Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2015

 BIOGRAFÍA

Tlan ktalalin Dios chu kintse

Tlan ktalalin Dios chu kintse

AKGTUM kilhtamaku kintse kiwanilh: «¡Ni kʼakgatekgsa tuku xlakata ni kakninaniputunkgoya kinatlatnikan tiku nikgonita! ¿Ni katsiya pi wa kinkamaxkikgonitan latamat? Ni kapaxtikatsiniya. ¿Tuku xlakata nialh xapulana kinatlatnikan? Komo nialh nakamaxkiya kakni, lakgmakgampat kintakanajlakan». Chu tsukulh tasa.

Kajku akgtiy papaʼ xtitaxtunit, xtatayananin Jehová xwanikgonit kintse komo xlakaskin nalimakgalhtawakgekgo Biblia. Xla ni xlakaskin, pero kawanilh pi akit xkimakgalhtawakgekgolh. ¿Tuku xlakata la uku lu xkisitsininit? Xlakata akit xaktlawaputun xtalakaskin Jehová chu xakmakgapaxuwaputun. Wa xlakata nialhla xaktlawa tuku xlakaskin kintse. Lu tuwa kmakgkatsilh pero Jehová kimatliwakglhli.

LA KLAKGAPASLI JEHOVÁ

Kifamilia chu akit budistas xakwanitaw, chuna la lhuwa latamanin kJapón. Pero akxni akgtiy papaʼ kkatakgalhtawakgalh xtatayananin Jehová, kkanajlalh pi Biblia xlikana tuku masiya. Akxni kkatsinilh pi kkgalhi chatum Tlat kʼakgapun, klakgapasputulh. Pulana, kintse chu akit lu xaklichuwinanaw tuku xakkatsinima. Ktsukulh kan ktamakxtumit domingos. Xlakata tuku xakkatsinima, kwanilh kintse pi nialh xakama makgtlawa talismanin xla budistas. Xla kiwanilh: «Kgalhikan kfamilia tiku ni kamaxki kakni xnatlatni tiku nikgonita mamaxaninan». Nialh kimaxkilh talakaskin nakan ktamakxtumit chu nialh lakaskilh nakkgalhtawakga. Nikxni klakpuwa pi chuna xkiʼama wani. Nikxni chuna xkiwaninit.

Kintlat tatayalh. Anta kEfesios 6 kkatsinilh pi Jehová lakaskin pi kamanan kakgalhakgaxmatkgolh xnatlatnikan. Akit xaklakaskin pi tlan xaklatalaliw, chu klakpuwa pi komo xakkgaxmatnikgolh na xkinkgaxmatnikgolh. Ama kilhtamaku kilikgalhtawakgat xwanit xlakata exámenes nema lu xlakaskinka xwanit xalak escuela. Wa xlakata tlan ktlawalh ni nakkan ktamakxtumit akgtutu papaʼ. Pero kwanilh Jehová pi xaktaspitpa ktamakxtumit akxni ksputli ama kilhtamaku.

Tuku ktlawalh pulaktiy nitlan kitaxtulh. ¿Tuku xlakata? Pulana, xlakata klakpuwa pi akxni xtitaxtulh akgtutu papaʼ chuntiya xakskujnaniputulh Jehová. Pero nichuna kitaxtulh. Nialh tlan ktalalilh Jehová. Chu xlipulaktiy, ama kilhtamaku kinatlatni tlakg katuwa tlawakgolh xlakata nialh xakskujnanilh.

 TALHUWILH TAʼAKGLHUWIT

Anta ktamakxtumit xakkalakgapasnit lhuwa xtatayananin Jehová tiku nachuna xtitaxtumakgolh. Kiwanikgolh pi Jehová xʼama kimaxki litliwakga chu kiwanikgolh pi komo akit xaktayanilh, kifamilia na tlan xlakgapaskgolh Dios (Mat. 10:34-37). Akit xaklipawan, wa xlakata ktlawanilh oración xliputum kilitliwakga.

Kinatlatni lhuwa tuku tlawakgolh xlakata xakmakgxtakgli Jehová. Akgtum liʼakxilhtit, tlakg kimaxkikgolh taskujut kkinchik xlakata ni xakalh ktamakxtumit. Xmin kilhtamaku ni xkimaxkikgo talakaskin naktanu kkinchik o ni xkimaxkikgo liwat. Makglhuwa kintasaskinilh kintse pi nialh xaklikgalhtawakgalh Biblia. Fuerza xaktlawani ni naktalakgalhti. Pero komo xakkgalhti, lu xaklakilhniyaw xlakata kinchatiykan xakwanaw pi wa xaxlikana tuku xakkatsiyaw. La uku kkatsi pi tlan xwa komo nitu xakkawanilh xlakata xtakanajlakan chu la xlimakgkatsikgo. Komo chuna xaktitlawalh max ni lu xsitsilh.

