Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2015

«Xlakaskinka» natayaniyatit

«Xlakaskinka» natayaniyatit

AKXNI xtatayana Jehová litaxtulh Andrea, lu sitsilh xchixku. * (Kaʼakxilhti nota.) Xchixku wanilh pi ni xʼalh kPukgalhtawakga xla xTatayananin Jehová chu na ni xlakaskin namapakuwi Dios. Chu akxni xkgaxmata pi Andrea xmapakuwi Jehová, lu ksitsi.

Nachuna, xchixku wanilh pi ni xkamasiyanilh xkamanan xlakata Jehová chu ni xkalilh ktamakxtumit. Lu tuwa tuku xtitaxtuma, xlakata kaj xatsekg xkalitachuwinan Dios xkamanan.

¿Nachuna titaxtunita? Max chatum tiku xalak mifamilia ni lakaskin xtatayana Jehová nawana. O max makgasa tatatlaya. O nilh minkgawasa o mintsumat, o tiku xtamakgaxtokga. O max chatum tiku xalak mifamilia nialh xtatayana Jehová litaxtu. Komo chuna titaxtupat, ¿tuku tlan natlawaya xlakata chuntiya naskujnaniya Dios chu ni namakgatsankgananiya?

Apóstol Pablo wa: «Xlakaskinka» natayaniyatit (Heb. 10:36). Wa xlakata ¿tuku tlan nakinkamakgtayayan?

KASKINI TAMAKGTAY JEHOVÁ

Akxni titaxtupat taʼakglhuwit, kaputsa xtamakgtay Jehová xlakata natayaniya. Talakaskin natlawaya oración. Chuna tlawalh tala Ana, tiku kaj lakapala nilh xchixku. Xtitaxtunita 30 kata lata xtamakgaxtokgkgonit. Ana wan: «Alh skuja chu nikxni taspitli. Kajku 52 kata xkgalhi».

Ana lu kskuja xlakata ni lu xlakapastakli tuku xtitaxtuma, pero uma ni mapanulh xtalipuwan. ¿Tuku tlawalh? Xla wan: «Putum xakwani Jehová la xakmakgkatsi chu xaktasaskini xkimaxkilh litliwakga». Ana liwana katsi pi Jehová makgtayalh, xlakata akxni xtlawakgo xʼoración tlakg tlan xmakgkatsi. Chu xlakata katsi pi Jehová namalakastakwani xchixku kParaíso lu tlan limakgkatsi (Filip. 4:6, 7).

Jehová kawani kskujnin pi putum kilhtamaku kakgaxmatni xʼoracioneskan (Sal. 65:2). Na kamaxki tuku maklakaskinkgo xlakata tlan chuntiya naskujnanikgo. Wa xlakata Jehová na namakgtayayan xlakata natayaniya maski nakgalhiya taʼakglhuwit.

 NI KAKATAMAKGATLINI NATALAN

Jehová na kinkalimakgtayayan natalan xalak congregación. Kalilakpuwanti natalan xalak makgan Tesalónica. Xlakan tayanikgolh xalipekua taputsastalanit, wa xlakata xtalakaskin xlamakgtayakgolh chu xlamatliwakglhli xlakata ni xmakgatsankgananikgolh Dios (1 Tes. 2:14; 5:11). ¿La xtlawakgo? Xʼankgo ktamakxtumit chu xlakuentajtlawa xlakata lu tlan xlatalalinkgo. ¿La tlan nachuna natlawayaw?

Talakaskin nakgalhiyaw lu tlan amigos kcongregación chu nalamakgpuwantiniyaw. Uma lu xlakaskinka, liwaka akxni kgalhiyaw taʼakglhuwit (Rom. 14:19). Apóstol Pablo tayanilh lhuwa taputsastalanit chu atanu tuwa taʼakglhuwit. Pero Jehová limaklakaskilh natalan xlakata makgtayalh. Wa xlakata Pablo wa pi natalan lu xmatliwakglhkgonit (Col. 4:10, 11). Chuna limasiyakgolh pi xpaxkikgo Pablo. ¿Lakapastaka akgtum kilhtamaku akxni natalan wankgolh o tlawakgolh tuku xmatliwakglhni?

