Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Septiembre kata 2015

Kamasiyaniw kintalakapastaknikan

Kamasiyaniw kintalakapastaknikan

«Wa xpalakata mastaka uma limapakgsin wa pi tapaxkit nataxtuyacha kʼakgtum ni xaxkajwani naku chu ni xaxkajwani talakapastakni.» (1 TIM. 1:5TNM)

TAKILHTLIN: 22, 48

1, 2. 1) ¿Tiku kinkamaxkin kintalakapastaknikan 2) ¿Tuku xlakata paxtikatsininanaw pi kgalhiyaw?

JEHOVÁ kinkatlawan chuna la tlan kiakstukan nalaksakaw tuku natlawaputunaw. Xlakata tlan nalaksakaw tuku tlan, kinkamaxkin talakapastakni. ¿Tuku kilhchanima talakapastakni? Wa tuku kgalhiyaw nema kinkawaniyan tuku tlan chu tuku nitlan (kaʼakxilhti recuadro «¿Tuku kilhchanima?»). Komo liwana masiyaninitaw kintalakapastaknikan, nakinkamakgtayayan natlawayaw tuku tlan chu nalakgmakganaw tuku nitlan. Akxni kinkamaxkin talakapastakni, Jehová kinkalimasiyanin pi kinkapaxkiyan chu lakaskin kapaxuwaw.

2 Wilakgo tiku ni lakgapaskgo limapakgsin xalak Biblia, maski chuna, tlawakgo tuku tlan chu lakgmakgankgo tuku ni tlan (kalikgalhtawakga Romanos 2:14, 15). ¿Tuku xlakata? Xlakata xtalakapastaknikan kawani pi makgapitsi tuku tlawakgo tlan, chu makgapitsi nitlan. Komo latamanin ni xkgalhikgolh talakapastakni, tlakg nitlan xtawi kakilhtamaku nixawa la uku. Wa xlakata paxtikatsiniyaw Jehová xlakata kinkamaxkinitan talakapastakni putum latamanin.

¿La kinkamakgtayayan kintalakapastaknikan nalaksakaw natlawayaw tuku tlan?

3. Komo liwana namasiyaniyaw kintalakapastaknikan, ¿la nakitaxtuni congregación?

 3 Tlakg lhuwa latamanin ni masiyanikgo xtalakapastaknikan. Pero akinin masiyaniputunaw xlakata lakaskinaw kakinkawanin pi akxni wi tuku tlawayaw, tlan o ni tlan. Xlakata tlan namasiyaniyaw kintalakapastaknikan, kilikgalhtawakgatkan Biblia chu nakatsiniyaw tuku wan. Pero ni kajwatiya talakaskin. Na talakaskin napaxkiyaw xlimapakgsin Dios chu nakanajlayaw pi komo makgantaxtiyaw tlan kinkakitaxtuniyan. Wa xlakata Pablo tsokgli: «Wa xpalakata mastaka uma limapakgsin wa pi tapaxkit nataxtuyacha kʼakgtum ni xaxkajwani naku, ni xaxkajwani talakapastakni chu ni xalakgaputiy takanajla» (1 Tim. 1:5, TMN). Komo akinin namasiyaniyaw kintalakapastaknikan chu nakgaxmatniyaw, tlan nakitaxtuni congregación chu natlawa pi tlan nakatalalinaw kinatalankan. Na tlakg napaxkiyaw Jehová chu tlakg nakanajlaniyaw. Nachuna, nalimasiyayaw pi tlan xʼamigos akinin chu makgapaxuwaputunaw. Chuna natasiya tukuya tayat kgalhiyaw.

4. Komo masiyaniputunaw kintalakapastaknikan, ¿tuku kilitlawatkan?

4 Komo masiyaniputunaw kintalakapastaknikan, ni kajwatiya nalikgalhtawakgayaw Biblia chu ni kajwatiya lhuwa tuku nakatsiniyaw chu lhuwa limapakgsin nakatsiyaw. Chali chali kilikgalhtawakgatkan, kililakpuwanatkan tuku likgalhtawakgayaw chu naskiniyaw Jehová kakinkamakgtayan kamakgantaxtiw tuku katsinitilhayaw. Akxni likgalhtawakgayaw Biblia tlakg lakgapasputunaw Jehová. Katsiputunaw xtayat, tuku lakgati chu tuku ni lakgati. Chuna la tlakg namasiyanitilhayaw kintalakapastaknikan, tlakg chuna nalakapastaknanaw la Jehová.

