Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Julio kata 2015

Katataya xTamapakgsin Dios

Katataya xTamapakgsin Dios

«Ni katuxawat [o kakilhtamaku] ntapakgsikgoy.» (JUAN 17:16)

TAKILHTLIN: 18, 54

1, 2. 1) ¿Tuku xlakata xlakskujnin Jehová ni makgtanuyaw ktaʼakglhuwit nema kamapitsi latamanin? (Kaʼakxilhti xapulana dibujo.) 2) ¿Tuku lakpuwankgo makgapitsi xlakata xpaískan chu equipo nema tatayakgo? 3) ¿Tuku kitaxtu akxni makgapitsi lakpuwankgo pi tlakg xlakaskinka litaxtukgo nixawa amakgapitsin?

LA UKU, lhuwa latamanin tapitsikgonit xlakata lakpuwankgo pi xpaískan, xtawilatkan chu xtachuwinkan tlakg xlakaskinka nixawa xla amakgapitsi. Pero xlakskujnin Jehová niti tatayakgo. ¿Tuku xlakata? Xlakata paxkiyaw Jehová chu kgalhakgaxmatputunaw (1 Juan 5:3). Maski tanu tanu niku lakachinitaw chuntiya kilikgalhakgaxmatatkan xlimapakgsin Jehová. Akinin wa tlakg xlakaskinka akxilhaw natatayayaw Jehová chu xtamapakgsin. Wa xlakata tlan wanaw pi akinin «ni katuxawat [o kakilhtamaku]» tapakgsiyaw (kalikgalhtawakga Juan 17:11, 15, 16; Is. 2:4).

2 Lhuwa latamanin lakpuwankgo pi xpaískan chu la wilakgolh wa tlakg tlan nixawa amakgapitsin. Nachuna lakpuwankgo makgapitsi xlakata equipo nema tatayakgo. Uma tlawa pi nalatlajaputunkgo, ni nalaʼakxilhputunkgo chu asta kamakgnikgo tiku ni chuna lakpuwankgo la xlakan. Maski akinin ni makgtanuyaw kʼumakgolh taʼakglhuwit max ni katikatsiw akxni na chuna nalakpuwanaw chu nachuna kifamiliajkan. Max asta wi tiku nakinkatlawaniyan  tuku lu nitlan, akxni chuna la, lu kinkakatsaniyan xlakata Dios kinkatlawanitan pi nakatsiyaw akxni wi tiku nakinkatlawaniyan tuku nitlan (Gén. 1:27 Deut. 32:4). Wa xlakata, akxni chatum mapakgsina tlawa tuku nitlan, max nitlan nalichuwinamputunaw. Akxni chuna la, chuntiya niti natatayayaw.

Ni kililakpuwanatkan pi kxkakilhtamaku Satanás wi tuku tlan chu na wi tuku nitlan

3, 4. 1) ¿Tuku xlakata kstalaninanin Cristo ni lichuwinanaw política chu ni anaw kʼguerra? 2) ¿Tuku naʼakxilhaw kʼuma artículo?

3 Lhuwa latamanin makgtanukgo ktaʼakglhuwit xla política xlakata chuna kawanikgo mapakgsinanin. Pero kskujnin Jehová ni likgalhchuwinanaw política chu ni anaw kʼguerra. ¿Tuku xlakata? Xlakata stalaniyaw xliʼakxilhtit Jesús (Mat. 26:52). Ni kililakpuwanatkan pi kxkakilhtamaku Satanás wi tuku tlan chu na wi tuku nitlan (2 Cor. 2:11). Wa xlakata nipara tsinu makgtanuyaw kxtaʼakglhuwit kakilhtamaku (kalikgalhtawakga Juan 15:18, 19).

4 Xlakata akinin makglakgalhinanin, max min kilhtamaku nitlan kaʼakxilhaw tiku ni chuna xtawilatkan la akinin o atanu xtachuwinkan (Jer. 17:9; Efes. 4:22-24). Kʼuma artículo naʼakxilhaw la Biblia kinkamakgtayayan ni nakgalhiyaw tapuwan nema tlawa ni la nakatalalimputunaw tiku tanu xtawilatkan. Na nalichuwinanaw tuku natlawayaw xlakata nakaʼakxilhaw amakgapitsin chuna la Jehová chu Jesús. Uma nakinkamakgtayayan ni namakgatsankgananiyaw xtamapakgsin Dios.

