Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Septiembre kata 2015

¿La na nalimasiyaniyaw Jehová pi paxkiyaw?

¿La na nalimasiyaniyaw Jehová pi paxkiyaw?

«Nkin, paxkiyaw, xampi pulh wa nkinkapaxkin.» (1 JUAN 4:19)

TAKILHTLIN: 6, 138

1, 2. ¿La kinkamasiyaninitan Jehová napaxkinanaw?

CHATUM tlat tiku tlan likatsi, kalimasiyani xkamanan wa tuku tlawa kxlatamat. Akxni kalimasiyani pi kapaxki kamasiyanima pi napaxkinankgo. Chuna tlawa Jehová. Nitiku tlakg kinkapaxkiyan la Jehová kinkapaxkiyan. Biblia wan pi «pulh wa nkinkapaxkin» (1 Juan 4:19). Chuna la Jehová kinkapaxkiyan, kinkamasiyaniman pi napaxkinanaw.

2 ¿Tuku xlakata Biblia wan pi Jehová pulana kinkapaxkin? Xlakata akxni «lakgalhinaninku xwanitaw» Jehová makamilh xKgawasa xlakata nakinkapalakaniyan (Rom. 5:8). Jehová tlawalh uma tamakamastan xlakata nakinkalakgmaxtuyan ktalakgalhin chu klinin. Chuna lu tlan liʼakxilhtit kinkawilinin chu kinkamasiyanin napaxkinanaw chu wi tuku nakamaxkiyaw amakgapitsin (1 Juan 4:10). Nachuna, xlakata paxtikatsiniyaw uma tamakamastan tlan xʼamigos litaxtuyaw chu tlan nalimasiyaniyaw pi paxkiyaw.

3, 4. ¿La limasiyaniyaw Jehová pi paxkiyaw?

3 Tapaxkit wa tayat nema tlakg xlakaskinka nema kgalhi Jehová. Wa xlakata, Jesús wa pi limapakgsin nema tlakg  xlakaskinka wa uma: «Napaxkiya Dios nkimPuchinakan lantla xlipaks kminaku, chu lantla xlipaks kmi[latamat], chu lantla xlipaks kmintapuwan, chu lantla xlipaks kmilitliwakga» (Mar. 12:30). Jehová lakaskin pi putuminika kinakujkan nalipaxkiyaw. Komo atanu tiku o wi tuku tlakg napaxkiyaw nitlan namamakgkatsiniyaw Jehová. Pero tapaxkit nema kgalhiniyaw ni kajwatiya xliwanat pi namakgkatsiyaw pi paxkiyaw. Xla lakaskin pi xliputum kintalakapastaknikan nalipaxkiyaw chu xliputuminika kilitliwakgakan, kilhchanima tuku lakpuwanaw chu tuku tlawayaw (kalikgalhtawakga Miqueas 6:8 *).

4 Wa xlakata kilipaxkitkan Jehová xliputum kilatamatkan chu xliputum tuku kgalhiyaw. Komo xlikana paxkiyaw, wa tlakg xlakaskinka nalitaxtu kkilatamatkan. Kʼartículo nema titaxtulh akxilhwi pulaktati la Jehová limasiya pi kinkapaxkiyan. Kʼuma artículo naʼakxilhaw la tlakg napaxkiyaw Jehová chu la nalimasiyaniyaw.

KAPAXTIKATSINIW

5. Akxni lilakpuwanaw putum tuku Jehová kinkamaxkiyan, ¿tuku tlawaputunaw?

5 Akxni wi tiku kinkamaxkiyan akgtum regalo, lu limasiyaniputunaw pi paxtikatsiniyaw. Apóstol Santiago wa pi Jehová lhuwa tuku kinkamaxkiyan (Sant. 1:17). Jehová kinkamaxkiyan putum tuku lakaskinaw xlakata tlan nalatamayaw chu napaxuwayaw. Chu lu paxtikatsiniyaw xlakata uma. Akxilhaw la xlilhuwa kinkapaxkiyan Dios chu lakaskinaw kakatsilh pi akinin na paxkiyaw. ¿Na lakaskina kakatsilh pi paxkiya?

