Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Febrero kata 2015

 BIBLIA KALAKGPALINILH XLATAMATKAN

Lu kaks kimalakawanilh la lu tlan takgalhtin masta Biblia

Lu kaks kimalakawanilh la lu tlan takgalhtin masta Biblia
  • KATA AKXNI LAKACHILH: 1948

  • PAÍS: HUNGRÍA

  • TUKU XTLAWA: LU XAKPUTSA XTAKGALHTIN TAKGALHSKININ NEMA XALAKTUWA

LA XAKLAMA:

Klakachilh Székesfehérvár, kachikin xalak Hungría, nema liwaka akgtum mil kata kgalhi chu lhuwa tuku lanit. Chuntiya wi kkintalakapastakni tuku titaxtulh xliʼAkgtiy Guerra xLikalanka Katiyatni.

Anta kstakli xchik kintata chu kinana o kintsiyuna. Lu kkalakapastaka, tlakg klakapastaka kinana, Elisabeth. Xla kimasiyanilh nakkanajlani Dios. Lata akxni xakkgalhi akgtutu kata kilimasmanilh naktlawa Padrenuestro putum katsisni. Pero kʼakgatekgsnilh uma oración asta akxni xakkgalhi 30 kata.

Kintata chu kinana kinkuentajtlawakgolh akxni aktsujku xakwanit, xlakata kinatlatni kskujkgo tantaku chu tantaskaka chu xmakimakgolh tumin tuku xlitamawakgolh xchikkan. Pero akgatiyun sábados xtamakxtumikgo putum familia xlakata makxtum nawayankgo. Xatapaxuwan klakapastaka uma kilhtamaku.

Kata 1958 tuku xlakaskinkgo kinatlatni kgantaxtulh: tamawakgolh akgtum chiki. ¡Tlan xakama katatawila! Lu kpaxuwalh, pero kintapaxuwan ni makgapalalh; xlakata kaj akgchaxan papaʼ titaxtulh, kintlat nilh xlakata cáncer.

Lu nitlan xakmakgkatsi. Klakapastaka pi xakwani Dios: «Ktasaskinin pi xlakgmaxtu kintlat. ¡Lu kmaklakaskin! ¿Tuku xlakata ni kinkgaxpatni?». Lu xakkatsiputun niku xwi kintlat. Xkinkgalhskinkan: «¿Alh kʼakgapun, o nialh katilatamalh putum kilhtamaku?». Xakkalakgsitsini kamanan tiku xkgalhikgo xnatlatnikan.

Akglhuwa kata chali chali xakan niku xmaknukanit kintlat. Xaktatsokgosta xlakatin niku xwi kintlat chu xaktlawa oración: «Katlawa litlan Dios, kkatsiputun niku wi kintlat». Nachuna xakskini pi xkimakgtayalh xakʼakgatekgsli tuku xlakata xkinkatlawanitan.

 Akxni xakkgalhi 13 kata tsukulh katsini alemán xlakata xaklakpuwan pi anta xakama tekgsa kintakgalhtin klhuwa xlikgalhtawakgakan alemanes. Kata 1967 kalh kgalhtawakga kkachikin wanikan Jena, nema xtapakgsini niku xwi Alemania oriental. Lakapala klikgalhtawakgakgolh libros xla filósofos alemanes, pero tlakg klikgalhtawakgalh nema xlichuwinan tuku xlakata lama chixku. Maski ktekgsli makgapitsi tuku tlan takgaxmata, pero ni kgalhtilh kintakgalhskinin. Chuntiya xkaskinima Dios.

BIBLIA LAKGPALILH KILATAMAT:

Kata 1970 ktaspitpa kHungría chu anta klakgapasli tiku kimpuskat xʼama wan, Rose. Uma kilhtamaku kachikin wa xʼakgchipakgonit comunistas, akxni aku xaktamakgaxtokgnitaw kaw kʼAustria. Xakkamputunaw kSydney, kʼAutralia, niku xlama kinkuku.