TUKU XLAKATA KAJWATIYA TATAYAYAW JEHOVÁ

5, 6. 1) ¿Tuku xlakpuwan Jesús xlakata latamanin? 2) ¿Tuku xlakata chuna xlakpuwan Jesús?

5 Akxni tuwa namakgkatsiya tlan nakaʼakxilha amakgapitsi latamanin, kakgalhskinka: «¿Tuku xtlawalh Jesús komo chuna xtitaxtulh tuku ktitaxtuma?». Akxni Jesús xlama unu Katiyatni, tiku xalak Judea, Galilea chu Samaria nitlan xlatalalin. Wa xlakata judíos chu samaritanos ni xlatachuwinan (Juan 4:9). Tiku judíos xwankgonit nema xkawanikan fariseos chu saduceos putum kilhtamaku xtaʼakglhuwikgo (Hech. 23:6-9). Judíos tiku xlikgalhtawakgakgonit xlimapakgsin Moisés xlakpuwankgo pi tlakg xlakaskinka xlitaxtukgo nixawa tiku ni xkgalhtawakgakgonit (Juan 7:49). Chu lhuwa ni xʼakxilhputunkgo pukinanin chu tiku xalak Roma (Mat. 9:11). Pero Jesús ni makgtanulh ktaʼakglhuwit. Xlikana pi Jesús xtataya xaxlikana xlakata Jehová chu xkatsi pi Dios xkalaksaknit judíos xlakata xkachikin xlitaxtulh. Pero nikxni kamasiyanilh kstalaninanin pi tlakg xlakaskinka xwankgonit nixawa amakgapitsin (Juan 4:22). Wata kamasiyanilh nakapaxkikgo putum latamanin (Luc. 10:27).

Jehová chu Jesús ni lakpuwankgo pi pulaktu latamanin, país o tachuwin tlakg xlakaskinka nixawa amakgapitsin

6 Jesús lakxtum xkaʼakxilha putum latamanin. Nipara pulaktu latamanin tlakg xlakaskinka nixawa amakgapitsi. Jehová katlawalh latamanin tiku tanu tanu tasiyakgo xlakata xmalakgatsamakgolh katiyatni (Gén. 1:27, 28). Uma masiya pi Jehová chu Jesús ni lakpuwankgo pi makgapitsi latamanin, países o tachuwin tlakg xlakaskinka nixawa  amakgapitsin (Hech. 10:34, 35; Apocalipsis [Revelación] 7:9, 13, 14). Akinin nachuna kililakpuwanatkan (Mat. 5:43-48).

7, 8. 1) Kstalaninanin Cristo, ¿tiku tatayayaw, chu tuku xlakata? 2) ¿Tuku kililakapastakatkan xpalakata xtaʼakglhuwit kakilhtamaku?

7 Kstalaninanin Cristo ni tatayayaw tamapakgsin xalak katiyatni. Kajwatiya tatayayaw Jehová chu xtamapakgsin. Xlakata lakpuwananaw pi wa tlakg xatlan xMapakgsina latamanin. Satanás tiwa kjardín xla Edén pi Jehová ni wa tlakg xatlan Mapakgsina. Xla lakpuwan pi chuna la kalin latamanin tlakg tlan nixawa Dios chu lakaskin pi nachuna nalakpuwanaw. Jehová masta talakaskin pi chatunu chatunu latamanin nalaksakkgo tiku nakamapakgsi. Wa xlakata kakgalhskinka: «¿Kkgalhakgaxmata Jehová xlakata kkanajla pi wa tlakg xatlan mapakgsina? ¿Liwana kkatsi pi kajwatiya xtamapakgsin Dios tlan nalakkaxtlawa putum taʼakglhuwit? ¿O klakpuwan pi ni lakaskinaw pi Dios kakinkamapakgsin?» (Gén. 3:4, 5).

