Alex jaxanan akxni lin akgtum caja kcamión, chu lakpuwan: «Nialh ktlawaputun uma taskujut. ¿Namin kilhtamaku lu tlan nakinkitaxtuni? ¡Kilatamat tlakg tlan xtawi komo ni lhuwa xakskujli!».

Pero ni kajwatiya Alex ni lakgati tlawa palha taskujut. Aaron tiku kaxtlawa putlaw wan: «Atsinu ni putum latamanin lakpuwankgo pi taskujut “nema ni lu xlakaskinka” lu maktujunan. Komo wi tiku kgalhi uma taskujut, kaj kgalhkgalhima asta akxni nakgalhi tlakg xatlan taskujut».

Lhuwa latamanin wankgo pi ni katlawaka xlakata palha naskujkgo. ¿Tuku xlakata? Max xlakata kanajlakgo tuku wankgo ktelevisión, kradio o atanu, niku masiyakgo pi xlakata nakgalhiya xatlan latamat milikgalhit tuku laklanka xtapalh chu nitu nalilakgaputsaya. Matthew tiku skuja kmantenimiento wan: «Lhuwa latamanin wankgo pi tiku lhuwa skujkgo wa tiku ni kgalhtawakgakgonit». Chatum conserje wanikan Shane nachuna akxilhnit. Wan: «Latamanin chuntiya lu tlan tlajaputunkgo la xapulana, pero nialh lu skujputunkgo».

Pero wilakgolh lhuwa latamanin tiku lakgatikgo palha taskujut. Daniel, tiku kgalhi 25 kata chu makgpatsapsnan wan: «Lu tlan tamakgkatsi akxni pulaktiy tuku tlan nakitaxtu». Andre, tiku kgalhi 23 kata nachuna lakpuwan: «Liwana kkatsi pi tuku tlakg makgapaxuwanan chu tlan mamakgkatsininan wa taskujut. Komo ni lu naskuja ni wamputun pi xatapaxuwan natawilaya, wata kaj nalakgachipiniya».

¿Tuku tlawakgonit Daniel chu Andre xlakata lu nalakgatikgo palha taskujut? Xlakata tlawakgo xtastakyaw Biblia. Anta wan pi palha naskujaw chu ni chuntiya natamakgxtakgaw, nachuna kinkawaniyan la tlan nalipaxuwayaw tuku tlawayaw.

¿Tuku tastakyaw xalak Biblia namakgtayayan xlakata nalipaxuwaya mintaskujut? Kkawaniyan pi kalikgalhtawakga makgapitsi textos kʼatanu artículo.