Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Agosto kata 2015

¿Liskujmaw la uku xlakata nalatamayaw kParaíso?

¿Liskujmaw la uku xlakata nalatamayaw kParaíso?

«Wa ntu ntlan nkatlawakgolh, [...] nchu nakgalhikgoy wa ntu xlipaʼan [o xaxlikana] latamat.» (1 TIM. 6:18, 19)

TAKILHTLIN: 43, 40

1, 2. 1) ¿Tuku tlawaputuna kParaíso? (Kaʼakxilhti xapulana dibujo.) 2) ¿Tuku umakgolh nema tlakg nakinkamakgapaxuwayan?

APÓSTOL Pablo wa pi kiliskujatkan xlakata tlan nakgalhiyaw latamat nema nikxni sputa (kalikgalhtawakga 1 Timoteo 6:12, 19). Lhuwa kskujnin Dios kgalhkgalhimakgo nalatamakgo putum kilhtamaku anta kParaíso unu kKatiyatni. Komo wa tuku kgalhkgalhipat, xlikana pi lu antiya latapaputuna. ¿Akxilhlakachipina akxni natakiya tsisa chu xatapaxuwan natawilaya, akxni nialh natatatlaya chu nituku nalilakgaputsaya? (Is. 35:5, 6.) Kalilakpuwanti pi lu tlan nawan pi akxtum nakatatawilaya mifamilia, miʼamigos chu tiku lakastakwanankgonitta nawan (Juan 5:28, 29; Hech. 24:15). Nachuna, nakgalhiya kilhtamaku xlakata lhuwa tuku nakatsiniya. Akgtum liʼakxilhtit, tlakg nakatsiniya xlakata ciencia, nakatsiniya natlakga akgtum litlakgni o natlawaya minchik.

2 Pero naʼanan pulaklhuwa tuku tlakg nakinkamakgapaxuwayan.  Pulaktum, wa pi putum latamanin namaxkikgo kakni xtukuwani Jehová chu kajwatiya nakgalhakgaxmatkgo (Mat. 6:9, 10). Atanu tuku lu nalipaxuwayaw wa pi Katiyatni nalitatsama latamanin tiku nialh nakgalhikgo talakgalhin, chuna la Jehová xlakaskin. Nachuna, kalilakpuwaw la tsinu tsinu tlakg tlan natalalinaw Jehová (Sal. 73:28; Sant. 4:8).

3. ¿Tuku kilitlawatkan la uku?

3 Liwana katsiyaw pi Jehová putum namakgantaxti uma. ¿La likatsiyaw? Xlakata Biblia wan «xpalakata Dios ni pala pulaktum wi wantu napuwanatit pala ni lay tlaway» (Mat. 19:25, 26, Hua Xasasti Talaccaxlan, 1999). Pablo wa pi lu kiliskujatkan xlakata nakgalhiyaw latamat nema nikxni sputa. Wa xlakata talakaskin nalimasiyayaw kkilatamatkan pi liwana katsiyaw pi nialh makgas namin lisputni. Komo latamaputunaw kParaíso, talakaskin naliskujaw la uku xlakata tlan nalatamayaw anta. Kaʼakxilhwi tuku tlan natlawayaw.

LA NATLAWAYAW

4. Kalichuwinanti akgtum liʼakxilhtit nema masiya tuku tlan natlawayaw xlakata tlan nalatamayaw kParaíso.

4 ¿Tuku kilitlawatkan la uku xlakata tlan nalatamayaw kParaíso? Kalilakpuwanti uma. Akxni wi tiku naʼan kʼalakatanu país, ¿tuku tlawa? Tlawa putum tuku talakaskin xlakata nalatama xtachuna la antiya lama kpaís. Akgtum liʼakxilhtit, tlan nakatsini xtachuwinkan uma país chu nalakgapasa tuku lismanikan. Asta tlan natsuku kgalhwanan liwat xala anta. Nachuna, komo latamaputunaw kParaíso kililatamatkan la komo antiya lamaw. Kaʼakxilhwi makgapitsi tuku tlan natlawayaw.

5, 6. ¿Tuku xlakata kilismanitkan la uku nakgalhakgaxmataw xkachikin Jehová?

5 Lamaw kkakilhtamaku niku tatlawa xtalakpuwan Satanás. Akgtum liʼakxilhtit, lhuwa tiku lakpuwankgo pi ni talakaskin nakgalhakgaxmatkgo Dios chu tlan natlawakgo tuku nalakaskinkgo. ¿La kitaxtunit? Latamanin patinankgo chu ni paxuwakgo (Jer. 10:23). Pero akinin katsiyaw pi Jehová mapakgsina tiku lu paxkinan. Wa xlakata kgalhakgaxmataw. Chu kParaíso, tlakg lipaxuw nalatamakan xlakata putum latamanin nakgalhakgaxmatkgo Dios.

