Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Febrero kata 2015

 TLAN LIʼAKXILHTIT XTAKANAJLAKAN | JOSÉ

«¿Ni wa Dios lakgchan nakinkawaniyan tuku wamputun?»

«¿Ni wa Dios lakgchan nakinkawaniyan tuku wamputun?»

JOSÉ tlawama kxakalipekua niku tlawankan chu xunuma. Lu palha taskujut chu ni tayanikan lhkakna. Kkilhtin kakuwani, pero niku wi ni kaxkgakga, wata kapukswa. Pulachin xtachuna la akgtum horno niku lu makachichinit Chichini. José liwana lakgapasa uma pulachin; xlakata makgasa anta tanuma. Xlikana pi unu maxkikan kakni, pero uma ni wamputun nialh tachin litaxtu.

¡Lu lakapastaka xfamilia, xʼanimales xtlat, xkasipijni Hebrón! Xkgalhi max 17 kata akxni tlawalh lhuwa kilómetros xlakata xtlawalh tuku xlakgayawanit xtlat. La uku kajwatiya tlawan kxpulakni pulachin. Xnatalan xmakgniputunkgo xlakata ksitsinikgo chu alistalh kastamaxkikgolh stananin. Linka kʼEgipto chu anta skujli kxchik chatum puxku wanikan Potifar. Titaxtulh kilhtamaku Potifar lipawa José, pero xpuskat limawakalh pi xlikgamanamputun chu wa xlakata tamaknuka kpulachin. La uku wi unu, kʼuma kxakalixkajni pulachin. (Génesis, capítulos 37 chu 39). *

José makgatsinita 28 kata, akgkaw kata titaxtunit lata tamaknuka kpulachin. Nichuna xlakpuwanit pi xʼama latama. ¿Namin kilhtamaku akxni natamakxtukan kpulachin? ¿Namin kilhtamaku akxni naʼakxilhpara xtlat tiku lu paxki chu Benjamín, xataju xtala? ¿La xlilhuwa kilhtamaku natanujku kʼuma xakalixkajni pulachin?

¿Minit kilhtamaku akxni makgkatsinita la José? Min kilhtamaku kilatamatkan ni chuna la xlakpuwanaw akxni lakgkgawasanku xwanitaw. Min kilhtamaku makgkatsiyaw pi ni sputa kintapatinkan chu lu tuwa nalakkaxtlawayaw o natayaniyaw. ¿La tlan nakinkamakgtayayan uma tlan liʼakxilhtit xlakata takanajla? Kaʼakxilhwi.

«JEHOVÁ CHUNTIYA XMAKGTAYAMA JOSÉ»

José katsi pi Jehová nitu makgxtakgma chu max wa uma tuku matliwakglha xlakata chuntiya natayani. Asta unu, kxakapukswa pulachin, sikulunatlawanit xDios. Biblia wan pi «Jehová chuntiya xmakgtayama José», limasiyalh tapaxkit nema ni makgxtakgnan chu tlawalh pi tiku xlakgaya pulachin tlan xlikatsinilh (Génesis 39:21-23). Nachuna, José lhuwa skujnit wa xlakata Dios sikulunatlawama. Max lu tlan mamakgkatsini xlakata katsi pi ni xakstu wi.

Max José kgalhskinkan nema ni katsi xtakgalhtin: «¿Putum kilhtamaku nakimakgxtakga Jehová unu?». Max wa tuku putum kilhtamaku lichuwinan akxni makgatunu tlawa xʼoración. Chuna la kitaxtu, xtakgalhtin minacha niku nipara tsinu xlakpuwanaw. Akgtum kilhtamaku kaks lakawankgokan xlakata chinkgolh chatiy tachin. Kalinka chatiy tiku akxtum kskujnikgo faraón xalak Egipto: xapuxku xtlawana kaxtalanchu chu tiku xlakgaya xvino mapakgsina, xapuxku tiku xmaxki vino mapakgsina (Génesis 40:1-3).

 Tiku xlakgaya pulachin wa José tiku kamakuentajtlawika umakgolh chatiy lakchixkuwin. * Akgtum tsisni, xchatiykan wi tuku limanixnankgolh tuku lu xaxlikana chu lilakgaputsakan. Lichali tsisa, José akxilha pi wi tuku nitlan xlama wa xlakata kakgalhskilh: «¿Tuku xlakata tasiya kmilakankan pi lipuwampatit?» (Génesis 40:3-7). Max xlakata xtachuwin takgaxmata pi tlan xlikatsi wa xlakata wanikgolh tuku xlilakgaputsamakgolh. José ni katsi, pero uma tuku xlichuwinamakgolh xʼama lakgpali xlatamat putum kilhtamaku. Tlan nakinkakgalhskinkanan: ¿Tlan xkatakgalhchuwinalh komo ni xkalilakgaputsalh? Xliʼakxilhtit xlitlawat pi nakinkakgalhskinkanan komo akinin na kalilakgaputsayaw amakgapitsin. Chuna limasiyayaw pi kgalhiniyaw takanajla Dios.

