Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Septiembre kata 2015

Tliwakglh katawilalh mintakanajlakan

Tliwakglh katawilalh mintakanajlakan

«Tliwakglh katawilatit kmintakanajlakan.» (1 COR. 16:13)

TAKILHTLIN: 23, 34

1. 1) ¿Tuku akgspulalh Pedro akxni xtitaxtuma tliwakga un, kpupunu xalak Galilea? (Kaʼakxilhti xapulana dibujo.) 2) ¿Tuku xlakata tsukulh tsankga Pedro kchuchut?

AKGTUM tsisni, Pedro chu amakgapitsi kstalaninanin Jesús xlipatakutmakgolh putakutnu, kpupunu xalak kʼGalilea, kaj xalan kalakgchilh tliwakga un. Chu akxilhkgolh pi Jesús xakgspuntlawama chuchut. Pedro kgalhskilh Jesús komo na tlan chuna xakgspuntlawalh. Jesús wanilh pi tlan chuna xtlawalh. Wa xlakata Pedro takutli kputakutnu chu tsukulh lakgan Jesús. Pero kaj nina makgat xtlawanit, tsukulh tsankga. ¿Tuku xlakata? Xlakata akxilhli la xlitliwakga xmima un chu pekualh. Wa xlakata, Pedro skinilh tamakgtay Jesús. Jesús pakgachipalh chu wanilh: «[¿]Wix ni lay kilipawana? ¿Lantla chu [puwanti TNM] pi ni kaktimakgtayan?» (Mat. 14:24-32, Hua Xasasti Talaccaxlan, TXS, 1999).

2. ¿Tuku nakatsiniyaw kʼuma artículo?

2 Kʼuma artículo pulaktutu tuku naʼakxilhaw nema wi tuku nakinkamasiyaniyan xlakata tuku titaxtulh Pedro: 1) Pulana limasiyalh pi lu xkanajla pi Jehová xʼama makgtaya, 2) tuku xlakata tsukulh  xlajwanan xtakanajla, chu 3) la matliwakglhpa xtakanajla. Komo liwana nakatsiyaw uma pulaktutu tuku titaxtulh, nakinkamakgtayayan tliwakga natawila kintakanajlakan (1 Cor. 16:13).

KAKANAJLANIW JEHOVÁ

3. 1) ¿Tuku xlakata Pedro takutli kputakutni chu tlan tsukulh tlawan kxakgspun chuchut? 2) ¿Tuku tlawanitaw kstalaninanin Cristo xtachuna litaxtu tuku tlawalh Pedro?

3 Akxni Jesús tasanilh Pedro, xla takutli kputakutnu chu akgspuntlawalh chuchut. ¿Tuku xlakata tlan chuna tlawalh? Xlakata xkanajla pi Jehová xʼama makgtaya chuna la makgtayalh Jesús. Akinin nachuna tlawaw akxni katsiniw kBiblia pi Jesús kinkawaniyan kstalanina nalitaxtuyaw, tamakamastaniw Jehová chu tamunuw. ¿Tuku xlakata tlan chuna tlawaw? Xlakata lu xkanajlayaw pi Jehová chu Jesús xʼamakgolh kinkamakgtayakgoyan (Juan 14:1; kalikgalhtawakga 1 Pedro 2:21).

Xlakata Pedro kanajlanilh Jehová tlan tlawalh kxakgspun chuchut

4, 5. ¿Tuku xlakata lu xlakaskinka takanajla?