Ni lhuwa kilhtamaku titaxtulh ktekgsli taskujut kʼAustria. Akgtum kilhtamaku tiku xaktaskuja kiwanilh pi Biblia tlan xkgalhtilh putum kintakgalhskinin chu kimaxkilh maktiy libro nema xlichuwinan. Lakapala klikgalhtawakgakgolh, pero tlakg xakkatsiputun, wa xlakata kkatsokgnanilh tiku xtlawakgonit uma libro, xtatayananin Jehová chu tlakg kkaskinilh likgalhtawakga.

Akxni xakmakgatsimaw akgtum kata lata xaktamakgaxtokgnitaw chatum kgawasa xtatayana Jehová kinkalakgapaxialhnan. Kiliminilh likgalhtawakga nema xakskinit chu kiwanilh komo xaklakaskin akgtum takgalhtawakga xalak Biblia. Tunkun kwanilh pi tlan. Lu xakkatsiputun, wa xlakata akgatunu semana makgtiy xakkgalhtawakga, ¡chu akgatunu takgalhtawakga xmakgapala akgtati hora!

Lu xaklakgati tuku xkimasiyanimakgolh xtatayananin Jehová. Akxni kimasiyanikgolh xtukuwani Dios, kkiBiblia xla húngaro, nila xakkanajla. Xaklin 27 kata lata xakan kmisa chu ni makgtum xakkgaxmatnit uma tukuwani: Jehová. Lu kaks kimalakawanilh takgalhtin nema xkilimasiyanikgo Biblia. Kkatsinilh pi tiku nikgonita nialhtu makgkatsikgo, xtachuna la tiku lhtatama (Eclesiastés 9:5, 10; Juan 11:11-15). Nachuna ktekgsli tuku wankanit xlakata xasasti kakilhtamaku niku «na nialh katiʼanalh linin» (Apocalipsis [Revelación] 21:3, 4). Lu kakxilhputuna kintlat, xlakata kkanajla pi «nalakastakwanankgoy ninin» kxasasti katiyatni (Hechos 24:15).

Rose kimakgtayalh xlakata nachuna tsukulh kgalhtawakga. Lakapala stakli kintakanajlakan chu akgtiy papa klimakgalhsputuw uma takgalhtawakga xalak Biblia. Xakkanaw putum ktamakxtumit xla xtatayananin Jehová lu kaks xkinkamalakawaniyan xtapaxkitkan, xlakata lu tlan xlamakgamakglhtinankgo chu makxtum xwilakgolh (Juan 13:34, 35).

Kata 1976 kinkamaxkikan talakaskin naktaspitparayaw kʼAustralia. Akxni kchaw, kkaputsaw xtatayananin Jehová chu xlakan tlan kinkamamakgkatsinikgon. Kata 1978 xtatayananin Jehová klitaxtuw.

TUKU TLAN KINKITAXTUNINIT:

Ktekgsli xtakgalhtin takgalhskinin nema lu xakkatsiputun. Nachuna ktekgsli tiku lu tlan tlat: Jehová (Santiago 4:8). La uku kkgalhi takgalhkgalhin xlakata nakakxilhpara kintlat kparaíso nema Dios malaknunit (Juan 5:28, 29).

Kata 1989 ktaspitparaw kHungría xlakata nakkalitachuwinanaw kintakanajlakan kifamiliajkan, kiʼamigoskan chu atanu latamanin. Kkamasiyaninitaw cientos latamanin. Liwaka tutupuxamakaw kkamakgtayanitaw xlakata xtatayana Jehová nalitaxtukgo, nachuna kintse.

Titaxtulh 17 kata lata xaktlawani oración Dios chu xakskini pi kakgalhtilh kintakgalhskinin chu titaxtunit 39 kata lata kinkgalhtinit. Chuntiya ktlawani oración, pero la uku kwani: «Paxtikatsinilh Tlat xalakʼakgapun, xlakata kgalhti kiʼoración lata aktsujku xakwanit».