Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Octubre kata 2015

Nitu kakinkamamakgxtakgnin la naskujnaniyaw Jehová

Nitu kakinkamamakgxtakgnin la naskujnaniyaw Jehová

«Anta niku xla tawi [...] tawi María laki xla nakgaxmatniy xtachuwin. Marta lu xliʼakgatiyama xlitaskujut.» (LUC. 10:39, 40, Xasasti Tamakatzinin [Coyutla], TXC)

TAKILHTLIN: 40, 55

1, 2. 1) ¿Tuku xlakata Jesús xpaxki Marta? 2) ¿Tuku tlawalh Marta nema ni xlitlawat xwanit?

¿LA XWANIT xtayat Marta, xtala Lázaro? Biblia wan pi Jesús xʼamiga xʼakxilha chu lu xpaxki. Xlikana, Jesús na xkapaxkikgo chu xkamaxki kakni amakgapitsi lakpuskatin. Akgtum liʼakxilhtit, xla na xpaxki María, atanu xtala Lázaro. Na lu xpaxki María tiku xtse xwanit (Juan 11:5; 19:25-27). Pero ¿tuku xlakata xpaxki Jesús Marta?

2 Jesús xpaxki Marta xlakata lhuwa tuku xkamaxki amakgapitsin chu lu kskuja, pero wa tuku tlakg xlipaxki, wa xlakata lu xkanajlani Dios. Lu xkanajla pi Jesús wa Mesías xwanit tiku xwankanit pi namin chu xkanajla putum tuku xmasiya (Juan 11:21-27). Maski chuna xlikatsi, xmin kilhtamaku na xwan o xtlawa tuku ni xlilat. Akgtum kilhtamaku akxni Jesús kalakgapaxialhnalh kxchikkan, Marta sitsinilh María chu wanilh Jesús: «Kimpuchina, ¿[...] nipara tsinu lakpuwana pi  akit ktlawanimakgolh xlitaskujut wantu xlitlawat [...] María? Pus luu katlawa litlan kawani pi kakimakgtayalh» (kalikgalhtawakga Lucas 10:38-42). ¿Tuku xlakata sitsilh Marta? ¿Tuku kinkamasiyaniyan xtakgalhtin Jesús?

MARTA ATANU TUKU XTLAWAMA

3, 4. 1) ¿Tuku xlakata Jesús wanilh María lakwan tachuwin? 2) ¿La makgamakglhtinalh Marta xtastakyaw Jesús? (Kaʼakxilhti xapulana dibujo.)

3 Jesús lu xpaxtikatsini xlakata Marta chu María wanikgolh pi xʼalh kxchikkan, wa xlakata lhuwa tuku tsukulh kamasiyani nema lu xlakaskinka. María lu xkatsiputun tuku xmasiya Lanka Makgalhtawakgena, wa xlakata tunkun tawi chu tsukulh kgaxmatni. Chu Marta, ¿tuku tlawalh? Na tlan xmakgxtakgli tuku xtlawama chu tlan xtikgaxmatnilh Jesús. Xlikana pi lu lakwan tachuwin xwanilh.

4 Pero Marta atanu tuku tsukulh tlawa chu nitu xkgaxmatnima Jesús. Wata tipalhuwa liwat xtlawama chu wi tuku xlakkaxwilima xlakata Jesús tlan xmakgkatsilh. Akxni akxilhli pi María ni xmakgtayama, sitsilh chu wanilh Jesús tuku nitlan xʼakxilha. Jesús xkatsi pi lu lhuwa tuku xtlawama. Wa xlakata liwana wanilh: «Kgoxuta wix Marta, wix xlikana lu akgatiyuj lilapat katuwa wantu militaskujut». Chu wanilh pi ni tuwa liwat xtlawalh. Alistalh wanilh María lakwan tachuwin xlakata liwana xkgaxmatnima, wa pi tlakg tlan tuku xlaksaknit chu niti xʼama makglhti. Alh kilhtamaku María max nialh lakapastakli tuku walh ama kilhtamaku pero xlikana pi putum kilhtamaku xlakapastaka tuku lichuwinalh Jesús. Akxni xtitaxtunitta liwaka 60 kata, apóstol Juan lichuwinalh: «Lu[...] xpaxkiy Jesús Marta, chu xtala» (Juan 11:5). Wa xlakata katsiyaw pi Marta kgaxmatnilh la Jesús liwana stakyawalh chu skujnanilh Jehová putum kxlatamat.