4 Akxni kanajlanikan Jehová lu kinkamakgtayayan xlakata tlan makgantaxtiyaw tuku tasiya pi nila katitlawaw (Mat. 21:21, 22). Akgtum liʼakxilhtit, Pedro tlan tlawalh kxakgspun chuchut xlakata lu xkanajlani Jehová. Akinin na tlawanitaw tuku tuwa xlakata kanajlaniyaw Dios. Akgtum liʼakxilhtit, lhuwa akinin putuminika lakgpalinitaw kintayatkan. Chu latamanin tiku xkinkalakgapaskgoyan akxilhkgo pi lu lakgpalinitaw kintayatkan. Tlan chuna tlawaw xlakata paxkiyaw Jehová chu xlakata wa kinkamakgtayan (kalikgalhtawakga Colosenses 3:5-10). Nachuna, xlakata kanajlaniyaw Jehová makamaxkiw kilatamatkan chu xʼamigos litaxtuw. Uma nila chuna xtlawaw komo Dios ni xkintikamakgtayan (Efes. 2:8).

5 Takanajla lu xlakaskinka xlakata kinkamakgtayayan tlan natayaniyaw tuku kinkatlawaniputunan Satanás, tiku lu tliwakga (Efes. 6:16). Nachuna, takanajla kinkamakgtayayan natayaniyaw taʼakglhuwit. Jehová kinkawaniyan pi komo nakanajlaniyaw chu lu naskujnaniyaw, nakinkamaxkiyan putum tuku maklakaskinaw (Mat. 6:30-34). Chu komo nakanajlaniyaw, kinkawaniyan pi tlan putum kilhtamaku nalatamayaw kParaíso (Juan 3:16).

NI KATAXLAJWANILH KINTAKANAJLAKAN

6, 7. 1) ¿Tuku tlan tamalakxtumiyaw un chu lipekua chuchut kpupunu nema makgapekualh Pedro? 2) ¿La likatsiyaw pi komo ni nakuentajtlawayaw max na tlan nataxlajwani kintakanajlakan?

6 Kalichuwinamparaw Pedro. ¿Tuku xlakata pekualh akxni xakgspuntlawama chuchut? Biblia lichuwinan pi nialh wa akxilhli Jesús, wata wa akxilhli la tliwakga xʼunama (Mat. 14:30). Wa xlakata tsukulh makgatsankga xtakanajla chu tsukulh tsankga kchuchut. Tliwakga un chu la xtakgayawama chuchut tlan tamalakxtumiyaw taʼakglhuwit chu akxni tlawaputunaw o kinkamatlawiputunkanan tuku nitlan chali chali. Maski umakgolh taʼakglhuwit lu laktuwa, Jehová tlan kinkamaxkiyan litliwakga xlakata tlan natayaniyaw. Komo kajwatiya nalilakpuwanaw kintaʼakglhuwitkan, max natsukuyaw makgatsankgayaw kintakanajlakan chu nialh katilakpuwaw pi Jehová nakinkamakgtayayan.

Komo kajwatiya nalilakpuwanaw kintaʼakglhuwitkan, max natsukuyaw makgatsankgayaw kintakanajlakan

7 Putum akinin, komo ni kuentajnatlawayaw na namakgatsankgayaw kintakanajlakan. ¿La likatsiyaw? Xlakata Biblia wan pi komo ni tliwakga nakgalhiyaw kintakanajlakan wa «yuma lixkajni talakgalhin wantu kinkasokgaliyan» (Heb.  12:1TXS, 1999). Komo kajwatiya nalilakpuwanaw kintaʼakglhuwitkan chuna la tlawalh Pedro, natsuku taxlajwani kintakanajlakan. ¿La nalikatsiyaw komo xlajwanama kintakanajlakan? Kaʼakxilhwi makgapitsi takgalhskinin nema nakinkamakgtayayan.

8. ¿Tuku natlawa pi max nialh nakanajlayaw tuku Jehová wanit natlawa?

