Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2015

Wa tuku kinkamasiyaniyan padrenuestro (xlipulaktiy)

Wa tuku kinkamasiyaniyan padrenuestro (xlipulaktiy)

«Wa minTIatkan nkatsiy xla ntu lakaskinatit.» (MAT. 6:8)

1-3. ¿Tuku xlakata chatum tala liwana katsi pi Jehová kgalhtilh xʼoraciones?

LANA, chatum tala tiku precursora litaxtu chu kilalh kʼAlemania kata 2012. Putum kilhtamaku nalakapastaka tuku titaxtulh akxni xtaspitmaja. Xla wan pi Jehová kgalhtilh akgtiy xʼoraciones. Xapulana oración kgalhtika akxni xʼama kʼaeropuerto. Ktren xʼama chu skinilh Jehová pi xmakgtayalh natekgsa tiku tlan xlitachuwinalh xlakata Jehová. Akxni chalh kʼaeropuerto, katsilh pi kʼavión niku xʼama taspita asta lichali xʼama taxtu. Skinilh Jehová pi makgtayalh xlakata nialh lhuwa tumin xkgalhi chu ni xʼanan niku klhtatalh. Wa uma xliʼakgtiy oración nema tlawalh.

2 Akxni tlawakgolh oración, wi tiku wanilh: «Tlen Lana, ¿tuku tlawapat unu?». Uma chatum tiku xcompañero xwanit kʼescuela chu xla xʼama kSudáfrica. Xtse chu xtsiyuna o xnana uma kgawasa xʼankgonit xtakgkgo kʼaeropuerto. Akxni Lana kawanilh tuku xʼakgspulama, wanikgolh pi tlan xtamakgxtakgli kxchikkan. Nachuna, lhuwa tuku kgalhskinkgolh xlakata  tuku xkanajla chu xlakata lhuwa kilhtamaku xlichuwinan Dios.

3 Lichali, kalikgalhtilh Biblia atanu xtakgalhskininkan. Chu akxni nina xtaspita kxpaís tsokgli niku xwilakgo uma lakpuskatin xlakata amakgapitsi natalan xkalakgapaxialhnankgolh. Lana chuntiya precursora litaxtu chu liwana katsi pi Jehová kgalhtilh xʼoraciones (Sal. 65:2).

Ni kalilakgaputsaw la natlawayaw xlakata nakgalhiyaw tuku namaklakaskinaw alistalh

4. ¿Tuku nakatsiyaw kʼuma artículo?

4 Akxni kgalhiyaw taʼakglhuwit, lakapala tlawaniyaw oración Jehová. Chu xla kinkakgalhtiyan chu xatapaxuwan kinkamakgtayayan (Sal. 34:15; Prov. 15:8). Pero Jesús kinkamasiyanin kpadrenuestro pi anan tuku tlakg xlakaskinka nema kiliskinatkan putum kilhtamaku. Kʼuma artículo nalichuwinanaw xaʼawatiya pulaktati tachuwin xla padrenuestro chu la kinkamakgtayayan ni namakgatsankgananiyaw Dios (kalikgalhtawakga Mateo 6:11-13).

«KAKINKAMAXKI NKINCHUJKAN» XALA UKU

5, 6. ¿Tuku xlakata talakaskin naskinaw kakinkamaxkikan kinchawkan maski kgalhiyaw tuku nawayaw?

5 Jesús ni kinkamasiyanin nawanaw «kakimaxki kinchuw» xala uku. Xla kinkamasiyanin nawanaw «kakinkamaxki nkinchujkan» xala uku. Kalichuwinaw la chuna tlawa chatum superintendente de circuito xalak África tiku wanikan Victor. Xla wan: «Kmaxki paxtikatsinit Jehová xlakata kimpuskat chu akit ni talakaskin naklilakgaputsayaw xlakata tuku nakwayaw o la nakxokgoyaw renta. Kinatalankan tiku lu kkapaxkiyaw kinkamakgtayakgoyan. Pero kskini Dios pi kakamakgtayalh natalan chuntiya natayanikgo maski tuwa tuku titaxtukgo xlakata ni anan tumin».

6 Max akinin kgalhiyaw tuku nawayaw, pero lhuwa kinatalankan ni kgalhikgo tumin. Chu amakgapitsi atanu tuku tuwa titaxtumakgo. Talakaskin nakapalakaskinaw kioracioneskan. Pero na tlan nakamakgtayayaw. Akgtum liʼakxilhtit, tlan nakatatapapitsiyaw tuku kgalhiyaw. Na tlan namastayaw tumin xlakata namakgtayananaw kxtaskujut Dios nema tatlawama xlikalanka katiyatni. Katsiyaw pi tuku mastayaw kamakgtaya natalan tiku maklakaskinkgo (1 Juan 3:17).

