Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 LICHUWINAN TUKU WI KXMAKNI REVISTA | JESÚS KINKALAKGMAXTUYAN, PERO ¿TUKU XLAKATA?

¿La kinkamakgtayayan xlakata nilh chu lakastakwanalh Jesús?

¿La kinkamakgtayayan xlakata nilh chu lakastakwanalh Jesús?

«Kakanajlani nkimPuchinakan Jesucristo, naʼakgaputaxtuya.» (Hechos 16:31)

Umakgolh tachuwin wa xla apóstol Pablo chu Silas chu wa wanikgolh xkuentajtlawana pulachin xalak Filipos nema tapakgsini Macedonia. Xlakata naʼakgatekgsaw tuku kilhchanima kanajlanikan Jesús chu talakgmaxtut klinin, pulana kilikatsitkan tuku xlakata niyaw. Kaʼakxilhwi tuku masiya Biblia xlakata uma.

Latamanin ni katlawaka xlakata nanikgo

«Jehová Dios tsukulh tlawa chixku chu wililh kjardín xaʼEdén xlakata xchananalh chu xkuentajtlawalh. Chu Jehová Dios na limapakgsilh chixku: “Tlan nawaya xtawakat putum kiwi nema yakgo kjardín asta nakgalhkgasa. Pero xtawakat kiwi nema lilakgapaskan tuku xatlan chu nixatlan, ni nawaya, xlakata kilhtamaku akxni nawaya, xlikana pi naniya”.» (Génesis 2:15-17.)

Dios wililh xapulana chixku, Adán kjardín xla Edén, chu katiyatni lhuwa tuku xʼanan chu lakswan kiwi. Na xʼanan kiwi nema xkgalhi xtawakat chu tlan xwakgolh. Pero Jehová xwaninit pi xtawakat kgantum kiwi ni xliwat. Dios wanilh pi komo xwalh uma tawakat xʼama ni.

¿Tuku akgatekgsli Adán uma tuku xwanikanit? Xla xkatsi tuku xkilhchanima nikan, xlakata xkaʼakxilhnit la xnikgo animales. Komo Adán xtlawakanit kaj xlakata nani, nila xwanilh Dios pi xʼama ni. Xapulana chixku xʼakgatekgsa pi komo xkgalhakgaxmatli Dios chu ni xwalh xtawakat kiwi, tlan xlatamalh putum kilhtamaku.

Makgapitsi lakpuwankgo pi uma kiwi kilhchanima talakgxtumit, pero uma nila chuna nawan, xlakata Jehová kawanilh Adán chu Eva: «Kakgalhitit kamanan chu kalhuwantit chu kamalakgatsamatit katiyatni chu kakuentajtlawatit» (Génesis 1:28). Wa xkilhchanima xaxlikana kiwi. Jehová limapakuwilh «kiwi nema lilakgapaskan tuku xatlan chu nixatlan» xlakata tlan xkawanilh latamanin tuku tlan chu tuku nitlan. Komo ni xwalh xtawakat kiwi ni kaj wa xlimasiyalh pi xkgalhakgaxmatnan, wata na xlimasiyalh pi xpaxtikatsini xMalakatsukina xlakata putum tuku tlan xmaxkinit.

 Adán nilh xlakata ni kgalhakgaxmatli Dios

Dios wanilh Adán: «Chu wat xtawakat kiwi nema xaklimapakgsinitan». Chu wanipa: «Nawaya kaxtalanchu pero pulana naxunuya asta akxni nataspitparaya kkatiyatni, xlakata anta tiyaka. Xlakata pokgxni wix chu kpokgxni napimparaya» (Génesis 3:17, 19).

Adán walh xtawakat kiwi nema xwanikanit pi ni naway, chu Dios nitlan akxilhli tuku tlawalh xlakata ni kgalhakgaxmatnilh, uma wamputun pi lakatakilh Dios chu ni paxtikatsinilh Jehová putum tuku lu tlan xmaxkinit. Akxni walh tawakat, Adán lakgmakgalh Jehová chu laksakli xakstu natapakgsi, chu lu nitlan tuku kitaxtulh.

Chuna la xwaninit Jehová, alistalh Adán nilh. Dios xlitlawanit Adán pokgxni xalak katiyatni chu wanilh pi xʼamapa taspitpara kpokgxni. Adán ni atanu la latamalh chu nipara alakatanu niku alh. Akxni nilh, nialh staknalh chuna la pokgxni niku xtiyakanit (Génesis 2:7; Eclesiastés 9: 5, 10).

Niyaw xlakata kinkilhtsukutkan Adán

«Ntsukulh ntalakgalhin nkatuxawat nkaj xpalakata nchatum chixku, pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin sampi paks lakgalhinankgolh.» (Romanos 5:12.)

Xlakata Adán ni kgalhakgaxmatnalh, xtalakgalhin, limilh lhuwa tuku nitlan. Pulana, Adán makgatsankgalh xlatamat, pero nichuna la kilatamatkan nema kgalhiyaw, 70 chu 80 kata: nialhla xlatamalh putum kilhtamaku. Chu ni kajwatiya uma, na kgalhilh talakgalhin, chu wa xlakata xkamanan na kgalhikgolh talakgalhin.

Xlakata Adán, putum kgalhiyaw talakgalhin, wamputun tlawaputunaw talakgalhin, chu kgalhiyaw kimaknikan nema sputa. Pablo tsokgli xlakata la tatakgsaw kkilatamatkan: «Kaj chixku lantla amakgapitsin nchixkuwin, ktastaninit nakimapakgsiy ntalakgalhin. ¡Koxuta nkit! ¿Ti nakimalakgtaxtiniy yuma nkintiyatliwa ntamaklhtuminitta naniy?». Xla kgalhtinampa: «Paxkatsinit kmaxkiy Dios mpiwi lakgtaxtut xpalakata Jesucristo nkimPuchinakan» (Romanos 7: 14, 24, 25).

