Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Octubre kata 2015

¿Akxilha wix pi Dios makgtayaman?

¿Akxilha wix pi Dios makgtayaman?

«Chu xlakskujnin naʼakxilhkgo xmakan Jehová.» (IS. 66:14)

TAKILHTLIN: 35, 26

1, 2. ¿Tuku lakpuwankgo xlakata Dios lhuwa latamanin?

LHUWA latamanin lakpuwankgo pi Dios ni akxilha tuku tlawayaw chu tuku kinkaʼakgspulayan. Akgtum liʼakxilhtit, noviembre kata 2013 milh akgtum lanka unisen kFilipinas, lu kalanka niku masputunalh. Akxni xtitaxtunita unisen, mapakgsina xalak Filipinas wa pi Dios ni kamakgtayalh xlakata max wi atanu tuku xtlawama.

2 Makgapitsi latamanin lakpuwankgo pi Dios ni akxilha tuku tlawakgo (Is. 26:10, 11; 3 Juan 11). Apóstol Pablo wa pi kxkilhtamaku xʼanankgo tiku ni xlatlawaputunkgo xtalakaskin Dios. Nitlan xlikatsikgo, nixaʼakgstitum tuku xtlawakgo chu lhuwa tuku xkgalhiputunkgo (Rom. 1:28, 29).

3. 1) ¿Tuku takgalhskinin kilitlawatkan? 2) ¿Tuku xkilhchanima Biblia akxni wan xmakan Dios?

3 Katsiyaw pi Jehová putum akxilha tuku tlawayaw pero kilitlawatkan uma takgalhskinin: «¿Xlikana kkanajla pi Dios kimakgtayaputun? ¿Kakxilha la kimakgtayama?». Biblia makglhuwa lichuwinan xmakan Dios. ¿Tuku wamputun uma? Makglhuwa kilhchani, la  Jehová kamakgtaya kskujnin (kalikgalhtawakga Deuteronomio 26:8 *). (Kaʼakxilhti recuadro «¿Tuku kilhchanima?».) Chu Jesús wa pi makgapitsi latamanin «naʼukxilhkgoy» Dios, uma wamputun pi xlakpuwankgo pi Dios kamakgtayama (Mat. 5:8). ¿Akxilha xmakan Dios? Uma wamputun, ¿akxilha la makgtayayan Dios kmilatamat? Biblia lichuwinan latamanin tiku ni akxilhkgolh xmakan Dios chu makgapitsi tiku akxilhkgolh. Kʼuma artículo naʼakxilhaw makgapitsi uma liʼakxilhtit. Chu kʼartículo nema aku namin naʼakxilhaw la kinkamakgtayayan kintakanajlakan nakatsiyaw pi Jehová kinkamakgtayaman.

NI KANAJLAKGOLH PI DIOS XMAKGTAYAMA XKACHIKIN

4. ¿Tuku xlakata tiku ni xkaʼakxilhputun Israel limasiyakgolh pi ni xkanajlakgo pi Jehová xmakgtayama xkachikin?

4 Kkilhtamaku akxni xtsokgmaka xTachuwin Dios, lhuwa latamanin katsikgolh la Dios xkamakgtayama Israel. Akgtum liʼakxilhtit, Jehová tlawalh milagros xlakata kamakgtayalh xkachikin xlakata xtaxtukgolh kʼEgipto chu lhuwa guerras xtlajanankgolh kTiyat nema xkawanikanit nakamaxkikan (Jos. 9:3, 9, 10). Lhuwa mapakgsinanin xkatsikgo tuku Jehová xtlawanit. Maski chuna, tamakxtumikgolh «xlakata natalatlawakgo kguerra Josué chu Israel» (Jos. 9:1, 2). Akxni talachipakgolh Israel, akxilhkgolh la Jehová xmakgtayama xkachikin. Akgtum liʼakxilhtit, akxilhkgolh la Chichini chu Papaʼ kaks tawilakgolh «asta akxni kachikin tlajakgolh xtalamakgasitsin» (Jos. 10:13). Pero lu laktsakat xwankgonit chu ni kanajlaputunkgolh pi Dios xmakgtayama xkachikin. Wa xlakata katlajaka (Jos. 11:20).

