«Katasantujlilh mintukuwani.» (MAT. 6:9TNM)

1. ¿La maklakaskinaw oración xla padrenuestro akxni lichuwinanaw Dios?

LHUWA latamanin katsikgo tuku wan oración xla padrenuestro (Mat. 6:9-13TNM). Akinin makglhuwa maklakaskinaw uma oración akxni lichuwinanaw Dios. Akgtum liʼakxilhtit, maklakaskinaw tachuwin «kamilh mintamapakgsin» xlakata nakamasiyaniyaw pi Tamapakgsin kilhchanima xtamapakgsin Dios chu nialh makgas natlawa pi Katiyatni akgtum paraíso nawan. Na maklakaskinaw tachuwin «katasantujlilh mintukuwani» xlakata nalimasiyayaw pi Dios kgalhi xtukuwani chu kilimaxkitkan kakni xlakata xasanto (Mat. 6:9, nota).

2. ¿La likatsiyaw pi Jesús ni lakaskin watiya tachuwin nawanaw akxni tlawayaw oración?

2 Lhuwa latamanin watiya watiya oración xla padrenuestro akxni tlawakgo xʼoracioneskan. Pero, ¿chuna xlakaskin Jesús xtlawaw? Ni. Xla wa: «Akxni ntlawayatit mioracionkan, ni makgIhuwa [...] watiya ntachuwin» kawantit (Mat. 6:7). Makgtum, Jesús xkamasiyanima kstalaninanin la natlawakgo oración chu xlichuwinama padrenuestro pero atanu tachuwin maklakaskilh (Luc. 11:1-4). Uma kinkamasiyaniyan pi Jesús masiyalh padrenuestro  xlakata xkatsiw tuku naskinaw kkioracionkan.

3. ¿Tukuya takgalhskinin tlan akstu natlawanikana chuna la nalikgalhtawakgatilhayaw umakgolh artículos?

3 Kʼuma artículo chu nema aku mima nalichuwinanaw oración xla padrenuestro. Chuna la nalikgalhtawakgatilhayaw, kakgalhskinka: «¿La kimasiyani oración xla padrenuestro tlakg tlan naktlawa kioraciones? ¿Klilatama chuna la wa oración xla padrenuestro?».

«KINTLATIKAN TIKU WILAPI KʼAKGAPUN»

4. 1) ¿Tuku kinkamalakapastakayan tachuwin «KinTlatikan»? 2) ¿Tuku xlakata tiku nalatamakgo kKatiyatni tlan wankgo pi Jehová xtlatkan?

4 Akxni Jesús matsukilh xʼoración wa: «KinTlatikan». Uma kinkamalakapastakayan pi Jehová wa xtlatkan putum natalan xlikalanka katiyatni (1 Ped. 2:17). Jehová kalaksaknit makgapitsi kstalaninanin Cristo xlakata nalatamakgo kʼakgapun. Xkamanan Jehová litaxtukgo. Wa xlakata Jehová xtlatkan kalitaxtuni (Rom. 8:15-17). Pero tiku nalatamakgo kKatiyatni, ¿tuku xlakata na tlan wankgo pi Jehová xtlatkan? Xlakata wa kamaxki latamat chu putum tuku maklakaskinkgo. Chu kilhtamaku nema aku mima, akxni nialh lakgalhinanin nawankgo chu ni namakgatsankgananikgo Dios akxni xaʼawatiya nakaputsananikan, na xkamanan Dios nalitaxtukgo (Rom. 8:21; Apocalipsis [Revelación] 20:7, 8).

5, 6. 1) ¿Tuku tlakg tlan tamaskiwin nakamaxkikgo natlatni xkamanankan? 2) ¿Tuku xlitlawat chatunu kamanan? (Kaʼakxilhti xapulana dibujo.)

5 Natlatni tiku kstalaninanin Cristo, tlan nakamaxkikgo xkamanan lu xatlan tamaskiwin. ¿Tukuya tamaskiwin? Nakamasiyanikgo pi Jehová wa xtlatkan xalak akgapun chu nakamasiyanikgo natlawakgo oración. Chatum superintendente viajante xalak Sudáfrica wan pi lata lakachinkgolh xlaktsuman, xla xkatatlawa oración akgatunu tsisni, kajwatiya akxni ni xtawila kxchik nila akxtum xkatatlawa oración. Xlaktsuman wankgo pi ni liwana lakapastakkgo tuku xwan xtlatkan akxni xtlawa oración. Pero liwana lakapastakkgo pi lu tlan xlimakgkatsikgo chu nitu xlipekuankgo akxni chuna xtlawakgo. Akxni tlan xakstukan tsukukgolh tlawakgo xʼoracioneskan, xtlatkan xkawani pi pixlanka xtlawakgolh xʼoracioneskan. Chuna xatlat xkgaxmata la xlaktsuman xwanikgo Jehová putum tuku xlakpuwankgo chu xmakgkatsikgo. Nachuna uma xmakgtaya xatlat nakatsi tuku xlikana xmakgkatsikgo xlaktsuman. Chu tlan xkamakgtaya nalichuwinankgo kxʼoracionkan tuku wan oración xla padrenuestro chu tlakg tlan xtlawakgolh xʼoracioneskan.