6. ¿Tuku xlitlawatkan xwanit israelitas xlakata Jehová chuntiya xkamaxkilh tuku xmaklakaskinkgo?

6 Jehová lhuwa tuku kamaxkilh israelitas. Akglhuwa ciento kata kamaxkilh putum tuku xmaklakaskinkgo xlakata tlan xlatamakgolh. Na kamaxkilh limapakgsin xlakata tlan xkatsikgolh tuku xlitlawatkan xwanit (Deut. 4:7, 8). Akgtum liʼakxilhtit, limapakgsin xwan pi xlimakamaxkitkan xwanit Dios «nema tlakg xalakwan chu wa nema chanit tuku xapulana» xmakgalakgolh kxtiyatkan (Éx. 23:19). Komo xlakaskinkgo pi Jehová chuntiya xkamaxkilh tuku xmaklakaskinkgo, xtalakaskin pi xkgalhakgaxmatkgolh chu xmaxkikgolh wa tuku tlakg xatlan. Chuna xlimasiyakgolh pi xpaxtikatsinikgo Jehová (kalikgalhtawakga Deuteronomio 8:7-11).

7. ¿La tlan nalimaklakaskinaw tuku xtapalh kgalhiyaw xlakata nalimasiyaniyaw Jehová pi paxkiyaw?

7 Akinin tlan nalimasiyaniyaw Jehová pi paxkiyaw akxni maxkiyaw «wantuku laklanka xtapalh» kgalhiyaw (Prov. 3:9). ¿La chuna natlawayaw? Pulaktu la tlan chuna natlawayaw wa akxni mastayaw tumin xlakata natatlawa xtaskujut Dios kkincongregacionkan chu xlakata natatlawa uma taskujut kxliputum katiyatni. Maski lhuwa tuku kgalhiyaw o ni lhuwa, tlan nalimaklakaskinaw tuku kgalhiyaw xlakata nalimasiyaniyaw Jehová pi paxkiyaw (2 Cor. 8:12). Pero ni kajwatiya uma tuku tlan nalimasiyaniyaw pi paxkiyaw. Kaʼakxilhwi amakgapitsi.

Chuna la tlakg nalipawanaw pi Jehová nakinkamaxkiyan tuku tlakg xlakaskinka nema maklakaskinaw, tlakg nalimasiyaniyaw pi paxkiyaw

8, 9. 1) Kawanti apulaktu la tlan nalimasiyaniyaw Jehová pi paxkiyaw. 2) ¿Tuku tlawakgolh Mike chu xfamilia?

8 Apulaktu la tlan nalimasiyaniyaw Jehová  pi paxkiyaw, wa akxni lipawanaw. ¿Tuku xlakata chuna wanaw? Kalakapastakwi pi Jesús kinkamasiyanin pi ni lu nalita ʼakglhuwiyaw xpalakata tuku tlakg xlakaskinka nema maklakaskinaw. Jehová wanit pi nakinkamaxkiyan tuku lakaskinaw komo nalimaklakaskinaw kilatamatkan kxtaskujut (Mat. 6:31-33). Akinin lipawanaw pi Jehová chuna natlawa. Chu uma chuna, xlakata akxni wi tiku paxkiyaw, lipawanaw. Chu chuna la tlakg lipawanaw Jehová, tlakg nalimasiyaniyaw pi paxkiyaw (Sal. 143:8). Wa xlakata, akstu kilitlawatkan umakgolh takgalhskinin: «¿Klimasiyani Jehová pi kpaxki chuna la kmaklakaskin kinkilhtamaku chu kilitliwakga? ¿Klimasiya chali chali pi klipawan pi wa nakimaxki tuku tlakg xlakaskinka nema kmaklakaskin?».