8 Komo wi tiku xkgalhskin tuku lakpuwana xlakata akgtum partido xlakata política o atanu organización xla lakchixkuwin, ¿tuku xkgalhtinanti? Xlikana pi makgapitsi organizaciones xlikana kamakgtayaputunkgo latamanin. Pero kalakapastakwi pi kaj Jehová tlan nakaxtlawa xtaʼakglhuwit kakilhtamaku chu namasputu putum talaksakpaxkit. Wa xlakata kaj Jehová tatayayaw. Komo ni chuna xtlawaw, nitlan nalatalalinkan kcongregación.

9. 1) ¿Tukuya taʼakglhuwit tawilalh kcongregación xalak Corinto? 2) ¿Tuku kawanilh Pablo kstalaninanin Cristo xalak Corinto?

9 Kxapulana siglo analh taʼakglhuwit kcongregación xalak Corinto. Makgapitsi kstalaninanin Cristo xtaʼakglhuwimakgolh xpalakata makgapitsi xtatayakgo Pablo, amakgapitsi Apolos, amakgapitsi Cefas chu amakgapitsi Cristo. Akxni Pablo katsilh tuku xlama lu nitlan limakgkatsilh. Lu nitlan tuku xlama xlakata uma xtlawalh pi xtapitsilh xcongregacionkan. Wa xlakata Pablo kawanilh: «Ni kaj katapapitsitit». Na kawanilh: Lakxtum «talakapastakni kakgalhitit». La uku na wa uma tastakyaw kilikgalhakgaxmatatkan. Ni xlilat natapitsi congregación (1 Cor. 1:10-13, Hua Xasasti Talaccaxlan, 1999; kalikgalhtawakga Romanos 16:17, 18).

10. ¿Tuku xmasiyaputun apóstol Pablo akxni katamalakxtumilh tiku kalaksakkanit la xpalakachuwina chatum mapakgsina?

10 Atanu kilhtamaku, Pablo kamalakapastakalh kstalaninanin Cristo tiku kalaksakkanit pi nalatamakgo kʼakgapun wa xlakata ni talakaskin nalitaʼakglhuwikgo «wantu xala katiyatna» (Filip. 3:17-20). * (Kalikgalhtawakga nota.) Pablo na tiwa pi tiku kalaksakkanit litaxtukgo la xpalakachuwina Jehová chu Cristo. Akxni chatum mapakgsina malakgacha  xpalakachuwina kʼalakatanu país, ni makgtanu kxtaʼakglhuwit ama país chu nipara kxpolítica. Nachuna, tiku kalaksakkanit naʼankgo kʼakgapun ni makgtanukgo ktaʼakglhuwit chu política (2 Cor. 5:20). Kstalaninanin Cristo tiku nalatamakgo kKatiyatni na ni makgtanukgo kxtaʼakglhuwit kakilhtamaku. Kaj xtamapakgsin Dios tatayakgo.

KAKAʼAKXILHWI AMAKGAPITSIN CHUNA LA JEHOVÁ KAʼAKXILHA

11, 12. 1) Komo wa tatayaputunaw xTamapakgsin Dios, ¿tuku ni kililakpuwanatkan? 2) ¿La xkaʼakxilha makgapitsi latamanin chatum tala puskat? 3) ¿Tuku makgtayalh chatum tala xlakata ni nalaksakpaxkinan?

11 Lhuwa latamanin tlakg tlan katalalin tiku nachuna stakkgolh chu chuwinankgo la xlakan. Makgapitsi litatlankanikgo xpaískan. Pero kilikuentajtlawatkan chu nikxni nalakpuwanaw pi tlakg tlan akinin nixawa amakgapitsin. Komo chuna lakpuwanaw kililakgpalitkan kintapuwankan. Uma nakinkamakgtayayan ni nalitaʼakglhuwiyaw tiku natatayayaw akxni natawila taʼakglhuwit. ¿Tuku nakinkamakgtayayan nalakgpaliyaw kintapuwankan?

