Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Noviembre kata 2015

Jehová, xapaxkina Dios

Jehová, xapaxkina Dios

«Dios, tapaxkit.» (1 JUAN 4:8, 16)

TAKILHTLIN: 18, 51

1. 1) ¿Tuku tlakg xlakaskinka tayat kgalhi Dios? 2) ¿La makgkatsiyaw akxni katsiyaw pi Dios tapaxkit?

BIBLIA wan pi «Dios, tapaxkit» (1 Juan 4:8). Uma wamputun pi tapaxkit wa tlakg xlakaskinka tayat nema Dios kgalhi. Jehová ni kajwatiya makgkatsi tapaxkit, wata wa tapaxkit. Putum tuku tlawa, tlawa xlakata paxkinan. Lu paxtikatsiniyaw xlakata tapaxkit tlawalh pi xmalakatsukilh putum kakilhtamaku chu putum tuku staknan.

2. ¿La likatsiyaw pi Jehová kinkapaxkiyan? (Kaʼakxilhti xapulana dibujo.)

2 Katsiyaw pi Jehová paxki putum tuku malakatsukinit. Wa xlakata liwana katsiyaw pi namakgantaxti putum tuku wanit. Xlakata kinkapaxkiyan, «lilhkanit akgtum nkilhtamaku, akxni [akgstitum] naliputsananiy ntachixkuwitat», chu lakgayawanit xKgawasa, Jesucristo (Hech. 17:31). Liwana katsiyaw pi Jesús akgstitum nakinkaputsananiyan. Ama kilhtamaku, putum latamanin tiku nakgalhakgaxmatnankgo napaxuwakgo putum kilhtamaku chu lu tlan nakakitaxtuni kkilhtamaku nema aku namin.

 TUKU MASIYA TUKU LATILHANIT KKAKILHTAMAKU

3. Komo Jehová ni xkinkapaxkin, ¿la xkinkakitaxtunin?

3 Komo Jehová ni xkinkapaxkin, ¿la xkinkakitaxtunin kkilhtamaku nema aku namin? Latamanin chuntiya xlamapakgsikgolh kxtamapakgsin Satanás, xalixkajni xdioskan (2 Cor. 4:4; 1 Juan 5:19; kalikgalhtawakga Apocalipsis [Revelación] 12:9, 12). ¡Lu nitlan xkinkakitaxtunin!

4. ¿Tuku xlakata Jehová mastalh talakaskin pi Satanás xlakatakilh?

4 Akxni Satanás lakatakilh Jehová, na tlawalh pi Adán chu Eva xlakatakikgolh. Limasiyaputulh pi Dios ni lakgchan namapakgsinan kxlikalanka kakilhtamaku. Nachuna, wa pi wa tlakg tlan mapakgsina ni xawa Dios (Gén. 3:1-5). Xlakata Jehová lu skgalala, mastalh talakaskin pi xtitaxtulh kilhtamaku xlakata Satanás xlimasiyalh komo xlikana tuku xwanit. Pero talimasiyanit pi Satanás chu latamanin ni tlan mapakgsinanin.

Jehová ni kinkatlawan chuna la tlan kiʼakstukan xtapakgsiw chu xkinkalakgchan kiʼakstukan natapakgsiyaw

5. ¿Tuku limasiyanit tuku latilhanit kkakilhtamaku?

5 La uku, kakilhtamaku tlakg nitlan tawilama. Kʼuma 100 kata nema titaxtunit, liwaka 100 millones latamanin nikgolh kʼguerras. Biblia wan pi «kxaʼawatiya kilhtamaku» latamanin tlakg nitlan xʼamakgo likatsikgo (2 Tim. 3:1, 13TNM). Na wan «pi chixku ni lakgchan xtiji. Nipara tsinu lakgchan chixku xakstu napulalin xtatukit» (Jer. 10:23). Uma lu xlikana. Jehová ni katlawalh latamanin xlakata xakstukan natapakgsikgo, talakaskin pi wa nakapulalin.

6. ¿Tuku xlakata Dios mastanit talakaskin pi chuntiya kalatamakgolh tiku lixkajni likatsikgo?