9 Kalichuwinaw chatum tala tiku wanikan Mike chu xfamilia, akxni kgawasaku xwanit, lu xʼamputun alakatanu kpaís xlakata nakamakgtayakgo natalan natalichuwinan Dios. Akxni xtamakgaxtokgnitta chu xkgalhinitta chatiy lakgkgawasan, xla chuntiya xlakpuwan. Mike chu xfamilia likgalhtawakgakgolh makgapitsi artículos xlakata natalan tiku alakatanu ankgolh lichuwinankgo Dios. Wa xlakata lakkaxwilikgolh pi nialh lhuwa tuku xkgalhikgolh. Stakgolh xchikkan chu ankgolh tawilakgo kʼakgtum chiki nema tlakg aktsu xwanit. Mike nialh lhuwa tiku xkastamaxki tuku ksta kxnegocio nema tamaklakaskin xlakata likaxakakan chu katsinilh limaklakaskin Internet xlakata tlan xpulalilh. La uku, Mike chu xfamilia xatapaxuwan skujnanimakgolh Dios kʼalakatanu país. Mike wan pi akxilhnit la kgantaxtu tuku Jesús wanit nema wi kʼMateo 6:33.

KALILAKPUWAW TUKU KINKAMASIYANIYAN JEHOVÁ

10. ¿Tuku xlakata nachuna kilitlawatkan la David chu kililakpuwanatkan xlakata tuku Jehová kinkamasiyaniyan?

10 Mapakgsina David xlimaxtu kilhtamaku xlakata xlilakpuwan xlimapakgsin Jehová chu putum tuku tlawanit. Wa xlakata wa: «Akgapun tanks kinkamasiniyan ixlilanka Dios». Nachuna, wa pi «ixlimapakgsin Dios» lu tlan chu tlan nalipawanaw, kinkamaxkiyan litliwakga chu kinkamakgtayayan skgalala nawanaw. Akxni David xlilakpuwan uma, tlawalh pi xlimasiyaniputulh pi xpaxki Dios. Wa xlakata wa pi xlakaskin pi xtalakapastakni chu tuku xtlawa xmakgapaxuwalh Jehová (Sal. 19:1, 7, 14SXP). Chuna la xtlawa David, akinin na kililakpuwanatkan xlakata tuku Jehová tlawanit chu tuku kinkamasiyaniyan kBiblia. Chuna tlakg tlan xʼamigo Dios nawanaw chu nalimasiyaniyaw pi paxkiyaw.

11. ¿La tlan nalimaklakaskinaw tuku kinkamasiyaniyan Jehová xlakata nalimasiyaniyaw pi paxkiyaw? (Kaʼakxilhti xapulana dibujo.)

11 La uku, Jehová lhuwa tuku kinkamasiyaniyan xlakata xtayat, tuku tlawanit, tuku  wanit pi natlawa chu xlakata tuku wan Biblia. Uma kakilhtamaku kamakgpuwantini latamanin lhuwa tuku nakatsikgo kʼuniversidades, pero uma tlawa pi latamanin nialh napaxkikgo Dios. Pero Jehová ni kajwatiya lakaskin pi lhuwa tuku nakatsiyaw. Na lakaskin pi nakatsiyaw la nalaksakaw tuku tlan kkilatamatkan. Na lakaskin pi wa tuku nakatsiniyaw nalimaklakaskinaw xlakata tlan nakinkakitaxtuniyan kkilatamatkan chu xpalakata amakgapitsin (Prov. 4:5-7). ¿La tlan nalimaklakaskinaw tuku katsiniyaw? Pulaktu la tlan wa akxni kalimakgtayayaw amakgapitsin pi «nalakgapaskgoy» tuku xaxlikana xlakata tlan nalakgtaxtukgo (1 Tim. 2:4). Komo lhuwa latamanin nakamasiyaniyaw lata tlan nakatekgsaw tuku natlawa xTamapakgsin Dios kimpalakatakan, nalimasiyayaw pi paxkiyaw Jehová chu amakgapitsin (kalikgalhtawakga Salmo 66:16, 17SXP).

12. ¿Tuku lichuwinalh chatum tala tsumatku xlakata regalo nema Jehová maxkilh?

12 Lakgkgawasan chu laktsuman na tlan nalilakpuwankgo putum tuku kamaxki Jehová chu kamasiyani. Akgtum liʼakxilhtit, chatum tala tiku wanikan Shannon lakapastaka la makgkatsilh kxalanka tamakxtumit xaʼakgtutu kilhtamaku xwanikan «Devoción piadosa». Shannon 11 kata xkgalhi chu xtala tsumat 10 kata xwanit. Kpulaktum xla ama tamakxtumit wanka pi putum lakgkgawasan chu laktsuman xʼankgolh tawilakgo niku xkalaksaknikanit natawilakgo. Shannon na anta tawilalh. Pulana lu xpekuama, pero lu lipaxuwalh akxni kamaxkika xregalojkan,  wa libro Los jóvenes preguntan. Xla wan pi uma tuku kamaxkika makgtayalh xlakpuwa pi Jehová xlikana lama chu makgkatsilh pi xpaxki. Chu paxtikatsini Jehová xlakata lhuwa tuku tlan kinkamaxkiyan.

