Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Abril kata 2015

 AKXNI NATACHUWINANKGOYAN XTATAYANANIN JEHOVÁ

¿Tuku xlakata kata kata kililakapastakatkan akxni tinilh Jesús?

¿Tuku xlakata kata kata kililakapastakatkan akxni tinilh Jesús?

Naʼakxilhaw la katachuwinankgo xtatayananin Jehová latamanin. Kalakpuwaw pi chatum xtatayana Jehová wanikan Linda lakgapaxialhnan chatum puskat tiku wanikan Lucía.

«ANKGALHIN NATLAWAYATIT NAKILILAKAPASTAKATIT»

Linda: Kgalhen Lucía. Lu klipaxuwalh pi kakxilhni semana nema titaxtulh akxni talakapastakli akxni tinilh Cristo. * ¿La akxilhti?

Lucía: Lu klakgatilh. Pero ni lu kʼakgatekgsli makgapitsi tuku talichuwinalh. Xakkgaxmatnit pi talakapastaka akxni lakachilh Jesús chu akxni lakastakwanalh kSemana Santa, pero nitu xakkgaxmatnit pi natalakapastaka akxni tinilh.

Linda: Chuna. Wa uma tuku tlakg kalakgapaskan. Pero akinin xtatayananin Jehová klakpuwanaw pi lu xlakaskinka naklakapastakaw akxni tinilh Cristo kata kata. Komo kgalhiya kilhtamaku, tlan nakwaniyan tuku xlakata maski kaj tsinu.

Lucía: Tlan, kkgalhi tsinu kilhtamaku.

Linda: Tlan. Akinin xtatayananin Jehová klakapastakaw akxni tinilh Cristo xlakata chuna limapakgsinalh. Kaʼakxilhwi tuku lalh katsisni akxni nina xmakgnikan. ¿Lakapastaka pi Jesús katawayalh xʼapóstoles?

Lucía: Chuna, klakapastaka. Xaʼawatiya Taway.

Linda: Wa uma. Na wanikan xTaway Malana. Akxni xwayamakgo, Jesús liwana kawanilh kstalaninanin tuku xlitlawatkan. Anta wi, kLucas 22:19. ¿Likgalhtawakgaputuna?

Lucía: Tlan. Unu wan: «Ntitiyalh nkaxtalanchuj, chu xmastanitta mpaxkatsinit, lakgchakgalh, na maxkikgolh, wanikgolh: “Wa yuma nkintiyatliwa, wa ntu wixin mimpalakatakan natamastay. Wa yuma ntlawamaw nchu, ankgalhin natlawayatit nakililakapastakatit”».

Linda: Paxtikatsinilh. Kaʼakxilhti tuku wa Jesús xlisputni versículo: «Ankgalhin natlawayatit nakililakapastakatit». Chu akxni nina xwan uma, kawanilh tuku xlilakapastakatkan xwanit. Kawanilh pi xʼama makamasta xmakni, o xmastalh xlatamat, xpalakata kstalaninanin. Anta kMateo 20:28, Jesús na xtachuna tuku lichuwinalh. Kaʼakxilhti tuku wan anta: «Xkam nchixku, ni wa limilh mpala kaj namakgtayakan, wampi kaj namakgtayakgoy [o nakaskujni] amakgapitsin». Wa xlakata, akinin xtatayananin Jehová lakapastakaw akxni tinilh Cristo xtamakamastan nema tlawalh xlakata xkinkalakgmaxtun. Xlakata nilh tlan nalakgtaxtuyaw komo nakgalhakgaxmatnanaw.

¿TUKU KINKALILAKGMAXTUYAN XLAKATA NILH CRISTO?

Lucía: Kkgaxmatnit pi Jesús nilh xlakata nakinkalakgmaxtuyan. Pero ni kʼakgatekgsa la kinkalakgmaxtuyan xlakata nilh.

 Linda: Kʼakgatekgsa tuku wana. Lichuwinankan xlakata talakgmaxtut, o xtamakamastan Jesús, lu tuwa. Pero wa tuku tlakg lilakgatit nema lichuwinan Biblia. ¿Tlan tlakg nalichuwinanaw?

Lucía: Tlan, kkgalhijku kilhtamaku.

Linda: Lu tlan. Aku xaklikgalhtawakgama xlakata uma tema chu naklakputsa xlakata ni tuwa la naklitachuwinanan.

Lucía: Tlan.