6 Chuna la staktilhakgolh xlaktsuman uma tala, tlakg tlan talalinkgolh Jehová. La uku tamakgaxtokgkgonit chu xlakan chu xchixkukan skujnanimakgo Dios putum kilhtamaku. Tuku tlakg tlan nakamaskiwikgo natlatni xkamanankan, wa pi nakamasiyanikgo pi Jehová xlikana lama chu tlan xʼamigojkan nalitaxtukgo. Xlikana pi chatunu kamanan wa xlikuentajtlawatkan la talalinkgo Jehová (Sal. 5:11, 12; 91:14).

«KATASANTUJLILH MINTUKUWANI»

7. 1) ¿Tukuya talakgalhaman kgalhiyaw xtatayananin Jehová? 2) ¿La limasiyayaw pi xlakaskinka akxilhaw uma talakgalhaman?

7 Xtatayananin Jehová kgalhiyaw talakgalhaman xlakata lakgapasaw xtukuwani Dios chu litapakwiyaw uma tukuwani (Hech. 15:14; Is. 43:10). Kpadrenuestro, Jesús masiyalh naskiniyaw Jehová uma: «Katasantujlilh mintukuwani». Uma wamputun pi ni lakaskinaw katamaxkajwanilh xtukuwani. ¿La limasiyayaw pi lanka talakgalhaman akxilhaw pi lakgapasaw chu linaw xtukuwani Jehová? Naskiniyaw pi kakinkamakgtayan  ni nawanaw chu ni natlawayaw tuku namaxkajwani xtukuwani. Ni chuna katlawaw la makgapitsi kstalaninanin Cristo xla xapulana siglo tiku wi tuku xmasiyakgo chu tanu tuku xtlawakgo. Apóstol Pablo wa pi xkuentajkan umakgolh latamanin, nitlan xlichuwinankan xtukuwani Dios (Rom. 2:21-24).

8, 9. ¿La makgtayalh Jehová chatum tala tiku lu xliskuja xlakata namalanki xtukuwani?

8 Kstalaninanin Cristo lu liskujaw xlakata namalankiyaw xtukuwani Jehová. Akgtum liʼakxilhtit, chatum tala xalak Noruega nilh xchixku chu xakstu tatamakgxtakgli aktsu xkgawasa tiku akgtiy kata xkgalhi. Xla wan: «Uma tuku ktitaxtulh lu tuwa xakmakgkatsi. Chali chali akgatunu hora xaktlawani oración Dios xlakata xkimaxkilh litliwakga chu xkimakgtayalh ni akglakgwa tuku naktlawa xlakata tuku xakmakgkatsi. Ni xaklakaskin pi Satanás xlikgalhkgamanalh Jehová kaj xlakata tuku nitlan xaklaksakli naktlawa. Na ni xakmakgatsankgananiputun Dios. Xakmalankiputun xtukuwani chu xaklakaskin pi kinkgawasa xakxilhpa xtlat kParaíso» (Prov. 27:11).

9 Xlikana pi uma tala xliskuja xlakata xmalankilh xtukuwani Jehová. Chu Jehová ¿la makgtayalh? Pulaktum la makgtayalh, wa pi natalan xlimatliwakglhkgo tuku xwanikgo wa xlakata tlan lilh xtalipuwan chu tlan tuku laksakli natlawa. Titaxtulh akgkitsis kata, tatamakgaxtokgli chatum kgolotsin xalak congregación. La uku xkgawasa kgalhi 20 kata, tamununita chu xtatayana Jehová litaxtu. Tala wan: «Lu kpaxtikatsini pi kinchixku kimakgtayalh nakmakgastaka kinkgawasa».

10. ¿La namasantujli xtukuwani Jehová?