Komo akxilhputunaw la kinkamakgtayayan Dios, skgalalh kilitawilatkan

5. ¿Tuku ni kanajlaputulh mapakgsina Acab?

5 Lhuwa kata alistalh, chatum mapakgsina makglhuwa tlan xtiʼakxilhli la Dios xmakgtayama xkachikin. Xwanikan Acab chu lu nitlan xlikatsi. Palakachuwina Elías wanilh mapakgsina Acab pi nialh xʼama senan asta kilhtamaku akxni Elías xwampa pi xmilh sen (1 Rey. 17:1). Xlikana, kajwatiya Dios tlan xmaxkilh Elías litliwakga xlakata tlan xwanilh Acab tuku kilhtamaku xmimpa sen. Pero Acab ni kanajlaputulh pi wa Jehová xtlawanit ama milagros. Alistalh, Elías wanilh Jehová pi xmakamincha lhkuyat kʼakgapun, chu kgalhtika xʼoración. Elías na wanilh Acab pi Jehová xʼama makamin lankasen. Chu chuna lalh (1 Rey. 18:22-45). Pero Acab ni kanajlaputulh pi wa Jehová xtlawanit amakgolh milagros. ¿Tuku kinkamasiyaniyan uma tuku akxilhwi kʼuma párrafo chu nema titaxtulh? Komo akxilhputunaw la Jehová kinkamakgtayayan, skgalalh kilitawilatkan.

KANAJLAKGOLH PI WA DIOS XMAKGTAYAMA XKACHIKIN

6, 7. ¿Tuku kanajlakgolh gabaonitas chu Rahab?

6 Kxkilhtamaku Israel, xwi kachikin xwanikan Gabaón. Ni chuna xlikatsikgo la amakgapitsi laklanka kachikinin. ¿Tuku xlakata? Xlakata xkgaxmatkgonit putum tuku Jehová xtlawanit xpalakata Israel chu xkanajlakgo pi wa Dios xkamakgtayama xkachikin. Wa xlakata, ni talachipakgolh Israelitas, gabaonitas lakkaxtlawakgolh  la ni xtalamakgasitsin nalitaxtukgo (Jos. 9:3, 9, 10). Lu tlan tuku tlawakgolh xlakata kanajlakgolh pi Jehová xtlawa pi Israel xtlajanankgolh kʼguerras.

7 Chatum puskat tiku na kanajlalh pi Jehová xmakgtayama xkachikin wa Rahab. Ni israelita xwanit, pero xkgaxmatnit pi Jehová xmaxtunit Israel kʼEgipto. Akxni chatiy skgalananin chankgolh kxchik, kawanilh pi xkanajla pi Jehová xʼama kamakgtaya xlakata xʼakgchipakgolh xtiyatkan. Chu maski xkatsi pi xlakata xkanajlani Jehová, kalipekua xwilima xlatamat chu nachuna xla xfamilia, Rahab liwana xkanajla pi Dios xʼama kalakgmaxtu (Jos. 2:9-13; 4:23, 24).

8. ¿Tuku kanajlakgolh makgapitsi israelitas?

8 Kalichuwinamparaw mapakgsina Acab. Akxni akxilhli pi xmimacha lhkuyat kʼakgapun xla ni kanajlaputulh pi Dios xkgaxmatnit xʼoración Elías. Pero lhuwa israelitas kanajlakgolh pi Dios xtlawanit ama milagro. Wa xlakata pixlanka wankgolh: «¡Jehová wa xaxlikana Dios!» (1 Rey. 18:39).

9. ¿La tlan naʼakxilhaw «xlimakgatliwakga» Jehová la uku?