Linda: Pulana kiliʼakgatekgsatkan tuku lalh akxni Adán chu Eva lakgalhinankgolh kjardín xla Edén. Xlakata tlan nakatsiyaw kalikgalhtawakgaw tuku wan Romanos 6:23. ¿Likgalhtawakgaputuna?

Lucía: Tlan. Wan: «Wa xtaxokgo ntalakgalhin, wa linin, wa mpi wa xtatakin Dios, wa latamat wantu xaliankgalhin, xpalakata nCristo Jesús nkimPuchinakan.»

Linda: Paxtikatsinilh. Kaputsananiw uma versículo. Kaʼakxilhti pi akxni litsuku versículo wan pi «xtaxokgo ntalakgalhin, wa linin». Wa tuku lakkaxwililh Dios akxni xwilakgo xapulana latamanin: tuku litaxokgo talakgalhin wa linin. Xlikana, xapulana niti xlakgalhinanit. Ni xkgalhikgo talakgalhin akxni katlawalh Adán chu Eva. Chu xkamanan na ni xkgalhikgolh talakgalhin akxni xlakachinkgolh. Wa xlakata, ni xtalakaskin pi xnikgolh. Adán chu Eva chu xkamanan tlan xatapaxuwan putum kilhtamaku xlatamakgolh. Pero chuna la katsiya, wi tuku lalh nema laktlawalh putum uma. ¿Lakapastaka tuku uma?

Lucía: Kkatsi, Adán chu Eva wakgolh xtawakat kiwi nema xkawanikanit pi ni xwakgolh.

Linda: Xlikana. Chu chuna lakgalhinankgolh; Adán chu Eva ni nakgalhakgaxmatkgo Dios lu kaj chuna tlawakgolh. Kgalhikgolh talakgalhin. Uma tuku tlawalh lu nitlan tuku kaliminilh chu nachuna xkamanan.

Lucía: ¿Chu tuku xlakata nitlan kakitaxtunilh xkamanan xlakata akinin nitu tlawanitaw?

Linda: Nakwiliniyan akgtum liʼakxilhtit. ¿Wi tuku makchanita kʼakgtum molde?

Lucía: Chuna, kkgalhi akgtum anta ktlawa kaxtalanchu.

Linda: Kalakpuwanti pi natamawaya xasasti chu akxni nina maklakaskina, namakgxtakga chu natachunta kxchastun. ¿La nataxtukgo kaxtalanchu nema nalitatlawa? ¿Nixlikana pi chuna nataxtukgoyacha?

Lucía: Chuna.

Linda: Nachuna, akxni Adán chu Eva ni kgalhakgaxmatkgolh Dios la kaj «tachuntakgolh» xlakata talakgalhin. Xlakata lakgalhinankgolh akxni nina xkgalhikgo xkamanan, putum xkamanankan nema lakachinkgolh na kamatitaxtinilh talakgalhin. Anta kBiblia, tachuwin talakgalhin ni kajwatiya kilhchanima tuku nitlan tlawakgo latamanin, wata na wa talakgalhin nema kinkamatlawiputunan tuku nitlan. Wa xlakata, maski ni kinkuentajkan xlakata tuku tlawakgolh Adán chu Eva, nina xlakachinaw, kimputumkan kgalhiyaw talakgalhin nema kinkamatlawiputunan tuku nitlan. Chu chuna la likgalhtawakgaw kRomanos 6:23, «wa xtaxokgo ntalakgalhin, wa linin».

Lucía: Pero ¿tuku xlakata putum kilhtamaku kilipatinatkan xlakata uma? Ni xlilat.

Linda: Xlikana, uma ni chuna xlilat. Tlakg kakatsiw tuku xlakata. Xaʼakgstitum Dios tlawalh pi Adán chu Eva xnikgolh xlakata tuku xtlawakgonit. Pero, Dios kamaxkilh akgtum takgalhkgalhin xkamanan. Mastalh akgtum tiji xlakata tlan xlakgtaxtukgolh xlakata nitlan xwilakgolh. Wa xtamakamastan Cristo. Kalikgalhtawakgaparaw tuku wan Romanos 6:23. Akxni wa pi «xtaxokgo ntalakgalhin, wa linin», versículo  wampara «wa mpi wa xtatakin Dios, wa latamat wantu xaliankgalhin, xpalakata nCristo Jesús nkimPuchinakan». Xlakata nilh Cristo tlawa pi tlan xlakgtaxtuw xlakata talakgalhin chu linin. *

TAMAKAMASTAN: LANKA XTAMASKIWIN DIOS

Linda: Wi atanu kʼuma versículo nema na klitachuwinamputunan.

Lucía: ¿Tuku uma?