7. ¿Tuku liʼakxilhtit lichuwinalh Jesús nema kinkamasiyaniyan ni lu nalilakgaputsayaw tuku maklakaskinaw?

7 Akxni xmasiyanitta padrenuestro, Jesús wililh akgtum liʼakxilhtit xlakata nakinkamasiyaniyan ni lu nalilakgaputsayaw tuku maklakaskinaw xlakata tlan nalatamayaw. Xla wa pi xanat xalak kkakiwin ni xliputsatkan tuku maklakaskinkgo xlakata Jehová kakuentajtlawa. Akinin na ni xlilat lu nalilakgaputsayaw la natlawayaw xlakata nakgalhiyaw tuku namaklakaskinaw alistalh (Mat. 6:30-34). Kalipaxuwaw xlakata kgalhiyaw tuku tlakg xlakaskina chali chali. Akgtum liʼakxilhtit, tlan naskiniyaw Dios kakinkamaxkin niku natawilayaw, akgtum taskujut xlakata tlan nakgalhiyaw tuku nawayaw chu kakinkamakgtayan nalaksakaw tuku tlan akxni tatatlayaw. Pero anan tuku tlakg xlakaskinka kiliskinatkan. ¿Tuku uma?

8. ¿Tuku kinkamalakapastakayan tachuwin «kakinkamaxki nkinchujkan»?

 8 Tachuwin «kakinkamaxki nkinchujkan» xala uku kinkamalakapastakayan pi kiliskinitkan Jehová pi chuntiya kakinkamasiyanin chu kakinkamakgtayan chuntiya xʼamigos nawanaw. ¿Tuku xlakata chuna wanaw? Xlakata Jesús na wa: «Ni xman wa nkaxtalanchu nkatililatamalh nchixku, wampi wa nalilatamay xlipaks ntachuwin wa ntu wan Dios» (Mat. 4:4).

«KAKINKAMATSANKANANI XLIPAKS WANTU NITLAN KKATLAWANINITAN»

9. ¿Tuku xlakata wanaw pi talakgalhin xtachuna akxni wi tuku laklinkan?

9 Jesús wa kpadrenuestro: «Kakinkamatsankanani [o kakilatapatiw] xlipaks wantu nitlan kkatlawaninitan»o kkalakgawilanin. Chu atanu kilhtamaku wa: «Kakinkamatsankganani nkintalakgalhinkan» (Mat. 6:12, Hua Xasasti Talaccaxlan, TXS, 1999; Luc. 11:4). Jesús chuna wa, xlakata talakgalhin xtachuna akxni wi tuku laklinkan o lakgatawilakan. Kata 1952, uma revista lichuwinalh pi kilipaxkitkan Dios chu kilikgalhakgaxmatatkan. Akxni lakgalhinanaw, ni maxkimaw tuku kilimaxkitkan. Wa xlakata lakliniyaw. Revista lichuwinalh pi komo Jehová chuna xlakaskilh nialh kiʼamigokan xlitaxtulh. Na wampa: «Talakgalhin wamputun pi ni lu paxkiyaw Dios» (1 Juan 5:3).

Kilipaxtikatsinitkan Jehová xlakata xtamakamastan Jesús

10. 1) ¿Tuku xlakata Jehová tlan kinkatapatiyan? 2) ¿La limakgkatsiyaw xlakata tuku Jehová tlawanit kimpalakatakan?

 10 Talakaskin pi Jehová kakinkatapatin chali chali. Chu maski titaxtunita 2,000 kata lata Jesús nilh kimpalakatakan, chuntiya tlawa pi Jehová kakinkatapatin kintalakgalhinkan. Kilipaxtikatsinitkan Jehová xlakata kinkamaxkin uma lu xlakaskina tamaskiwin. Komo Jesús ni xnilh kimpalakatakan nila xlakgtaxtuniw talakgalhin chu linin (kalikgalhtawakga Salmo 49:7-9 chu 1 Pedro 1:18, 19). Tachuwin kakilatapatiw kintalakgalhinkan kinkamalakapastakayan pi akinin chu kinatalankan na maklakaskinkgo xtamakamastan Jesús. Uma litasiya pi Jehová lakaskin nalakpuwanaw xpalakata kinatalankan chu la talalinkgo. Uma wamputun pi tunkun nakatapatiyaw akxni wi tuku kinkatlawanikgoyan. Maski laklanka o ni lu laklanka talakgalhin tuku kinkatlawanikgonitan, akxni katapatiyaw, limasiyayaw pi kapaxkiyaw chu paxtikatsiniyaw pi Jehová kinkatapatiyan (Col. 3:13).

11. ¿Tuku xlakata talakaskin nakatapatiyaw amakgapitsin?