10 Jehová namasantujli xtukuwani akxni nakamasputu putum tiku lakgmakgankgo chu ni lakaskinkgo nakamapakgsi (kalikgalhtawakga Ezequiel 38:22, 23). Alistalh, latamanin nialh katikgalhikgolh talakgalhin. Chu putum tiku nalatamakgo kʼakgapun chu kKatiyatni nakakninanikgo Jehová namalankikgo xasanto xtukuwani. Uma kilhtamaku Jehová «nalikgantaxtuy xlipaks nkatuwaj», uma wamputun pi nakamapakgsi putum tuku anan (1 Cor. 15:28).

«KAMILH MINTAMAPAKGSIN»

11, 12. ¿Tuku tlawalh Jehová kata 1876?

11 Akxni Jesús nina xtaspita kʼakgapun, kstalaninanin kgalhskinkgolh komo xTamapakgsin Dios nialh makgas xʼama tsuku mapakgsinan. Pero Jesús kawanilh pi nina xchan kilhtamaku nakatsikgo xlakata uma, wata xtalakaskin xlichuwinankgolh Dios (kalikgalhtawakga Hechos 1:6-8). Nachuna, kamasiyanilh pi kskinkgolh pi xmilh xtamapakgsin Dios chu kawanilh pi skgalalh xtawilakgolh xlakata xkatsikgolh akxni xtsukulh mapakgsinan. Wa xlakata chuntiya skinimaw Jehová pi kamilh xTamapakgsin.

12 Kkata 1876, Jehová kamakgatekgsnilh kskujnin pi Jesús xʼama tsuku mapakgsinan kʼakgapun kkata 1914. ¿La kamakgtayalh? Ama kata, tala Russell tsokgli artículo nema xlitapakuwi: «¿Tukuya kilhtamaku nasputa xkilhtamakujkan tiku ni judíos?». Anta xwan pi tuku Daniel lichuwinalh pi xʼama lay xlakata «pulaktujun kilhtamaku» watiya xkilhchanima tuku Jesús lichuwinalh xlakata «nkilhtamaku ntu lakgchankgoy xaʼakgmakgat chixkuwin» (Dan. 4:16; Luc. 21:24). Ama artículo xwan pi amakgolh kilhtamaku xʼama kgalhsputa kkata 1914. * (Kaʼakxilhti nota.)

13. 1) ¿Tuku lalh kkata 1914? 2) ¿Tuku limasiya putum tuku lanit kakilhtamaku lata 1914?

13 Kkata 1914, tsukulh guerra kʼEuropa  nema talakgatumilh xlikalanka katiyatni. Lhuwa tiku nikgolh xlakata tatsinksni. Chu kkata 1918, xalipekua taʼakgalhamat kamakgnilh tlakg lhuwa latamanin nixawa guerra. Putum uma wa tuku xʼama «litasiya» nema Jesús lichuwinalh (Mat. 24:3-8; Luc. 21:10, 11). Uma limasiyalh pi Jesús tsukulh mapakgsinan kʼakgapun kkata 1914. Ama kata Jesús «titlajanalh, lakimpi [namakgatsi xtatlaja, TNM]» (Apoc. 6:2). Jesús katamakxtucha Satanás chu xdemonios kʼakgapun chu kamakamilh kKatiyatni. Akxni chuna lalh, tsukulh kgantaxtu uma tuku xwankanit: «Kgoxutanin wa nti lamakgo nkatuxawat, chu wa nti lama ktakgayawana, sampi wa akgskgawini, kalakgminitan, na lu[...] tlanka tasitsin nkgalhiy, xpalakata mpi katsiy mpi kaj tsinu kilhtamaku nkgalhiy» (Apoc. 12:7-12).

14. 1) ¿Tuku xlakata chuntiya skinaw pi kamilh Tamapakgsin? 2) ¿Tuku lu xlakaskinka taskujut chuntiya kilitlawatkan?

14 Tuku lichuwinan libro xla Apocalipsis capítulo 12 kinkamakgtayayan naʼakgatekgsaw tuku xlakata tsukulh lay tuku lu nitlan kKatiyatni akxni Jesús tsukulh mapakgsinan. Maski Jesús mapakgsinamaja kʼakgapun, Satanás wa tiku mapakgsinama kKatiyatni. Pero nialh makgas, Jesús namasputu putum tuku nitlan, chu chuna xatakgatsin natlajanan. Wa xlakata chuntiya skinaw pi kamilh xTamapakgsin Dios. Na chuntiya natlawayaw lu xlakaskinka taskujut. ¿Tukuya taskujut? Nakalitachuwinanaw latamanin xlakata Tamapakgsin. Akxni lichuwinankan Dios kgantaxtu tuku Jesús wa: «Umakgolh xalakwan xalaksasti tamakatsin xla xtamapakgsin Dios natalichuwinan kputum katiyatni xlakata natamakatsininan kputum laklanka kachikinin; chu alistalh namin lisputni» (Mat. 24:14TNM).