12 Kaʼakxilhwi tuku titaxtulh tala Mirjeta.  * (Kaʼakxilhti nota.) Uma tala stakli kʼakgtum país nema xwanikan Yugoslavia. Stakli niku ni xkaʼakxilhputunkan tiku xalak Serbia. Pero katsinilh pi Jehová lakxtum kaʼakxilha latamanin, ni anan nema tlakg xlakaskinka litaxtukgo, chu na katsilh pi Satanás lakaskin pi latamanin ni nalaʼakxilhputunkgo. Wa xlakata lakgpalilh xtapuwan maski tuwa makgkatsilh. Pero akxni tsukulh guerra kʼama país, Mirjeta nitlan tsukupa kaʼakxilha serbios. Ni para xkalitachuwinanputun xtachuwin Dios. Xla xkatsi pi ni tlan chuna xmakgkatsilh wa xlakata skinilh Jehová xmakgtayalh xlakata nialh chuna xmakgkatsilh. Na skinilh pi xmakgtayalh pi precursora xlitaxtulh. Xla wan pi xlakata lichuwinan Dios lu makgtayanit. Nitlan tapuwan nema xkgalhi pulana, tsinu tsisnu sputnit xlakata akxni lichuwinan Dios lu liskuja nakapaxki latamnin la Jehová.

13. 1) ¿Tuku akgspulalh chatum tala tiku wanikan Zoila? 2) ¿Tuku tlawalh uma tala? 3) ¿Tuku kinkamasiyaniyan tuku titaxtulh Zoila?

13 Chatum tala xalak México wanikan Zoila, alh kʼEuropa. Anta kxcongregación ankgo natalan tiku xalak América Latina. Xla wan pi makgapitsi natalan xlikgalhkgamanankgo xkachikin, xtalismanin chu xtatlakgni. Uma lu xlisitsi. Pero skinilh Jehová xmakgtayalh ni chuna xmakgkatsilh. ¿Tuku kinkamasiyaniyan tuku titaxtulh Zoila? Pi makgapitsi natalan nila machokgokgo tuku makgkatsikgo akxni nitlan lichuwinankan xpaískan. Wa xlakata nikxni nawanaw tuku nalimasiyaputun pi makgapitsi latamanin tlakg xalaktlan nixawa amakgapitsin. Ni wiliputunaw tapitsit kcongregación, nachuna kxlakgstipankan latamanin (Rom. 14:19; 2 Cor. 6:3).

Kaskini Jehová pi kamakgtayan nakaʼakxilha amakgapitsin chuna la Jehová kaʼakxilha

14. ¿Tuku namakgtayayan chuna nakaʼakxilha la Jehová kaʼakxilha amakgapitsin?

14 Xlakskujnin Jehová xlikalanka kayatni lu tlan latalalinaw. Wa xlakata ni nalakpuwanaw pi akgtum país tlakg tlan nixawa atanu. Max kifamiliajkan o amakgapitsi tiku kintalakatsukan kinkamasiyanikgonitan napaxkiyaw país nema tapakgsiniyaw. Wa xlakata max chuntiya ni lu tlan nakaʼakxilhaw tiku atanu xpaískan, xtachuwinkan o xtawilatkan. Komo chuna makgkatsiya, ¿tuku namakgtayayan nalakgpaliya mintapuwan? Kalakpuwanti la akxilha Jehová latamanin tiku lanka kamakgkatsikan xpalakata xpaískan chu lakpuwankgo pi tlakg xlakaskinka nixawa amakgapitsin. Kaputsa likgalhtawakga xlakata uma tema  akxni miʼakstu nakgalhtawakgaya o akxni nakatakgalhtawakgaya mifamilia. Chu kaskini Jehová kamakgtayan nakaʼakxilha amakgapitsin chuna la xla kaʼakxilha (kalikgalhtawakga Romanos 12:2).

Komo ni makgatsankgananiputunaw Jehová putum kilhtamaku nakgalhakgaxmatniyaw maski nakinkatlawanikgoyan tuku nitlan amakgapitsin (Kaʼakxilhti párrafos 15 chu 16)

15, 16. 1) ¿Tuku tlawakgo makgapitsi xlakata akxilhkgo pi akinin ni chuna linaw kilatamatkan? 2) ¿Tuku tlan natlawakgo natlatni xlakata nakamakgtayakgo xkamanankan ni namakgatsankgananikgo Jehová?

