Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2015

Jehová kinkatachuwinanan

Jehová kinkatachuwinanan

«Wix wanti, katlawa litlan kakgaxpatti, chu akit nakchuwinan.» (JOB 42:4)

TAKILHTLIN: 31, 137

1-3. 1) ¿Tuku likatsiyaw pi nipara tsinu malakgchaniyaw la katachuwinan Jehová amakgapitsi? 2) ¿Tuku naʼakxilhaw kʼuma artículo?

¿TUKU xlakata Jehová katlawalh ángeles chu latamanin? Xlakaskin pi na xkgalhikgolh latamat amakgapitsin chu akxtum xpaxuwakgolh (Sal. 36:9; 1 Tim. 1:11). Pulana tlawalh Jesús, apóstol Juan limapakuwi «nTachuwin» (Juan 1:1; Apocalipsis [Revelación] 3:14). Jehová xtachuwinan Jesús chu xwani tuku xlakpuwan chu xmakgkatsi (Juan 1:14, 17; Col. 1:15). Pablo wan pi ángeles latachuwinankgo chu na kgalhikgo xtachuwinkan. Pero tachuwin nema kgalhikgo ni xtachuna nema kgalhikgo latamanin (1 Cor. 13:1).

2 Jehová liwana kalakgapasa lhuwa millones ángeles chu putum latamanin nema katlawanit. Jehová kgaxmata millones oraciones maski akxtum katlawakan. Nachuna, akgatekgsa kioracionkan maski tanu tanu kintachuwinkan. Maski kinkakgaxmatniman, kapulalin ángeles chu katachuwinan. Dios putum tlan tlawa uma xlakata chuna la lakpuwan chu chuna la katachuwinan amakgapitsin nipara tsinu malakgchaniyaw (kalikgalhtawakga Isaías 55:8, 9). Xlakata  naʼakgatekgsniyaw, ni tuwa la kinkatachuwinanan.

3 Kʼuma artículo naʼakxilhaw pi Jehová kinkatachuwinanan chuna la akinin liwana naʼakgatekgsaw. Na naʼakxilhaw pi lakgpalitilha la kinkatachuwinanan chuna la natalakaskin.

DIOS KATACHUWINAN LATAMANIN

4. 1) ¿Tuku tachuwin maklakaskilh Jehová xlakata nakatachuwinan Moisés, Samuel chu David? 2) ¿Tuku lichuwinan Biblia?

4 Jehová, max xtachuwinan Adán ktachuwin xamakgan hebreo. Alistalh na katachuwinalh amakgapitsi lataman kʼuma tachuwin, la Moisés, Samuel chu David. Xla kawanilh tuku xlakpuwan, chu xlakan tsokgwilikgolh kxtachuwinkan chuna la xchuwinankgo. Na tsokgwilikgolh tuku Jehová kawanilh chu tsokgwilikgolh tuku latilhalh kxkachikin. Akgtum liʼakxilhtit, Biblia lichuwinan xtakanajlakan chu xtapaxkitkan kskujnin Dios, tuku nitlan tlawakgolh chu xtalakgalhinkan. Putum uma tatsokgli xlakata nakinkamakgtayayan (Rom. 15:4).

Tiku tsokgkgolh Biblia chuna tlawakgolh la kawanilh Jehová chu tsokgwilikgolh tuku titaxtulh xkachikin

5. ¿Tuku xlakata Jehová ni putum kilhtamaku ktachuwin hebreo katachuwinalh latamanin?

5 Jehová ni putum kilhtamaku maklakaskilh tachuwin hebreo akxni xkatachuwinan latamanin. Kilhtamaku akxni israelitas taxtukgolh kBabilonia, makgapitsi aramero xchuwinankgo. Max wa xlakata Daniel, Jeremías chu Esdras ktachuwin arameo tsokgkgolh makgapitsi libros xalak Biblia (kaʼakxilhti notas kʼEsdras 4:8 chu 7:12, Jeremías 10:11 chu Daniel 2:4).

