Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2015

Maktum traducción nema lu tlan taʼakgatekgsa

Maktum traducción nema lu tlan taʼakgatekgsa

«Xtachuwin Dios [...] xastakna.» (HEB. 4:12)

TAKILHTLIN: 37, 43

1. 1) ¿Tuku taskujut lakgayawaka Adán? 2) ¿La limaklakaskinitaw kintachuwinkan kskujnin Dios?

JEHOVÁ kinkatlawan xlakata tlan nalatachuwinanaw. Anta kParaíso Jehová wanilh Adán pi xwilinilh xtukuwanikan putum animales. Adán limaklakaskilh tuku xmaxkinit Jehová xlakata xlaksakli xtukuwanikan putum animales (Gén. 2:19, 20). Lata ama kilhtamaku, kskujnin Dios limaklakaskinitaw kintachuwinkan xlakata nalimalankiyaw Jehová chu nakalitachuwinanaw amakgapitsin. Kkinkilhtamakujkan limaklakaskinitaw kintachuwinkan xlakata limatitaxtiyaw Biblia kʼatanu tachuwin chu kamakgtayayaw latamanin nalakgapaskgo Jehová.

2. 1) ¿Tuku xmakgantaxtiputunkgo natalan akxni tlawakgolh Traducción del Nuevo Mundo? 2) ¿Tuku naʼakxilhaw kʼuma artículo?

2 Klhuwa mil tachuwin matitaxtikanit Biblia, makgapitsi tlan la tamatitaxtinit pero makgapitsi ni lu tlan. Natalan tiku tlawakgolh Traducción del Nuevo Mundo xtlawaputunkgo chuna la xtatsokgnit xapulana. Wa xlakata pulaktutu tuku xmakgatsiputunkgo. Xapulana, xmalankiputunkgo xtukuwani  Dios chu putum xwilika xtukuwani niku xlitawilat chuna la xapulana (kalikgalhtawakga Mateo 6:9). Xliʼakgtiy, komo ni xtalakgpalilh tuku xwamputun akgatunu akgatunu tachuwin xtamatitaxtilh. Komo nila chuna xtatlawalh, xwilika tuku xkilhchanima. Chu xliʼakgtutu, xtamaklakaskilh tachuwin nema ni tuwa xtalikgalhtawakgalh chu xtaʼakgatekgsli (kalikgalhtawakga Nehemías 8:8, 12). * Xtatayananin Jehová makgantaxtikgonit uma pulaktutu akxni matitaxtika Biblia kliwaka 130 tachuwin. Kʼuma artículo nalichuwinanaw la tatlawanit Biblia edición 2013 xla Traducción del Nuevo Mundo Kxaʼinglés. Na naʼakxilhaw pi nachuna tatlawakgonit kmakgapitsi tachuwin.

BIBLIA NEMA MALANKI XTUKUWANI DIOS

3, 4. 1) ¿Niku wi xtukuwani Dios ktachuwin hebreo? 2) ¿Tuku tlawanikanit xtukuwani Dios klhuwa biblias?

3 Ktachuwin hebreo, xtukuwani Dios akgtati letras kgalhi. Uma tukuwani tatsokgnit kmaklhuwa xamakgan tatsokgni kxahebreo, la nema lilakgapaskan Rollos del mar Muerto. Na wi kmakgapitsi copias xla Septuaginta nema max tatlawalh kata 200 akxni nina xmin Cristo asta kata 100 akxni xminita Cristo. Lhuwa latamanin kaks lakawankgo akxni akxilhkgo pi xtukuwani Dios makglhuwa tatsokgnit kxalakgmakgan tatsokgni.

Lhuwa latamanin kaks lakawankgo akxni akxilhkgo pi makglhuwa wi xtukuwani Dios kxamakgan tatsokgni

4 Liwana tasiya pi xtukuwani Dios xlitawilat kBiblia. Maski chuna, lhuwa biblias ni wilikgonit xtukuwani. Akgtum liʼakxilhtit, kata 1901 tamakgpitsilh American Standard. Uma Biblia xlimin xtukuwani Dios. Kata 1950 tatlawalh Traducción del Nuevo Mundo de las Escrituras Griegas Cristianas kxaʼinglés, uma na xlimin xtukuwani Dios. Kata 1952 makgpitsika edición revisada xla American Standard Version. Uma Biblia nialh xlimin xtukuwani Dios. ¿Tuku xlakata? Xlakata tiku xtlawakgo, xlakpuwankgo pi nitlan namaklakaskinkan. Lhuwa atanu biblias xaʼinglés chu kʼatanu tachuwin nialh wilinikgo xtukuwani Dios.