15 Xlakata kgalhakgaxmataw Jehová minkilhtamaku kintalakatsukan, kifamiliajkan, tiku kataskujaw o kʼescuela akxilhkgo pi ni chuna likatsiyaw la xlakan (1 Ped. 2:19). Jesús wa pi makgapitsi asta ni xkinkaʼakxilhputunkgon xlakata uma. Pero kalakapastakwi pi umakgolh latamanin nitu katsikgo xlakata xTamapakgsin Dios. Wa xlakata ni akgatekgskgo tuku xlakata lu xlakaskinka akxilhaw kajwatiya natatayayaw xTamapakgsin Dios.

16 Komo ni makgxtakgaw Jehová, putum kilhtamaku natlawayaw xtalakaskin maski atanu tuku natlawakgo o tuku nawankgo amakgapitsin (Dan. 3:16-18). Max tiku lakgkgawasanku tuwa makgkatsikgo. Makgapitsi max napekuankgo akxni kawanikan pi kamaxkikgolh kakni bandera o akxni nakawanikan pi kamakgtlawakgolh atanu tuku limalankikan kachikin. Wa xlakata, xalak tlat, xlimakgtayatkan xlakata ni napekuankgo. ¿La natlawakgo? Akxni nakakninanikgo Dios kfamilia tlan nalichuwinankgo la akxilha Jehová xlakata bandera chu amakgapitsi temas nema naxtachuna. Na tlan nakamasiyanikgo la nalichuwinankgo  xtakanajlakan chuna la ni tuwa chu ni nalisitsikgo (Rom. 1:16). Nachuna, komo natalakaskin, tlan nakatachuwinankgo makgalhtawakgenanin xlakata nakawanikgo tuku kanajlakgo.

KAKATALALIW PUTUM TIKU JEHOVÁ KATLAWANIT

17. 1) ¿Tuku ni kililakpuwanatkan? 2) ¿Tuku xlakata ni nawanaw pi putum tuku tlawayaw tlakg tlan?

17 Xlikana pi lu lakgatiyaw liwat niku stakwi, tachuwin, talismanin chu la tasiya kasipijni. Pero ni lakpuwanaw pi tuku lakgatiyaw tlakg tlan nixawa tuku lakgatikgo amakgapitsin. ¿Tuku xlakata? Xlakata Jehová lhuwa tuku tlawanit xlakata tlan nalipaxuwayaw (Sal. 104:24; Apoc. 4:11). Wa xlakata nitlan komo nawanaw pi putum tuku tlawayaw tlakg tlan.

Jehová lakaskin pi putum latamanin nalakgapaskgo, nakakninanikgo chu putum kilhtamaku nalatamakgo

18. ¿La kinkamakgtayayan chuna nakaʼakxilhaw amakgapitsin chuna la Jehová kaʼakxilha?

18 Jehová lakaskin pi putum latamanin nalakgapaskgo, nakakninanikgo chu putum kilhtamaku nalatamakgo (Juan 3:16; 1 Tim. 2:3, 4). Wa xlakata talakaskin pi nakakgaxmatniputunaw tuku lakpuwankgo kinatalankan. Chu komo ni lakataya xlimapakgsin Jehová nakgaxmataw maski ni xtachuna la akinin lakpuwanaw. Komo chuna natlawayaw, kilatamatkan tlakg tlan nawan, tlakg nalipaxuwayaw chu tlan nakatalalinaw kinatalankan. Chuna la akxilhwi kajwatiya tatayayaw Jehová chu xtamapakgsin, wa xlakata ni makgtanuyaw ktaʼakglhuwit xala kakilhtamaku chu ni makgtayananaw pi makgapitsi tlakg lanka nakamakgkatsikan chu ni katalatlajaputunaw amakgapitsin. Paxtikatsiniyaw pi Jehová kinkamasiyaniyan pi tlan nakatalalinaw amakgapitsi chu nataktujuyaw. Makgkatsiyaw la tiku tsokgli salmo 133:1, niku wan: «¡[Lu] tlan chu tlan tamakgkatsi akxni ti tatapakgsini Dios akxtum tarapaxki la litakam!» o linatalan.

^ párr. 10 Max makgapitsi kstalaninanin Cristo xalak Filipos anta xtapakgsikgo kRoma. Wa xlakata tlakg lhuwa tuku xkamaxkikan talakaskin natlawakgo nixawa tiku ni xtapakgsikgo kRoma.

^ párr. 12 Kʼuma artículo makgapitsi tukuwani kalakgpalikanit.