 Jesús mastalh xlatamat xlakata tlan nalatamayaw putum kilhtamaku

«Wa xaTlat, malakgachanit xKam, mpi namakgaputaxtikgoy ntachixkuwitat.» (1 Juan 4:14.)

Jehová Dios lakkaxwililh la namasputu tuku nitlan limin talakgalhin chu xlakata ni naniyaw putum kilhtamaku. ¿La tlawalh? Malakgachalh xKgawasa tiku lu xpaxki xlakata xlakachilh kKatiyatni chu ni xkgalhi talakgalhin chuna la Adán. Jesús ni chuna la Adán xlakata «ni tsinu ntlawalh ntalakgalhin» (1 Pedro 2:22). Wa xlakata nikxni xʼama ni chu tlan xtilatamalh putum kilhtamaku.

Pero, Jehová mastalh talakaskin pi xKgawasa xmakgnikgolh tiku ni xʼakxilhputunkgo chu xliʼakgtutu kilhtamaku maxkipa xlatamat. Jesús lakastakwanalh la chatum espíritu chu alistalh taspita kʼakgapun. Jesús makamaxkilh xTlat xlatamat nema ni xkgalhi talakgalhin xlakata xlakgmaxtulh latamat nema Adán xmakgatsankganit chu nachuna xkamanan. Jehová makgamakglhtinalh tamakamastan xKgawasa, chu mastalh talakaskin pi tiku xkanajlanikgolh Jesús tlan xmakgamakglhtinankgolh latamat nema nitu xlisputni (Romanos 3:23, 24; 1 Juan 2:2).

Chuna, Jesús litamawalh xlatamat tuku Adán makgatsankgalh. Nilh xlakata tlan nalatamayaw putum kilhtamaku. Biblia wan pi Jesús “kapalakanilh xlipaks ntachixkuwitat xpalakata xtalakgalhaman Dios” (Hebreos 2:9).

Putum uma lhuwa kinkamasiyaniyan xlakata Jehová. Xlakata xtalakgalhinkan, latamanin nila xmakgatsikgo tuku kskin xlimapakgsin Dios xlakata tlan xlakgtaxtukgolh. Pero, xlakata paxkinan chu lakgalhamanan Dios lakpuwa namasta tuku xtalakaskin xlakata namakgantaxti xlimapakgsin. Pero, xlakata xkinkalakgmaxtun klinin mastalh tuku tlakg lanka xtapalh: mastalh xlatamat xKgawasa (Romanos 5:6-8).

Jesús malakastakwanika chu nachuna amakgapitsin

«Lakastakwananit nCristo klinin; na wa nti xakgasiyaj lakastakwananit [...]. Sampi lantla likilhtsukulh anan linin xpalakata nchatum chixku, na chuna xpalakata nchatum chixku lantla nalilakastakwanankgo ninin. Sampi lantla nikgoy xlipaks nchixkuwin mpi wa ntatapakgsikgoy Adán, pus na chuna wa nti ntatapakgsikgoy nCristo, paks nalakastakwanampalakgoy.» (1 Corintios 15:20-22.)

Xlikana pi Jesús latamalh chu nilh, pero ¿la likatsiyaw pi lakastakwanalh? Tuku likatsiyaw wa pi akxni xlakastakwananita makglhuwa chu lakalhuwa niku katasiyanilh lhuwa latamanin. Akgtum kilhtamaku katasiyanilh liwaka 500 latamanin. Apóstol Pablo tsokgli kxcarta xlakata uma nema kamalakgachanilh xalak Corinto. Asta wa pi makgapitsi tiku akxilhkgolh xlamakgolhku, xwamputun pi tlan xlichuwinankgolh tuku xʼakxilhkgonit chu xkgaxmatkgonit (1 Corintios 15:3-8).

Apóstol Pablo tsokgli pi Cristo wa tiku «xakgasiyaj lakastakwananit» o xapulana tiku malakastakwanika, xlakata uma xlimasiya pi xʼama anan tiku xʼama lakastakwanankgo alistalh. Jesús wa pi xʼama min kilhtamaku «akxni putum tiku wilakgo kputaknun [...] nataxtukgo» (Juan 5:28, 29).

 Komo latamaputunaw putum kilhtamaku, talakaskin nakanajlaniyaw Jesús

«Lhuwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, wampi wata nakgalhiy xlatamat wa ntu xaliankgaIhin.» (Juan 3:16.)

Akxni litsuku Biblia lichuwinan akxni lakatsukulh linin chu paraíso nema tsankgalh kjardín xaʼEdén. Xaʼawatiya páginas lichuwinan akxni Dios namasputu linin chu akgtum paraíso natlawa Katiyatni. Akxni nachan uma kilhtamaku latamanin tlan nalatamakgo putum kilhtamaku chu xatapaxuwan. Apocalipsis [Revelación] 21:4 wan pi «nialh katiʼanalh linin», chu xlakata tlan nalipawanaw kversículo 5 wampara: «Wa yuma ntachuwin, kgalhiy xkakni, na xlikanaj». Putum tuku Jehová malaknu, putum namakgantaxti.

¿Kanajlaniya pi «yuma ntachuwin, kgalhiy xkakni, na xlikanaj»? Komo chuna tlakg kakatsi xlakata Jesús chu kakanajlani; chuna Jehová tlan naʼakxilhan. Ni kajwatiya la uku nakgalhiya tasikulunalin wata nalatapaya putum kilhtamaku anta kparaíso niku nialh katiʼanalh linin, «ni mpala wa ntatasa, chu na ni mpala wa ntakatsanajwat».