9 Akxilhnitawa lhuwa liʼakxilhtit xlakata tiku ni kanajlakgolh pi Dios kamakgtaya xlakskujnin chu tiku kanajlakgolh. Pero akinin chuna wamputunaw la tiku kanajlakgolh. Pero la uku, ¿la tlan naʼakxilhaw «xlimakgatliwakga» Jehová la uku? Tlan nawanaw pi akxilhaw, xlakata kanajlayaw kkinakujkan (Efes. 1:18). (Kaʼakxilhti recuadro «¿Tuku kilhchanima?».) Wa xlakata talakaskin pi chali chali tlakg nalakgapasaw Jehová chu kilikatsitkan la xtayat. Pero ¿tuku likatsiyaw pi Jehová kamakgtayama la uku tiku makgapaxuwaputunkgo?

 WA TUKU LIKATSIYAW PI JEHOVÁ KINKAMAKGTAYAMAN

10. ¿Tuku likatsiyaw pi Jehová chuntiya kamakgtayama tiku makgapaxuwaputunkgo? (Kaʼakxilhti xapulana dibujo.)

10 Lhuwa tuku likatsiyaw pi Jehová kamakgtayama tiku makgapaxuwaputunkgo. Makglhuwa kgaxmataw la lhuwa latamanin kakgalhti Jehová xʼoracionkan (Sal. 53:2). Akgtum liʼakxilhtit, chatum xTatayana Jehová tiku wanikan Allan, xlichuwinama Dios kʼaktsu isla xalak Filipinas. Akxni xtachuwinama chatum puskat, ama puskat tsukulh tasa. ¿Tuku xʼakgspulama? Allan wan pi ama kilhtamaku ama puskat kskininit Dios pi xlakgminkgolh kxchik xTatayananin Jehová xlakata xtachuwinankgolh. Akxni aktsujku xwanit xkatakgalhtawakga xTatayananin Jehová. Pero alistalh tamakgaxtokgli, chu alakatanu alh chu nialh kgalhtawakgalh. Wa xlakata lu xpaxtikatsini xlakata Dios kgaxmatnilh xʼoración. Nipara akgtum kata titaxtulh tamunulh.

Skgalalh kilitawilatkan xlakata naʼakxilhaw la Jehová kinkamakgtayayan (Kaʼakxilhti párrafos 11 asta 13)

11, 12. 1) ¿La kamakgtayanit Jehová xlakskujnin? 2) Kawanti la Jehová makgtayanit chatum tala.

11 Jehová kamakgtaya lhuwa xlakskujnin. Akgtum liʼakxilhtit, akxni nina xTatayananin Jehová xlitaxtukgo, makgapitsi kxkulikgo, xmaklakaskinkgo drogas chu xʼakxilhkgo tiku ni lhakganankgonit. Lhuwa tiku wankgo pi nialh xtlawaputunkgo tuku nitlan, pero nila xmakgxtakgkgo. Pero akxni skinikgolh tamakgtay Jehová, kamaxkilh «litliwakga nema lakatsala kilitliwakgakan», chuna, tlan makgxtakgkgolh tuku xkasmanipasanit (2 Cor. 4:7; Sal. 37:23, 24).

12 Jehová na kamakgtayanit xlakskujnin xlakata natayanikgo taʼakglhuwit. Kaʼakxilhwi xpalakata chatum tala tiku wanikan Amy. Skinika pi xʼalh kʼakgtum kʼaktsu isla xalak Pacífico xlakata xmakgtlawalh akgtum Pukgalhtawakga xla xTatayananin Jehová, chu na xmakgtlawalh akgtum chiki niku xtawilakgolh misioneros. Pero anta ni xtachuna xwanit la niku xlama, makglhuwa ni xkgalhikgo chuchut chu luz, chu patum xtawila chuchut ktiji. Chu lu aktsu xwanit xcuarto khotel niku xwi, nachuna lu xlakapastaka xfamilia. Akgtum kilhtamaku ni tlan kgalhtilh chatum tala akxni kskujmakgolh. Akxni taspitli khotel, lu nitlan xmakgkatsi. Ama kilhtamaku ni xʼanan luz, chu puks xwi. Tlawanilh akgtum oración Jehová. Chu akxni chilh luz, tekgsli maktum revista La Atalaya nema xkgalhi tastakyaw xpalakata misioneros. Artículo xlimin tastakyaw xlakata la natayanikan akxni lu lakapastakkan familia chu xlakata tanu xtawilatkan niku chankgo misioneros. Amy makgkatsilh la komo Jehová xtachuwinama. Uma maxkilh litliwakga xlakata ni xmakgxtakgli taskujut nema xlakgayawakanit (Sal. 44:25, 26; Is. 41:10, 13).