8 ¿Chuntiya kanajlaniyaw tuku Jehová kinkawaninitan pi nakinkamaxkiyan? Akgtum liʼakxilhtit, Jehová wanit pi nialh makgas namalakgsputu xkakilhtamaku akgskgawini. Pero komo namastayaw talakaskin pi tuku lipaxuwakan kakilhtamaku nakinkaʼakgchipayan, max nialh katikanajlaw pi lakatsu wi lisputni (Hab. 2:3). Kalichuwinaw atanu liʼakxilhtit, Jehová na wanit pi xlakata Jesús kinkapalakanin xla tlan nakinkatapatiyan kintalakgalhinkan. Pero komo chuntiya nalakpuwanaw tuku nitlan tlawanitaw makgasa, max natsukuyaw lakpuwanaw pi Jehová nitu kinkatapatinitan kintalakgalhinkan (Hech. 3:19). Asta max nialh xalipaxaw naskujnaniyaw Jehová chu nialh katilichuwinaw xTamapakgsin.

9. ¿Tuku max nala komo kaj wa natlawayaw tuku lakaskinaw chu nialh wa xtalakaskin Jehová?

9 ¿Chuntiya xliputum kinakujkan skujnanimaw Jehová? Komo tliwakga naskujnaniyaw Jehová nakinkamakgtayayan putum kilhtamaku nalilakpuwanaw latamat nema ni kgalhi xlisputni. Pero ¿tuku nala komo namastayaw talakaskin pi atanu tuku tlakg xlakaskinka nawan kkilatamatkan? Akgtum liʼakxilhtit, max namakglhtinanaw akgtum taskujut niku lu tlan nakinkaxokgonikanan pero natlawa pi nialh tlan naskujnaniyaw Jehová la pulana. Uma natlawa pi naxlajwanan kintakanajlakan chu natlawa pi nialh xliputum kinakujkan naliskujnaniyaw Jehová (Heb. 6:10-12).

Kstalaninanin Cristo xkatsikgo pi xlakata tlan xkatapatikgolh amakgapitsin xtalakaskin xkanajlanikgolh Dios

10. ¿Tuku xlakata katsiyaw pi akxni katapatiyaw amakgapitsin limasiyayaw pi kanajlaniyaw Jehová?

10 ¿Tuwa makgkatsiyaw natapatinanaw? Akxni wi tiku kinkatlawaniyan tuku nitlan, ¿lisitsiyaw chu nialh tachuwinanaw? Komo chuna, max wa tlakg xlakaskinka akxilhmaw tuku makgkatsiyaw. Pero komo nakatapatiyaw limasiyamaw nawan pi kanajlaniyaw Jehová. ¿Tuku xlakata chuna wanaw? Katsiyaw pi komo lakaskinaw pi Jehová nakinkatapatiyan kintalakgalhinkan, talakaskin pi nakatapatiyaw amakgapitsin (Luc. 11:4). Akxni katapatiyaw amakgapitsin, limasiyayaw pi katsiyaw pi tlan wilaw kxlakatin Jehová chu nakinkatapatiyan. Chu uma tlakg xlakaskinka nixawa nakamalakgaxokgeputunaw tuku kinkatlawanikgoyan amakgapitsin. Nachuna, kstalaninanin Cristo xkatsikgo pi xtalakaskin pi nakanajlanikgo Dios xlakata tlan xkatapatikgolh amakgapitsin. Wa xlakata  akxni Jesús kawanilh pi xkatapatikgolh amakgapitsin asta wantiku makglhuwa xkatlawanikgo tuku nitlan, xlakan wanikgolh Jesús: «Kakinkamaliwakani nkintakanajlakan» (Luc. 17:1-5).

11. ¿Tuku ni kilitlawatkan akxni wi tiku kinkastakyawayan?

11 ¿Lisitsiyaw akxni kinkastakyawakanan? Akxni wi tiku kinkastakyawayan, kajwatiya tlakg xlakaskinka kiliʼakxilhatkan la nakinkamakgtayayan xtastakyaw. Pero komo kajwatiya naputsananiyaw tuku nitlan tlawa o naputsananiyaw tuku kinkawaniyan tiku kinkastakyawayan, ni tsinu kintikamakgtayan (Prov. 19:20). Tlakg xlakaskinka nakanajlaniyaw Jehová chu akxni titaxtuyaw tuku nitlan, kalakpuwaw pi Jehová kinkamakgtayaman chuna nalakpuwanaw la lakpuwan.