«KATATLAWALH MINTALAKASKIN» KKATIYATNI

15, 16. ¿Tuku xlakata ni kajwatiya talakaskin naskinaw pi katatlawalh xtalakaskin Dios kKatiyatni?

15 Titaxtunita max 6,000 kata, akxni  kKatiyatni xtatlawa xtalakaskin Dios. Uma wamputun pi xtlawakan tuku xla xlakaskin. Wa xlakata wa pi putum «lu tlan xwanit» (Gén. 1:31). Pero Satanás lakatayalh chu lata ama kilhtamaku lhuwa latamanin ni tlawakgo tuku Dios lakaskin. Maski chuna, la uku wilakgo liwaka akgtsayan millón kskujnin Jehová. Xlakan katsikgo pi ni kajwatiya talakaskin naskinaw pi katatlawalh xtalakaskin Dios kKatiyatni. Wa xlakata fuerza tlawanikgo xlakata natlawakgo xtalakaskin. Liskujkgo xlakata namakgapaxuwakgo Dios chu lu xatapaxuwan nakalitachuwinankgo amakgapitsin xlakata Tamapakgsin.

¿Kamasiyanipat minkamanan natlawakgo xtalakaskin Dios? (Kaʼakxilhti párrafo 16)

16 Kalichuwinaw chatum misionera tiku skujnanima Dios kʼÁfrica chu kgalhi 80 kata, tamunulh kkata 1948. Xla wan: «Makglhuwa kskini Dios pi putum tiku naku tlan kgalhikgo tlan xlakgapaskgolh xlakata wijku kilhtamaku. Chu akxni wi tiku naktachuwinan, kskini Jehová pi kakimaxkilh liskgalala xlakata tlan naklakgchan kxnaku. Na kskini pi kakinkamakgtayan kimputumkan xlakata nakkakuentajtlawayaw tiku kgalhtawakgamakgolha». Uma tala kamakgtayanit lhuwa latamanin nalakgapaskgo Jehová. ¿Kalakgapasa atanu natalan tiku linkgoya kata chu lu xatapaxuwan tlawakgo xtalakaskin Jehová? (Kalikgalhtawakga Filipenses 2:17.)

17. ¿Tuku lakpuwana xlakata tuku Jehová natlawa kilhtamaku nema aku mima?

17 Kskujnin Dios chuntiya naskinaw pi katatlawalh xtalakaskin kKatiyatni asta akxni nakamasputukgo xtalamakgasitsin. Akxni chuna nala, Katiyatni akgtum paraíso nawan chu lhuwa millón latamanin nalakastakwanankgo. Jesús wa pi putum «nti aknukgoy, nakgaxmatkgoy xtachuwin, natakxtupalakgoy» (Juan 5:28, 29). Kalakpuwanti la lu napaxuwayaw akxni nakaʼakxilhparayaw tiku nikgonita chu lu xkapaxkiyaw. Dios naxaka putum kilakgpixtajatkan (Apoc. 21:4). Lhuwa tiku nalatamaparakgo ni katsikgolh xaxlikana xlakata Jehová chu Jesús. Wa xlakata Biblia kalimapakuwi «ni xalakwan». Lu xatapaxuwan nakamasiyaniyaw natlawakgo xtalakaskin Dios xlakata tlan nalatamakgo putum kilhtamaku (Hech. 24:15; Juan 17:3).

18. ¿Tuku tlakg maklakaskinkgo latamanin?

18 Nialh makgas, Jehová natlawa pi kakgantaxtulh pulaktutu tuku xapulana skinaw kpadrenuestro: namin xTamapakgsin chu namasantujli xtukuwani chu putum tuku wilakgolh kakilhtamaku akxtum nakakninanikgo Jehová. Chuna Dios nakamaxki putum latamanin tuku maklakaskinkgo. Kʼartículo nema aku mima nakatsiyaw atanu tuku Jesús kinkamasiyanin naskinaw kpadrenuestro.

^ par. 12 Komo tlakg katsiputuna tuku xlakata kwanaw pi uma tuku xwankanit pi nala kgantaxtulh kkata 1914, kaʼakxilhti libro ¿Tuku xlikana masiyay Biblia?, páginas 215 asta 218.