Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Marzo kata 2015

 LICHUWINAN TUKU WI KXMAKNI REVISTA | JESÚS KINKALAKGMAXTUYAN, PERO ¿TUKU XLAKATA?

¿Tuku xlakata maklakaskinaw nakinkalakgmaxtukanan?

¿Tuku xlakata maklakaskinaw nakinkalakgmaxtukanan?

«Chixku tiku malakachinilh chatum puskat, ni makgas latama, lhuwa tuku lilakgaputsa; xtachuna la xanat nema pakglha chu xnakga, tsala chuna la mastilenkg.» (Job 14:1, 2, La Biblia de Nuestro Pueblo)

Lata makgasa, latamanin lakpuwankgonit la lu tlan xwa pi nikxni xkgolonkgolh. Lu nitlan pero kimputumkan niyaw. Akgtutu mil kata titaxtunita lata wa Job uma tachuwin chu xlikana tuku wa asta la uku.

Kimputumkan latamaputunaw chu ni niputunaw. Biblia wan pi Dios wililh kkinakujkan pi nalatamaputunaw putum kilhtamaku chu na katsiputunaw tuku wamputun putum kilhtamaku latamaputunkan (Eclesiastés 3:11). ¿Xlilat kawa pi chatum Dios tiku kinkapaxkiyan nakinkawiliniyan kkinakujkan tuku nila xkgantaxtulh? Komo wanti pi ni, xlikana tuku wana. Xtachuwin Dios wan pi linin kintalatlawanakan chu wan pi “nalaktlawakan” (1 Corintios 15:26).

Linin xaxlikana kintalatlawanakan. Nipara chatum lataman tiku liwana lakapastaknan namakgamakglhtinan linin. Akxni akxilhaw pi nakinkaʼakgspulayan tuku nitlan lakapala lakputsayaw la natsalayaw. Akxni tatatlayaw tunkun anaw kpumakuchin. Kuenta tlawayaw xlakata nitu natlawa pi naniyaw.

¿Xlikana tlan namasputukan xamakgan kintalatlawanakan? Chuna. Jehová, kiMalakatsukinakan, ni kinkatlawan xlakata ni makgas nalatamayaw. Dios ni xlakpuwanit pi naniyaw. Xla lakaskin pi putum kilhtamaku xlatamaw kKatiyatni chu tuku xla lakpuwan natlawa nakgantaxtu (Isaías 55:11).

¿La natlawa Dios xlakata namasputu linin? Kilhtamaku nema titaxtunit, latamanin lakputsakgonit la nalakxtlawakgo linin pero nila chuna tlawakgonit. Asta la uku chuntiya lakputsananimaka. Científicos tlawakgonit vacunas chu likuchun nema malakgachokgo makgapitsi tajatat. Na lakputsananimakgolh la katlawakanit tiku staknankgo. Klakalhuwa, latamanin tlakg latamakgo nixawa siglo nema titaxtulh. Maski chuna, nila katimakgatlajaw linin. Chuna la wan Biblia, pi «putum taspitkgo kpokgxni» (Eclesiastés 3:20).

Pero anan tlan tamakatsin: ni wa latamanin nalakkaxtlawakgo taʼakglhuwit. Jehová Dios, lakkaxwilinita xlakata nakinkalakgmaxtuyan klinin chu limaklakaskinit Jesucristo xlakata chuna natlawa.