12. ¿Tuku limasiyayaw akxni putum kilhtamaku nitlan kalichuwinanaw tiku pulalimakgolh congregación?

12 ¿Nitlan kalichuwinanaw tiku pulalimakgolh congregación? Akxni israelitas kgaxmatkgolh nitlan tamakatsin nema wankgolh 10 skgalananin, nitlan lichuwinankgolh Moisés chu Aarón. Wa xlakata Jehová kgalhskilh Moisés: «¿Asta tukuya kilhtamaku uma kachikin ni kakintimaxkilh kakni, chu asta tukuya kilhtamaku ni kintikanajlanikgolh maski lhuwa milagros ktlawanit kxlakgstipankan?» (Núm. 14:2-4, 11). Akxni israelitas nitlan lichuwinankgolh lakchixkuwin tiku xkapulalinkgo limasiyakgolh pi ni xkanajlanikgo Jehová. Nachuna, komo putum kilhtamaku nitlan nakalichuwinanaw lakchixkuwin tiku Jehová kalimaklakaskin kcongregación, limasiyayaw pi xlajwanama kintakanajlakan.

13. ¿Tuku xlakata ni nalakpuwanaw pi nila tuku katitlawaw komo naʼakxilhaw pi xlajwananit kintakanajlakan?

13 Xlakata lilakpuwanitawa umakgolh takgalhskinin, max naʼakxilhaw pi xlajwanama kintakanajlakan. Pero ni nalakpuwanaw pi nila tuku natlawayaw. Kalakapastakwi pi asta apóstol  Pedro pekualh chu makgatsankgalh xtakanajla. Chu makgapitsi kilhtamaku, Jesús kastakyawalh amakgapitsi xʼapóstoles xlakata ni tliwakga xwi xtakanajlakan (Mat. 16:8). Maski chuna xkaʼakgspula, wi tuku lu tlan kinkamasiyaniyan tuku alistalh tlawalh Pedro akxni xtaxlajwanima xtakanajla chu xlakgtsankgama kpupunu.

LA NAMATLIWAKGLHPARAYAW KINTAKANAJLAKAN

14, 15. 1) ¿Tuku tlawalh Pedro akxni tsukulh lakgtsankga kchuchut? 2) ¿La tlan kaks naʼakxilhaw Jesús?

14 ¿Tuku tlawalh Pedro akxni tsukulh lakgtsankga kchuchut? Xla lu xkatsini xtasuwij kchuchut chu tlan xakstu xtitaspitpa kputakutnu (Juan 21:7). Pero ni chuna tlawalh. ¿Tuku xlakata? Ni lakpuwa pi ni xlakaskin tamakgtay, wata akxilhli Jesús chu skinilh xtamakgtay. Komo naʼakxilhaw pi kintakanajlakan taxlajwanima, nachuna kilitlawatkan la Pedro. ¿La chuna natlawayaw?

15 Pedro kaks akxilhli Jesús. Akinin na lu kaks kiliʼakxilhatkan Jesús, chuna la wan Biblia (kalikgalhtawakga Hebreos 12:2, 3, TNM *). (Kaʼakxilhti recuadro «¿Tuku kilhchanima?».) Pero akinin nila akxilhaw Jesús chuna la xʼakxilha Pedro. Wa xlakata la tlan naliʼakxilhaw Jesús kilakgastapukan. Nalikgalhtawakgayaw tuku tlawalh chu tuku masiyalh, komo chuna natlawayaw natatliwakglhpara kintakanajlakan. Kaʼakxilhwi la tlan nachuna natlawayaw la Jesús.

Akxni kaks akxilhaw xliʼakxilhtit Jesús chu tlawayaw chuna la tlawalh, tlakg tatliwakglha kintakanajlakan (Kaʼakxilhti párrafo 15)

16. ¿La tlan nalimatliwakglhaw Biblia kintakanajlakan?

