Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2015

Cristo wa «xlitliwakga, [...] Dios»

Cristo wa «xlitliwakga, [...] Dios»

«Wa nCristo, xlitliwakga, [...] Dios.» (1 COR. 1:24)

1. ¿Tuku xlakata Pablo wa pi Cristo litaxtu «xlitliwakga, [...] Dios»?

AKXNI Jesús latamalh kKatiyatni, tlawalh laklanka milagros. Komo nalikgalhtawakgayaw kBiblia xlakata umakgolh milagros, natatliwakglha kintakanajlakan (Mat. 9:35; Luc. 9:11). Jesús tlan tlawalh umakgolh milagros xlakata Jehová xmaxkinit xlitliwakga. Wa xlakata apóstol Pablo wa pi Cristo litaxtu «xlitliwakga, [...] Dios» (1 Cor. 1:24). ¿Pero tuku kinkamasiyaniyan xmilagros Jesús?

2. ¿Tuku kinkamasiyaniyan xmilagros Jesús?

2 Xmilagros Jesús lhuwa tuku kinkamasiyaniyan (Hech. 2:22). Akgtum liʼakxilhtit, xlakata uma, katsiyaw pi kxtamapakgsin xla 1,000 kata, Jesús natlawa milagros nema nakalimakgtaya putum tiku nalatamakgo kKatiyatni. Xmilagros na kinkamakgtayayan tlakg nalakgapasaw xtayat Jesús chu Jehová. Kʼuma artículo nalichuwinanaw akgtutu xmilagros Jesús chu naʼakxilhaw la tlan nakinkamakgtayayan la uku chu kilhtamaku nema aku mima.

 MILAGRO NEMA KINKAMASIYANIYAN WI TUKU LU NAMASKIWINAMPUTUNAW

3. 1) ¿Tuku lalh kʼakgtum tamakgaxtokgat nema xtlawamaka kCaná? 2) ¿Tuku xlakata Jesús tlawalh uma milagro?

3 Jesús tlawalh xapulana milagro kʼakgtum tamakgaxtokgat kCaná. Ni katsiyaw tuku xlakata, pero ni xʼanan lhuwa vino nema xtalakaskin ktamakgaxtokgat. Uma lu limaxana xkakitaxtunilh tiku xtamakgaxtokgmakgo, xlakata xtalakaskin pi lu tlan xkalikatsinikgolh tiku xʼankgonit kxtamakgaxtokgatkan. Wa xlakata María skinilh Jesús pi xkamakgtayalh. ¿Tuku xlakata? María liwana xkatsi tuku xwankanit xlakata Jesús chu xkatsi pi xʼamaka limapakuwikan «xKam nti ntlanka xlakatsukut» (Luc. 1:30-32; 2:52). Wa xlakata María max xlakpuwan pi Jesús tlan xkamakgtayalh tiku xtamakgaxtokgmakgo. Pero tuku liwana katsiyaw, wa pi María chu Jesús xkamakgtayaputunkgo. Wa xlakata Jesús tlawalh pi 380 litros chuchut, xatlan vino xwa (kalikgalhtawakga Juan 2:3, 6-11). Jesús ni xlakgchan natlawa uma milagro, pero chuna tlawalh xlakata xkamakgtayaputun latamanin. Chuna xtlawama la Jehová, tiku lu lhuwa tuku kinkamaskiwiyan.

Jesús wa pi talakaskin nalismaniyaw natlawayaw tuku tlan xpalakata amakgapitsi

4, 5. 1) ¿Tuku kinkamasiyaniyan milagro xlakata chuchut chu vino? 2) Xlakata ama milagro, ¿tuku kinkamasiyaniyan pi natlawa Jehová kParaíso?

4 Jesús limaklakaskilh xlitliwakga Jehová xlakata tlawalh pi lhuwa chuchut xatlan vino litaxtulh. Lhuwa vino tlawalh xlakata xkakchanilh lhuwa latamanin. Ama milagro kinkamasiyaniyan pi Jehová chu Jesús lu lhuwa tuku maskiwinankgo chu xlikana akgatekgskgo la makgkatsiyaw. Na liwana kinkamasiyaniyan pi Jehová namasta taway nema nalakaskinkgo putum tiku nalatamakgo kParaíso (kalikgalhtawakga Isaías 25:6).