5. 1) ¿Tuku xlakata tuwa la uku nakuentajtlawaniyaw tuku tlakg xlakaskinka? 2) ¿Tuku takgalhskinin nakgalhtiyaw kʼuma artículo?

5 Chuna la akxilhaw, kilhtamaku akxni xtsokgmaka Biblia, xʼanan tuku xkamamakgxtakgniputun xtaskujut Jehová tiku xlakskujnin xwankgonit. Pero la uku tlakg lhuwa anan tuku nakinkamakglhtiyan kilhtamaku. Krevista La Atalaya 1 xla abril kata 1959, wa pi kstalaninanin Cristo xlikuentajtlawatkan xwanit pi tuku xasasti xtaxtuma, ni xtlawalh pi xmakgxtakgolh tuku tlakg xlakaskinka. Amakgolh kata asta xtasiya pi chali chali wi tuku xasasti xtaxtu. Revistas, radio, cine chu televisión lu xkamaklakaskinkan. Revista La Atalaya lichuwinalh pi chuna la xtalakatsuwilh lisputni, tlakg xʼanalh tuku xkinkamakglhtin kilhtamaku. Chu chuna lanit. ¿La tlan natlawayaw la María chu nitu natlawa pi ni naskujnaniyaw Jehová?

NI LU KALIMAKLAKASKIW TUKU ANAN KKAKILHTAMAKU

6. ¿La limaklakaskinaw xlakskujnin Dios tuku xalaksasti taxtutilhama?

6 Xlakskujnin Jehová limaklakaskinitaw tuku xasasti taxtuma xlakata natalichuwinan Dios. Akgtum liʼakxilhtit, akxni nina xmin xaPulana Guerra xLikalanka Katiyatni chu akxni xwija guerra, xlitamaklakaskin akgtum programa nema xlimin dibujos ktanu tanu color, xtakgaxmata chu xtasiya xadibujo. Xwanikan «Foto-Drama de la Creación». Xlakata uma programa, lhuwa millones tiku xalak tanu tanu países katsinikgolh pi Jesús nialh makgas natlawa pi nialh katiʼanalh tuku nitlan kKatiyatni. Alistalh na limaklakaskinkgolh radio xlakata nakamakatsinikan xTamapakgsin  Dios lhuwa latamanin xlikalanka katiyatni. Chu la uku maklakaskinaw Internet xlakata nakamakatsiniyaw putum latamanin, asta tiku makgat lamakgolh.

Ni kamastaw talakaskin pi tuku ni xlakaskinka kakinkamakglhtin kinkilhtamakujkan chu nialh naskujnaniyaw Jehová (Kaʼakxilhti párrafo 7)

7. 1) ¿Tuku xlakata ni lu kilimaklakaskinatkan kakilhtamaku? 2) ¿Tuku kuentajkilitlawatkan? (Kaʼakxilhti nota.)

7 Apóstol Pablo wa pi ni lu namaklakaskinaw kakilhtamaku (kalikgalhtawakga 1 Corintios 7:29-31). Wa xlakata lu kuentajkilitlawatkan ni lhuwa kilhtamaku nalimaklakaskinaw tuku wi kkakilhtamaku. Xlikana nila wanaw pi putum nitlan tuku anan. Pero komo ni nastalaniyaw xtastakyaw Pablo, tuku xalak kakilhtamaku natlawa pi lhuwa kilhtamaku namakgatsankgayaw. Chu max asta nialh natlawayaw tuku tlakg xlakaskinka, wa naskujnaniyaw Jehová (kalikgalhtawakga Efesios 5:15-17). ¿Tuku max nalimakgatsankgayaw kinkilhtamakujkan? Wa tuku ni lu xlakaskinka, la akxni likgalhtawakgakan makgapitsi libros, akxilhkan televisión, paxialhnantapulikan, tamawanantapulikan, malakgachakan mensajes, akxilhkan noticias o naʼakxilhkan tiku tlajanalh ktakgaman, naputsakan tuku xasasti taxtulh xaʼelectrónico chu atanu. Makgapitsi latamanin ni la makgxtakgkgo uma tuku lismanikgonit (Ecl. 3:1, 6). *

8. ¿Tuku xlakata lu xlakaskinka napaxkiyaw Jehová chu ni tuku xalak kakilhtamaku?