6. ¿Tuku xlakata Tatsokgni xaHebreo matitaxtika ktachuwin griego?

6 Titaxtulh kilhtamaku, chatum mapakgsina xalak Grecia xwanikan Alejandro Magno akgchipalh lhuwa países. Latamanin tiku xlamakgolh kʼuma países tsukukgolh maklakaskinkgo tachuwin griego nema putum latamanin xʼakgatekgskgo. Lhuwa judíos na tsukukgolh maklakaskinkgo uma tachuwin. Wa xlakata, Tatsokgni xaHebreo tamatitaxtilh ktachuwin griego. Uma lilakgapaskan Septuaginta. Wa xapulana Biblia nema matitaxtika kʼatanu tachuwin chu na tlakg xlakaskinka litaxtu. Tiku lu katsinikgo xlakata uma, wankgo pi mat 72 latamanin tiku tlawakgolh. * (Kalikgalhtawakga nota.) Makgapitsin tiku tlawakgolh Septuaginta kʼatanu tachuwin akgatunu akgatunu tachuwin xmatitaxtikgo, pero makgapitsi ni. Maski xtalakgpali, judíos tiku xchuwinankgo griego chu xapulana kstalaninanin Cristo, uma Septuaginta xTachuwin Dios xʼakxilhkgo.

7. ¿Tuku tachuwin xlimaklakaskin Jesús akxni xkatachuwinan kstalaninanin?

7 Akxni Jesús xlama kkatiyatni, max hebreo xchuwinan (Juan 19:20; 20:16; Hech.  26:14). Max na xmaklakaskin tachuwin arameo nema lu xtalakgapasa. Nachuna, xlakgapasa xamakgan hebreo nema xchuwinan Moisés chu palakachuwinanin, judíos xlikgalhtawakgakgo ama tatsokgni putum semanas niku xkakninanikgo Dios (Luc. 4:17-19; 24:44, 45; Hech. 15:21). Ama kilhtamaku na xlimaklakaskinkan tachuwin griego chu latín, pero Biblia ni wan komo Jesús xchuwinan umakgolh tachuwin.

8, 9. 1) ¿Tuku xlakata makgapitsi libros xalak Biblia kxagriego katsokgka? 2) ¿Tuku kinkamasiyaniyan putum uma xlakata Jehová?

8 Xapulana kstalaninanin Jesús hebreo xchuwinankgo. Pero akxni xninita, lhuwa tiku xkgalhikgo atanu tachuwin na kstalaninanin Cristo litaxtukgolh (kalikgalhtawakga Hechos 6:1). Titaxtulh kilhtamaku, lhuwa kstalaninanin ni wa xchuwinankgo hebreo, xchuwinankgo griego. Xlakata tachuwin griego wa tlakg xchuwinankan, libros xla Mateo, Marcos, Lucas chu Juan kʼgriego tatsokgkgolh. * (Kalikgalhtawakga nota.) Cartas nema tsokgli Pablo chu amakgapitsi libros xalak Biblia na katsokgka kʼgriego.

9 Tiku xtsokgkgo Tatsokgni xaGriego, akxni xlimaklakaskimputunkgo tachuwin nema xwi ktatsokgni xahebreo anta xlakatikgo kSeptuaginta, xlakata uma xtatsokgnita kʼgriego. Xmin kilhtamaku chuna la xtatsokgnit makgapitsi tachuwin anta kSeptuaginta, tsinu xtalakgpali la xtatsokgnit ktatsokgni xahebreo. Maski kaj lakchixkuwin la akinin tiku tlawakgolh uma tatsokgni na anta makgtanumakgolh kBiblia nema kgalhiyaw la uku. Uma kinkamasiyaniyan pi Jehová ni lakpuwan pi kaj pulaktu tachuwin tlakg xlakaskinka nixawa amakgapitsin (kalikgalhtawakga Hechos 10:34).