Linda: Kaʼakxilhti tuku wan unu: «Wa mpi wa xtatakin Dios, wa latamat wantu xaliankgalhin, xpalakata nCristo Jesús nkimPuchinakan». Komo Jesús patinalh chu nilh kimpalakatakan xlakata nalakgtaxtuyaw, ¿tuku xlakata ni wan unu pi “xtatakin Jesús nema masta”? *

Lucía: Aaah... nipara tsinu kkatsi.

Linda: Xlakata ni kgalhakgaxmatnikgolh Dios kjardín xaʼEdén, Adán chu Eva makglakgalhikgolh xMalakatsukinakan. Uma tuku nitlan tlawakgolh lu nitlan limakgkatsilh. Pero Jehová lakapala lakkaxwililh: malakgachalh chatum ángel nema xmilh kKatiyatni, xlatamalh la chatum lataman nema ni kgalhi talakgalhin chu xmastalh xlatamat xlakata nakalakgmaxtu latamanin. * Wa xlakata talakgmaxtut xtamaskiwin Dios. Pero, na atanu tuku kilhchanima. ¿Lakpuwanitata la makgkatsilh Dios akxni makgnika Jesús?

Lucía: Ni chuna.

Linda: Kakxilha wilakgolh likgaman. ¿Kgalhiya kamanan?

Lucía: Chuna, kgalhi chatiy; chatum aktsu kgawasa chu chatum aktsu tsumat.

Linda: Xlakata wix kgalhiya kamanan, tlan nalakpuwana la makgkatsilh Jehová anta kʼakgapun akxni akxilhli la nilh xKgawasa. ¿La lakpuwana pi makgkatsilh akxni chipaka Jesús, likgalhkgamanankgolh chu wilinikgolh? Kalakpuwanti la makgkatsilh akxni akxilhli pi lu xpatinama xKgawasa xlakata lakatsuku xnima kʼakgtum kiwi.

Lucía: Ni xaklakpuwanit uma. ¡Lu nitlan!

Linda: Ni liwana katsiyaw la makgkatsilh Dios. Pero Biblia kinkawaniyan tuku tlawalh pi xmastalh talakaskin xlakata xpatinalh xKgawasa. Anta Juan 3:16 kinkawaniyan uma lakstlan tachuwin. ¿Likgalhtawakgaputuna?

Lucía: Chuna. Wan: «Sampi lhuwa chuna mpaxkilh Dios ntachixkuwitat, wantilimastalh nchastum xkam, lakimpi xlipaks wanti nkanajlaniy, ni katitsankgalh, wampi wata nakgalhiy xlatamat wantu xaliankgalhin».

Nitu anan xtachuna la uma tapaxkit xlakata talakgmaxtut

Linda: Paxtikatsinilh. Kakxilhpara niku litsuku versículo. Anta wan: «Sampi lhuwa chuna mpaxkilh Dios ntachixkuwitat». Wa uma tuku xlakata: wa tapaxkit. Tapaxkit nema tlawalh pi Dios xmalakgachalh xKgawasa unu kKatiyatni xlakata xnilh kimpalakatakan. Nitu anan xtachuna la uma tapaxkit. Wa uma tuku xtatayananin Jehová klakapastakaw kata kata kilhtamaku akxni nilh Cristo. Makgtayan tuku lichuwinaw...

Lucía: Chuna kimakgtaya. Paxtikatsinilh xlakata limaxtu kilhtamaku.

¿Kgalhiya takgalhskinin xlakata Biblia? ¿Katsiputuna xlakata xtakanajlakan xtatayananin Jehová? Komo chuna, tlan nakakgalhskina akxni nakaʼakxilha. Lu xatapaxuwan natachuwinankgoyan.

^ par. 5 Makgtum akgtum kata, xtatayananin Jehová tamakxtumikgo xlakata nalakapastakkgo akxni tinilh Cristo xlakata nalakapastakkgo tuku tlawalh kimpalakatakan. Uma kata, natalakapastaka viernes 3 xla abril.

^ par. 32 Atanu artículo nalichuwinan la xtamakamastan Jesús kinkalakgmaxtuyan ktalakgalhin chu tuku natlawayaw xlakata nakinkamakgtayayan.

^ par. 36 Biblia wan pi Dios chu Jesús ni watiya. Komo tlakg katsiputuna, kaʼakxilhti capítulo 4 xla uma libro, ¿Tuku xlikana masiyay Biblia?, nema tlawakgonit xtatayananin Jehová. .

^ par. 38 Kalikgalhtawakga Génesis 3:15.