Ankan kxpulakni

Ankan kliputsan

Xtatayananin Jehová

Laksakkan tachuwin totonaco

«Milipaxkit mintalataman chuna la mi’akstu paxkikana»

«Milipaxkit mintalataman chuna la mi’akstu paxkikana»

«Milipaxkit mintalataman chuna la mi’akstu paxkikana.» (MAT. 22:39TNM)

TAKILHTLIN: 25, 36

1, 2. ¿Tuku kinkamasiyaniyan Biblia xlakata tapaxkit?

TAPAXKIT wa tlakg xlakaskinka xtayat Jehová (1 Juan 4:16). Chu Jesucristo lu limasiya xtayat xTlat. Jesús malakatsukika akxni nina xmalakatsukikan putum tuku anankgo, chu talatamanit Dios kʼakgapun lhuwa millones kata. Wa xlakata katsinilh pi Jehová lu xapaxkina (Col. 1:15). Jesús na limasiyanit uma tapaxkit putum kxlatamat, anta kʼakgapun chu kKatiyatni. Wa xlakata liwana katsiyaw pi Jehová chu Jesús putum kilhtamaku nakinkalimasiyanikgoyan pi kinkapaxkiyan akxni nakinkamapakgsikgoyan.

2 Akgtum kilhtamaku, chatum chixku kgalhskilh Jesús tukuya limapakgsin tlakg xlakaskinka xwanit. Jesús kgalhtilh: «“Milipaxkit Jehová miDios xliputum minaku chu xliputum milatamat chu xliputum mintalakapastakni”. Wa uma tlakg xalanka chu xapulana limapakgsin. Xliʼakgtiy, nema xtachuna, wa uma: “Milipaxkit mintalataman chuna la miʼakstu paxkikana”» (Mat. 22:37-39TNM).

3. ¿Tiku kilhchanima kintalatamankan?

 3 Lu xlakaskinka nakalimasiyaniyaw putum latamanin pi kapaxkiyaw. Jesús lichuwinalh pi kilipaxkitkan Jehová chu kintalatamankan. Pero, ¿tiku kilhchanima? Putum tiku lakatsu kinkawilanin. Akgtum liʼakxilhtit, komo tamakgaxtokgnitaw, tiku tlakg xlakaskinka kintalatamankan wa tiku tatamakgaxtokgnitaw. Kinatalankan xalak congregación chu tiku kalitachuwinanaw Dios na kintalatamankan. Kʼuma artículo naʼakxilhaw la nalimasiyayaw pi putum kapaxkiyaw.

KALIMASIYA PI PAXKIYA TIKU TATAMAKGAXTOKGNITA

4. ¿La likatsiyaw pi tiku tamakgaxtokgkgonit tlan napaxuwakgo maski lakgalhinanin?

4 Jehová kamamakgaxtokgli xapulana latamanin. Wa xlakata wa xMalakatsukina tamakgaxtokgat. Dios xlakaskin pi Adán chu Eva xpaxuwakgolh chu xlimalakgatsamakgolh Katiyatni xkamanan (Gén. 1:27, 28). Pero akxni ni kgalhakgaxmatnikgolh Jehová, sputli xtapaxuwankan. Na kinkamatitaxtinikgon talakgalhin chu linin (Rom. 5:12). Xlakata putum tiku tamakgaxtokgkgonit lakgalhinanin, ¿wamputun uma pi nila katipaxuwakgolh? Ni. Tiku tamakgaxtokgkgonit tlan napaxuwakgo. ¿La likatsiyaw? Xlakata kBiblia Jehová kamaxki tlakg xalaktlan tastakyaw (kalikgalhtawakga 2 Timoteo 3:16, 17).

Jehová lakaskin pi xatlat nalimasiyani xfamilia pi paxki

5. ¿Tuku xlakata lu xlakaskinka tapaxkit ktamakgaxtokgat?