6 ¿Tuku xlakata Jehová mastanit talakaskin pi chuntiya kalatamakgolh tiku lixkajni likatsikgo? Chuna litasiyanit pi xTamapakgsin Dios wa tlakg xatlan. Kkilhtamaku nema aku namin, Dios nakamasputu putum tiku lixkajni likatsikgo. Alistalh, komo wi tiku natlawa kalakpuwanka pi Dios ni lakgchan namapakgsinan, lakapala nalakkaxtlawa. Nalimaklakaskin tuku latilhanit kkakilhtamaku xlakata nalimasiya pi tiku lakatakinankgo xlilat nakamasputukan. Nialh katimastalh talakaskin pi nalatamaparakgo tiku nitlan likatsikgo.

LA KINKALIMASIYANIYAN DIOS PI KINKAPAXKIYAN

7, 8. ¿La kinkalimasiyaniyan Jehová pi kinkapaxkiyan?

7 Pulaklhuwa la kinkalimasiyaniyan Jehová pi kinkapaxkiyan. Akgtum liʼakxilhtit, kalilakpuwanti la lu lanka chu lu lilakgatit putum kakilhtamaku. Kxlikalanka kakilhtamaku anan lhuwa mil millones planetas chu staku. Chichini na akgtum staku. Komo ni xʼanalh Chichini nila xlatamaka kKatiyatni. Chuna la wan Romanos 1:20, putum uma kinkalimasiyaniyan pi Jehová kiMalakatsukinakan chu lu tliwakga, skgalala chu xapaxkina.

Jehová lakkaxwililh Katiyatni xlakata tuku staknankgo xlipaxuwakgolh

8 Jehová lakkaxwililh Katiyatni xlakata tuku staknankgo xlipaxuwakgolh chu kawililh  latamanin kxastlan jardín. Na kamaxkilh akgtum talakapastakni nema ni xkgalhi talakgalhin chu tlawalh xlakata tlan xlatamalh putum kilhtamaku (kalikgalhtawakga Apocalipsis 4:11). Salmo 136:25, na wan pi Jehová kamawi putum tuku staknankgo, xlakata xtapaxkit nikxni sputa.

9. Maski Jehová xapaxkina, ¿tuku ni akxilhputun?

9 Maski Jehová xapaxkina, ni akxilhputun tuku nitlan. Wa xlakata Salmo 5:4-6 wan pi Jehová ni lakgati tuku nitlan chu ni kaʼakxilhputun tiku lixkajni likatsikgo, tiku lakluku chu tiku akgsaninankgo.

NIALH MAKGAS NASPUTA TUKU NITLAN

10, 11. 1) ¿Tuku nakaʼakgspula tiku lixkajni likatsikgo nialh makgas kilhtamaku? 2) ¿Tuku nakamaxki Jehová tiku kgalhakgaxmatkgo?

10 Chuna la akxilhnitaw, Jehová xapaxkina chu ni akxilhputun tuku nitlan. Akxni nalakkaxwili, namasputu putum tuku nitlan. Biblia wan pi tiku nitlan likatsikgo nakamasputukan, «pero tiku lipawankgo Jehová wa nakamaxkikan katiyatni». Chu na wan pi nialh makgas, nakamasputu xtalamakgasitsin Jehová (Sal. 37:9, 10, 20).

11 ¿Tuku nakamaxki Jehová tiku kgalhakgaxmatkgo chu paxtikatsinikgo xtapaxkit? Natlawa pi lu tlan kakakitaxtunilh kkilhtamaku nema aku namin. Biblia wan pi «tiku xa’akgstitum xlakan nawan katiyatni» chu anta nalatamakgo putum kilhtamaku (Sal. 37:29). Tiku ni makgatsankgananikgo Dios lu napaxuwakgo chu ni katikgalhikgolh taʼakglhuwit (Sal. 37:11). ¿Tuku xlakata? Xlakata Dios tiku lu kinkapaxkiyan putum kilhtamaku tlawa pi tlan nakakitaxtuni kskujnanin tiku ni makgatsankgananikgo. Biblia wan pi «nakaxakani putum xlakgpixtajatkan, chu nialh kati’analh linin, nialh kati’analh talipuwan, tatasa chu takatsanajwa». Nialh katiʼanalh tuku nitlan (Apoc. 21:4TNM).

12. ¿Tuku kilitlawatkan xlakata Jehová xalakatitum nakinkaʼakxilhan?