16 Kalimatliwakglhwi Biblia kintakanajlakan. Jesús liwana xkatsi pi Biblia wa xTachuwin Dios chu anta wi tlakg xatlan tastakyaw (Juan 17:17). Komo akinin nachuna tlawaputunaw la Jesús chu lakaskinaw pi tliwakga katawilalh kintakanajlakan, chali chali kilikgalhtawakgatkan Biblia chu nalilakpuwanaw tuku katsinimaw. Na naputsayaw xtakgalhtin tuku ni liwana akgatekgsaw. Akgtum liʼakxilhtit, ¿liwana katsiya pi kxaʼawatiya kilhtamaku lamaw? Kalikgalhtawakga tuku xwankanit pi xʼama la xlakata xaʼawatiya kilhtamaku chu natatliwakglha mintakanajla. ¿Liwana katsiya pi Jehová namakgantaxti tuku wanit pi natlawa? Kalikgalhtawakga tuku xwankanit pi nala chu kgantaxtukgolha chu namatliwakglha mintakanajla. ¿Liwana katsiya pi tastakyaw xalak Biblia lu makgtayanankgo la uku? Kalikgalhtawakga xlakata natalan tlan tsukukgolh linkgo xlatamatkan xlakata tlawakgolh xtastakyaw Biblia chu namatliwakglha mintakanajla (1 Tes. 2:13). *

17. 1) ¿Tuku makgtayalh Jesús natayani tuku lu tuwa titaxtulh? 2) ¿La tlan nastalaniyaw xliʼakxilhtit Jesús?

17 Kalakapastakwi tuku Jehová wanit nakinkamaxkiyan. Jesús lilakpuwa tuku Jehová xwaninit pi xʼama maxki. Wa uma tuku makgtayalh natayani tuku lu tuwa titaxtulh (Heb. 12:2). Jesús ni mastalh talakaskin pi tuku lipaxuwakan kkakilhtamaku xakgchipalh (Mat. 4:8-10). ¿La nachuna natlawayaw la tlawalh Jesús? Kalilakpuwaw tuku Jehová kinkawaninitan nakinkamaxkiyan. ¿Tuku tlan nakinkamakgtayayan? Kalakpuwanti la nalatamayaw kParaíso. Tlan natsokgwiliya chu nadibujarliya tuku wix tlawaputuna anta. Chu max na tlan natlawaya akgtum lista xlakata tiku katachuwinamputuna chu max tsokgputuna tuku xkalitachuwinankgo akxni nalakastakwanankgo. Kalakpuwanti pi tuku Dios wanit natlawa, putum kinkawaniman.

18. ¿Tuku nakinkamakgtayayan tlakg natatliwakglha kintakanajlakan?

 18 Kaskiniw Jehová pi tlakg kakanajlaniw. Jesús kamasiyanilh kstalaninanin pi kskinikgolh Jehová espíritu santo (Luc. 11:9, 13). Espíritu santo nakinkamakgtayayan tlakg nakanajlaniyaw Dios, xlakata kgalhikan takanajla wa litasiya pi kgalhikan espíritu santo. Na tlan naskiniyaw Jehová pi kakinkamakgtayan namakgatlajayaw tuku namaxlajwaniputun kintakanajlakan. Akgtum liʼakxilhtit, komo makgkatsiyaw pi tuwa natapatinanaw tlan naskiniyaw Jehová tlakg nakanajlaniyaw chu kakinkamakgtayan natapatinanaw.

19. ¿Tiku nakalaksakaw xlakata tlan nakatalalinaw?