José tlan xkalikatsini amakgapitsi tachin chu xkamaxki kakni

Lakchixkuwin wanikgo José pi manixnankgonit chu ni katsikgo tuku kilhchanima. Egipcios lu xlakaskinka akxilhkgo tamanixni chu putum kilhtamaku putsakgo tiku nakawani tuku wamputun. Umakgolh lakchixkuwin ni katsikgo pi wa Jehová, xDios José, tiku kamamanixnilh, pero José katsi. Wa xlakata tlan kamamakgkatsinilh akxni kawanilh: «¿Ni wa Dios lakgchan nakinkawaniyan tuku wamputun? Kakilawaniw, katlawatit litlan» (Génesis 40:8). ¡Lu tlan tuku wa! Putum tiku likgalhtawakgakgo Biblia la uku nachuna xlimasiyatkan tatutsuwit. Ni tlankajwa nakamakgkatsikan chu naskinikgo xtamakgtay Dios xlakata nakatsikgo tuku xlikana kilhchanima xTachuwin Dios (1 Tesalonicenses 2:13; Santiago 4:6).

Tiku xmaxki vino faraón wa tiku pulana chuwinalh. Xla limanixnalh xakiwi uvas, nema xkgalhi kgantutu xpakganin chu anta xwakakgo uvas. Chakgolh uvas chu lakgchitjulh kxcopa mapakgsina. Xlakata makgtayalh Jehová, José tunkun katsi tuku wamputun uma tamanixni chu wani chixku pi kgantutu xpakgan kiwi wamputun akgtutu kilhtamaku: akgtutu kilhtamaku natitaxtu mapakgsina namaxkipara xtaskujut nema xkgalhi. Tiku masta vino lu tlan makgkatsi, chu José wanilh: «Katlawa litlan, kakilimasiyani tapaxkit nema ni makgxtakgnan chu kakilichuwinanti kxlakatin Faraón» (Génesis 40:9-15).

Xlakata lu tlan limakgkatsilh tuku wanika xcompañero, tiku xtlawa kaxtalanchu wanilh José tuku xlimanixnanit. Xla manixnalh pi kxʼakgxakga xkgalhi akgtutu canasta. Xlitatsamanit kaxtalanchu chu xwilakgolh spitu nema xwamakgolh kaxtalanchu xla akgtum canasta. Jehová wanipa José tuku xwamputun uma tamanixni pero nitlan tuku xkilhchanima. José wa: «Akgtutu canasta wamputun akgtutu kilhtamaku. Akgtutu kilhtamaku tsankga  xlakata Faraón [nachukuʼakti] miʼakgxakga [...] chu namawakayan kkgantum kiwi; chu spitu nawakgo miliwa» (Génesis 40:16-19). Chuna la kskujnin tiku ni makgxtakgkgo, José ni pekualh akxni mastalh xtamakatsinin Dios maski tlan o nitlan xwanit (Isaías 61:2).

Titaxtulh akgtutu kilhtamaku chu xtachuwin José putum kgantaxtulh. Faraón tlawama fiesta xlakata makgatsima xkata, talismanin nema xkachikin Dios ni xkgalhikgo, chu anta katalakkaxla chatiy skujnin. Makgnika tiku xtlawa kaxtalanchu chuna la xwanit José chu tiku xmaxki vino tapatika chu maxkiparaka tuku xlakgaya. Lu nitlan, pero uma chixku ni lakapastakli José (Génesis 40:20-23).

«NI WA AKIT TIKU CHUNA NATLAWA»

Akgtiy kata titaxtunita (Génesis 41:1). Max José nialh katsi tuku natlawa. Akxni makgtayalh Jehová xlakata nakawani umakgolh lakchixkuwin tuku xwamputun xtamanixnikan, xlakpuwan pi xʼamakaja tamakxtukan kpulachin. Chali chali max xlakpuwan pi natamakxtukan chu akgatunu tsisni xlipuwan xlakata chuntiya xtanuma kpulachin. Max uma akgtiy kata tlakg tuwa makgkatsilh, pero nipara tsinu maxlajwanilh; chuntiya lipawa Jehová. Liwana xlakpuwanit pi ni nataxlajwani chu uma tuku lu nitlan titaxtulh wata kaj matliwakglhli (Santiago 1:4).