5 Xlakata xatapaxuwan natawila akgtum tamakgaxtokgat, Biblia wan pi xlakaskinka naʼanan tapaxkit. Wa uma tuku wa Apóstol Pablo xlakata xaxlikana tapaxkit: «Tapaxkit ni lakapala sitsi chu tlan likatsi. Tapaxkit ni lakgsitsinan, ni tlankajwa, ni tlawa tuku xalimaxana, ni putsa tuku kaj xla tlan nakitaxtuni, ni tunkun lakpuwan pi tlawanimaka tuku nitlan. Ni putum kilhtamaku lakapastaka tuku nitlan tlawanikan. Ni lipaxuwa tuku ni xaʼakgstitum, wata lipaxuwa tuku xaxlikana. Putum tapatinan, putum kanajla, putum kgalhkgalhi, putum tayani. Tapaxkit nikxni katisputli» (1 Cor. 13:4-8TNM). Komo lilakpuwanaw xtachuwin Pablo chu tlawayaw xtastakyaw, tlan napaxuwayaw kkintamakgaxtokgatkan.

Biblia kinkamaxkiyan tastakyaw xlakata nalipaxuwayaw kintamakgaxtokgatkan (Kaʼakxilhti párrafos 6 chu 7)

6, 7. 1) ¿Tuku wan 1 Corintios 11:3 xlakata tiku namapakgsinan? 2) ¿La nalikatsini xpuskat chatum kstalanina Cristo?

6 Jehová laksaknit tiku namapakgsinan kfamilia. Pablo lichuwinalh: «Wa nCristo, xapuxku lantla xlipaks nchixkuwin; chu wa nchixku, na wa xpuxku mpuskat; chu wa Dios, xpuxku nCristo» (1 Cor. 11:3). Chuna la akxilhaw, xachixku wa tiku kgalhi limapakgsin kfamilia. Pero uma ni wamputun pi nitlan nalikatsini xfamilia. Jehová lakaskin pi nakalimasiyani pi kapaxki. Nachuna, Dios wilini xatlan liʼakxilhtit chixku xlakata putum kilhtamaku limasiyani Jesús pi paxki chu nikxni xakstu paxkikan. Wa xlakata, Jesús ni tuwa makgkatsi namaxki kakni Jehová. Jesús wa: «Kpaxkiy xaTlat» (Juan 14:31). Komo Jehová nitlan xtilikatsinilh Jesús, nikxni chuna xwa.

7 Biblia wan pi xachixku tlan mapakgsi xpuskat. Pero na wan pi xlimaxkit kakni (1 Ped. 3:7). ¿La namaxki kakni xpuskat? Namaxki tuku maklakaskin chu akxni ni lakatsalakan xtastakyaw Biblia tlan wi tuku nalaksaka natlawa. Biblia wan: «Wixin mpuchuwa chixkuwin, kapaxkitit mimpuskatkan, xtachuna lantla  mpaxkilh nCristo nkgamputum nkanajlanin, chu na tiakstu[ta]mastalh xpalakatakan» (Efes. 5:25). Chuna la akxilhaw, xlakata Jesús lu xkapaxki kstalaninanin, mastalh xlatamat xpalakatakan. Komo xachixku tlawa la Jesús chu limasiyani xpuskat pi paxki, xpuskat ni tuwa namakgkatsi napaxki, namaxki kakni chu namakgtaya xlakata tuku nalaksaka natlawa (kalikgalhtawakga Tito 2:3-5).

KALIMASIYA PI KAPAXKIYA MINATALAN

8. ¿La nakalikatsiniyaw kinatalankan?

8 Kxliputum katiyatni wilakgolh lhuwa millón tiku skujnanikgo Jehová. ¿La nakalikatsiniyaw? Biblia wan pi putum latamanin tlan nakalikatsiniyaw, pero liwaka kinatalankan (Gál. 6:10; kalikgalhtawakga Romanos 12:10). Apóstol Pedro tsokgli pi komo kgalhakgaxmatniyaw Dios, xliputum kinakujkan nakapaxkiyaw kinatalankan. Na wa pi lu xlakaskinka pi kstalaninanin Cristo nalalimasiyaniyaw pi xlikana lapaxkiyaw (1 Ped. 1:22; 4:8).

9, 10. ¿Tuku xlakata lu makxtum wilakgolh kskujnin Dios?