5 ¡Kalilakpuwanti! Akxni nalatamayaw kParaíso, Jehová natlawa pi nitu nakinkatsankganiyan. Putum nakgalhiyaw akgtum lilakgatit chiki chu xatlan taway. Akxni lilakpuwanaw putum tuku tlan nakinkamaxkiyan Jehová, lu paxtikatsiniyaw.

Katlawaw chuna la Jesús chu kalimaklakaskiw kinkilhtamakujkan xlakata nakamakgtayayaw amakgapitsin (Kaʼakxilhti párrafo 6)

6. 1) ¿La xlimaklakaskin Jesús xlitliwakga? 2) ¿La tlan natlawayaw chuna la Jesús?

6 Jesús nikxni limaklakaskilh xlitliwakga xlakata xakstu nalimakgtayakan. Akgtum liʼakxilhtit, ¿tuku tlawalh akxni Akgskgawini wanilh pi kaxtalanchu xtlawalh chiwix? Ni tlawaputulh (Mat. 4:2-4). Xla xlimaklakaskin xlitliwakga xlakata xkamakgtayalh amakgapitsin. ¿La tlan nachuna natlawayaw? Jesús wa pi talakaskin nalismaniyaw natlawayaw  tuku tlan xpalakata amakgapitsin (Luc. 6:38). ¿Tuku tlan natlawayaw? Tlan nakawaniyaw pi kaʼankgolh wayankgo kkinchikkan. Na tlan nalimaxtuyaw kilhtamaku akxni nasputa tamakxtumit, max xlakata nakgaxmatniyaw tiku makgatawakgaputun xtaʼakgchuwin. Chu max tlan nakamakgtayayaw tiku aku katsinimakgo nalichuwinankgo Dios. Akxni lhuwa tuku kamaxkiyaw amakgapitsin chu kamakgtayayaw, tlawamaw chuna la Jesús.

«PAKS TIWAYANKGOLH, NA TIKGALHKGASKGOLH»

7. ¿Tukuya taʼakglhuwit nikxni katisputli kxkakilhtamaku Satanás?

7 La uku lamakgo lhuwa pobres. Pero uma chuna xwanit lata akxni tsokgka Biblia. Jehová kawanilh israelitas: «Putum kilhtamaku naʼanan tiku pobre kxlakgstipan katiyatni» (Deut. 15:11). Chu lhuwa ciento kata alistalh, Jesús kawanilh: «Wa limaxkganin [o pobres] xaliankgalhin natalatapakgoyatit» (Mat. 26:11). ¿Xwamputun pi putum kilhtamaku naʼanan tiku pobre kKatiyatni? Ni. Jesús xwamputun pi putum kilhtamaku naʼanan pobres kxkakilhtamaku Satanás. Pero kParaíso ni chuna katiwa. Anta putum nakgalhiyaw tuku nawayaw chu ni tiku pobre katiwa.

8, 9. 1) ¿Tuku xlakata Jesús litlawalh milagro kaxtalanchu chu skiti? 2) ¿Tuku makgkatsiya akxni lilakpuwana ama milagro?

8 Salmo 145:16 wan pi Jehová stonkga xmakan chu kamaxki putum tuku maklakaskinkgo tiku staknankgo. Akxni Jesús milh kKatiyatni, chuna tlawalh la xTlat chu kamaxkilh lhuwa latamanin tuku xmaklakaskinkgo. Pero ni kaj xlakata nalimasiya pi lhuwa litliwakga xkgalhi. Chuna tlawalh xlakata xlikana xkamakgtayaputun. Akgtum liʼakxilhtit, kaʼakxilhwi tuku wan Mateo 14:14-21 (kalikgalhtawakga). Lhuwa tiku xalak lakalhuwa kachikinin kaj xtlawamakgolh kstalanimakgolh Jesús (Mat. 14:13). Akxni xtsiswanita, kstalaninanin Jesús akxilhkgolh pi latamanin xtlakgwankgonit o xʼakgxunikgonit, chu xtsinksmakgo. Wa xlakata wanikgolh Jesús pi xkawanilh pi xʼankgolh chu xtamawakgolh tuku xwakgolh. ¿Tuku tlawalh Jesús?

9 Jesús kamaxkilh tuku nawakgo lhuwa miles latamanin chu limaklakaskilh kaj makkitsis kaxtalanchu chu tantiy skiti o tamakgnin. ¿Tuku xlakata tlawalh ama milagro? Xlakata kapaxki latamanin chu kamakgtayaputun. Biblia wan pi lhuwa taway kamaxkilh, putum wayankgolh asta akxni liwana kgalhkgaskgolh. Uma kamatliwakglhli xlakata tlan xtaspitkgolh xchikkan (Luc. 9:10-17). Lhuwa taway xʼanan, asta 12 canastas akgataxtulh.

