natalichuwinan kputum katiyatni xlakata natamakatsininan kputum laklanka kachikinin; chu alistalh namin lisputni» (Mateo 24:14TNM). Uma taskujut ni xtachuna putum tuku tlawakgonit takanajla. Wi tuku lu xlakaskinka nalichuwinan: «xalakwan xalaksasti tamakatsin xla xtamapakgsin Dios». ¿Tukuya takanajla lichuwinama xalakwan xalaksasti xla xTamapakgsin Dios, chu ni kaj kʼakgtum país, wata «kputum katiyatni»?

Xalakwan tamakatsin xla xTamapakgsin Dios talichuwinama xlikalanka katiyatni chu kʼakglhuwa ciento tachuwin

Tlawakanit jw.org sitio xla Internet xla xtatayananin Jehová, xlakata nalichuwinan «xalakwan xalaksasti tamakatsin xla xtamapakgsin Dios». Kgalhi likgalhtawakga nema lichuwinan uma tamakatsin kliwaka 700 tachuwin. ¿Wi atanu takanajla nema lhuwa liskuja xlakata nakalitachuwinan latamanin xTamapakgsin Dios? Akxni nina xʼanan Internet, xtatayananin Jehová xkinkalilakgapaskanana pi klichuwinanaw xalakwan xalaksasti xla Tamapakgsin. Lata kata 1939, makatunu revista Makatsinina limin uma tachuwin: «Lichuwinan xTamapakgsin Jehová». Chu maktum libro xla takanajla wa uma tuku wan xlakata tuku ktlawayaw: «Ni anan tuku xtachuna la xlilhuwa chu la malakgatumikgonit la lichuwinankgo Dios». Tamakatsin nema lu xlakaskinka klichuwinanaw wa pi xTamapakgsin Dios nialh makgas namasputu tuku lixkajni anan kkakilhtamaku.

LU XLAKASKINKA KILHTAMAKU NEMA WILAW

¿Akxilhnita kmilatamat la kgantaxtunit tuku xwankanit pi nala nema talichuwinalh kʼuma  artículo? Akgtum ciento kata nema titaxtunit, uma revista lichuwinan tuku xalaksasti xlakata tuku lanit kkakilhtamaku chu tiku likgalhtawakgakgo akxilhkgonit pi umakgolh makgantaxtikgo tuku litasiya xaʼawatiya kilhtamaku. Xlikana, tiku ni kanajlakgo wankgo pi tuku talichuwinan tlan nalakgpalikan chu pi ni xlikana pi kakilhtamaku tlakg nitlan wi. Wankgo pi xlakata lhuwa taxtuma tuku xalaksasti, tlan katsiyaw taʼakglhuwit nema nikxni xkatsiw. Maski katuwa tuku nawankgo umakgolh latamanin, lhuwa tiku lakputsanankgo tlakg tekgskgo tuku kalimasiyani pi lamaw kkilhtamaku nema lu xlakaskinka.

Akgtum liʼakxilhtit anta wi ktamakatsin nema makgapitsi científicos katlawanilh Consejo de Seguridad de las Naciones Unidas nema makgtanumakgo The Bulletin of the Atomic Scientists kkata 2014. Akxni xlichuwinamakgolh tuku nitlan nakakitaxtuni latamanin, wankgolh: «Xlakata liwana klakputsananitaw uma tuku nitlan nala, wa uma tuku kakxilhnitaw: Max nasputkgo putum latamanin xlakata lhuwa tuku xalaksasti taxtuma». Uma tuku akxilhwi tlakg lhuwa latamanin kamakanajli, chu tiku tsokgkgo uma revista chu lhuwa tiku likgalhtawakgakgo pi lamaw kxaʼawatiya kilhtamaku chu pi mimaja lisputni. Pero ni talakaskin napekuanaw. Wata kapaxuwaw. ¿Tuku xlakata chuna wanaw? Xlakata tlan nalakgtaxtuyaw.