5. ¿Tuku naʼakxilhaw kʼuma artículo?

5 Max akstu nakinkakgalhskinkanan: «¿La kinkamakgtayayan kintalakapastaknikan nalaksakaw tuku tlan kkilatamatkan? ¿La nalimasiyayaw pi maxkiyaw kakni xtalakapastaknikan kinatalankan? ¿La kinkamakgtayayan kintalakapastaknikan natlawayaw tuku tlan?». Kʼuma artículo naʼakxilhaw pulaktutu la tlan nakinkamakgtayayan kintalakapastaknikan tuku tlan masiyaninitaw. Xapulana, akxni tatatlayaw. Xlipulaktiy, akxni laksakaw tuku nalilakgastananaw o tuku nalipaxuwayaw chu xlipulaktutu akxni nalichuwinanaw kintakanajlakan.

AKXNI TATATLAYAW

6. Komo tatatlayaw, ¿tuku max natalakaskin nalaksakaw?

6 Biblia kinkamaxkiyan tastakyaw nema kinkamakgtayayan ni lu natatatlayaw, kinkawaniyan pi ni nawayaw tuku nakinkatlawaniyan tuku nitlan, chu ni namalakatsaliyaw nawayanaw chu ni nakgotaw (Prov. 23:20; 2 Cor. 7:1). Xlikana, maski natlawayaw tuku wan Biblia chuntiya natatatlayaw chu nakgolontilhayaw. Wa xlakata komo tatatlayaw, max natalakaskin liwana nalaksakaw tuku nalikuchunaw. Kmakgapitsi países, natalan tlan laksakkgo komo nalikuchunkgo tuku mastakan kfarmacia  o likuchun xla naturista o atanu. Lhuwa natalan tsokgnanikgo sucursales xlakata kgalhskininankgo komo tlan o nitlan namaklakaskinkgo makgapitsi likuchun.

7. ¿Tuku nakinkamakgtayayan nalaksakaw tuku tlan xlakata kgalhni?

7 Sucursales chu lakgkgolotsin xalak congregación ni xliwanitkan natalan tukuya likuchun nalaksakkgo, maski nakakgalhskinkan (Gál. 6:5). Xlikana, lakgkgolotsin tlan nakinkamakgtayakgoyan pi akinin nalaksakaw tuku tlan nakinkakitaxtuniyan. ¿La natlawakgo? Nakinkamalakapastakakgoyan tuku Dios kinkawaniyan kBiblia. Akgtum liʼakxilhtit, nakinkamalakapastakakgoyan tuku Dios kawani kskujnin: «Ni nawayatit nkgalhni» (Hech. 15:29). Xlakata uma limapakgsin, liwana katsiyaw pi nitlan nakinkawilinikanan kgalhni o pulaktu nema xlipulaktati tuku litatlawanit kgalhni nema tlakg xlakaskinka. Chu nema tlakg laktsina tuku maxtunikan pulaktu nema xlipulaktati tuku litatlawanit kgalhni, ¿tlan nakinkawilinikanan? Chatunu kililaksakatkan, kilitlawatkan chuna la nakinkawaniyan kintalakapastaknikan. Makgapitsi natalan xtalakapastaknikan kawani pi tlan namakglhtinankgo chu makgapitsi kawani pi ni namakglhtinankgo. * ¿Tuku atanu textos xalak Biblia nakinkamakgtayayan nalaksakaw tuku nalikuchunaw?

8. ¿La kinkamakgtayayan Filipenses 4:5 xlakata nalaksakaw tuku tlan akxni tatatlayaw?

