Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Abril kata 2015

 BIBLIA KALAKGPALINILH XLATAMATKAN

Akgtutu takgalhskinin nema lakgpalilh kilatamat

Akgtutu takgalhskinin nema lakgpalilh kilatamat
  • KATA AKXNI LAKACHILH: 1949

  • PAÍS: ESTADOS UNIDOS

  • ATANU: XAKPUTSAMA TUKU XLAKATA LAMAW

LA XAKLAMA.

Kstakli kʼAncram, akgtum aktsu kachikin xalak Nueva York. Anta xkakuentajtlawakan wakax nema mastakgo leche. Asta tlakg xʼanan wakax ni xtachuna latamanin.

Kifamilia xʼankgo kpusikulan nema xwi kkachikin. Klakapastaka pi putum domingos tsisa, kintata xkixakani kizapatos akxni nina xakan kclases xla takanajla. Xaklin maktum xasnapapa aktsu Biblia nema xkimaskiwinit kinana. Akit chu kinatalan kinkamasiyanikan pi lu nakskujaw, nakkamaxkiyaw kakni amakgapitsin chu nakkamakgtayayaw kintalakatsukan, chu nakpaxtikatsiniyaw Dios xlakata tuku xakkgalhiyaw.

Akxni kstakli, ktaxtulh kkinchik chu maestra klitaxtulh. Kkgalhilh lhuwa takgalhskinin xlakata Dios chu xlakata latamat. Akgtum liʼakxilhtit, makgapitsi kilimakgalhtawakget lu lakgskgalalan xwankgonit, pero atanu lu xtalakaskin pi tlakg xkgalhtawakgakgolh. Nachuna xwilakgolh lakgkgawasan tiku xtlawakgo ejercicio, pero na xwilakgolh tiku nila chuna xtlawakgo. Uma lu nitlan xakakxilha. Lakgachunin, natlatni tiku chuna xkgalhikgo xkamanankan xkiwanikgo la uma: «Dios chuna lakaskilh». Xkinkgalhskinkan tuku xlakata Dios xmasta talakaskin kamanan tiku nitu xtlawakgonit chuna xlakachinkgolh.

Nachuna xkinkgalhskinkan: «¿Tuku naktlawa kkilatamat?». Xakmakgkatsi pi xtitaxtuma kata chu nitu xaktlawanit tuku lu xlakaskinka. Kifamilia xkgalhikgo tumin, liwana xakkgalhtawakganit chu xaklakgati tuku xakliskuja. Pero xakmakgkatsi pi wi tuku xkintsankgani. Tuku tlakg tlan xaklakpuwan, naktamakgaxtokga, chu nakkgalhi kamanan, chu naktawila niku stlan chiki, chu chuntiya nakskuja asta akxni naktajubilarli chu ktanuma nawan xaʼawatiya kilatamat niku kakuentajtlawakan lakgkgolotsin. Xkinkgalhskinkan komo kajwatiya uma tuku xʼanan.

BIBLIA LAKGPALILH KILATAMAT.

Akxni kkgalhilh vacaciones verano kkataʼalh kʼEuropa makgapitsi makgalhtawakgenanin. Klakgapaxialhnaw abadía xla Westminer, catedral xla  Notre-Dame xla París chu Vaticano, nachuna makgapitsi pusikulan. Kaniwa niku xakan xaktlawa uma takgalhskinin. Chu akxni ktaspitli kkinchik, Sloatsburg (Nueva York), lhuwa pusikulan klakgapaxialhnalh, pero niti kgalhtilh kintakgalhskinin nema xakkgalhi.

Akgtum kilhtamaku, chatum kilimakgalhtawakget tiku xkgalhi 12 kata kintlawanilh akgtutu takgalhskinin. Pulana, kinkgalhskilh komo xakkatsi pi xla xtatayana Jehová xwanit. Kwanilh pi xakkatsi. Xlipulaktiy, kinkgalhskilh komo xakkatsiputun xlakata xtatayananin Jehová. Amakgtum, kwanipa pi tlan. Xliʼakgtutu, kinkgalhskilh niku xakwi. Akxni kwanilh kidirección, kkatsiw pi kintalakatsu xwanit. Nikxni xaklakpuwanit pi umakgolh akgtutu takgalhskinin xʼama lakgpali kilatamat xliputum kilhtamaku.

Ni makgas kilhtamaku titaxtulh, uma tsumat kxbicicleta milh kkinchik chu tsukulh kilimakgalhtawakge Biblia. Na watiya takgalhskinin ktlawanilh nema xakkatlawaninit xla amakgapitsi takanajla. Uma tsumat kilimasiyanilh xBiblia xtakgalhtin kintakgalhskinin nixawa tiku na xakkakgalhskinit. ¡Nila xakkanajla pi putum kilhtamaku anta xwi xtakgalhtin!