8 Satanás lakaskin pi lu kamaklakaskiw tuku anan kkakilhtamaku chu nialh kaskujnaniw Jehová. Chuna tlawalh akxni xlamakgolh xapulana kstalaninanin Cristo, chu nachuna kinkamatlawiputunan (2 Tim. 4:10). Pero Biblia kinkawaniyan pi ni napaxkiyaw tuku anan kkakilhtamaku wata wa Jehová. ¿Tuku xlakata? Komo chuna natlawayaw nalimasiyayaw pi kgalhakgaxmataw chu xʼamigos nawanaw (1 Juan 2:15-17). Wa xlakata kiliʼakxilhatkan kilatamatkan komo tuku xalak kakilhtamaku kaj limakgapalamaw. Komo chuna, katlawaw tuku natalakaskin xlakata namakgxtakgaw.

 KALIMAXTUNIW KILHTAMAKU TUKU TLAKG XLAKASKINKA

9. 1) ¿Tuku tlakg xlakaskinka xlitlawatkan xwanit kstalaninanin Jesús? 2) ¿Tuku tlan liʼakxilhtit kawilinilh Jesús kstalaninanin?

9 Chuna la akxilhnitaw, Jesús masiyanilh Marta ni nalimakgatsankga xkilhtamaku tuku ni lu xlakaskinka. Jesús na watiya tuku kamasiyanilh kstalaninanin. Kawanilh pi wa pulana xwilikgolh kxlatamatkan xTamapakgsin Dios chu wa Jehová kskujnanikgolh (kalikgalhtawakga Mateo 6:22, 33). Nachuna lu tlan liʼakxilhtit kawilinilh chu nikxni lhuwa tuku kgalhilh. Nipara kgalhilh akgtum chiki o xtiyat (Luc. 9:58; 19:33-35).

10. ¿Tuku lu tlan liʼakxilhtit kinkawilinin Jesús?

10 Jesús ni mastalh talakaskin pi wi tuku xtlawalh nialh nalichuwinan Dios. Akgtum kilhtamaku xlichuwinama Dios kCapernaum. Akxni makgalhsputulh, lhuwa tiku tlawaputunkgolh pi tlakg makgas xtamakgxtakgli. Pero ¿tuku tlawalh Jesús? Chuntiya tlawalh tuku tlakg xlakaskinka, kawanilh pi xliʼanat xwanit alakatanu xlakata xlichuwinalh xTamapakgsin Dios (Luc. 4:42-44). Chu chuna tlawalh. Makgat xʼan kamasiyani latamanin xlakata xTamapakgsin Dios. Lu kskuja chu maski ni lakgalhina xwanit xmin kilhtamaku xjaxputun (Luc. 8:23; Juan 4:6).

Jesús masiyalh pi ni lu nalitaʼakglhuwiyaw xlakata tuku nakgalhiputunaw, xlakata max natlawa pi nialh naskujnaniyaw Dios

11. 1) Akxni chatum chixku xkgalhi akgtum taʼakglhuwit, ¿tuku tlawalh Jesús akxni skinilh tamakgtay? 2) ¿Tuku kamasiyanilh Jesús xtamakgalhtawakgen?

11 Akgtum kilhtamaku, Jesús wi tuku xkamasiyanima kstalaninanin. Kaj xalan milh chatum chixku, chu skinilh tamakgtay xlakata xtalakkaxtlawalh akgtum taʼakglhuwit. Wanilh: «Makgalhtawakgana, kawani kintala pi [...] lakxtum kakintamapapitsinilh [...] wantu kinkamakgaxtakgninitan kintlat». Pero Jesús ni makgtayalh ama chixku. ¿Tuku xlakata? Xlakata xkamasiyanima kstalaninanin chu ni mastalh talakaskin pi atanu tuku xmamakgxtakgalh. Wata limaklakaskilh uma xlakata xkamasiyanilh kstalaninanin pi ni lu xlitakglhuwikgolh lhuwa tuku xkgalhikgolh, xlakata xtlawalh pi nialh kskujnanikgolh Dios (Luc. 12:13-15, Hua Xasasti Talaccaxlan, TXS, 1999).

12, 13. 1) ¿Tuku tlawalh Jesús kxtemplo Jerusalén? 2) ¿Tuku tlawalh Jesús akxni Felipe wanilh pi wi tiku xlakgapasputunkgo?