8 La uku anan tajatat nema ni anan xlikuchun. Pero makgapitsi max nawankgo pi anan xlikuchun. Kuentajkatlawaw. Proverbios 14:15 wan pi wantiku skgalala ni kanajla putum tuku wanikan, wata liwana lakpuwan tuku natlawa. Nachuna apóstol Pablo wa pi kstalaninanin Cristo liwana xlilakapastaknatkan (Filip. 4:5). Komo natlawayaw uma limapakgsin, ni wa tlakg xlakaskinka naʼakxilhaw kintajatatkan kkilatamatkan. Ni kaj wa nalakpuwanaw tuku tlan nakinkakitaxtuniyan. Akinin ni wamputunaw la tiku kaj xakstu kapaxkikan (Filip. 2:4). Katsiyaw pi xlakata makglakgalhinaninku akinin chuntiya natatatlayaw. Wa xlakata, liwana nalakkaxwiliyaw pi naskujnaniyaw Jehová, wa tuku tlakg xlakaskinka  naʼakxilhaw kkilatamatkan (kalikgalhtawakga Filipenses 1:10).

¿Tlawaputunaw pi amakgapitsin na wa natlawakgo tuku akinin tlawayaw? (Kaʼakxilhti párrafo 9)

9. 1) ¿La kinkamakgtayayan Romanos 14:13, 19 akxni laksakaw tuku nalikuchunaw? 2) Komo ni natlawayaw xtastakyaw Pablo, ¿tuku max nala?

9 Anta kRoma, makgapitsi kstalaninanin Cristo nitlan xlichuwinankgo amakgapitsin xlakata tanu tanu xlakpuwanankgo xlakata liwat chu paskua. Xlakata chuna xtlawakgo, congregación xtapitsi. Wa xlakata, Pablo kawanilh: «Wa nchatum, tlakg maxkiy nkakni makgapitsin kilhtamaku; chi nchu achatum, akxtum laktlaway mputsananiy xlipaks nkilhtamaku. Chatunu lakatanks kakatsilh kxtalakapastakna» (kalikgalhtawakga Romanos 14:5, 13, 15, 19, 20). Uma kinkamasiyaniyan pi liwana nalakapastaknanaw chu namaxkiyaw kakni tuku lakpuwankgo amakgapitsin, chu ni nalakaskinaw pi chuna nalakpuwankgo la akinin. Komo ni natlawayaw xtastakyaw Pablo, ¿tuku max nala? Max nakamakgasitsiyaw natalan chu natapitsi congregación. Kʼakgtum país, akgtum tamakgaxtokgat kawanikgolh makgapitsi natalan pi xtamawakgolh likuchun nema xlakan xlakgapaskgo chu ni xwakgolh makgapitsi taway. Makgapitsi kakgalhakgaxmatkgolh pero amakgapitsi ni. Alistalh, natalan tiku kakgaxmatnikgolh chu ni wakgolh tuku xkawanikgonit pi ni nawakgo chu xwamakgolh likuchun, chu ni chuna kakitaxtunilh la xlakaskinkgo, sitsikgolh. ¿Tuku lilakatsukulh uma taʼakglhuwit? Pi uma tamakgaxtokgat tlawakgolh pi chuna xtlawaka la xlakan xlakaskinkgo. Wa natalan xlakgchankgo nalaksakkgo komo xmaklakaskinkgolh uma likuchun o ni xwakgolh makgapitsi taway. Pero akxni kawanikgolh amakgapitsin pi xmaklakaskinkgolh, tlawakgolh pi congregación xtapitsilh.

Liwana nalakkaxwiliyaw pi naskujnaniyaw Jehová, wa tuku tlakg xlakaskinka naʼakxilhaw kkilatamatkan

10. ¿Tuku xlakata ni kilimakgtanutkan tuku laksakkgo amakgapitsin? (Kaʼakxilhti xapulana dibujo.)

10 Max namin kilhtamaku nitlan naʼakxilhaw tuku nalaksaka chatum kintalakan xlakata tuku nalikuchun. Ni xlilat komo nitlan nalichuwinanaw, nipara nawaniyaw pi kalakgpalilh tuku tlawama. Max kaj talakaskin pi tlakg liwana namasiyani xtalakapastakni tlan (1 Cor. 8:11, 12). O max wata akinin tlakg liwana kilimasiyanitkan kintalakapastaknikan tuku tlan. Chatunu akinin kililaksakatkan tuku natlawayaw chu ni nawanaw, ¿tuku xlakata? Wa tuku nakitaxtu alistalh.