9 Ni anan xtachuna la xkachikin Dios. ¿Tuku xlakata? Xlakata kapaxkiyaw kinatalankan xliputum kinakujkan. Na paxkiyaw Jehová chu kgalhakgaxmataw xlimapakgsin. Wa xlakata, kinkamaxkiyan xʼespíritu santo. Uma espíritu tlakg tliwakga nixawa putum tuku anan  kxlikalanka kakilhtamaku chu tlawa pi tlan makxtum nakatatawilayaw kinatalankan kxlikalanka katiyatni (kalikgalhtawakga 1 Juan 4:20, 21).

10 Pablo wa pi lu xlakaskinka pi kstalaninanin Cristo nalalimasiyaniyaw pi lapaxkiyaw. Tsokgli: «Nkalikgalhitit wa ntu nkgayaj nalikatsanatit, lu[...] xalakgalhamananin, lu[...] tsatsata mintalakapastaknakan nakgalhiyatit, chu xasmalhwan nawanatit, chu nakgalhiyatit ntapaxuwanaliyan. Kalapaxuwanalipinitit, chu na [nalatapatiyatit] nchatunu amakgapitsin lapi wi nti lamakgasitsiyatit; xtachuna lantla [katapatin] nCristo, na chuna wixin nkatlawatit. Na wantu ntlakg xlakaskinka, mpi nalakgalhiniyatit ntapaxkit, xampi wa yuma ntu lakatanks makxtum tlawanan» (Col. 3:12-14). Maski tanu tanu kinkachikinkan chuntiya lapaxkiyaw, wa xlakata kstalaninanin Cristo lu makxtum wilaw. Lu paxtikatsiniyaw Dios xlakata kgalhiyaw uma tapaxkit nema ni anan xtachuna.

Xlakata lapaxkiyaw chu makxtum layaw uma limasiya pi akinin xaxlikana kstalaninanin Cristo chu limasiyayaw pi Dios kinkalimaklakaskiman xlakata nalichuwinanaw xTamapakgsin kxlikalanka Katiyatni

11. ¿Tuku limasiya pi kgalhiyaw xaxlikana takanajla?

11 Xtatayananin Jehová xlikana lapaxkiyaw chu lu makxtum layaw. Uma limasiya pi kgalhiyaw xaxlikana takanajla. Jesús wa: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit nchatunu chatunu» (Juan 13:34, 35). Chu apóstol Juan tsokgli pi kilikgalhakgaxmatatkan xlimapakgsin Jehová chu kilipaxkitkan kinatalankan komo limasiyaputunaw pi «xlakgskgatan Dios» akinin. Alistalh wa: «Xampi wa yuma ntamakatsinin ntu nkgaxpatnitantit asta xalipulana mpi nalapaxkiyatit nchatunu amakgapitsin» (1 Juan 3:10, 11). Xlakata xtatayananin Jehová lapaxkiyaw chu makxtum layaw uma limasiya pi akinin xaxlikana kstalaninanin Cristo. Na limasiya pi Dios kinkalimaklakaskiman xlakata nalichuwinanaw xTamapakgsin kxlikalanka Katiyatni (Mat. 24:14).

MAMAKXTUMIKAN «LHUWA TACHIXKUWITAT»

12, 13. 1) ¿Tuku tlawama la uku «lhuwa tachixkuwitat»? 2) ¿Tuku tuwa natitaxtu nialh makgas «lhuwa tachixkuwitat»?

12 La uku, atsinu ni putum xtatayananin Jehová makgtapakgsikgo «lhuwa tachixkuwitat». Uma lhuwa latamanin wilakgolh kxlikalanka katiyatni chu tatayakgo xTamapakgsin Dios. Biblia wan pi umakgolh latamanin, lakgtaxtukgonit «ntlanka [takatsanajwat], na chakgakgonit xlhakgatkan, na wa xkgalhni nkalhnilu limasnapapuanikgonit». Uma wamputun pi kanajlanikgo xtamakamastan Jesús. Paxkikgo Jehová chu «tantaku tantaskaka» kakninanikgo chu na paxkikgo Jesucristo (Apocalipsis [Revelación] 7:9, 14, 15).