12 Akxni xtalakatsuwima kilhtamaku xnilh Jesús, lu tuwa makgkatsilh (Mat. 26:38; Juan 12:27). Xkatsi pi lu xʼama patinan chu xʼama niy. Pero na xkatsi pi pulana lhuwa tuku xlitlawat xwanit. Akgtum liʼakxilhtit, akxni xtsankga akgkitsis kilhtamaku akxni xʼama niy, kgetawilalh tantum burro chu chuna tanucha kJerusalén. Lhuwa latamanin wankgolh pi xreykan xwanit (Luc. 19:38). Lichali, katamakxtulh Jesús ktemplo tiku kstanamakgolh chu xkaʼakgskgawikgo latamanin xlakata lhuwa tumin xtlajakgolh (Luc. 19:45, 46).

13 Makgapitsi griegos xʼankgonit kJerusalén xlakata nakatatlawakgo Paskua judíos.  Akxni akxilhkgolh tuku tlawalh Jesús ktemplo, kaks lakawankgolh. Wa xlakata kgalhskinkgolh apóstol Felipe komo tlan xtachuwinankgolh Jesús. Pero Jesús ni lakaskilh. Xlakata ni xputsama tiku natataya o nalikgawa. Tuku tlakg xlakaskinka xʼakxilha wa pi xtlawalh xtalakaskin Jehová, wa pi xmastalh xlatamat kimpalakatakan. Chu kamalakapastakalh kstalaninanin pi nialh makgas xʼama masta xlatamat chu kawanipa pi komo chuna xtalakaskilh na xlimastatkan xwanit xlatamatkan. Chu kawanilh pi komo xmastakgolh xlatamatkan, Jehová xkaxokgonilh chu xkamaxkilh latamat nema nikxni sputa. Xlikana pi Felipe kawanilh griegos uma lu tlan tamakatsin (Juan 12:20-26).

14. Maski Jesús pulana xwili nalichuwinan Dios, ¿tuku na tlawalh akxni xlama kkatiyatni?

14 Akxni Jesús xlama kkatiyatni, tuku tlakg xlimaklakaskin xkilhtamaku wa pi xlichuwinan Dios. Maski chuna, na xlimaxtu kilhtamaku atanu tuku natlawa. Akgtum liʼakxilhtit, katsiyaw pi kilalh niku xtamakgaxtokgmaka, anta tlawalh pi chuchut xlitaxtulh tlakg xatlan vino (Juan 2:2, 6-10). Na alh katawayan kxchikkan xʼamigos chu amakgapitsi tiku xkgaxmatputunkgo tuku xmasiya (Luc. 5:29; Juan 12:2). Pero tuku tlakg xlakaskinka wa pi xputsa kilhtamaku xlakata xtlawalh oración, xlakata wi tuku xlilakpuwanalh chu xjaxli (Mat. 14:23; Mar. 1:35; 6:31, 32).

NITU KAKINKAMAMAKGXTAKGNIN XTASKUJUT DIOS

15. 1) Chuna la wa apóstol Pablo, ¿tuku kilitlawatkan akinin kstalaninanin Cristo? 2) ¿Tuku liʼakxilhtit kinkawilinin?

15 Apóstol Pablo wa pi kstalaninanin Cristo litaxtuyaw la tiku lu makgat xlikgosnatkan ktakgaman. Komo champutunaw niku kilichanatkan, putum kilimakgxtakgatkan tuku natlawa pi ni lakapala nakgosnanaw o natachokgoyaw (kalikgalhtawakga Hebreos 12:1). Chu Pablo kinkamaxkin akgtum lu tlan liʼakxilhtit. Pablo tlan lhuwa tumin xtikgalhilh chu lu xtilakgapaska kxtakanajlakan judíos. Pero makgxtakgli uma, chu wa tsukulh tlawa «tuku tlakg xlakaskinka». Kajwatiya xlichuwinan Dios chu lu makgat niku kilichuwinalh la kSiria, kʼAsia Menor, kMacedonia chu kJudea. Lu xlakaskinka xʼakxilha namakglhtinan xtatlaja, wa pi xlatamalh kʼakgapun. Wa xlakata wa: «Kpatsankga wantu xapulh aya titaxtunit kkilatamat, [...] wata kliakgaʼaniy wantu tsankgay [...] naklakgchan wantu kakxilhlakachanit nakimaxkikan» (Filip. 1:10TNM; Filip. 3:8, 13, 14TXS, 1999). Chu xlakata ni xtamakgaxtokgnit, tlan tlakg skujnanilh Dios (1 Cor. 7:32-35).