Uma kilhtamaku niku lu katuwa nema lamaw, ¿nixlikana pi putum maklakaskinaw natayaniyaw? Komo kimputumkan tayaniputunaw tuku nitlan titaxtuyaw kkilatamatkan, maklakaskinaw takgalhkgalhin chu takaksni nema kaj wa Dios tlan nakinkamaxkiyan. Xla makgtayalh José chu na nakinkamakgtayayan ni nataxlajwaniyaw chu chuntiya nakgalhiyaw takgalhkgalhin (Romanos 12:12; 15:13).

Max tiku xmaxki vino mapakgsina ni lakapastakli José pero Jehová chuntiya xlakapastaka. Akgtum tsisni Dios malakgachanilh faraón akgtiy tamanixni nema nila xpatsankga. Xapulana, mapakgsina akxilha pi takutmakgolh kkgalhtuchokgo wanikan Nilo tantujun xalakgkgon wakax chu ni tatatlakgo chu alistalh tantujun wakax xalakgkgakgkgala chu xatatatlanin. Pero, xalakgkgakgkgala wakax kakgotwakgo xalakgkgon. Xliʼakgtiy xtamanixni akxilha kgantujun espigas xalaklanka chu lhuwa kgalhi xtalhtsi, alistalh akxilha kgantujun espigas nema laktsu chu xaxnakgni nema kakgotwakgo xapulana. Tsisa, mapakgsina lu xlilakgaputsama tuku limanixnalh chu katasanilh xalakgskgalalan, tiku xwanikgo tuku aku nala chu magos xlakata xwanikgolh tuku kilhchanima pero niti wanikgo tuku kilhchanima (Génesis 41:1-8). ¿Max nialhla chuwinankgolh? ¿Kaj katuwa tuku likgalhtinankgolh? Ni katsiyaw. Wa tuku katsiyaw wa pi nila kgalhtinankgolh chu faraón lu xkatsiputun tuku xkilhchanima.

Uma kilhtamaku tiku xmaxki vino mapakgsina lakapastakli José. Nitlan mamakgkatsini xtalakapastakni, wa xlakata lixakgatlilh faraón uma kgawasa nema lu skgalala xlakata titaxtunita akgtiy kata akxni wanilh tuku xkilhchanima xtamanixni chu xtamanixni tiku xtlawa kaxtalanchu. Faraón limapakgsinan pi tunkun kaliminka José (Génesis 41:9-13).

José max lu tlan limakgkatsilh akxni akxilhli pi chankgolh xlakskujnin mapakgsina. Tunkun lakgpalilh klhakgat chu takgalhswikli. Max na taʼakxwikli, xlakata chuna xtalismani kʼEgipto. ¡Max lu lhuwa tlawanilh oración Jehová xlakata xmakgtayalh akxni xlakgalh mapakgsina! Kaj lakapala, xwilachata niku xwi mapakgsina, kxlakatin faraón. Biblia wan pi mapakgsina wanilh José: «Kkgalhinit akgtum tamanixni nema niti la kiwani tuku kilhchanima. Pero kiwanikanit pi kaj talakaskin nakgaxpata xlakata nakiwaniya tuku wamputun». Amakgtum, tuku likgalhtinalh José limasiya pi tataktuju chu pi xkanajlani Dios: «Ni akit, wata Dios, tiku namaxki Faraón takgalhtin nema xlilat» (Génesis 41:14-16, El libro del Pueblo de Dios).

José wanilh mapakgsina: «Ni akit, wata Dios»

Jehová lu lanka xtapalh akxilha tiku taktuju chu ni makgxtakga; wa xlakata maxkilh José takgalhtin nema lu xputsamakgolh tiku xalakgskgalalan chu sacerdotes xalak Egipto. José wanilh faraón pi akgtiy tamanixni watiya tuku xkilhchanima. Xlakata makgtiy makatsinika tuku xʼama la xwamputun pi «liwana lakkaxwilinit» Jehová, wamputun, pi xʼama kgantaxtu. Xalakgkgon wakax chu espigas nema lhuwa talhtsi xkgalhi xwamputun pi akgtujun kata xʼama lananan kʼEgipto. Wakax xalakgkgakgkgala chu xaxnakgni espigas wamputun pi akgtujun  kata xʼama anan tatsinksni. Lu lhuwa naʼanan tatsinksni asta latamanin nialh katilakapastakkgolh akxni lhuwa xmakgalanankgo (Génesis 41:25-32).