KAKGAXMATWI XTASTAKYAW JEHOVÁ

13, 14. ¿Tuku kilitlawatkan akxni Jehová kinkastakyawayan?

13 Biblia wan pi Jehová kastakyawa tiku kapaxki, «chuna la tlawa chatum tlat xpalakata xkgawasa tiku lu paxki» (Prov. 3:12). ¿Tuku kilitlawatkan akxni Jehová kinkastakyawayan? Max nitlan namakgkatsiyaw o nalakpuwanaw pi nitu litaxtuyaw. Pero putum kilhtamaku kilikgalhakgaxmatatkan xtastakyaw Jehová. Chuna nakatsiniyaw natlawayaw tuku tlan chu nitu kintikasakgalin kkintalakapastaknikan (Heb. 12:11). Nikxni kalakgmakgaw xtastakyaw Jehová chu ni kalisitsiw komo nitlan kgaxmatwi tuku kinkawanikan. Komo nakgalhakgaxmataw Jehová chu nalakgpaliyaw tuku natalakaskin, chuna nalimasiyaniyaw Jehová pi paxkiyaw.

Komo nalakgpaliyaw kintayatkan xlakata namakgapaxuwayaw Jehová, nalimasiyaniyaw pi paxkiyaw

14 Kxkilhtamaku palakachuwina Malaquías, judíos xmakamaxkimakgo Jehová tamakamastan nema nixatlan. Wa xlakata Jehová lu palha kastakyawalh (kalikgalhtawakga Malaquías 1:12, 13 *). Makglhuwa chuna tlawalh, pero xlakan ni kgalhakgaxmatkgolh. Alistalh, Jehová kamalakgaxokgelh (Mal. 2:1, 2). ¿Tuku kinkamasiyaniyan uma? Pi komo ni nakgalhakgaxmataw xtastakyaw Jehová o nalakpuwanaw pi ni xlakaskinka, nialhla xʼamigo nalitaxtuyaw.

Kilikgalhakgaxmatatkan Jehová chu ni wa kakilhtamaku (Kaʼakxilhti párrafo 15)

15. ¿Tukuya tayat ni kilikgalhitkan?

15 Lhuwa latamanin xalak kakilhtamaku laktlankajwa chu xakstu kapaxkikan. Lhuwa tiku ni lakgatikgo nakastakyawakan o nakawanikan tuku xlitlawatkan. Chu akxni  kgalhakgaxmatnankgo kaj xatasitsin tlawakgo. Pero Biblia wan pi akinin ni kilikgalhitkan ama tayat. Kiliʼakgatekgsatkan tuku Jehová lakaskin chu nakgalhakgaxmataw (Rom. 12:2). Jehová limaklakaskin xkachikin xlakata kinkalistakyawayan akxni talakaskin. Akgtum liʼakxilhtit, kinkawaniyan la ni xlilat nalatalalinkgo puskat chu chixku, la nakalaksakaw tiku nakatalalinaw chu la nalaksakaw tuku natlawayaw akxni lakgastananaw chu kgamananaw. Akxni makgamakglhtinanaw tastakyaw chu tlawayaw tuku kilitlawatkan xlakata namakgapaxuwayaw Jehová, limasiyaniyaw pi paxtikatsiniyaw xtastakyaw chu paxkiyaw (Juan 14:31; Rom. 6:17).

KASKINIW TAMAKGTAY JEHOVÁ

16, 17. 1) Akxni nina laksakaw tuku natlawayaw kkilatamatkan, ¿tuku xlakata pulana kilikatsitkan tuku Jehová lakpuwan? 2) Xlakata israelitas ni wa Jehová lipawankgolh ¿tuku tlawakgolh?