Kintse kaskinilh tamakgtaya amakgapitsi latamanin. Tachuwinalh kimaestro, pero xla ni makgtanuputulh kkintaʼakglhuwitkan. Alistalh kililh kxtaskujut chu skinilh litlan xmalana pi xkiwanilh pi wa budismo nema tlakg tlan takanajla. Na katasanilh makgapitsi kifamilia chu katasaskinilh pi xmakgtayakgolh. Uma lu nitlan xkimamakgkatsini. Pero ktamakxtumit kimalakapastakakgolh pi akxni kintse xkawanikgo amakgapitsin tuku xaktlawama, xtachuna la xkalitachuwinama Dios.

Kinatlatni xlakaskinkgo pi xakalh kuniversidad chu xakkgalhilh tlan taskujut. Putum kilhtamaku xaklitaʼakglhuwiyaw xlakata uma. Wa xlakata kkatsokgnilh maklhuwa cartas niku xakkawani tuku xaktlawaputun. Akgtum kilhtamaku  kintlat lu sitsilh chu kiwanilh: «Komo lakpuwana pi tlan natekgsa taskujut, chali katekgsti. Komo ni natekgsa nataxtuya kchiki». Ktasaskinilh Jehová pi xkimakgtayalh. Lichali kalh lichuwinan Dios, chu chatiy natalan lakpuskatin kiwanikgolh pi xkimaxkiputunkgo taskujut xlakata xakkamakgalhtawakgelh xlaktsumankan. Uma ni makgapaxuwalh kintlat, wata nialh kintachuwinalh. Kintse kiwanilh pi tlakg tlan xwa komo xlakatsalana limapakgsin xaklitaxtulh chu ni xtatayana Jehová.

Jehová kimakgtayalh naklakgpali kintapuwan chu tlan wantuku xaklaksakli

Xmin kilhtamaku xakkgalhskinkan komo Jehová tlan xakxilha nakkatalakgalhti kinatlatni. Lu lhuwa oración ktlawalh chu klilakpuwa textos niku xlichuwinan xtapaxkit Dios. Kimakgtayalh nakʼakgatekgsa pi kaj xlakaskimakgolh tlan nakinkitaxtuni. Jehová kimakgtayalh naklakgpali kintapuwan chu tlan tuku xaklaksakli. Akxni tlakg xaklichuwinan Dios, tlakg xaklipaxuwa. Precursora xaklitaxtuputun.

PRECURSORA KLITAXTULH

Akxni makgapitsi natalan lakpuskatin katsikgolh pi precursora xaklitaxtuputun, kiwanikgolh pi xakkgalhkgalhilh asta akxni kinatlatni nialh lu xsitsikgolh. Kskinilh tamakgtay Jehová, klikgalhtawakgalh tuku wan kilikgalhtawakgakan chu klakpuwa tuku xlakata precursora xaklitaxtuputun. Nachuna kkaskinilh tastakyaw natalan tiku makgasa kskujnanimakgolh Jehová. Klakpuwa pi tlakg xlakaskinka nakmakgapaxuwa Jehová. Kkatsilh pi komo xakkgalhkgalhilh asta akxni kinatlatni nialh xsitsikgolh, ni xwamputun pi kinatlatni xlakgpalikgolh xtapuwankan.

Kmatsukilh precursorado akxni awatiya kata xakkgalhtawakgama ksecundaria. Titaxtulh kilhtamaku klakpuwa nakkan makgtayanan niku natalan tlakg xlakaskinkgo tamakgtay natalichuwinan Dios. Pero kinatlatni ni xlakaskinkgo pi naktaxtu kkinchik. Wa xlakata kkgalhkgalhilh nakmakgatsi akgpuxam kata. Akxni kmakgatsilh, kskilh ksucursal pi xkimalakgachaka xsur Japón, niku xwilakgolh makgapitsi kifamilia. Chuna kintse nialh lu xlakgaputsalh.