Dios ni kinkawaniyan pi kilikatsinitkan akgtum tachuwin xlakata nalakgapasaw o nakatsiyaw tuku wanit pi natlawa

10. ¿Tuku tlawa Jehová xlakata nakinkatachuwinanan?

10 Chuna la akxilhnitaw Jehová katachuwinan latamanin chuna la talakaskin. Ni kinkawaniyan pi kilikatsinitkan akgtum tachuwin xlakata nalakgapasaw o nakatsiyaw tuku wanit pi natlawa (kalikgalhtawakga Zacarías 8:23 chu Apocalipsis [Revelación] 7:9, 10). Na akxilhnitaw pi Jehová kamatsokgnilh xtalakapastakni makgapitsi latamanin, pero kamaxkilh talakaskin pi chuna xtsokgkgolh la xchuwinankgo.

DIOS KUENTAJTLAWALH XTACHUWIN

11. Maski akinin tanu tanu tachuwin kgalhiyaw, ¿tuku xlakata uma ni tlawa pi Jehová nila nakinkatachuwinanan?

11 Latamanin tanu tanu tachuwin maklakaskinkgo. Pero uma ni tlawa pi Jehová nila nakinkatachuwinanan. ¿La likatsiyaw? Anta kBiblia ni lhuwa xtachuwin Jesús tatsokgnit ktachuwin nema xla xwanit (Mat. 27:46; Marc. 5:41; 7:34; 14:36). Pero Jehová tlawalh pi tuku xmakatsininan Jesús xtatsokgli chu alistalh xtamatitaxtilh ktachuwin griego  chu kʼamakgapitsi tachuwin. Nachuna, xtamakatsin Dios ni lakgsputli xlakata tlawalh pi judíos chu kstalaninanin Cristo lhuwa copias xtlawakgolh. Chu uma copias klhuwa tachuwin matitaxtika. Max 400 kata akxni xminita Cristo, chatum tsokgna xla takanajla wa pi xtamasiy Jesús xtamatitaxtinita klhuwa tachuwin, la Siria, Egipto, India, Persia chu kʼEtiopía.

12. ¿Tuku tuwa titaxtulh Biblia?

12 Chuna la titaxtunit kilhtamaku lhuwa tiku masputuputunkgonit Biblia, chu tiku matitaxtikgonit kʼatanu tachuwin o tiku xmakgpitsikgo. Akgtum liʼakxilhtit, akxni xtitaxtunita 300 akxni xminita Cristo, chatum mapakgsina xalak Roma limapakgsinalh pi xmasputuka putum biblias. Akxni xtitaxtunita 1,200 kata, chatum tiku xwanikan William Tyndale tsukulh matitaxti Biblia ktachuwin inglés. Xla wa pi komo Dios xmaxkilh talakaskin makgas kilhtamaku nalatama, xʼama tlawa pi asta chatum kgawasa tiku kaj xalak pukuxtu tlakg tlan xakgatekgsli Biblia nixawa sacerdote. Akxni xpulalinanin takanajla tsukukgolh putsastalanikgo, Tyndale tsalataxtulh kʼInglaterra xlakata xmakgatsilh xBiblia chu tlan xʼimprimirlika. Maski xpulalinanin takanajla lhkuyakgolh putum biblias nema tekgskgolh, lhuwa biblias nema tlawalh kalakgchalh lhuwa latamanin. Titaxtulh kilhtamaku Tyndale makgnika chu lhkuyuka. Pero taskujut nema tlawalh ni masputuka chu wa limaklakaskinka xlakata tlawaka akgtum traducción xaʼinglés nema wanikan King James Version (Versión del Rey Jacobo) (kalikgalhtawakga 2 Timoteo 2:9).

13. ¿Tuku katsikgonit biblistas xlakata liwana lakputsananikgonit copias xalamakgasa?