10. ¿Tuku wan Dios pi natlawa xlakata tiku pobres?

10 Xlakata mapakgsinanin nitlan likatsikgo chu xakstukan kapaxkikan, lhuwa tiku pobres. Asta makgapitsi  xtatayananin Jehová ni lhuwa taway kgalhikgo. Pero Dios tlan nakamaxki putum latamanin tuku maklakaskinkgo chu chuna tlawaputun. Xla wan pi namasputu talimaxkgen (kalikgalhtawakga Salmo 72:16). Nialh makgas, tiku kgalhakgaxmatkgo Dios nalatamakgo niku nialh katiʼanalh tiku nitlan likatsi chu tiku pobre.

Xmilagros Jesús limasiyalh pi limaklakaskimputun xlitliwakga xlakata nakinkamakgtayayan

11. 1) ¿Tuku xlakata liwana katsiyaw pi nialh makgas Jesús nalimaklakaskin xlitliwakga xlakata nakamakgtaya putum latamanin? 2) Akxni lilakpuwanaw tuku Cristo natlawa, ¿tuku na tlawaputunaw?

11 Akxni Jesús xlama kKatiyatni, akgtutu kata a itat tlawalh milagros kaj antiya niku xlama (Mat. 15:24). Pero la uku mapakgsina, chu akxni namapakgsinan 1,000 kata, tlan nakamakgtaya putum latamanin (Sal. 72:8). Xmilagros Jesús limasiyalh pi limaklakaskimputun xlitliwakga xlakata nakinkamakgtayayan. Wa xlakata liwana katsiyaw pi nialh makgas chuna natlawa. Akxni lilakpuwanaw uma, tlawa pi nakalimakgtayaputunaw kinkilhtamakujkan chu kilitliwakgakan amakgapitsin (Sal. 45:1; 49:3). Xlikana, akinin nila tlawayaw milagros. Pero tlan nakalitachuwinanaw latamanin tuku wan Biblia pi nala. Chu chuna kilitlawatkan (Rom. 1:14, 15).

JEHOVÁ CHU JESÚS TLAN MAPAKGSIKGO TUKU ANAN KAKILHTAMAKU

12. ¿Tuku xlakata liwana katsiyaw pi Jesús katsi la skujma Katiyatni?

12 Biblia wan pi akxni Dios tlawalh Katiyatni, Jesús xmakgtayama chu xlitaxtu «skujni xapuxku» o tiku lu xatlan skujni (Prov. 8:22, 30, 31; Col. 1:15-17). Wa xlakata, Jesús liwana katsi la skujma Katiyatni chu katsi la namapakgsi tuku lay kakilhtamaku, la akxni anan lanka un o akxni taʼakgayawa pupunu.

Akxni lilakpuwana tuku xlakata Jesús tlawalh milagros, ¿tuku kaks malakawaniyan? (Kaʼakxilhti párrafos 13 chu 14)

13, 14. Kalichuwinanti pulaktum tuku limasiya pi Jesús tlan mapakgsi tuku anan kKatiyatni.

13 Akxni Jesús xlama kKatiyatni, limasiyalh pi tlan mapakgsi tuku anan kKatiyatni. Akgtum liʼakxilhtit, makgtum limaklakaskilh xlitliwakga Dios xlakata namakaksa akxni «lipikua ntitsukulh unan» (kalikgalhtawakga Marcos 4:37-39). Chuna la wan tiku lu katsini xlakata Biblia, ama unisen lu tliwakga xwanit, lakgtsitsekge puklhni xʼanan, lhuwa xʼunama, xjilima chu lanka sen xmima. Uma unisen putum masputunan. Apóstol Mateo na lichuwinalh uma lipekua un (Mat. 8:24).

14 Kalakpuwanti tuku xlama. Taʼakgayawana xmakgpuspitputun barca, chu xtanu chuchut. Unisen lu pixlanka xtakgaxmata, chu barca anu anu xlinkan. Maski chuna, Jesús lu xtlakgwanit chu klhtatama. Pero xʼapóstoles lu xpekuamakgo. Wa xlakata malakgawanikgolh chu wanikgolh pi xʼamakgolh nikgo (Mat. 8:25). ¿Tuku tlawalh Jesús? Takilh chu wanilh un, chu pupunu: «Kaks» (Mar. 4:39). ¡Chu unisen takaksli! Liwana tasiya pi Jesús tlan mapakgsi tuku anan kKatiyatni.