6 Komo latamaputunaw kParaíso, kilismanitkan nakgalhakgaxmataw la uku xkachikin Jehová. ¿Tuku xlakata? Xlakata kParaíso nakinkawanikanan tuku kilitlawatkan xlakata namakgtayananaw pi Katiyatni akgtum stlan jardín nawan chu nakamakgtayayaw tiku nalakastakwanankgo nalakgapaskgo Jehová. Naʼanan lhuwa taskujut. Wa xlakata talakaskin akstu nakinkakgalhskinkanan: «Komo xkachikin Dios kiskini kaktlawalh tuku ni klakgati, ¿nakgalhakgaxmatnan chu xatapaxuwan naktlawa?».

7, 8. 1) ¿Tuku xlakata kilismanitkan la uku akxtum chu xatapaxuwan nataskujaw xkachikin Dios? 2) ¿Tuku kawanikanit makgapitsi natalan natlawakgo? 3) ¿La namakgkatsiyaw akxni nalatamayaw kParaíso?

7 Xlakata tlan nalatamayaw kParaíso, talakaskin nalismaniyaw nalipaxuwayaw tuku kinkalakgchanan natlawayaw chu namakgtayananaw. Akgtum liʼakxilhtit, akxni xkachikin Dios kinkalakgayawayan alakatanu akgtum taskujut, liskujaw xlakata namakgtayananaw chu nalipaxuwayaw. Komo nalismaniyaw akxtum nataskujaw xkachikin Dios la uku, tlakg ni tuwa chuna natlawayaw kParaíso (kalikgalhtawakga Hebreos 13:17).  Kakalilakpuwaw israelitas akxni chankgolh ktiyat nema Jehová xkawaninit pi nakamaxki. Nila laksakkgolh niku nalatamakgo. Chatunu chatunu kawanika niku xʼamakgo latamakgo (Núm. 26:52-56; Jos. 14:1, 2). Nachuna, kParaíso max nila katilaksakwi niku nalatamayaw. Pero komo katsininitaw akxtum taskujaw xkachikin Dios, xatapaxuwan naskujnaniyaw Jehová chu ni wa xlakaskinka katiʼakxilhwi niku nalatamayaw.

8 Lanka talakgalhaman nawan naskujnaniyaw Dios akxni namapakgsinan. Wa xlakata xatapaxuwan makgtayayaw xkachikin la uku. Pero max min kilhtamaku kinkawanikan pi alakatanu kaskujniw Jehová. Akgtum liʼakxilhtit, makgapitsi natalan tiku kskujkgo ksucursal xalak Estados Unidos, kawanika pi nialh anta xʼamakgolh skujkgo. Chu makgapitsi superintendentes viajantes kawanika pi precursores especiales xlitaxtukgolh xlakata linkgoya kata o atanu tuku xlakata. Putum umakgolh natalan lipaxuwamakgo tuku tlawamakgo chu Jehová lu kasikulunatlawama. Komo akinin na paxuwaputunaw chu lakaskinaw pi Jehová kakinkasikulunatlawan, ¿tuku kilitlawatkan? Naskiniyaw xtamakgtay, natlawayaw putum tuku tlan xlakata naskujnaniyaw chu nalipaxuwayaw katuwa taskujut tuku nakinkalakgayawakanan (kalikgalhtawakga Proverbios 10:22 *). ¿Tuku natlawayaw komo wi niku lu nalatamaputunaw kParaíso pero nakinkawanikanan pi alakatanu nalatamayaw? Xlikana pi ni xlakaskinka katiʼakxilhwi niku nalatamayaw chu tuku naliskujaw. Lu napaxtikatsiniyaw Jehová pi nakinkamaxkiyan talakaskin nalatamayaw kParaíso (Neh. 8:10).

9, 10. 1) ¿Tuku xlakata max natalakaskin pi akinin tlakg nakgalhkgalhinanaw kParaíso? 2) ¿La nalimasiyayaw la uku pi ni lakapala sitsiyaw?

9 Max kParaíso natalakaskin xakgalhkgalhina nawanaw. Akgtum liʼakxilhtit, max naʼakxilhaw pi amakgapitsin lu napaxuwakgo akxni nalakastakwanankgo xfamiliajkan chu xʼamigojkan. Pero max akinin kilikgalhkgalhitkanku nawan asta akxni nalakastakwanankgo tiku kifamiliajkan. Komo chuna nakinkaʼakgspulayan, ¿nakatapaxuwayaw amakgapitsin chu nakgalhkgalhinanaw? (Rom. 12:15.) Komo la uku xatapaxuwan nakgalhkgahiyaw pi Jehová namakgantaxti tuku wanit natlawa, nachuna natlawayaw kxasasti kakilhtamaku (Ecl. 7:8).