12 Biblia kinkawaniyan pi putum tiku Jehová naʼakxilha pi «lakatitum lamaj», o ni tlawa tuku nitlan, xalipaxuw nalatama kkilhtamaku nema aku namin. Na wan pi Dios nakamasputu putum tiku lixkajni likatsikgo chu ni kgalhakgaxmatnikgo (Sal. 37:37, 38SXP). Komo lakaskinaw pi Jehová xalakatitum kakinkaʼakxilhni, talakaskin nalakgapasaw chu na nalakgapasaw xKgawasa, chu kilikgalhakgaxmatatkan putum tuku kinkawaniyan (kalikgalhtawakga Juan 17:3). Liwana kilikatsitkan pi uma kakilhtamaku nialh makgas namasputukan, «pero tiku tlawa xtalakaskin Dios putum kilhtamaku latama» (1 Juan 2:17TNM). Xlakata nialh makgas namasputukan uma kakilhtamaku, lu xlakaskinka namakgantaxtiyaw uma tastakyaw: «Kalipawanti Jehová chu katlawanti kxtiji» (Sal. 37:34).

WA TUKU TLAKG LITASIYA PI JEHOVÁ KINKAPAXKIYAN

13. ¿Tuku tlakg litasiya pi Jehová kinkapaxkiyan?

13 Maski lakgalhinanin akinin, tlan nakgalhakgaxmatniyaw Dios. Na tlan xʼamigos nawanaw,  xlakata Jesús mastalh xlatamat. Wa tuku tlakg litasiya pi Dios kinkapaxkiyan. Jehová makamilh xKgawasa xlakata xnilh chu tiku xkgalhakgaxmatnankgolh xlakgtaxtukgolh ktalakgalhin chu klinin (kalikgalhtawakga Romanos 5:12 chu 6:23). Jehová liwana xkatsi pi Jesús ni xʼama makgatsankganani kKatiyatni, xlakata ni xmakgatsankgananinit kʼakgapun lhuwa kilhtamaku. Jehová lu nitlan limakgkatsilh akxni akxilhli pi latamanin lixkajni likatsinikgolh xKgawasa tiku lu paxki. Pero Jesús putum kilhtamaku limasiyalh pi Dios lakgchan nakinkamapakgsiyan. Na limasiyalh pi chatum tiku ni kgalhi talakgalhin tlan ni namakgatsankganani Dios maski natitaxtu tuku lu tuwa.

Xlakata Dios kinkapaxkiyan makamilh xKgawasa (Kaʼakxilhti párrafo 13)

14, 15. Xlakata Jesús nilh, ¿la litamakgtayayaw putum latamanin?

14 Jesús lu patinalh, pero ni makgatsankgananilh Dios maski makgnika chu limasiyalh pi wa xtlat tiku lakgchan namapakgsinan. Xlakata Jesús nilh, ¿la litamakgtayayaw putum latamanin? Tlawa pi tlan nalatamayaw putum kilhtamaku kParaíso. Apóstol Pablo wa pi uma tamakamastan limasiya pi Jehová chu Jesús lu kinkapaxkiyan. Pablo wa pi max niti namastaputun xlatamat xpalakata tiku akgstitum chixku chu na wa pi max makgapitsi namastaputunkgo xlatamatkan xpalakata tiku tlan likatsi. Pero wa pi Dios limasiya pi lu kinkapaxkiyan akxni makamilh xKgawasa xlakata xnilh kimpalakatakan «akxni lakgalhinaninku xwanitaw» (Rom. 5:6-8). Chu apóstol Juan tsokgli: «Xlakata uma Dios kinkalimasiyanin pi kinkapaxkiyan, xlakata Dios malakgachalh kkatiyatni kaj xachastum xKgawasa xlakata tlan nakgalhiyaw latamat xpalakata. Wa uma tuku kilhchanima tapaxkit, ni xlakata akinin paxkinitaw Dios, wata kilhchanima pi xla kinkapaxkin chu malakgachalh xKgawasa xlakata nakinkapalakgaxokgoyan kintalakgalhinkan» (1 Juan 4:9, 10TNM).