5. ¿Tuku xlakata lu xlakaskinka natawila xtukuwani Dios kBiblia?

5 Akxni wi tiku matitaxti kʼatanu tachuwin maktum libro, xlikatsit tuku lakaskin tiku tsokgli chu chuna namatitaxti kʼatanu tachuwin. Tuku wi kBiblia wa xtachuwin Jehová. Lhuwa versículos masiya pi lu xlakaskinka akxilha xtukuwani chu lakaskin pi kalakgapaskgolh latamanin chu kamalankikgolh xtukuwani (Éx. 3:15; Sal. 83:18; 148:13; Is. 42:8; 43:10; Juan 17:6, 26; Hech. 15:14). Wa xlakata lu xlakaskinka natawila xtukuwani Dios kbiblias. Jehová tlawalh pi lhuwa miles xtawilalh xtukuwani kxamakgan tatsokgni (kalikgalhtawakga Ezequiel 38:23). Wa xlakata akxni ni wilikgo xtukuwani Dios kBiblia  tiku matitaxtikgo kʼatanu tachuwin, nitu maxkimakgolh kakni Jehová.

6. ¿Tuku xlakata makgchaxan taliwakalh xtukuwani Dios kBiblia nema taxtulh kata 2013 xaʼinglés?

6 La uku lhuwa tuku likatsiyaw pi xtukuwani Dios xlitawilat kBiblia. Biblia nema taxtulh kata 2013 xla Traducción del Nuevo Mundo kxaʼinglés wilikanit 7,216 xtukuwani Dios, taliwakalh makgchaxan la xlilhuwa xwi xtukuwani Dios xapulana. Makgkitsis wilika 1 Samuel. ¿Tuku xlakata? Xlakata xtukuwani Dios wilakgolh uma versículos kRollos del mar Muerto, wa nema nina makgas mastaka talakaskin tlan naʼakxilhkgo putum latamanin. * (Kalikgalhtawakga xapulana nota.) Xlimakgchaxan wilinika klibro xla Jueces xtukuwani Dios. Chuna wilika xlakata liwana likgalhtawakgaka lhuwa tatsokgni xala makgasa nema xlikana tuku wan. * (Kalikgalhtawakga xliʼakgtiy nota.)

7, 8. ¿Tuku wamputun xtukuwani Jehová?

7 Xaxlikana kstalaninanin Cristo lu xlakaskinka akxilhkgo naʼakgatekgskgo tuku wamputun xtukuwani Dios. Uma tukuwani wamputun «Xla Tlawa pi chuna Kakitaxtulh». * (Kalikgalhtawakga xliʼakgtutu nota.) Pulana, kilikgalhtawakgakan xlichuwinan tuku xwamputun uma tukuwani, anta xtakilhti kÉxodo 3:14 ktantun página, wan: «Akit naklitaxtu tuku akit naklitaxtuputun». Traducción del Nuevo Mundo xla kata 1984 kxaʼinglés lichuwinalh pi Jehová litaxtu tuku natalakaskin xlakata namakgantaxti tuku wanit natlawa. * Pero Biblia nema taxtulh kata 2013 wan: «Xtukuwani Dios ni kajwatiya wamputun pi xla litaxtu tuku natalakaskin xlakata namakgantaxti tuku wanit natlawa. Na kilhchani pi Jehová tlawa pi putum tuku tlawanit natlawa o nalitaxtu tuku natalakaskin xlakata namakgantaxti xtalakaskin». (Na kaʼakxilhti folleto Tuku liputsananikan xTachuwin Dios, kpágina 5.)

8 ¿La tlawa Jehová pi putum tuku tlawanit nalitaxtu tuku lakaskin? Akgtum liʼakxilhtit, Dios tlawalh pi Noé xkaxtlawalh arca chu Bezalel lu xkatsinilh la xtlawalh caja xla talakkaxlan. Na tlawalh pi Gedeón lu tlan soldado xwa chu tlawalh pi Pablo ni xapekua misionero xlitaxtulh. Lu xlakaskina akxilhkgo tuku wamputun xtukuwani Dios kskujnin. Wa xlakata, natalan tiku tlawakgolh Traducción del Nuevo Mundo wilikgolh xtukuwani Dios niku xlitawilat.

9. ¿Tuku xlakata Lakgkgolotsin tiku Pulalinkgo xTatayananin Jehová lakaskinkgo pi katamatitaxtilh Biblia klhuwa tachuwin?