10 Na nakinkamakgtayayan tlan nalatamayaw kParaíso akxni ni nasitsiyaw komo wi tuku natalakgpali kkilikgalhtawakgakan, la akgtum tamasiy xalak Biblia. ¿Liwana likgalhtawakgayaw umakgolh xalaksasti likgalhtawakga? Komo wi tuku ni liwana akgatekgsaw, ¿tuku tlawayaw? Komo la uku ni lakapala lisitsiyaw, akxni nalatamayaw kParaíso tlakg ni tuwa katimakgkatsiw namakglhtinanaw xasasti limapakgsin (Prov. 4:18; Juan 16:12).

11. ¿Tuku xlakata kilismanitkan la uku natapatinanaw?

 11 Akxni katapatiyaw amakgapitsin na kinkamakgtayayan tlan nalatamayaw kParaíso. Akxni Cristo namapakgsinan 1,000 kata, kimputumkan tsinu tsinu nialh katikgalhiw talakgalhin, nachuna tiku nalakastakwanankgo (Hech. 24:15). ¿Nakatapatiyaw chu tlan nakalikatsiniyaw akxni wi tuku nakinkatlawanikgoyan amakgapitsin? Komo la uku nakatsiniyaw katapatiyaw amakgapitsin, tlakg ni tuwa tlan nakatalalinaw amakgapitsin kParaíso (kalikgalhtawakga Colosenses 3:12-14).

Anta kParaíso natalakaskin nakgalhiyaw tayat nema Jehová kinkamasiyaniman la uku

12. ¿Tuku xlakata kilikgalhitkan la uku lakwan tayat nema Jehová kinkamasiyaniyan?

12 Anta kParaíso natalakaskin nakgalhiyaw tayat nema Jehová kinkamasiyaniyan la uku. ¿Tuku xlakata? Xlakata kParaíso max ni putum nakgalhiyaw tuku nalakaskinaw. Max natalakaskin nakgalhkgalhiyaw xlakata tlan nakgalhiyaw makgapitsi tuku nalakaskinaw. Natalakaskin nalipaxuwayaw chu napaxtikatsiniyaw putum la natawilayaw. Komo la uku nakgalhiyaw umakgolh tayat, nalimasiyayaw pi wi tuku tlawamaw xlakata tlan nalatamayaw kParaíso chu nalimasiyayaw pi latamaputunaw kkakilhtamaku niku putum nakgalhakgaxmatkan Jehová (Heb. 2:5; 11:1).

KAJWATIYA KASKUJNIW JEHOVÁ

Xatapaxuwan kalichuwinanti Dios

13. ¿Tuku tlakg xlakaskinka kiliʼakxilhatkan nawan kParaíso?

13 Anta kParaíso nitu kintikatsankganin xlakata xatapaxuwan natawilayaw. Pero tuku tlakg nalipaxuwayaw wa pi lu tlan natalalinaw Jehová (Mat. 5:3). Tlakg xlakaskinka naʼakxilhaw naskujnaniyaw Jehová chu lu nalipaxuwayaw (Sal. 37:4). Wa xlakata, komo latamaputunaw kParaíso, tlakg xlakaskinka kiliʼakxilhatkan naskujnaniyaw Jehová la uku (kalikgalhtawakga Mateo 6:19-21).

14. ¿Tuku tlan nalakkaxwilikgo natlawakgo kamanan?

14 ¿Tuku tlan natlawayaw xlakata tlakg nalipaxuwayaw  akxni naskujnaniyaw Jehová? Pulaktum tuku tlan natlawayaw wa pi nalakkaxwiliyaw tuku namakgantaxtiyaw. Komo wix kgawasaku, kalakpuwanti la nalimaklakaskina milatamat xlakata tlan naskujnaniya Dios. Max tlan nalakpuwana naskujnaniya Dios xaputum kilhtamaku. Kkilikgalhtawakgakan natekgsa pulaklhuwa la tlan natlawaya. * Na tlan nakatachuwinana natalan tiku skujnanikgonit Dios xaputum kilhtamaku akglhuwa kata. Komo namaklakaskina milatamat xlakata naskujnaniya Jehová, lhuwa tuku nakatsiniya nema namakgtayayan tlan nalatapaya kParaíso.