13. ¿Tuku liʼakxilhtit kgalhiyaw nema litasiya pi Jehová kamakgtaya xlakskujnin xlakata tlan natalichuwinan Dios?

13 Jehová na kamakgtayanit xlakskujnin xlakata nakamaxkikan talakaskin nalichuwinankgo Dios (Filip. 1:7). Akgtum liʼakxilhtit, akxni makgapitsi mapakgsinanin nialh xlakaskinkgo natalichuwinan Dios, asta kxlakatin tribunales kitayanitaw xlakata ni natamalakgachokgo uma taskujut. Tribunales nema tlakg xlakaskinka kxlikalanka katiyatni 268 taʼakglhuwit akinin kinkatatayanitan. Akgtum liʼakxilhtit, lata kata 2000 Tribunal Europeo de Derechos Humanos 24 taʼakglhuwit akinin kinkatatayanitan. Liwana tasiya pi niti la natlawa pi Jehová ni nakamakgtaya  xkachikin (Is. 54:17; kalikgalhtawakga Isaías 59:1 *).

14. ¿Tuku atanu likatsiyaw pi Dios kinkamakgtayaman?

14 ¿Tuku atanu likatsiyaw pi Dios kinkamakgtayaman? Pulaktu wa pi lichuwinamaw Dios xliputum katiyatni (Mat. 24:14; Hech. 1:8). Atanu tuku na litasiya pi Dios kinkamakgtayaman wa pi makxtum layaw, maski tanu tanu niku xalanin akinin. Ni anan atanu takanajla kkatiyatni nema tlakg makxtum wilakgolh. Asta tiku ni skujnanikgo Jehová wankgo: «Lu[...] xlikana Dios katalaman» (1 Cor. 14:25). Chuna la akxilhaw, lhuwa tuku litasiya pi Dios kinkamakgtayaman (kalikgalhtawakga Isaías 66:14 *). Chu wix, ¿akxilha la Jehová makgtayaman kmilatamat?

¿AKXILHA LA DIOS MAKGTAYAMAN?

15. ¿Tuku xlakata max ni naʼakxilhaw pi Dios kinkamakgtayaman?

15 Max namin kilhtamaku ni katiʼakxilhwi pi Jehová kinkamakgtayaman. ¿Tuku xlakata? Max xlakata kintaʼakglhuwitkan, ni lakapastakaw pi Jehová makglhuwata kinkamakgtayanitan. Chuna akgspulalh Elías. Xla ni xapekua xwanit. Pero akxni mapakgsina Jezabel xmakgniputun, Elías nialh lakapastakli la Jehová xmakgtayanit. Lu xpekuanit, Biblia wan pi asta xniputun (1 Rey. 19:1-4). ¿La tlan xmakglhtinalh tamakgtay chu litliwakga? Xputsalh xtamakgtay Jehová (1 Rey. 19:14-18).

16. Akxni kgalhiyaw taʼakglhuwit, ¿tuku nakinkamakgtayayan naʼakxilhaw pi Jehová kinkamakgtayaman?

16 Tiku nachuna tiʼakgspulalh la Elías wa Job. Lu xlitaʼakglhuwima tuku tuwa xtitaxtuma chu ni chuna xʼakxilha la Jehová xakxilha xtaʼakglhuwit (Job 42:3-6). Chu akxni kgalhiyaw taʼakglhuwit, max na ni katiʼakxilhwi pi Dios  kinkamakgtayaman. ¿Tuku nakinkamakgtayayan naʼakxilhaw pi kinkamakgtayaman? Akxni likgalhtawakgayaw Biblia chu lilakpuwanaw xtastakyaw. Akxni akxilhaw la Jehová kinkamakgtayayan kitaxtu la komo kinkatachuwinaman. Uma natlawa pi tlakg naʼakxilhaw pi Jehová lama chu tlan nawanaw la Job: «Pero la uku xlikana kilakgastapu kliʼakxilhman».