11 Xlakata makglakgalhinanin akinin, max min kilhtamaku tuwa makgkatsiyaw natapatiyaw chatum tala (Lev. 19:18). Chu komo nakawaniyaw amakgapitsi tuku kinkatlawanin max nakinkatatayakgoyan chu nialh katitalalinkgolh tala. Chu uma natlawa pi kaʼanalh tapapitsit kcongregación. Komo nitu natlawayaw xlakata nialh naʼanan tapapitsit kcongregación, nalimasiyayaw pi ni paxtikatsiniyaw pi Jesús nilh kimpalakatakan (Mat. 18:35). Komo ni katapatiyaw amakgapitsin, Jehová ni kintikatapatin (kalikgalhtawakga Mateo 6:14). Chu komo lakaskinaw pi Jehová kakinkatapatin, ni kilitlawatkan laklanka talakgalhin (1 Juan 3:4, 6).

Komo lakaskina pi Dios natapatiyan talakaskin nakatapatiya amakgapitsin (Kaʼakxilhti párrafo 11)

NI KAMAKGXTAKGTI NAKTLAWAYAW TUKU NITLAN

12, 13. 1) ¿Tuku titaxtulh Jesús akxni aku xtamununit? 2) ¿Tuku xlakata nila kalimawakayaw amakgapitsin komo ni tayaniyaw akxni kinkamatlawiputunkanan tuku nitlan? 3) ¿Tuku limasiyalh Jesús xlakata putum kilhtamaku kgalhakgaxmatli Dios?

12 Jesús wa kpadrenuestro: «Ni kakinkamakgaxtakgti lakimpi pala ti nakinkamatlawiyan talakgalhin». Uma kinkamalakapastakayan tuku titaxtulh Jesús akxni aku xtamununit. Jehová mastalh talakaskin pi «akgskgawini» xliʼakxilhli la xwi xtakanajla (Mat. 4:1; 6:13TXS, 1999). ¿Tuku xlakata mastalh talakaskin? Xlakata Adán chu Eva lakgmakgankgolh xtamapakgsin Dios chu xtalakaskin xtakgalhtilh uma takgalhskinin: ¿Wi tuku nitlan tlawalh Jehová akxni kamalakatsukilh latamanin? ¿Tlan ni namakgatsankganani Dios chatum tiku ni kgalhi talakgalhin akxni namatlawiputunkan tuku nitlan? ¿Tlakg tlan xʼama kakitaxtuni latamanin komo xakstukan xtapakgsikgolh chuna la makgatekgsninamputulh Satanás? (Gén. 3:4, 5.) Jehová makamilh Jesús kKatiyatni xlakata xtakgalhtilh umakgolh takgalhskinin. Pero kilhtamaku nema aku mima natakgalhti putum umakgolh takgalhskinin. Ama kilhtamaku putum tiku nalatamakgo kʼakgapun chu kKatiyatni  nakatsikgo pi Jehová wa tiku lu tlan mapakgsina.

Tlan ni namakgatsankgananiyaw Jehová maski lu tuwa tuku natitaxtuyaw

13 Jehová xasanto, wa xlakata nikxni kinkamatlawiyan tuku nitlan. Wa tiku chuna tlawa, wa Satanás (Mat. 4:3). Pero akinin nalaksakaw komo natlawayaw o ni tuku kinkamatlawiputunkanan (kalikgalhtawakga Santiago 1:13-15). Kalilakpuwaw Jesús. ¿Tuku tlawalh akxni Satanás xmatlawiputun tuku nitlan? Tunkun wanilh pi ni chuna xʼama tlawa chu likgalhtilh tuku wan xTachuwin Dios. Jesús laksakli ni namakgatsankganani Jehová. Pero Satanás ni chuntiya tamakgxtakgli. Putsalh atanu kilhtamaku xlakata namatlawi tuku nitlan (Luc. 4:13). Maski chuna, Jesús putum kilhtamaku kgalhakgaxmatli Dios. Chuna limasiyalh pi tiku ni kgalhi talakgalhin tlan ni namakgatsankganani Jehová maski lu tuwa tuku natitaxtu. Pero la uku, Satanás chuntiya kinkamatlawiputunan tuku nitlan xlakata ni nakgalhakgaxmataw Jehová.

Jehová kinkalipawanan chu kinkamakgtayayan

14. ¿Tuku natlawayaw komo tayaniputunaw akxni kinkamatlawiputunkanan tuku nitlan?