Kalakkaxwili tuku lakpuwanita namakgantaxtiya

15. ¿Tuku atanu tlan nalakkaxwiliyaw natlawayaw?

15 Kimputumkan tlan nalakkaxwiliyaw xlakata tlakg tlan naskujnaniyaw Dios. Akgtum liʼakxilhtit, tlan pulaklhuwa la nakatsiniyaw la nalichuwinanaw Dios. Na tlan nalakpuwanaw la tlakg tlan namakgantaxtiyaw xtastakyaw Dios kkilatamatkan. Chu na tlan tlakg nakatsiniyaw lu tlan nakgalhtawakgayaw, tlakg tlan namastayaw kintakgalhtinkan chu akxni wi tuku namatitaxtiyaw ktamakxtumit. Kalakapastakwi pi akxni lakkaxwiliyaw tuku tlawaputunaw nakinkamakgtayayan tlakg xatapaxuwan naskujnaniyaw Dios chu nakinkamakgtayayan tlan nalatamayaw kParaíso.

TLAKG XATLAN LATAMAT

Kapaxtikatsini Jehová xlakata putum tuku kinkamaxkiyan

16. ¿Tuku xlakata katsiyaw pi akxni skujnaniyaw Jehová wa tlakg xatlan latamat?

16 Komo nalimaklakaskinaw kilatamatkan xlakata nakatsiniyaw tlan nalatamayaw kParaíso, ¿kaj makgatsankgamaw xatlan latamat la uku? Nichuna. Skujnikan Dios chu tlan talalinkan wa tlakg tlan latamat. Ni skujnanimaw kaj xlakata wi tiku kinkalimapakgsiman o kaj xlakata lakgtaxtuputunaw akxni namasputukan kakilhtamaku. Skujnanikan  Dios chu lu tlan talalinkan Dios wa tlakg tlan latamat chu lu kinkamakgapaxuwayan. Jehová chuna kinkatlawanitan. Akxni kgalhiyaw xtapaxkit chu xtastakyaw tlakg tlan chu nitu xtachuna (kalikgalhtawakga Salmo 63:1, 3SXP). Komo nakakninaniyaw Jehová xliputum kinakujkan, lu napaxuwayaw. Tiku lhuwata kata skujnikgonit katsikgo pi tlakg tlan kinkakitaxtuniyan akxni skujnaniyaw (Sal. 1:1-3; Is. 58:13, 14).

Kaputsa tastakyaw kBiblia

17. Kawanti komo kParaíso tlan lhuwa tuku nalipaxuwayaw chu najaxaw.

17 ¿Tlan nakgamananaw, nalakgastananaw chu najaxaw kParaíso? Chuna. Jehová kinkatlawan pi lu nalipaxuwaputunaw latamat. Xla kinkawaniyan pi putum nakinkamaxkiyan tuku nalakaskinaw (Sal. 145:16; Ecl. 2:24). Pero kalakapastakwi pi tlakg lipaxuwayaw tuku kgalhiyaw akxni tlakg xlakaskinka akxilhaw tlan natalalinaw Jehová. Chuna la akxilhwi, anta kParaíso tlan najaxaw chu lhuwa tuku nalipaxuwayaw, pero tlakg xlakaskinka nawan naskujnaniyaw Jehová. Wa xlakata, la uku, kalatamaw la nalatamayaw kParaíso chu kaʼakxilhwi tuku kinkamaxkiyan Dios la uku (Mat. 6:33).

Akxni xʼamigo litaxtuyaw Jehová, tlakg tlan latamayaw chu tlakg paxuwayaw

18. ¿La limasiyamaw pi wi tuku tlawamaw xlakata tlan nalatamayaw kParaíso?

18 Anta kParaíso, tlakg tlan nawan latamat nixawa la lakpuwanaw. Kalimasiyaw la uku pi latamaputunaw kParaíso. ¿La natlawayaw? Kalimasiyaw lakwan tayat nema Jehová kinkamasiyaniyan chu xatapaxuwan kalichuwinaw xTamapakgsin. Kaskujniw Jehová xliputum kinakujkan. Liwana katsiyaw pi Jehová putum namakgantaxti tuku kinkawaninitan. Wa xlakata kalatamaw la uku xtachuna la antiya xlatamaw.

^ párr. 8 Proverbios 10:22: «Xtasikulunalin Jehová wa tuku tlawa pi lhuwa tuku nakgalhikan, chu xla ni kinkatamaxkiyan takatsanajwat».

^ párr. 14 Kalikgalhtawakga volumen 2 xla libro Los jóvenes preguntan, kpáginas 311 asta 318.