9 Tlakg lhuwa biblias anan nema makglhtinikgo xtukuwani Dios. Anta niku xliʼanat wilikgo «Malana» o akgtum xtukuwani dios nema lakgapaskan kxkachikinkan. Wa xlakata, Lakgkgolotsin tiku Pulalinkgo xTatayananin Jehová lakaskinkgo pi putum latamanin tiku tanu tanu xtachuwinkan kakgalhikgolh Biblia nema malanki xtukuwani Dios (kalikgalhtawakga Malaquías 3:16). Asta la uku Traducción del Nuevo Mundo malanki xtukuwani Dios k130 tanu tanu tachuwin.

 CHUNA TATSOKGNIT LA XAPULANA CHU NI TUWA TAʼAKGATEKGSA

10, 11. ¿Tuku xlakata tuwa kitaxtunit nakilhtikan Traducción del Nuevo Mundo xaʼingles xlakata namatitaxtikan kʼatanu tachuwin?

10 Matitaxtikan Traducción del Nuevo Mundo xaʼingles kʼatanu tachuwin tuwa kitaxtunit. Akgtum liʼakxilhtit, kEclesiastés 9:10 chu kʼatanu versículos, edición xla kata 1984 kxaʼinglés xmaklakaskin ktachuwin xahebreo Seol. Atanu Biblias xaʼinglés na limaklakaskinkgo uma tachuwin. Pero lhuwa atanu tachuwin ni katsikgo tuku wamputun chu nitu wi kxdiccionariojkan. Lhuwa latamanin asta lakpuwankgo pi Seol wi niku wi. Xlakata uma, mastaka talakaskin pi tachuwin hebrea Seol chu tachuwin griega Hades xtamatitaxtilh «Putaknun». Chuna la tamatitaxtilh ni tuwa akgatekgskan.

11 Tachuwin «alma» kHebreo chu kʼGriego tuwa tamatitaxtilh kʼamakgapitsi tachuwin. Kʼamakgolh tachuwin, alma kilhchanima tuku ni tasiya chu wi niku an nema kinkalaktanuman chu wankgo pi akxni niyaw uma taxtu chu ni niy. Xlakata ni xʼanalh taʼakglhuwit, kamaxkika talakaskin traductores namatitaxtikgo tachuwin alma chuna la xtamaklakaskilh ktachuwin. Kʼapendice 4A xla Biblia con referencias talichuwinan la tamaklakaskinit tachuwin alma kBiblia. Xlakata versículos ni tuwa naʼakgatekgskan, wilikan knotas tuku wamputunkgo tachuwin khebreo chu kʼGriego.

Natalan tiku lakkaxtlawakgolh Biblia kxaʼinglés, likgalhtawakgakgolh lhuwa mil takgalhskinin nema xtlawakgonit tiku xmatitaxtikgo kʼatanu tachuwin Biblia, xlikalanka kKatiyatni

12. ¿Tuku lakgpalika Biblia edición revisada 2013? (Na kaʼakxilhti artículo «La revisión de 2013 de la Traducción del Nuevo Mundo» kxaʼedición estándar xla uma revista.)

 12 Takgalhskinin nema xtlawakgo tiku matitaxtikgo kʼatanu tachuwin Biblia, litasiyalh pi lhuwa tachuwin kxaʼinglés akxni xtamatitaxtilh nitlan xtaʼakgatekgsli kxtachuwinkan. Wa xlakata Lakgkgolotsin tiku Pulalinkgo xTatayananin Jehová kseptiembre kata 2007 wankgolh pi liwana xlakkaxtlawapara Traducción del Nuevo Mundo xaʼinglés. Natalan tiku lakkaxtlawakgolh Biblia kxaʼinglés, likgalhtawakgakgolh lhuwa mil takgalhskinin nema xtlawakgonit tiku xmatitaxtikgo kʼatanu tachuwin Biblia, xlikalanka kKatiyatni. Lakgpalikgolh tachuwin nema nialh xtamaklakaskin chu xalaksasti maklakaskinkgolh. Maklakaskinkgolh ni laktuwa tachuwin pero ni lakgpalikgolh tuku xwamputun. Chuna la akxilhmaw, xtaskujutkan natalan tiku matitaxtikgo Biblia kʼatanu tachuwin, makgtayanankgolh tlakg ni tuwa nataʼakgatekgsa Biblia xaʼinglés (Prov. 27:17).

LU PAXTIKATSINIKGO NATALAN

13. ¿La makgamakglhtinankgonit tiku likgalhtawakgakgonit Biblia edición revisada 2013?