Lu tlan kimamakgkatsinilh tuku kkatsinilh kBiblia. Tuku kaks kimalakawanilh wa tuku wan 1 Juan 5:19: «Na paks kxlitliwakga akgskgawini wilakgo, xlipaks ntachixkuwitat». Tlan klimakgkatsilh pi ni wa Dios tiku xkuenta xlakata anan tapatin kKatiyatni, wata xkuenta Satanás chu Dios ama lakkaxtlawa (Apocalipsis [Revelación] 21:3, 4). Kkatsilh xlakata naʼakgatekgsniya Biblia ni talakaskin lhuwa tuku nawanikana. Kimakgalhtawakgena tiku xkgalhi 12 kata kimasiyanilh pi xaxlikana wa xaxlikana, maski katiwa tiku namasiyaniyan.

Maski chuna, liwana xakkatsiputun komo xlikana xtlawakgo tuku xlichuwinankgo xtatayananin Jehová. Akgtum liʼakxilhtit, uma tsumat lu xkiwani pi kstalaninanin Cristo ni lakapala sitsikgo chu tlan likatsikgo (Gálatas 5:22, 23). Klakpuwa pi nakliʼakxilha. Akgtum kilhtamaku lu chuna ktlawalh ni sokg kchalh. Xakkatsiputun komo xʼama kinkgalhkgalhi chu ni ksitsinit. Akxni kchalh kkinchik, kakxilhli pi xwi kʼescaleras niku laktanukan kkinchik. Lakapala alh kkimputlaw chu kiwanilh: «Xakamaja kinchik chu xakama wani kintse pi xtachuwinankgolh policías chu xchuwinankgolh khospitales. Xlakata putum kilhtamaku sokg chitana, klakpuwa pi nitlan tuku xlaninita. ¡Lu xaklipuwama!».

Atanu kilhtamaku ktlawanilh akgtum takgalhskinin nema xakkatsi pi lu tuwa xwanit xlakata kajku aktsu tsumat chu xkgalhi 12 kata. Xakkakʼxilhputun komo kaj xʼama kiliʼakgskgawi xtakgalhtin. Akxni kkgalhskilh, kaks lakawa chu kiwanilh: «Uma takgalhskinin lu tuwa. Naktsokgwili xlakata nakkakgalhskini kinatlatni». Akxni taspitpa limilh maktum Makatsinina nema xlimin takgalhskinin tuku xaktlawaninit. Wa uma tuku klakgatilh xlakata xtatayananin Jehová: xlikgalhtawakgakan xtakilhti kBiblia putum kintakgalhskinin. Chuntiya ktalikgalhtawakgalh Biblia uma aktsu tsumat, titaxtulh akgtum kata xtatayana Jehová klitaxtulh. *

TUKU TLAN KINKITAXTUNINIT.

Akxni kkatsilh xtakgalhtin kintakgalhskinin, na xakkawaniputun putum latamanin xlakata tuku xakkatsininit (Mateo 12:35). Xapulana, kifamilia ni xlakgatikgo xasasti kintakanajla, titaxtulh kilhtamaku nialh chuna likatsikgolh. Kintse na tsukulh likgalhtawakga Biblia akxni nina xni. Maski ni tamunulh, liwana kkatsi pi xlakpuwanit naskujnani Jehová.

Kata 1978, ktatamakgaxtokgli Elias Kazan, chu kata 1981 kinkawanikan nakanaw kBetel xalak Estados Unidos. * Lu nitlan tuku lalh, xlakata Elias nilh akxni akgtati kata xtitaxtunit. Pero, ktamakgxtakgli kBetel. Uma kimakgtayalh xlakata wi tuku xaktlawalh chu ni lu xaklipuwan.

Kata 2006, ktatamakgaxtokgli Richard Eldred, tiku na xalak familia Betel. Richard chu akit chuntiya kwilaw kBetel chu lu klipaxuwayaw kintaskujutkan. Xlakata klikgalhtawakgalh Biblia kgalhtilh kintakgalhskinin chu kkatsilh tuku xlakata lamaw... pero putum uma tsukulh kaj xlakata akgtutu takgalhskinin nema kintlawanilh uma aktsu tsumat.

^ par. 16 Uma aktsu tsumat chu xnatalan kamakgtayakgolh kgalhkitsis xmakgalhtawakgenanin naʼakgatekgskgo tuku wan Biblia chu asta xtatayana Jehová litaxtukgolh.

^ par. 18 Betel, wamputun «xChik Dios», chuna lilakgapaskgo xtatayananin Jehová xʼoficinaskan nema kgalhikgo xlikalanka katiyatni (Génesis 28:17, 19; nota). Tiku skujkgo anta kBetel, pulaklhuwa la makgtayanankgo xlakata la makgalhtawakganankgo xtatayananin Jehová.