Jehová na tlan nakinkamaklakaskinan xlakata nakalimakgtaya amakgapitsin (Kaʼakxilhti párrafos 17 chu 18)

17, 18. 1) Kawanti pulaklhuwa la max Jehová kinkamakgtayanitan kkilatamatkan. 2) La uku, ¿la kamakgtayanit Jehová xlakskujnin?

17 ¿Akxilha la Jehová makgtayaman kmilatamat? Akgtum liʼakxilhtit, makgapitsi natalan katsikgo pi Dios kamakgtayalh natekgskgo xaxlikana takanajla. Makgapitsi max lakpuwankgo pi Jehová kamakgtayalh xlakata tuku lichuwinalh chatum tala akxni mastalh taʼakgchuwin ktamakxtumit. O max nawankgo pi Jehová kamakgtayalh akxni kakgalhtilh xʼoracionkan nema tlawanikgolh. Chu makgapitsi max makgkatsikgo pi kamakgtayalh Jehová namakgantaxtikgo tuku xwanikgonit xlakata tlakg tlan kskujnanikgolh. Chu makgapitsi max wankgo pi Jehová kamaxkilh tuku xmaklakaskinkgo akxni makgxtakgkgolh akgtum taskujut nema xtlawa pi nila xʼankgolh ktamakxtumit chu nila xʼankgo lichuwinankgo Dios (Heb. 13:5). Komo tlan xʼamigo Jehová akinin, naʼakxilhaw pi pulaklhuwa la kinkamakgtayaman.

18 Anta kKenia, chatum tala tiku wanikan Sarah xlakpuwan pi chatum tiku xmakgalhtawakgema ni xlakaskinka xʼakxilha tuku xkatsinima. Sara tlawanilh oración Jehová chu kgalhskilh komo tlan nialh xmakgalhtawakgelh. Pero akxni makgalhsputulh xʼoración, chuwinalh kteléfono tiku xmakgalhtawakge xlakata nakgalhskin komo tlan akxtum xʼankgolh ktamakxtumit. ¡Lu kaks malakawanilh Sarah uma! Komo skgalalh natawilayaw, na tlan naʼakxilhaw pi Jehová kinkamakgtayaman. Anta kʼAsia, chatum tala tiku wanikan Rhonna wan pi lin kilhtamaku naʼakxilhaw la Jehová kinkamakgtayayan. Chu wan pi akxni akxilhaw pi chuna, lu kaks kinkamalakawaniyan la Jehová kinkamakgtayayan.

19. Komo akxilhputunaw la Dios kinkamakgtayayan, ¿tuku na talakaskin?

19 Komo akxilhputunaw la kinkamakgtayayan Dios, «xachakgani» kilikgalhitkan kinakujkan (Mat. 5:8). Uma wamputun pi putum tuku nalakpuwanaw tlan xliwanat chu nialh natlawayaw tuku nitlan (kalikgalhtawakga 2 Corintios 4:2). Kʼuma artículo akxilhnitaw pi komo lakaskinaw pi Jehová kakinkamakgtayan, lu tlan xʼamigos kiliwanatkan. Kʼartículo nema aku mima nakinkamasiyaniyan la kintakanajlakan tlawa pi tlan naʼakxilhaw la Jehová kinkamakgtayayan.

^ párr. 3 Deuteronomio 26:8: «Chu Jehová kinkalimaxtun xlimakgatliwakga kʼEgipto chu xtamakgxpastonkgnit, chu tlawalh tuku makgapekuanan, chu tuku kaks xlilakawankan chu milagros».

^ párr. 13 Isaías 59:1: «Kaʼakxilhtit xmakan Jehová ni taktsuwinit xlakata nalakgmaxtunan, chu ni akgatapanit xlakata nila nakgaxmata».

^ párr. 14 Isaías 66:14: «Chu naʼakxilhatit, chu minakujkan nalipaxuwa, chu naxanay milukutkan la sekget. Chu xlakskujnin naʼakxilhkgo xmakan Jehová. Pero xla namakgesiyakgo xtalamakgasitsin».