Niku kimalakgachaka kkamakgtayalh makgapitsi xtatayananin Jehová nalitaxtukgo. Na kkgalhtawakgalh inglés xlakata tlakg tlan nakskujnani Jehová. Ktamakxtumit niku xakkan xwilakgolh chatiy precursores especiales. Lu xaklakgati la xlilhuwa kskujkgo xlakata nalichuwinankgo Dios chu la xkamakgtayakgo amakgapitsin. Klakpuwa pi na precursora especial xaklitaxtulh. Ama kilhtamaku, kintse makgtiy lu tatatlalh. Chu amakgolh kilhtamaku ktaspitli xlakata nakkuentajtlawa. Xla nila xkanajla xlakata chuna ktlawalh. Uma tlawalh pi tsinu tlakg tlan xkilikatsinilh.

JEHOVÁ LU TLAN LIKATSI

Akxni xtitaxtunita akgtujun kata, kilakgchilh maktum xcarta chatum precursor especial tiku klichuwinalha. Tiku xwanikan Atsushi. Kiwanilh pi xlakpuwama natamakgaxtokga chu kinkgalhskilh komo xakpaxki. Akit ni xakmakgkatsi pi xakpaxki chu akit xaklakpuwan pi ni xkilakgati. Titaxtulh akgtum papaʼ kkgalhtilh chu kwanilh pi tlan komo tlakg xaklalakgapaswi. Kkatsiw pi tuku akit xaklakgati nawa xlakgati. Chuntiya xakskujnaniputunaw Jehová putum kilhtamaku niku xtalakaskilh. Titaxtulh kilhtamaku ktamakgaxtokgwi. Kinatlatni chu atanu kifamiliaskan kilakgolh. Uma lu kimakgapaxuwalh.

Nepal

Kinchixku chu akit xakliskujmaw la precursores regulares. Pero sucursal tsukulh kinkawaniyan pi xakkalakgapaxialhnaw makgapitsi congregaciones. Alistalh precursores especiales klitaxtuw, titaxtulh kilhtamaku Atsushi superinte de circuito tlawaka. Akxni putum  xakkalakgapaxialhnanitawa congregaciones, sucursal kinkatachuwinan chu kinkakgalhskin komo tlan nakkanaw kNepal, xlakata chuntiya xakkalakgapaxialhnaw congregaciones.

Xlakata kskujnit klhuwa países lhuwa tuku kimasiyaninit xlakata Jehová

Ni xakkatsi tuku xwankgolh kinatlatni akxni xkatsikgolh pi makgat niku xakama. Pero akxni kkatachuwinalh, kintlat kiwanilh: «Niku pimpat lu kastlan». Semana nema aku xtitaxtunit, chatum amigo xmaskiwinit maktum libro nema xlichuwinan kachikin Nepal. Akxni xlikgalhtawakganita, kintlat lakpuwa pi Nepal akgtum kachikin niku tlan nalakgapasnankan.

Tlan xakmakgkatsiyaw xakkatatawilayaw latamanin xalak Nepal, tiku lu tlan likatsikgo. Titaxtulh kilhtamaku kinkawanikan pi na xaklakgapaxialhnaw congregaciones xalak Bangladesh. Maski umakgolh países lu lakatsunin wilakgolh, talakgpalikgo. Uma xtlawa pi xtalakgpalilh la xaklichuwinanaw Dios. Akxni xtitaxtunita akgkitsis kata kinkamaspitkan kJapón. La uku chuntiya klipaxuwayaw kkalakgapaxiʼalhnanaw congregaciones kJapón.

Xlakata kskujwi kJapón, Nepal chu Bangladesh lhuwa tuku kimasiyaninit xlakata Jehová. Latamanin xalak amakgolh países tanu tanu talismanin kgalhikgo. Chu ni lakxtum lataman. Pero kakxilhnit pi Jehová tlan kamakgtaya, kakuentajtlawa chu makgamakglhtinan putum latamanin.

Lhuwa tuku kpaxtikatsini Jehová. Kimaxkinit talakaskin naklakgapasa chu nakskujni, chu kimaxkilh chatum chixku tiku lu skujnani Dios chu tlan likatsi. Nachuna kimasiyaninit nakkatsi laksaka tuku tlan nakinkitaxtuni. Kpaxtikatsini Jehová, la uku kintse chu akit lu tlan amigas, chu tlan kkatalalin amakgapitsi kifamilia. Putum kilhtamaku kmasta paxtikatsinit xlakata tlan ktalalin Dios chu kintse.

Lu klakgatiyaw kalakgapaxiʼalhnanaw congregaciones