Pablo lakgmakgalh xlakata rico nawan chu lu xlakgapaska chu wa pulana wililh «tuku tlakg xlakaskinka»

16, 17. 1) Komo tamakgaxtokgnitaw o ni, ¿la tlan nachuna natlawayaw la Pablo? 2) ¿La nachuna tlawalh akgtum tamakgaxtokgat xalak Gales la tlawalh Pablo?

16 La uku, lhuwa tiku laksakkgonit ni natamakgaxtokgkgo xlakata tlakg naskujnanikgo  Jehová (Mat. 19:11, 12). Makgapitsi tiku ni tamakgaxtokgkgonit, ni lhuwa tuku lakgayakgolh kfamilia nixawa tiku tamakgaxtokgkgonit. Pero, komo akinin tamakgaxtokgnitaw o ni, putum kuentajkilitlawatkan pi nitu natlawa nialh naskujnaniyaw Jehová. Akgtum liʼakxilhtit, max makgapitsi kililakgpalitkan tuku tlawayaw xlakata ni kaj paxkat natlawayaw kinkilhtamakujkan chu tlan naskujnaniyaw Jehová.

17 Kaʼakxilhwi xliʼaxilhtit Mark chu Claire, akgtum tamakgaxtokgat xalak Gales (Reino Unido). Akxni nina xtamakgaxtokgkgo precursores wankgolh akxni taxtukgolh kʼescuela. Akxni tamakgaxtokgkgolh chuntiya precursores litaxtukgolh. Pero tlakg kskujnaniputunkgo Jehová, wa xlakata lakpuwankgolh ni lhuwa tuku nakgalhikgo. Mark wan pi makgxtakgkgolh xchikkan nema akgtutu cuarto xkgalhi chu xtaskujut. Uma tlawalh pi tlan xmakgtapakgsikgolh kʼgrupo tiku tlawakgo Pukgalhtawakga xla xTatayananin Jehová xla xlikalanka Katiyatni. Umakgolh akgpuxam kata, akglhuwa Pukgalhtawakga makgtlawakgonit klakalhuwa países xalak África. Minit kilhtamaku atsinu ni masputukgonit xtuminkan, pero Jehová chuntiya kakuentajtlawanit. Claire wan pi nitu tlawa pi tlakg nakamakgapaxuwa chuna la kamakgapaxuwa pi makamaxkikgo Jehová xlatamatkan. Kʼumakgolh kata, lhuwa tiku tsukukgolh katalalinkgo chu nikxni katsankgani tuku tlakg xlakaskinka. Na wan pi ni xlakaskinka akxilhkgo tuku makgxtakgkgolh komo tamalakxtumikan xtapaxuwankan nema kgalhikgo xlakata skujnanimakgolh Jehová xaputum kilhtamaku. Amakgapitsi xlakskujnin Dios tiku na xaputum kilhtamaku skujnanimakgolh nachuna makgkatsikgo. * (Kalikgalhtawakga nota.)

18. ¿Tuku takgalhskinin kilitlawatkan?

18 Putum akinin kilitlawatkan uma takgalhskinin: «¿Talakaskin pi tlakg xatapaxuwan nakskujnani Jehová? ¿Kmastama talakaskin pi atanu tuku nakimakglhti kinkilhtamaku chu ni pulana ktlawa tuku tlakg xlakaskinka? Komo chuna, ¿tuku tlan naklakgpali?». Max natalakaskin nalakgpaliyaw la likgalhtawakgayaw Biblia chu chuna la lakputsananiyaw. Kʼatanu artículo naʼakxilhaw la natlawayaw.

^ párr. 17 Akgtum liʼakxilhtit, Hadyn chu Melody Sanderson lu tlan xwanit xpustankan kʼAustralia, pero makgxtakgkgolh xlakata xaputum kilhtamaku tlan kskujnanikgolh Jehová. Akxni kskujnanimakgolh kʼIndia, masputukgolh putum xtuminkan. ¿Katsiputuna tuku tlawakgolh? Kalikgalhtawakga xlatamatkan krevista La Atalaya 1 xla marzo kata 2006.