13 ¿La makgamakglhtinankgonit natalan Biblia edición revisada 2013? Lhuwa mil natalan malakgachakgonit cartas niku pulalinkan taskujut xliputum katiyatni (Nueva York). Chatum tala puskat wa pi Biblia la akgtum cofre niku tajuma lhuwa lakswan chiwix, nema xtachuwin Dios. Xla wan pi ni tuwa likgalhtawakga chu ni tuwa akgatekgsa. Akxni likgalhtawakgama, makgkatsi la komo liwana akxilhmakgolh lakswan chiwix chu akxilhma la tanu tanu tasiyakgo, la lakgxkgakga, xcolor chu la xlistlan. Xlakata ni tuwa akgatekgskan uma Biblia makgtayanit tlakg liwana nalakgapasa Dios. Akxni likgalhtawakga, akxilha Jehová la chatum tlati tiku akgpixti o snata chu xatapaxkin tachuwinan.

14, 15. ¿La makgkatsikgo natalan tiku kgalhikgo Traducción del Nuevo Mundo kxtachuwinkan?

14 Natalan tiku ni chuwinankgo inglés na mastakgo paxtikatsinit xlakata kgalhikgo  Traducción del Nuevo Mundo kxtachuwinkan. Chatum chixku tiku lina kata xalak Bulgaria wan pi akglhuwata kata likgalhtawakganit Biblia, pero nikxni xlikgalhtawakganit maktum nema ni tuwa taʼakgatekgsa chu chan knaku. Chatum tala puskat xalak Albania wa pi Biblia ktachuwin albanés lu stlan takgaxmata. Na wa: «¡Lu lanka talakgalhaman kgaxmatnikan Jehová kkintachuwinkan!».

15 Klhuwa países, lhuwa latamanin ni la likgalhtawakgakgo Biblia, xlakata lu laktapalaxla o tuwa tekgskan. Akgtum liʼakxilhtit, kRuanda, lhuwa latamanin tiku xkamakgalhtawakgemakgolh xtatayananin Jehová nila kstaka xtakanajlakan xlakata ni xkgalhikgo Biblia. Biblia nema kstakan kʼakgtum takanajla xalak xkachikinkan lu tapalaxla xwanit chu tuwa xʼakgatekgskan. Akxni taxtulh Traducción del Nuevo Mundo kxtachuwinkan, akgtum familia tiku xkgalhikgo kgalhtati kamanan paxtikatsinikgolh Jehová chu Skujni xalipaw chu xaskgalala. Pulana nila xtamawakgo Biblia xlakata chatunu chatunu xkgalhikgolh, pero la uku xputumkan kgalhikgo. Xlakata nalimasiyanikgo pi paxtikatsinikgo Jehová, akxtum likgalhtawakgakgo chali chali.

16, 17. 1) ¿Tuku lakaskin Jehová xlakata putum latamanin? 2) ¿Tuku tlawaputunaw?

16 Edición revisada 2013 xla Traducción del Nuevo Mundo tlakg nataxtu klhuwa tachuwin. Satanás ni mastaputun talakaskin, pero Jehová lakaskin pi putum kskujnin liwana kaʼakgatekgswi xtachuwin (kalikgalhtawakga Isaías 30:21). Nialh makgas, «katiyatni nalitatsama xtamasiy Jehová» (Is. 11:9).

17 Liwana kalimaklakaskiw putum tamaskiwin nema kinkamaxkiyan Jehová, la uma Biblia nema malanki xtukuwani. Chali chali kakgaxmatniw tuku kinkawaniyan kxtachuwin. Chu xla putum nakinkakgaxmatniyan kiʼoracioneskan. Komo putum kilhtamaku natachuwinanaw, tlakg nalakgapasaw chu tlakg napaxkiyaw (Juan 17:3).

«¡Lu lanka talakgalhaman kgaxmatnikan Jehová kkintachuwinkan!»

^ párr. 2 Kaʼakxilhti artículo «Cómo escoger una buena traducción de la Biblia», xla La Atalaya 1 xla mayo kata 2008. Na kaʼakxilhti apéndice A1 kʼedición 2013 xla Traducción del Nuevo Mundo xaʼinglés.

^ párr. 6 Rollos xalak mar Muerto liwaka 1,000 kata xlimakgas xtatsokgnita, nixawa tatsokgni xahebreo nema tamaklakaskilh akxni tlawaka Traducción del Nuevo Mundo.

^ párr. 6 Xtukuwani Dios wilika 1 Samuel 2:25, 6:3, 10:26 chu 23:14, 16, chu kJueces 19:18.

^ párr. 7 Makgapitsi tiku lu katsikgo xlakata uma, nachuna wankgo, maski ni xputumkan.

^ párr. 7 Kaʼakxilhti apéndice 1A kBiblia con referencias, página 1559, niku wan «El nombre divino en las Escrituras Hebreas».