14 Takgalhskinin nema tawilalh akxni Adán chu Eva ni lakaskinkgolh pi Dios xkamapakgsilh aku natakgalhti. Wa xlakata Jehová chuntiya mastanit talakaskin pi Satanás kakinkamatlawiputun tuku nitlan. Pero kalakapastakwi pi Dios ni kinkamatlawiyan tuku nitlan. Xla kinkalipawanan chu kinkamakgtayayan. Pero ni fuerza tlawa pi kakgalhakgaxmatniw. Masta talakaskin nalaksakaw komo ni makgatsankgananiputunaw. ¿Tuku kilitlawatkan komo tayaniputunaw akxni kinkamatlawiputunkanan tuku nitlan? Tlan xʼamigo Jehová nalitaxtuyaw chu putum kilhtamaku natlawaniyaw  oración. ¿La nakinkakgalhtiyan kioracioneskan? Kaʼakxilhwi.

Chuntiya lu tlan katalalipi Jehová chu xatapaxuwan kalichuwinanti (Kaʼakxilhti párrafo 15)

15, 16. 1) Kawanti makgapitsi tuku max nakinkamatlawiputunkanan nema ni kilitlawatkan. 2) ¿Tiku xkuenta komo natlawayaw tuku nitlan?

15 Jehová limaklakaskin xʼespíritu santo xlakata nakinkamakgtayayan natayaniyaw tuku Satanás kinkaliʼakxilhan. Na limaklakaskin Biblia chu congregación xlakata nakinkamakatsiniyan tuku nitlan nakinkakitaxtuniyan. Akgtum liʼakxilhtit, kinkawaniyan pi ni kalaktlawamiw lhuwa kilitliwakgakan, kinkilhtamakujkan chu kintuminkan kaj xpalakata tuku ni maklakaskinaw. Kalichuwinaw akgtum tamakgaxtokgat tiku xtukuwanikan Espen chu Janne. Xlakan lamakgo kʼakgtum país xalak Europa niku anan lhuwa tumin. Akglhuwa kata precursores xlitaxtukgo kʼakgtum kachikin niku xtalakaskin tiku xlichuwinankgolh Dios. Pero la uku kgalhikgo chatiy kamanan chu nialhla precursores wankgo. Espen wan: «Makglhuwa kskiniyaw Jehová pi kakinkamakgtayan ni naktlawaputunaw tuku nitlan xlakata nialhla lu lhuwa kilhtamaku kskujniyaw. Kskiniyaw kakinkamakgtayan chuntiya lu tlan naktalalinaw chu xatapaxuwan naklichuwinanaw xtukuwani».

16 Atanu tuku ni kilitlawatkan wa pi ni naʼakxilhaw tiku ni lhakganankgonit. Makgapitsi akxilhkgo tiku ni lhakganankgonit xlakata chuntiya lakpuwankgo tuku nitlan. Wa xlakata komo chuna xtlawaw, nila nalimawakayaw Satanás o xkakilhtamaku pi wa xkuentajkan. ¿Tuku xlakata? Xlakan nila fuerza kinkamatlawikgoyan tuku nitlan. Pero lhuwa natalan lakchixkuwin chu lakpuskatin ni akxilhkgo uma. Akinin na tlan natayaniyaw (1 Cor. 10:12, 13).

«KAKINKAMAPANUNI XLIPAKS WANTU XKINKAMATLAWIN TU NITLAN»

17. 1) ¿La limasiyayaw pi lakaskinaw pi Jehová kakinkakuentajtlawan? 2) ¿Tuku natlawa Jehová nialh makgas kilhtamaku?

17 ¿La nalimasiyayaw pi lakaskinaw pi Jehová kakinkamapanunin xlipaks wantu xkinkamatlawiputun tuku nitlan? Ni namakgtanuyaw tuku xalak kakilhtamaku chu ni napaxkiyaw tuku wi kkakilhtamaku (Juan 15:19; 1 Juan 2:15-17). Nialh makgas Jehová nalakgachinu Satanás chu namasputu xalixkajni xkakilhtamaku. Kalakapastakwi pi Satanás lu sitsinit xlakata katsi pi sputmaja xkilhtamaku. Namaklakaskin tuku wi kxmakan xlakata nialh naskujnaniyaw Jehová. Wa xlakata chuntiya kiliskinitkan Dios pi kakinkakuentajtlawan xlakata Satanás ni nakinkatlawaniyan tuku nitlan (Apocalipsis [Revelación] 12:12, 17).

18. Komo latamaputunaw niku Satanás nialh nalatama, ¿tuku kilitlawatkan?

18 Komo latamaputunaw niku Satanás nialh nalatama, talakaskin nalatamayaw chuna la wan oración xla padrenuestro. ¿La natlawayaw? Naskiniyaw Dios pi kamilh xTamapakgsin, katasantujlilh xtukuwani chu kalalh xtalakaskin kKatiyatni. Kalipawaw pi xla nakinkamaxkiyan chali chali putum tuku maklakaskinaw xlakata nalatamayaw chu xlakata chuntiya ni namakgatsankgananiyaw.