15. ¿Tuku likatsiyaw pi Jehová mapakgsi tuku anan kKatiyatni?

 15 Wa Jehová tiku maxkilh litliwakga Cristo xlakata namapakgsi tuku anan kKatiyatni. Wa xlakata liwana katsiyaw pi Jehová tlan mapakgsi tuku anan kKatiyatni. Akgtum liʼakxilhtit, akxni nina xmin Munkaklat, xla wa: «Kaj akgtujun kilhtamaku tsankga naktlawa pi kasenalh xʼakgspun katiyatni tipuxum kilhtamaku chu tipuxum katsisni» (Gén. 7:4). Nachuna, Éxodo 14:21 wan pi Dios limaklakaskilh «akgtum tliwakga un, nema [...] xmimacha niku taxtuyacha chichini» xlakata xtlawalh pi xtapitsilh pupunu. Chu Jonás 1:4 wan pi atanu kilhtamaku Jehová tlawalh pi «lu lipekua [x]tsukulh takgayawa pupunu». Lu tlan limakgkatsiyaw xlakata katsiyaw pi kParaíso Dios namapakgsi tuku anan kKatiyatni.

16. ¿Tuku xlakata tlan limakgkatsiyaw xlakata katsiyaw pi Jehová chu Jesús tlan mapakgsikgo tuku anan kKatiyatni?

16 ¿Tuku xlakata lu tlan limakgkatsiyaw xlakata katsiyaw pi Jehová chu Jesús tlan mapakgsikgo tuku anan kKatiyatni? Xlakata uma wamputun pi akxni Cristo namapakgsinan 1,000 kata, ni katiʼanalh lu tliwakga un,  tsunamis, volcanes chu ni katitachikilh tiyat. Ni katipekuaw xlakata nala tuku namasputunan, xlakata Jehová nakakuentajtlawa latamanin (Apocalipsis [Revelación] 21:3, 4). Liwana katsiyaw pi Cristo nalimaklakaskin xlitliwakga Dios xlakata namapakgsi tuku anan kKatiyatni.

KATLAWA CHUNA LA DIOS CHU CRISTO

17. ¿La tlan natlawayaw chuna la Jehová chu Jesús?

17 ¿La tlan natlawayaw chuna la Dios chu Cristo? Akinin nila tlawayaw milagros, pero tlan tlawayaw tuku wan Proverbios 3:27 (kalikgalhtawakga). Akxni patinankgo kinatalankan, tlan nakamaxkiyaw tuku maklakaskinkgo chu tlan nakamatliwakglhaw (Prov. 17:17). Tlan chuna natlawayaw akxni wi tuku masputunan. Akgtum liʼakxilhtit, akxni xtitaxtunita huracán, lu lakxlalh xchik chatum tala tiku ninita xchixku. Akxni makgtayakgolh natalan, tala wa pi lu xpaxtikatsini pi xtatayana Jehová litaxtu, ni kaj xlakata wi tuku maxkika, wata wa tlakg paxtikatsini pi makgtayaka natatliwakglha xtakanajla. Nachuna titaxtulh chatum tala tiku nina tamakgaxtokga. Xla ni xkatsi tuku natlawa xlakata unisen xlakxtlawanit xchik. Pero natalan minkgolh chu takaxtlawakgolh. Tala wa pi ni xʼanan tachuwin xlakata xwa putum tuku xmakgkatsi. Chu alistalh wa: «Kpaxtikatsinilh Jehová». Putum paxtikatsiniyaw pi kgalhiyaw natalan tiku kinkamakgtayakgoyan. Pero tlakg kapaxtikatsiniyaw Jehová chu Jesús xlakata kinkakuentajtlawakgoyan.

18. Akxni lilakpuwana tuku xlakata Jesús tlawalh milagros, ¿tuku kaks malakawaniyan?

18 Akxni Jesús xminit kKatiyatni, limasiyalh pi wa xlitaxtu «xlitliwakga, [...] Dios». Pero ni tlawalh milagros kaj xlakata amakgapitsi xʼakxilhkgolh o kaj xlakata xakstu xlitamakgtayalh. Xla xtlawa milagros xlakata xlikana xkapaxki latamanin chu xkamakgtayaputun. Kʼartículo nema aku mima tlakg nalichuwinanaw xlakata uma.