19 Wa kakatalaliw tiku tliwakga wi xtakanajlakan. Jesús kuentajtlawalh tiku xʼamigos xlitaxtukgolh. Tiku tlakg tlan xkatalalin wa xʼapóstoles xlakata ni xmakgxtakgkgo chu xkgalhakgaxmatkgo (kalikgalhtawakga Juan 15:14, 15). Akinin na wa kililaksakatkan nakatalalinaw tiku tliwakga xtakanajlakan chu kgalhakgaxmatkgo Jesús. Tiku tlan amigos xaxlikana tuku lawani. Komo natalakaskin pi nakinkamaxkikgoyan tastakyaw, kinkamaxkikgoyan. Chu komo natalakaskin pi akinin nakamaxkiyaw tastakyaw, ni lisitsikgo (Prov. 27:9).

20. ¿Tuku xlakata kilimakgtayatkan amakgapitsin tlakg nakanajlanikgo Dios?

20 Kakamakgtayaw amakgapitsin tlakg nakanajlanikgo Jehová. Jesús lhuwa tuku lichuwinalh chu tlawalh xlakata xkamatliwakglhnilh xtakanajlakan kstalaninanin (Mar. 11:20-24). Akinin na nakamakgtayayaw amakgapitsin pi tlakg tlan natawila xtakanajlakan. Komo chuna natlawayaw na tlakg natatliwakglha kintakanajlakan (Prov. 11:25). ¿La tlan namatliwakglhaw xtakanajlakan amakgapitsin? Akxni kalitachuwinanaw Dios tlan nakawaniyaw tuku xlakata kanajlayaw pi Dios lama, kinkamakgtayaputunan chu tuku xlakata kanajlayaw pi tuku tatsokgnit kBiblia wa xtapuwan. Na tlan nakamakgtayakgoyaw kinatalankan pi tliwakga natawila xtakanajlakan. Akgtum liʼakxilhtit, komo nakgaxmataw pi chatum tala nitlan kalichuwinan tiku pulalinkgo congregación ni kililakpuwanatkan pi nitlan tala chu nialh natachuwinanaw. Kuentajnatlawayaw la nawaniyaw pi tlakg kalipawa Jehová chu kakalipawa natalan (Jud. 22, 23). ¿Kgawasaku wix chu pinaku kʼescuela? Komo mimakgalhtawakgena lichuwinan evolución, ni kapekuanti chu kawanti pi wix kanajlaya pi Dios tlawanit tuku anan. Ni kalakpuwanti pi mimakgalhtawakgena chu mincompañeros nasitsikgo, max wata tlan naʼakxilhkgo.

21. ¿La nakinkamakgtayayan Jehová kinchatunukan?

21 Chuna la akxilhwi, Jehová chu Jesús makgtayakgolh Pedro pi nialh xpekualh chu tlakg xtatliwakglhli xtakanajla. Chu titaxtulh kilhtamaku, Pedro lu tlan liʼakxilhtit kinkawilinin xlakata la xkanajlani Dios. Jehová na nakinkamakgtayayan chatunu akinin xlakata tlakg nakanajlaniyaw (kalikgalhtawakga 1 Pedro 5:9, 10). Maski natalakaskin lu naliskujaw xlakata tlakg tliwakga natawila kintakanajlakan, tuku natlawayaw ni kaj paxkat katiwa.

^ párr. 15 Hebreos 12:2, 3, (TNM): «Chu kaks akxilhaw xaPuxku kimpulalinakan, chu tiku xmalaktlanina kintakanajlakan, wa Jesús, xlakata tapaxuwan nema xwi kxlakatin tayanilh tapatin kkgantum kiwi, lakgmakgalh tamaxana, chu paxtutawilanit kxpakgstakat kxlaktawilh Dios. Chuna, lu liwana kaʼakxilhtit tiku tayanilh nitlan tachuwin nema wanikgolh lakgalhinanin tiku xakstu xkatlawanimaka tuku nitlan, xlakata tlan natayaniyatit chu ni naxlajwananatit».

^ párr. 16 Akgtum liʼakxilhtit, kaʼakxilhti sección «Biblia kalakgpalinilh xlatamatkan», krevista Makatsinina nema tamakgpitsi.