16 Laktsu kamanan skinikgo xnatlatnikan tamakgtay xlakata nitu nakaʼakgspula. Asta wantiku stakkgonita lakgachunin skinikgo tamakgtay xnatlatnikan. ¿Tuku xlakata? Xlakata maski tlan xakstukan nalaksakkgo tuku natlawakgo, katsikgo pi xnatlatnikan tlan nakastakyawakgo. Jehová na chuna kinkamaxkiyan talakaskin nalaksakaw tuku natlawayaw. Pero xlakata lipawanaw chu paxkiyaw, putum kilhtamaku waniyaw pi kakinkamakgtayan. Chu akxni nina laksakaw tuku natlawayaw kkilatamatkan, pulana katsiputunaw tuku lakpuwan. Akxni skiniyaw tamakgtay Jehová, kinkamaxkiyan xʼespíritu santo xlakata natlawayaw tuku tlan (Filip. 2:13).

17 Kilhtamaku akxni xlama Samuel, akxni filisteos xkatlajamakgolh israelitas kʼguerra. Pero israelitas ni wa Jehová lipawankgolh chu ni kgalhskinkgolh tuku xtlawakgolh, wata linkgolh caja xla talakkaxlan kʼguerra. Lakpuwankgolh pi chuna Jehová xʼama kamakgtaya. Pero ni kgalhskinkgolh tuku xlakpuwan Jehová. Kajwatiya tlawakgolh tuku xlakpuwankgo pi tlan. ¿La kakitaxtunilh? Nikgolh 30,000 soldados israelitas. Tuku tlakg nitlan, wa pi filisteos akgchipakgolh caja xla talakkaxlan (1 Sam. 4:2-4, 10, 11; kalikgalhtawakga Proverbios 14:12 *).

18. Chuna la wan Salmo 42:5, 6 chu Proverbios 3:5, 6, ¿tuku kilitlawatkan?

18 Chatum chixku tiku lu xpaxki Jehová tsokgli pi akxni xkgalhi laktuwa taʼakglhuwit, xlipawan pi Jehová xmakgtayalh chu xlakgmaxtulh (Sal. 42:5, 6). ¿Nachuna wix tlawaya? Max wix lipawana Jehová. Maski chuna, tlan pi putum akinin tlakg nalipawanaw. Biblia wan: «Kalipawanti Jehová xliputum minaku, chu ni wa mintalakapastakni kalipawanti. Xliputum mintiji kuentajkatlawani, chu xla namatsaja mintiji» (Prov. 3:5, 6).

19. ¿La nalimasiyaniya Jehová pi paxkiya?

19 Chuna la akxilhwi, Jehová pulana kinkapaxkin. Chuna kinkamasiyanin pi napaxkiyaw. Putum kilhtamaku kililakpuwanatkan putum tuku tlawanit kimpalakatakan chu la xlilhuwa kinkapaxkiyan. Kalimasiyaniw pi paxkiyaw xliputum kinakujkan, xliputum kintalakapastaknikan chu xliputum kilitliwakgakan (Mar. 12:30).

^ párr. 3 Miqueas 6:8: «Chixku, xla waninitan tuku tlan. ¿Chu tuku skiniman Jehová natlawaya? Kajwatiya katlawa tuku xaʼakgstitum, xlakaskinka kaʼakxilhti ni namakgatsankgananiya, chu nataktujuniya la napulalinan miDios».

^ párr. 14 Malaquías 1:12, 13: «“Pero wixin kilamaxkajwanimaw akxni wanatit: «Xmesa Jehová lixkajnit, chu tuku makgala chu xtaway, uma xlitalakgmakganat». Chu na wanatit: «¡Kaʼakxilhti! ¡Lu lilakgachanit!», chu akxni kgankgawananatit xkajniyatit”, chuna wanit Jehová tiku mapakgsi lhuwa soldados. «Chu litanitantit xatakgalha aminales, nema nila tlawan chu xatatatla. Chuna, litanitantit uma xlakata kimaxkipatit. ¿Xlilat nakkamakgamakglhtiyan?» chuna wan Jehová».

^ párr. 17 Proverbios 14:12: «Wi kgantum tiji nema kxlakatin chixku xatlan tasiya, pero linan kkalinin».