Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2015

Kalimasiyaw pi paxtikatsiniyaw xtamaskiwin Jehová

Kalimasiyaw pi paxtikatsiniyaw xtamaskiwin Jehová

AKXNI akxilhaw putum tuku tlawanit Jehová, akxilhaw pi Dios lu xapaxkina (Sant. 1:17). Akgtum liʼakxilhtit, Jehová ni kaj tsinu wililh staku kʼakgapun, wata wililh millones. Nachuna chanit xliputuminika kkatiyatni lakswan tuwan (Sal. 65:12, 13; 147:7, 8; 148:3, 4).

Anta kBiblia lichuwinankan chatum kskujni Dios tiku lu xpaxtikatsini xlakata putum tuku tlawanit, chu wa xlakata tsokgnilh akgtum takilhtlin. Tlan nalikgalhtawakgaya uma kSalmo 104. Anta wan pi uma chixku xmalankiputun Jehová putum kxlatamat (Sal. 104:33). ¿Nachuna makgkatsiya la uma chixku?

TLAN LIʼAKXILHTIT XLAKATA MASKIWINANKAN

Jehová lakaskin pi wi tuku nakamaskiwiyaw amakgapitsin. Wa xlakata tlawalh pi apóstol Pablo xtsokgli pi tiku kgalhikgo tumin ni wa nalipawankgo xtuminkan xlakata nakgalhikgo tapaxuwan. Wata wa nalipawankgo Dios, tiku kinkamaxkiyan putum tuku tlan. Pablo na lichuwinalh pi natlawayaw tuku tlan xpalakatakan amakgapitsin, namaskiwinanaw chu xatapaxuwan nakamaxkiyaw amakgapitsin tuku kgalhiyaw. Komo natlawayaw umakgolh tastakyaw, nakgalhiyaw tlan latamat chu xatapaxuwan nalatamayaw (1 Tim. 6:17-19). Chuna la akxilhaw Jehová kinkamasiyaniyan tuku xlakata na namastayaw tamaskiwin.

Akxni Pablo tsokgli xlimaktiy cartas xla Corintios, lichuwinalh tuku xlakata namaskiwinanaw. Xla wa: «Lantla nchatunu mpuwa namastay kxnaku, chuna nkamastalh; ni kaj chalipuwana namastay, chu na ni kaj fuerzaj; sampi wa Dios, paxkiy wanti xlipaks xtapaxuwan limastay» (2 Cor. 9:7). ¿Tiku tlan kitaxtuni akxni wi tuku maskiwinanaw? Wa tiku makglhtinankgo tuku maklakaskinkgo. Chu akinin, xlakata lhuwa tuku tlan kinkamaxkiyan Jehová (2 Cor. 9:11-14).

Pablo na kamalakapastakalh xalak corintios pi xmaxkikgolh paxtikatsinit Dios xlakata kinkamaxkin akgtum tamaskiwin nema nitu xtachuna (2 Cor. 9:15). Uma tamaskiwin wa nema kinkamaxkiyan putum xpalakata xkgawasa, Jesucristo. Ni anan tachuwin nema tlan naliwankan la xlilanka uma tamaskiwin nema kinkamaxkinitan Jehová.

¿La nalimasiyayaw pi paxtikatsiniyaw Jehová chu Jesús putum tuku tlawakgo la uku chu kkilhtamaku nema aku mima? Nalimaxtuyaw kinkilhtamakujkan, kilitliwakgakan chu tuku kgalhiyaw xlakata naskujnaniyaw Jehová, chu nakamakgtayayaw amakgapitsin nalakgapaskgo. Kimputumkan tlan chuna natlawayaw, maski lhuwa o ni lhuwa tumin kgalhiyaw (1 Cró. 22:14; 29:3-5; Luc. 21:1-4).