13 Xlikana pi makgapitsi copias xla Biblia nema makgasata katsokgka wi niku kaj xalan nitlan tatsokgnit chu kaj tsinu talakgpali. Pero lhuwa biblistas, liwana likgalhtawakgakgonit lhuwa miles copias chu lhuwa traducciónes xla biblias xala makgasa. ¿Pero tuku tekgskgonit? Ni lhuwa tuku talakgpali kmakgapitsi versículos, lu kaj tsinu, uma ni tlawa pi natalakgpali xtamakatsinin Biblia. Tiku xlikana katsiputunkgo tuku masiya, liwana katsikgo pi kgalhikgo xTachuwin Dios (Is. 40:8). *

14. ¿Niku kʼakglit tachuwin tlan likgalhtawakgakan Biblia la uku?

 14 Maski lhuwa tuku tlawaniputunkanit Biblia, la uku tlan likgalhtawakgakan max k2,800 tanu tanu tachuwin. Ni anan atanu libro nema matitaxtikanit klhuwa tachuwin. Maski lhuwa latamanin ni kanajlanikgo Dios, wa Biblia tuku tlakg tamakgpitsinit asta la makgasa xlikalanka katiyatni. Xlikana pi makgapitsi biblias tsinu talakgpali tuku wan o nila likgalhtawakgakan. Pero tlakg lhuwa biblias lichuwinankgo xlakata takgalhkgalhin chu latamat nema ni kgalhi xlisputni.

XTALAKASKIN XASASTI TRADUCCIÓN

15. 1) ¿Tuku talakgpalinit kkilikgalhtawakgakan lata kata 1919 chu asta la uku? 2) ¿Tuku xlakata pulana kxaʼinglés tlawakan kilikgalhtawakgakan?

15 Kata 1919, makgapitsi xlikgalhtawakganin Biblia litaxtukgolh «skujni xalipaw chu xaskgalala» (Mat. 24:45TNM). Ama kilhtamaku, «skujni xalipaw chu xaskgalala» ktachuwin xaʼinglés wa tlakg xmaklakaskin akxni xkatachuwinan xkachikin Dios. Pero la uku, likgalhtawakga xalak Biblia nema tlawa skujni xalipaw wi kliwaka 700 tachuwin. Chuna la makgasa xmaklakaskinkan tachuwin griego xlakata takgalhtawakga chu akxni xtlawakan negocios, la uku wa inglés nema tlakg tamaklakaskin. Chu wa tachuwin nema tlakg talakgapasa la uku xlikalanka katiyatni. Wa xlakata pulana tlawakan kxaʼinglés kilikgalhtawakgakan chu alistalh matitaxtikan kʼatanu tachuwin.

16, 17. 1) ¿Tuku xmaklakaskin xkachikin Dios? 2) ¿Tuku tlawaka xlakata xmaxkika tuku xmaklakaskin? 3) ¿Tuku xlakaskin tala Knorr?

16 Putum tuku maklakaskikgo xkachikin Dios kBiblia kilhtikgo. Liwakaya 60 kata Biblia nema tlakg xtamaklakaskin kxaʼinglés wa King James Version (Versión del Rey Jacobo). Pero uma traducción xtatlawanit kata 1611, wa xlakata maklakaskin xamakgan tachuwin chu tuwa akgatekgskan. Xamakgan copias akglhuwa mil limin xtukuwani Dios, pero uma Biblia ni lhuwa limin. Nachuna, wi niku kaj xalan nitlan tatsokgnit, chu na limin makgapitsi versículos nema nitu wi kxapulana copias. Chu amakgapitsi traducciónes xaʼinglés na ni lu tlan katsokgkanit.