13 Nialh makgas, akxni naʼanan «tlanka takatsanajwat», Dios namalakgsputu uma xalixkajni  kakilhtamaku (Mat. 24:21; kalikgalhtawakga Jeremías 25:32, 33). Pero Jehová lu kapaxki kskujnanin, chu wa xlakata nakakuentajtlawa chu nakamaxki talakaskin nalatamakgo kParaíso. Chuna la wa pi xʼama tlawa, titaxtunita max 2,000 kata, «nakaxakani putum xlakgpixtajatkan, chu nialh kati’analh linin, nialh kati’analh talipuwan, tatasa chu takatsanajwa». ¿Akxilhlakachipina la max nalatamakan akxni nasputa tuku nitlan, tapatin chu linin? (Apoc. 21:4.)

14. ¿Niku kgalhlit latamanin makgtapakgsikgo la uku uma «lhuwa tachixkuwitat»?

14 Kkata 1914 akxni tsukulh xaʼawatiya kilhtamaku, kaj xwilakgolh 5,000 kskujnin Dios. Maski titaxtukgolh tuku tuwa, tiku xkalaksakkanit naʼankgo kʼakgapun chuntiya lichuwinankgolh Dios xlakata xpaxkikgo xtalatamankan chu espíritu santo xkamakgtaya. Xlakata uma, la uku mamakxtumimaka «lhuwa tachixkuwitat», o lhuwa latamanin tiku nalatamakgo putum kilhtamaku kKatiyatni. Ama lhuwa latamanin litakgatsi max akgtsayan millón xtatayananin Jehová. Umakgolh tamakxtumikgo kliwaka 115,400 congregaciones xlikalanka katiyatni. ¡Chu chuntiya talhuwima! Akgtum liʼakxilhtit, lata septiembre kata 2013 asta agosto kata 2014, tamunukgolh liwaka 275,500 latamanin. Uma wamputun pi akgatunu semana tamunukgolh max 5,300.

15. ¿Tuku kinkamakgtayayan nakaliniyaw tamakatsinin xla xTamapakgsin Dios latamanin?

15 Lu kaks kinkamalakawaniyan la xlilhuwa kgaxmatkgo xlakata xTamapakgsin Dios. Pulaktum tuku kinkamakgtayayan nakamakatsiniyaw, wa kilikgalhtawakgakan, uma matitaxtikanit kliwaka 700 tachuwin. Akgtum liʼakxilhtit, revista Makatsinina wa nema tlakg tamakgpitsi kxlikalanka katiyatni. Akgatunu papaʼ imprimirlikan liwaka 52 millones revistas Makatsinina k247 tachuwin. Atanu lu tlan liʼakxilhtit wa libro ¿Tuku xlikana masiyay Biblia? Matitaxtikanit kliwaka 250 tachuwin, chu imprimirlikanit liwaka 200 millones.

16. ¿Tuku xlakata chuntiya talhuwimakgolh kskujnanin Jehová?

16 Chuntiya talhuwimakgolh kskujnanin Jehová xlakata lipawanaw Dios chu kanajlayaw pi Biblia xTachuwin (1 Tes. 2:13). Maski Satanás ni kinkaʼakxilhputunan chu kinkatlawaniputunan tuku nitlan, chuntiya lu tlan talalinaw Jehová (2 Cor. 4:4).

KALIMASIYA PI PAXKIYA MINTALATAMAN

17, 18. ¿Tuku lakaskin Jehová katlawaw akxni wi tiku lakgmakgan tuku litachuwinamputunaw?

17 Akxni lichuwinanaw Dios, tanu tanu la kinkakgalhtikgoyan latamanin. Makgapitsi kinkakgaxmatnikgoyan, pero amakgapitsin ni kgaxmatputunkgo tuku kalitachuwinamputunaw. ¿Tuku lakaskin Jehová natlawayaw? Maski tanu tanu tuku natlawakgo latamanin, Jehová lakaskin katlawaw tuku wan Biblia. Akgtum liʼakxilhtit, Colosenses 4:6 wan pi putum kilhtamaku nakamaxkiyaw kakni akxni nakatachuwinanaw. Akxni nakgalhmakgtayayaw tuku kanajlayaw, ni xatasitsi nakgalhtinanaw chu namastayaw kakni, xlakata paxkiyaw kintalatamankan (1 Ped. 3:15).