AKXNI LAKSAKAW TUKU NALIPAXUWAYAW

11, 12. ¿La kinkamakgtayayan Eclesiastés 3:4 chu Gálatas 5:19-21 nakatsiyaw nalaksakaw tuku nalilakgastananaw?

11 Putum lakgatiyaw litsiyanaw chu paxuwaputunaw, xlakata Jehová chuna kinkatlawan (Ecl. 3:4). Pero komo lakaskinaw pi ni nalakglakgalhi kintalakapastaknikan tuku lilakgastananaw, kuenta kilitlawatkan tuku laksakaw chu la xlilhuwa limaxtuyaw kilhtamaku. ¿La kinkamakgtayayan kintalakapastaknikan tlan tuku nalaksakaw?

«¿Kiwani kintalakapastakni ni naktlawa tuku nitlan akxni wi tuku naktitaxtu?»

12 Biblia wan pi nikxni natlawayaw talakgxtumit nema ni xlitatlawat, kakninanikan ídolos, taskuwan, lakgaxikan, ankan kfiestas niku malakatsalikan tuku tatlawa o kgachikan. Pablo wa pi tiku «ntlawakgoy yuma nkatuwaj,  ni katilakgchankgolh kxtapakgsin Dios» (Gál. 5:19-21). Wa xlakata, katlawaw uma takgalhskinin: «¿Nitu kiwani kintalakapastakni komo naklilakgastanan akxni latlawanikan tuku nitlan o akxni tatayakan akgtum país chu akxni kakxilha tuku tlawa pi nitlan naklikatsi? ¿Nitu kiwani kintalakapastakni komo nakakxilha películas niku masiyakan pi tlan tlawakan talakgxtumit xalimaxana, takgachitat chu taskuwan?».

13. ¿La kinkamakgtayayan 1 Timoteo 4:8 chu Proverbios 13:20 xlakata nalaksakaw tuku tlan akxni nalakgastananaw?

13 Kaʼakxilhwi amakgapitsi textos nema nakinkamakgtayakgoyan tlan tuku nalaksakaw akxni wi tuku nalilakgastananaw. Akgtum liʼakxilhtit, 1 Timoteo 4:8 wan pi makgtayanan tlawakan ejercicio. Chu xlikana pi komo kgamanankan makgtayanan. Pero uma ni wamputun pi ni nakuentajtlawayaw tiku natakgamananaw. Proverbios 13:20 wan: «Wantiku katalalin xalakgskgalalan latamanin, xaskgalala nawan pero tiku katalalin tiku lu xalak tontos nitlan katikitaxtunilh». Liwana akxilhaw pi komo lakaskinaw tlan nakinkakitaxtuniyan xlakata kintalakgastankan, liwana kilimasiyanitkan kintalakapastaknikan tuku wan Biblia.

14. ¿La kamakgtayalh xtastakyaw Romanos 14:2-4 akgtum familia?

14 Kalichuwinaw akgtum tamakgaxtokgat xtatayananin Jehová, Christian chu Daniela. Christian wan pi akxni xkakninanimakgolh Dios kfamilia, katalichuwinalh chatiy xlaktsuman xlakata talakgastan chu takgaman. Lichuwinankgolh pi makgapitsi talakgastan tlan, chu makgapitsi nitlan. Na lichuwinankgolh tiku tlan katalalinkan. Ama kilhtamaku chatum xtsumat wa pi nitlan xʼakxilha tuku xtlawakgo makgapitsi xtatayananin Jehová kxescuela. Na wa pi xʼakgpuwantima pi na xtlawalh tuku xtlawakgo. Xnatlatni wanikgolh pi chatunu chatunu xlimaklakaskinat, xtalakapastakni xlakata nalaksaka tuku natlawa chu tiku natalakgastanan o natakgamanan (kalikgalhtawakga Romanos 14:2-4).

