Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Abril kata 2015

 LICHUWINAN TUKU WI KXMAKNI REVISTA | ¡KAKATSI TUKU MASIYA BIBLIA!

¿Kgalhi Biblia xtakgalhtin putum takgalhskinin?

¿Kgalhi Biblia xtakgalhtin putum takgalhskinin?
  • ¿Tuku xlakata lamaw?

  • ¿Tuku xlakata patinanaw chu niyaw?

  • ¿Tuku nakinkakgspulayan kilhtamaku nema aku mima?

  • ¿Kimpaxkiyan Dios?

¿Tlawanikanitata umakgolh takgalhskinin? Komo chuna, ni kaj miʼakstu. Lhuwa latamanin xlikalanka katiyatni katsiputunkgo xtakgalhtin. ¿Tlan nakatekgsaw?

Millones latamanin wankgo pi tlan. ¿Tuku xlakata? Xlakata tekgskgolh xtakgalhtinkan anta kBiblia nema kamakanajlilh. ¿Katsiputuna tuku masiya? Komo chuna, max litamakgtayaputuna takgalhtawakga nema mastakgo xtatayananin Jehová chu ni taxokgo. *

Makgapitsi pekuankgo nalikgalhtawakgakgo Biblia. Wi tiku wankgo pi ni kgalhikgo kilhtamaku xlakata tlan nalikgalhtawakgakgo Biblia, pi lu tuwa o nitu litayaputunkgo. Pero wilakgolh makgapitsi tiku makgamakglhtinankgonit takgalhtawakga. Wa uma tuku wankgo makgapitsi latamanin tiku likgalhtawakgamakgolh Biblia:

  • «Kkatatamakxtumilh católicos chu protestantes, kʼakgtum templo sij, kʼakgtum monasterio budista chu asta kkgalhtawakgalh Teología kʼUniversidad. Pero ni ktekgsli xtakgalhtin lhuwa takgalhskinin nema xakkgalhi. Alistalh chatum xtatayana Jehová chuwinalh kkinchik. Lu kaks klilakawa xlakata kilikgalhtilh Biblia, wa xlakata kmakgamakglhtinalh akxni kimalaknunilh takgalhtawakga.» (Gill, Inglaterra.)

  • «Lhuwa tuku xakkatsiputun xlakata latamat, pero ni xakkanajla tuku xkiwanikgo tiku xpulalinkgo kkintakanajla. Pero, chatum xtatayana Jehová, kaj Biblia limaklakaskilh xlakata nalikgalhti putum kintakgalhskinin. Akxni kinkgalhskilh komo tlakg xakkatsiputun, kwanilh pi tlan.» (Koffi, Benín.)

  • «Xakkatsiputun tuku xkaʼakgspula tiku nikgonit. Xaklakpuwan pi tlan nakintlawani tuku nitlan chu xakkatsiputun tuku xwan Biblia. Wa xlakata ktsukulh takgalhtawakga chatum amigo tiku xtatayana Jehová.» (José, Brasil.)

  • «Ktsukulh likgalhtawakga Biblia pero nitu xakʼakgatekgsa. Akgtum kilhtamaku, minkgolh kkinchik xtatayananin Jehová chu liwana kilitachuwinankgolh pulaklhuwa tuku lichuwinan Biblia. Chu uma tlawalh pi tlakg xakkatsiputulh.» (Dennize, México.)

  • «Xkinkgalhskinkan komo xlikana xkimpaxki Dios. Ktlawanilh oración Dios tiku xla Biblia. Lichali, minkgolh xtatayananin Jehová kkinchik chu ktsukulh katakgalhtawakga.» (Anju, Nepal.)

Tuku lichuwinankgolh tatayakgo tachuwin nema wa Jesús: «Xatapaxuwan latamakgo tiku katsikgo pi lakaskinkgo tuku xla Dios» (Mateo 5:3). Kimputumkan xatapaxuwan tawilaputunaw, chu kaj watiya Dios kinkawaniyan tuku talakaskin xlakata chuna natawilayaw. ¿La tlawa? Limaklakaskin xTachuwin, wa Biblia.

¿La tlan nakatsiya tuku wan Biblia? ¿La tlan namakgtayayan? Kaʼakxilhwi.

^ par. 8 Biblia wan pi Jehová wa xtukuwani Dios.