Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  Enero kata 2015

¿Wa kilitlawanitkan oración Jesús?

¿Wa kilitlawanitkan oración Jesús?

NINA lhuwa kata, liwaka 800 kamanan tiku tanu tanu takanajla kgalhikgo malakgatsamakgolh maktum kapsnat niku xkakgalhskinkan komo xkanajlakgo pi Jesús xkgaxmata xʼoracioneskan. Liwaka 60% kgalhtinankgolh pi xkanajlakgo, pero chatum lakalhtitli niku xwi xtukuwani Jesús chu tsokgwililh «Dios».

¿Chu wix tuku lakpuwana? ¿Tiku natlawaniyaw oración? ¿Wa Dios o Jesús? * Xlakata natekgsaw xtakgalhtin kaʼakxilhwi tuku kamasiyanilh kstalaninanin.

¿TIKU WA JESÚS PI NATLAWANIYAW ORACIÓN?

Jesús ni kajwatiya masiyalh pi natlawaniyaw oración Dios, xla chuna tlawalh.

Jesús xtlawani oración xTlat. Akinin nachuna kilitlawatkan

TUKU MASIYALH: Akgtum kilhtamaku, chatum kstalanina wanilh: «Kimpuchinakan kakinkamasiyuni lantla naktlawayaw nkioracionkan». Jesús kgalhtilh: «Akxni natlawayatit mioracionkan, nawanatit: “KinTlatikan”» (Lucas 11:1, 2). Ni lhuwa kilhtamaku titaxtulh kTaʼakgchuwin xalak Sipi, lichuwinalh pi talakaskin natlawayaw oración. Wa, katlawani: «Oración [...] minTlat». Alistalh wampa: «Xla aya katsiy wantu wixin katsankganiyan, maski asta ni askiniyatit» (Mateo 6:6, 8). Chu katsisni akxni xʼamaja makgnikan kawanilh kstalaninanin: «Mpi xlipaks ntu kskinitit xaTlat kkintukuwani, nakamaxkiyan» (Juan 16:23). Chuna la akxilhaw, Jesús makglhuwa masiyalh pi wa natlawaniyaw oración xTlat, Jehová, tiku na kinTlatkan (Juan 20:17).

TUKU TLAWALH: Asta Jesús tlawanilh oración Dios: «Kmaxkiyan paxkatkatsinit, wix Tata wanti xmalana akgapun, chu katiyatna» (Lucas 10:21). Atanu kilhtamaku «lakalh kʼakgapun, chu chuna wanilh xDios: Tlati, kpaxkatkatsiniyan pi wix kgaxpatnita kintachiwin» (Juan 11:41). Nachuna akxni xʼamaja niy, wa: «¡Tlati Dios, chu anta kmimakan kmakgaxtakga kilistakna!» (Lucas 23:46). Jesús kinkawilinin liʼakxilhtit: wa natlawaniyaw oración Jehová, «wanti xmalana akgapun, chu katiyatna» (Mateo 11:25; 26:41, 42; 1 Juan 2:6). Chu chuna tlawakgolh kstalaninanin Cristo tiku latamakgolh kxapulana siglo.

¿TIKU XTLAWANIKGO ORACIÓN XAPULANA KSTALANINANIN CRISTO?

Ni lhuwa semana xtitaxtunit akxni Jesús xʼanita kʼakgapun, mapakgsinanin xkaputsastalanimakgolha kstalaninanin (Hechos 4:18). Tlawakgolh oración xlakata naskinkgo tamakgtay. Pero, ¿tiku skinikgolh tamakgtay? «Tsukukgolh kilhanikgoy Dios kxoracionkan» xlakata naskinkgo tamakgtay kxtukuwani Jesús (Hechos 4:24, 30). Chuna tlawakgolh la xkamasiyaninit Jesús: tlawanikgolh oración Dios.

Akxni xtitaxtunita akglhuwa kata, apóstol Pablo tsokgli: «Ankglhin kmaxkiyaw mpaxkatsinit Dios, wa cha xTlat nkimPuchinakan Jesucristo, akxni kkapalakaskinan kkioraciónkan» (Colosenses 1:3). Na kawanilh xnatalan pi putum kilhtamaku kapaxtikatsinikgolh «namaxkiyatit mpaxkatsinit Dios nkinTlatkan kxtukuwini nkimPuchinakan Jesucristo»  (Efesios 5:20). Atanu kilhtamaku kawanilh pi wa natlawanikgo oración «Dios xaTlat», pero wa nalimaklakaskinkgo xtukuwani Jesús (Colosenses 3:17).

Chuna la xapulana kstalaninanin Cristo, kilitlawatkan la kinkawanin Jesús akxni natlawayaw kiʼoraciónkan; chuna nalimasiyaniyaw pi paxkiyaw (Juan 14:15). Chatum xtsokgna Biblia wa: «Akit kpaxki Kintikukan Dios, porque kgaxmatli kintaxkgalan [...] akit nakkilhani wakg kilhtamaku lata klamajku nawan» (Salmo 116:1, 2). Akinin na tlan chuna nawanaw komo kaj Jehová natlawaniyaw oración. *

^ par. 3 Biblia wan pi Dios chu Jesús ni watiya. Komo tlakg katsiputuna, kaʼakxilhti capítulo 4 xla uma libro, ¿Tuku xlikana masiyay Biblia?, tlawakgonit xtatayananin Jehová.

^ par. 11 Nachuna, xlakata Dios nakinkakgaxmatniyan kiʼoraciónkan, kilitlawatkan xlimapakgsin. Komo tlakg katsiputuna, kaʼakxilhti capítulo 17 xla uma libro, ¿Tuku xlikana masiyay Biblia?