18 Akxni latamanin kinkasitsinikgoyan chu lakgmakgankgo tuku kalitachuwinamputunaw, kalimasiyaniyaw pi kapaxkiyaw chu tlawayaw la Jesús. Biblia wan pi akxni xtalamakgasitsin wanikgolh Jesús lixkajni tachuwin, ni lixkajni kakgalhtilh. Chu «akxni mapatinika, xla niukxni puwa pala namalakgxokgakgoy», wata lipawa Jehová (1 Ped. 2:23, Hua Xasasti Talaccaxlan, 1999). Wa xlakata, akxni nitlan kinkalikatsinikanan, taktujuyaw chu ni kamalakgaxokgeyaw. Ni katamakgapuspitniyaw,  wata liskujaw xlakata natlawayaw tuku tlan xpalakatakan (1 Ped. 3:8, 9).

Kilipaxkitkan kintalamakgasitsinkan, maski nitlan nakinkalikatsinikgoyan

19. ¿La nakalikatsiniyaw kintalamakgasitsinkan?

19 Komo taktujuyaw, nakgalhakgaxmataw uma xtastakyaw Jesús: «Kgaxpatnitantit ntiwankaj: “Napaxkiya wa nti lakatsu litawila [o mintalataman], chi nchu wa mintalatlawana, naxkajniya”. Wampi wa nchu nkit kawaniyan: “Kapaxkitit mintalatlawanakan, [katapatikgotit] wa nti nkamaxkajwalikgoyan, wa ntu ntlan nkatlawanikgotit wa nti nkaxkajnikgoyan, chu na kapalakatlawakgotit oración wa nti xalikgaman katlawakgoyan, chu nkasokgalikgoyan”. Lakimpi xkaman nawanatit minTlatkan nti wi nkakgapun: “Wa nti machichiniy kxokgspunkan wa nti ni lakwan chixkuwin, chu wa nti ntlan chixkuwin, chu na makaminikgoy s[e]n wanti xatlan, chu wa nti ni tlan xtayat”» (Mat. 5:43-45). Kskujnin Dios kilipaxkitkan kintalamakgasitsinkan, o kintalatlawanakan, maski nitlan nakinkalikatsinikgoyan.

20. ¿Tukuya kilhtamaku putum tiku wilakgolh kKatiyatni napaxkikgo Jehová chu xtalatamankan? (Kaʼakxilhti xapulana dibujo.)

20 Putum kilhtamaku kilimasiyatkan pi paxkiyaw Jehová chu kintalatamankan. Maski makgapitsi ni kinkaʼakxilhputunkgoyan o lakgmakgankgo tuku kalitachuwinamputunaw, kamakgtayayaw akxni maklakaskinkgo. Apóstol Pablo tsokgli: «Ti ni ti mpala tu nalipiniyatit, wampi wa yuma militlawatkan mpi nalapaxkiyatit nchatunu amakgapitsin; xampi wa nti mpaxkiy wa nti lakatsu litawi [o xtalataman], makgantaxtilha limapakgsin. Na wa limapakgsin ntu wan: “Ni [natatalakgxtupiya tiku ni tatamakgaxtokgnita, TNM]; Ni timakgninana; Ni tikgalhanana; Ni tiliyawanana ntakgsanin; Ni timakglakgatinana” chu lapi wi akgtum limapakgsin, paksa watiya ntipatu likgantaxtuy xlipaks, wa yuma: “Napaxkiya nti lakatsu litawila lantlata wix akstupaxkikana”. Wa ntapaxkit, ni lakgalhiy wa nti lakatsu litawi; pus wa xpalakata, mpi lapi kgalhiya ntapaxkit, limakgantaxtiya xlipaks limapakgsin» (Romanos 13:8-10). Satanás tlawa pi latamanin ni kalaʼakxilhputunkgolh, pero akinin xlikana paxkiyaw kintalatamankan (1 Juan 5:19). Akxni Jehová namasputu Satanás, demonios chu uma xalixkajni kakilhtamaku, putum tiku wilakgolh nawan kKatiyatni napaxkikgo Jehová chu xtalatamankan. ¡Lanka tasikulunalin nakgalhiyaw!