17 Xkachikin Dios xlakaskin maktum Biblia nema chuna xtatsokgli la xapulana, chu ni tuwa xtaʼakgatekgsli. Wa xlakata kaliyawaka makgapitsi natalan pi xmatitaxtikgolh Biblia kxaʼinglés. Umakgolh natalan  kalilakgapaska Comité de Traducción de la Biblia del Nuevo Mundo. Xlakan kpulakchaxan tomos limaxtukgolh putum Biblia, lata kata 1950 asta 1960. Xapulana tomo mastaka 2 xla agosto kata 1950 kʼakgtum lanka tamakxtumit. Kʼama tamakxtumit, tala Knorr wa pi kskujnin Dios xlakaskinkgo maktum Biblia nema ni tuwa xtaʼakgatekgsli, nitu xlakgpalilh chu xmaklakaskilh tachuwin xala ama kilhtamaku. Chu ni tuwa xkatsinikgolh xaxlikana xlakata Dios. Ama traducción xtalakaskin ni tuwa xlikgalhtawakgaka, chu xʼakgatekgska, chuna la xwanit xapulana nema tsokgkgolh xapulana kstalaninanin Cristo. Tala Knorr xlakaskin pi xkamakgtayalh lhuwa millón latamanin Traducción del Nuevo Mundo xlakata tlan xlakgapaskgolh Jehová.

18. ¿Tuku makgtayananit xlakata tlan namatitaxtikan Biblia klhuwa tachuwin?

18 Kata 1963 kgantaxtulh tuku xlakaskin tala Knorr. Ama kata, Traducción del Nuevo Mundo de las Escrituras Griegas Cristianas xmatitaxtikanita ktachuwin alemán, español, francés, holandés, italiano chu kportugués. Kata 1989, Lakgkgolotsin tiku Pulalinkgo xTatayananin Jehová tlawakgolh akgtum departamento nema xkamakgtayakgolh tiku matitaxtikgo kʼatanu tachuwin Biblia. Chu kata 2005 mastakgolh talakaskin namatitaxtikgo kʼatanu tachuwin Biblia tiku xtlawakgoya revista Makatsinina. Xlakata mastakgolh talakaskin, la uku tatlawanita xatakgatsin o ni xatakgatsin Traducción del Nuevo Mundo k130 tachuwin.

19. 1) ¿Tuku lalh kata 2013? 2) ¿Tuku nalichuwinanaw kʼatanu artículo?

19 Traducción del Nuevo Mundo makgpitsika xaʼinglés liwakaya 60 kata. Lata ama kata, tachuwin inglés talakgpalinit. Wa xlakata talakaskilh natlawakan xasasti traducción. Kilhtamaku 5 chu 6 xla octubre kata 2013 ktamakxtumit nema tatlawa kata kata número 129, 1,413,676 latamanin k31 países akxilhkgolh programa o kʼInternet. Kʼuma tamakxtumit, chatum kgolotsin tiku makgpulalin xtatayananin Jehová masiyalh xasasti Traducción del Nuevo Mundo xaʼinglés. Putum latamanin lu xpaxuwamakgolh, chu lhuwa tiku tasakgolh akxni kamaxkika. Akxni xwi tamakxtumit, tiku xmastakgo taʼakgchuwin xlimaklakaskinkgo xasasti Biblia, chu putum xʼakxilhkgo pi tlakg ni tuwa xtaʼakgatekgsa. Artículo nema aku mima tlakg nalichuwinan uma xasasti Biblia chu la tamatitaxtilh kʼamakgapitsi tachuwin.

^ párr. 6 Tachuwin Septuaginta wamputun «tutumpuxamakaw». Lakpuwankan pi uma tatlawalh 300 kata akxni nina xmin Cristo, chu max 150 kata litlawakgoka. Septuaginta chuntiya xlakaskinka litaxtu xlakata kamakgtaya tiku katsinikgo uma taskujut, tlan naʼakgatekgskgo tachuwin xahebreo nema tuwa akgatekgskan.

^ párr. 8 Makgapitsi tiku lu katsikgo xlakata uma, wankgo pi Mateo tsokgli xlibro khebreo chu alistalh matitaxtilh ktachuwin griego.

^ párr. 13 Kaʼakxilhti artículo La Biblia, una historia de supervivencia, La Atalaya 1 xla noviembre kata 2009. Na kaʼakxilhti apéndice A3 edición revisada de la Traducción del Nuevo Mundo xaʼinglés.