Mapakgsina katsi pi tuku wan José xaxlikana. Pero ¿tuku tlan natatlawa? José wani pi wa uma tuku katlawalh: mapakgsina xliputsat chatum chixku tiku «xalipaw chu skgalala» nema namakgstokgwili talhtsi nema namakgalanankan xapulana akgtujun kata chu alistalh namakgpitsikan akxni naʼanan tatsinksni (Génesis 41:33-36). Maski José lhuwa xkatsininit la tlan nalakkaxwili chu tlan xtlawalh uma taskujut, ni wanilh faraón pi xla tlan chuna xtlawalh. Lu tataktuju chu lu xkgalhi takanajla wa xlakata nipara tsinu chuna lakpuwa. Komo akinin xlikana lipawanaw Jehová, na ni katiwaw tuku tlan tlawayaw chu na ni lhuwa tuku katikgalhiputuw. Namakgxtakgniyaw Jehová xlakata nalakkaxtlawa chu nakgalhkgalhiyaw, xlakata katsiyaw pi katsi la nalakkaxtlawa tuku titaxtuyaw.

¿ANAN ACHATUM CHIXKU LA UMA?

Faraón chu kskujnin katsikgo pi tuku wan José xaxlikana. Faraón na katsi pi uma kgawasa makgtaya Dios, wa xlakata wan kxlakatin kskujnin: «¿Anan achatum chixku la uma tiku kgalhi xʼespíritu Dios?». Wanilh José: «Xlakata Dios makatsinin putum uma, ni anan atanu tiku xalipaw chu skgalala la wix. Wix nalakgatayaya kinchik chu putum kinkachikin nakgalhakgaxmatkgoyan. Kaj [...] akit [...] tlakg lanka nakwan nixawa wix» (Génesis 41:38-41).

Faraón makgantaxtilh xtachuwin. Limapakgsinalh pi tunkun xmalhakgeka lhakgat xatlan lino, tamakgaxtulh xʼanillo chu maxkilh José. Na maxkilh kgantum cadena xaʼoro, putlaw xalak pumapakgsin chu putum limapakgsin xlakata tlan naʼan kputum país xlakata namakgantaxti tuku xlakkaxwilinit (Génesis 41:42-44). Nila takanajla: José tsukulh xkilhtamaku kpulachin chu likgotanulh kxpumapakgsin mapakgsina; lakgaxkgakgalh kpulachin chu lilakgakgotanulh xlichatiy lanka mapakgsina kʼEgipto. Uma kilhtamaku litasiyalh pi xlakata lipawa Jehová wa tuku tlakg tlan tlawalh. Wa xDios akxilhli tuku nitlan tlawanika putum kata chu lakkaxtlawalh akxni xtamaklakaskin chu tlakg tlan lakkaxtlawalh. Pero Malakatsukina ni kajwatiya xlakkaxtlawaputun tuku ni xaʼakgstitum, wata kuentajtlawalh kachikin Israel nema xʼama litaxtu. Wa tuku nalichuwinanaw kʼatanu artículo xla uma serie.

Komo wix makgasata lipatinampat tuku ni xakgstitum o atanu tuku nitlan, ni kataxlajwani. Kalakapastakti José: xla putum kilhtamaku tataktujulh, ni makgatsankgalh xtakanajla chu putum kilhtamaku tlan likatsilh. Putum kilhtamaku tayanilh chu tlawalh tuku talakaskin xlakata Jehová ksikulunatlawalh tuku xtlawa.

^ par. 4 Kaʼakxilhti «Tlan liʼakxilhtit xtakanajlakan» 1 xla agosto chu 1 xla noviembre kata 2014 xla uma revista.

^ par. 10 Kxamakgan Egipto xʼanan tatipuxamakaw tanu tanu kaxtalanchu, uma limasiya pi xpuxkukan xtlawananin kaxtalanchu lu xkatsini. Nachuna, xpuxkukan tiku xmaxkikgo vino mapakgsina wa tiku xkapulalin tiku xlakgayakgo naʼakxilhkgo komo vino tlan xwanit chu max nachuna cerveza xatlan xwa chu ni xkgalhikgolh veneno, xlakata uma kilhtamaku lhuwa tiku ni xkaʼakxilhputunkgo mapakgsina chu xlamakgnikan. Wa xlakata, tiku xmasta vino xtalakaskin xlipawanka chu na kstakyawana mapakgsina xlitaxtu.