15 Jesús na wa pi Dios lu kapaxki latamanin, wa xlakata mastalh xlatamat xKgawasa «xlakata putum tiku nakanajlani ni namalakgsputukan  wata nakgalhi latamat nema nikxni sputa» (Juan 3:16TNM). Maski Jehová lu nitlan limakgkatsilh, mastaputulh talakaskin pi xKgawasa xnilh kimpalakatakan. Uma limasiya pi lu kinkapaxkiyan, chu uma nikxni katitalakgpalilh. Wa xlakata Pablo tsokgli: «Wa xpalakata, lu[...] tlan klikatsi mpi asta ni mpala wa linin, chu na ni mpala wa nkakilhtamaku, ni mpala ángeles, chu na ni mpala wa nti malanankgoy, chu na ni mpala ti nkgalhikgoy litliwakga, chu na ni mpala wa ntu anan nchu, chu na ni mpala wa ntu namin nkilhtamaku, chu na ni mpala wa ntu xala katalhman, chu na ni mpala wa ntu xala katutsu, chu na ni mpala wa nkatuwaj tamalakatsukun, ntlan [nakinkamamakgatliyan, TNM] kxtapaxkit Dios wa ntu nkgalhiyaw xpalakata Cristo Jesús nkimPuchinakan» (Rom. 8:38, 39).

XTAMAPAKGSIN DIOS MAPAKGSINAMAJA

16. 1) ¿Tuku xTamapakgsin Mesías? 2) ¿Tiku mapakgsina limaxtulh Jehová kʼuma Tamapakgsin?

16 Atanu tuku limasiya pi Jehová kinkapaxkiyan wa xTamapakgsin Mesías. Uma Tamapakgsin Dios malakatsukilh, chu mapakgsina tlawalh tiku lu kapaxki latamanin chu liwana katsini la nakamapakgsi (Prov. 8:31). Uma mapakgsina, Jesucristo, wa Mesías. Nachuna, kalaksakkanit 144,000 latamanin tiku natamapakgsinankgo Cristo kʼakgapun. Akxni lakastakwanankgo, linkgo kxtalakapastaknikan putum tuku titaxtukgolh unu kKatiyatni (Apoc. 14:1). Akxni Jesús latamalh kKatiyatni, Tamapakgsin wa tuku tlakg lichuwinalh akxni xlichuwinan Dios. Chuna kamasiyanilh kstalaninanin natlawakgo oración: «KinTlatikan tiku wilapi kʼakgapun, katamasantujlilh mintukuwani. Kamilh minTamapakgsin. Katatlawalh mintalakaskin, chuna la kʼakgapun, nachuna kkatiyatni» (Mat. 6:9, 10TNM). Lu lakaskinaw pi kakgantaxtulha uma oración chu Tamapakgsin kakasikulunatlawalh putum latamanin.

17. ¿Tuku xlakata wanaw pi Jesús ni mapakgsinan la mapakgsinankgo latamanin?

17 Jesucristo ni mapakgsinan la mapakgsinankgo latamanin. Lakchixkuwin tlawakgonit guerras chu kamakgnikgonit lhuwa millones latamanin. Pero Jesús kinkapaxkiyan chu na kgalhi lakswan xtayat Jehová, pero tlakg kgalhi tapaxkit (Apoc. 7:10, 16, 17). Jesús wa: «Kakilakgtantit xlipaks wixin wa nti skujtamakganitantit, chu nkukananitantit, lakimpi kit nakkamajaxayan. Kalipitit nkimukiwi kmiʼokgspunkan, chu na kakinkatsinitit, mpi lu[...] xasmalhwa nkit, chu na tsatata nkinaku. Na natakgsniyatit ntajaxni milistaknakan. Xampi wa nkimukuwi, lu[...] ni tuwa liyankan, chu wa nkintakuka, skapaka» (Mat. 11:28-30). ¡Jesús lu kinkapaxkiyan!

18. 1) ¿Tuku latilhanit lata kata 1914? 2) ¿Tuku naʼakxilhaw kʼartículo nema aku mima?

18 Biblia masiya pi xTamapakgsin Dios tsukulh mapakgsinan kʼakgapun kkata 1914. Lata ama kilhtamaku kamamakxtumimaka xaʼawatiya tiku litakgatsikgo 144,000 chu natamapakgsinankgo Cristo kʼakgapun. Na kamamakxtumimaka makgapitsi latamanin tiku nalakgtaxtukgo akxni namasputukan uma kakilhtamaku chu nalatamakgo kParaíso. Umakgolh kalilakgapaskan, «lhuwa tachixkuwitat», o lhuwa latamanin (Apoc. 7:9, 13, 14). ¿La xlilhuwa umakgolh latamanin? ¿Tuku lakaskin Dios katlawakgolh? Naʼakxilhaw kʼartículo nema aku mima.