Kalimaklakaskiw Biblia xlakata nalimasiyaniyaw kintalakapastaknikan, nakinkamakgtayayan ni katitlawaw tuku nitlan (Kaʼakxilhti párrafo 14)

15. ¿La kinkamakgtayayan Mateo 6:33 nalaksakaw la nalimaklakaskinaw kinkilhtamakujkan?

15 ¿Tuku tlakg xlakaskinka akxilha? ¿Wa pi  napina ktamakxtumit, nalichuwinana Dios chu nalikgalhtawakgaya Biblia? ¿O nalakgastanana o nakgamanana? Jesús mastalh akgtum tastakyaw nema nakinkamakgtayayan nakatsiyaw la xlimakgas nalakgastananaw o nakgamananaw. Tilichuwinalh: «Wampi xapulana kaputsatit wa ntu x[ta]mapakgsin Dios, chu wa xtalakaskin, wa nchu xlipaks yuma ntu amakgapitsin, paks nakataliwakaniyan» (Mat. 6:33). Akxni nalakkaxwiliyaw la namaklakaskinaw kinkilhtamakujkan, xlitlawat pi kintalakapastaknikan nakinkamalakapastakayan xtastakyaw Jesús.

AKXNI LICHUWINANAW KINTAKANAJLAKAN

16. ¿Tuku xlitlawat kintalakapastaknikan?

16 Komo liwana nastakyawayaw kintalakapastaknikan, ni kajwatiya nakinkawaniyan ni katlawaw tuku nitlan. Na nakinkawaniyan pi katlawaw tuku tlan, nakinkawaniyan kalichuwinaw Dios. Kintalakapastaknikan nakinkamaʼakpuwantiniyan nakalitachuwinanaw Dios latamanin kʼakgatunu chiki chu alakatanu. Chuna kitaxtunilh Pablo. Xla wa pi nila xmakgxtakga nalichuwinan Dios xlakata xmakgkatsi pi uma lu xtlawaputun (1 Cor. 9:16). Komo natlawayaw chuna la tlawalh, makgantaxtimaw nawan tuku kinkalakgayawakanitan chu lipaxuw natawila kintalakapastaknikan. Nachuna, apóstol Pablo wa pi akxni lichuwinanaw Dios, tlawamaw pi xtalakapastaknikan latamanin nakgaxmatputunkgo tuku nakalitachuwinanaw (2 Cor. 4:2).

17. ¿Tuku tlawalh chatum tsumat tiku liwana xlimasiyaninit xtalakapastakni tuku wan Biblia?

17 Kalichuwinaw tala Jacqueline. Akxni xkgalhi 16 kata, xkgalhtawakgama biología, akgtum kilhtamaku kamasiyanika xlakata evolución. Xla lu xlakgati xkgalhtinan akxni wi tuku xmasiyakan kʼescuela, pero ama kilhtamaku, xtalakapastakni wanilh pi ni lu lhuwa xkgalhtinalh. ¿Tuku xlakata? Xlakata ni xtatayaputun evolución. Wa xlakata wanilh xmakgalhtawakgena tuku xkanajla. Lu tlan makgkatsilh pi xmakgalhtawakgena ni lisitsilh chu wanilh pi xkalitachuwinalh putum xcompañeros pi wa Dios tlawanit tuku anan. Xla lu tlan makgkatsilh pi liwana xlimasiyaninit xtalakapastakni tuku wan Biblia, wa makgtayalh natlawa tuku tlan. ¿Nachuna makgtayayan mintalakapastakni?

18. ¿Tuku xlakata lu xlakaskinka pi liwana namasiyaniyaw kintalakapastaknikan?

18 Komo likgalhtawakgayaw Biblia, lilakpuwanaw tuku katsiniyaw chu tlawayaw tuku kinkamasiyaniyan, kintalakapastaknikan putum kilhtamaku ni kintikamaxkin talakaskin natlawayaw tuku nitlan. Uma lu xlakaskinka, xlakata nakinkamakgtayayan namakgantaxtiyaw xlimapakgsin Jehová kkilatamatkan. ¿Ni xlikana pi putum akinin chuna tlawaputunaw?

^ párr. 7 Kaʼakxilhti sección «Preguntas de los lectores», krevista La Atalaya 15 xla junio kata 2004, páginas 29 asta 31.