KAKAWANI LAKGKGOLOTSIN PI KAMAKGTAYAKGON

Atanu tiku Jehová kamaklakaskin xlakata nakinkamakgtayayan, wa lakgkgolotsin xalak congregación. Xlakan limaklakaskinkgo  Biblia xlakata nakinkamatliwakglhkgoyan chu nakinkastakyawakgoyan. Biblia wan pi xlakan litaxtukgo «la putatsekgni akxni min un chu litatsekgni akxni lipekua senan, xtachuna la chuchut kʼakgtum país niku xakaskakni, xtachuna la xmastalekg akgtum lanka chiwix xatsinka niku wi desierto» (Is. 32:2). ¿Ni xlikana pi lu tlan limakgkatsiyaw xlakata wilakgo lakgkgolotsin? Wa xlakata akxni kgalhiya taʼakglhuwit kakatachuwinanti. Xlakan namakgtayakgoyan chuntiya naskujnaniya Jehová.

Xlikana, lakgkgolotsin na makglakgalhinanin (Hech. 14:15). Wa xlakata nila katilakkaxtlawakgolh putum kintaʼakglhuwitkan. Pero tlan natlawakgo oración kimpalakatakan chu uma nakinkamakgtayayan tlakg tlan namakgkatsiyaw (Sant. 5:14, 15). Akgtum liʼakxilhtit, kʼItalia, lakgkgolotsin xalak akgtum congregación makgtayakgonit chatum tala tiku akglhuwata kata lata snun tatatla. Tala wan pi xlakata natalan makglhuwa lakgapaxialhnankgo chu limasiyanikgo pi paxkikgo, uma lu makgtayanit. Wa xlakata, komo kgalhiyaw taʼakglhuwit, Jehová kinkawaniyan pi kakawaniw lakgkgolotsin kakinkamakgtayakgon.

NI KAMAKGXTAKGTI LA SKUJNIPAT JEHOVÁ

Komo chuntiya naskujnaniyaw Jehová maski kgalhiyaw taʼakglhuwit, xla nakinkamakgtayayan. Chuna titaxtulh chatum tala tiku wanikan John. Akxni xkgalhi 39 kata, wanika pi xkgalhi cáncer. Xlakpuwan pi xlakata nina lhuwa kata xkgalhi ni xlilat lu xtatatlalh. Xlilakpuwan la xʼama kakitaxtuni xpuskat chu aktsu xkgawasa tiku akgtutu kata xkgalhi. Xla wan: «Kimpuskat ni kajwatiya xlikuentajtlawat xwanit kinkgawasa, na xtalakaskin xkinkuentajtlawalh chu xkililh kpumakuchin». Tuku xlimakuchimaka lu xmakgatlakgwan o xmakgxuni chu xtlawa pi xpatlanamputulh. Chu tuku tlakg nitlan, katsilh pi xtlat lu xtatatla chu xnimaja chu xtalakaskin xkuentajtlawaka.

¿Tuku makgtayalh Jonn chu xfamilia? Maski xla xmakgkatsi pi putum kilhtamaku xtlakgwanit, xkuentajtlawa pi putum chuntiya kskujnanikgolh Jehová. Wan: «Xmin kilhtamaku tuwa xakmakgkatsiyaw, pero putum kilhtamaku xakanaw ktamakxtumit, xakanaw lichuwinanaw Dios chu xakkakninaniyaw Dios kfamilia». Jonn katsinilh pi lu xlakaskinka lu tlan natalalinkan Dios. Maski pulana lu xpekuanit, makgkatsilh pi Jehová makgtayalh chu tlan mamakgkatsinilh chu maxkilh litliwakga nema xmaklakaskin. Jonn wan pi Jehová tlan nakamakgtaya kskujnin chuna la xla makgtayalh. Jehová na tlan namakgtayayan xlakata natayaniya tuku makgalipuwanan o makgapekuanan.

Akxni natitaxtuya taʼakglhuwit, kalakapastakti tuku wa Pablo, pi «xlakaskinka» natayaniyaw. Wa xlakata katlawani oración Jehová, ni kakatamakgatlini natalan, kakawani lakgkgolotsin pi kamakgtayakgon chu chuntiya kaskujnani Jehová. Xla namakgtayayan natayaniya taʼakglhuwit nema kgalhiya la uku chu nema aku namin.

^ par. 2 Kʼuma artículo makgapitsi tukuwani kalakgpalikanit.