Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2015

Cristo xkapaxki latamanin

Cristo xkapaxki latamanin

«Tuku tlakg xakkapaxki wa xkamanan latamanin.» (PROV. 8:31)

1, 2. ¿La limasiyalh Jesús pi lu kapaxki latamanin?

KCAPÍTULO akgtsayan xla Proverbios lichuwinan liskgalala xtachuna la chatum lataman. Liskgalala nema lichuwinan, wa kilhchanima Jesús akxni nina xmin kKatiyatni. Anta wan pi akxni Dios tlawalh putum tuku anan, anta xtawi Jesús chu xlitaxtu «skujni xapuxku» o chatum tiku lu tlan tlawa xtaskujut. Kalakpuwanti la xpaxuwa chu tlan xlimakgkatsi Jesús akxni xTlat xtlawama akgapun chu Katiyatni. Pero xliputum tuku Dios tlawalh, wa tuku Jesús tlakg xkapaxki, wa latamanin (Prov. 8:22-31).

2 ¿La limasiyalh Jesús pi lu paxki Dios chu na kapaxki latamanin? Limasiyalh akxni milh kKatiyatni xlakata xmastalh xlatamat chu xkinkalakgmaxtun ktalakgalhin chu klinin (Mat. 20:28; Filip. 2:5-8). Nachuna, akxni xlama kKatiyatni, makglhtinalh xlitliwakga Dios xlakata xtlawalh milagros. Amakgolh milagros na limasiyalh pi lu kinkapaxkiyan chu nialh makgas lhuwa tuku lu tlan natlawa kimpalakatakan.

3. ¿Tuku nalichuwinanaw kʼuma artículo?

 3 Akxni Jesús xlama kKatiyatni, kalitachuwinalh latamanin xlakata xTamapakgsin Dios (Luc. 4:43). Xla xkatsi pi uma tamapakgsin namasantujli xtukuwani Dios chu nalakkaxtlawa taʼakglhuwit nema anan putum kilhtamaku. Chu milagros nema tlawalh akxni xlichuwinama Dios, limasiyalh pi kapaxki putum latamanin. Lu xlakaskinka akxilhaw putum uma. ¿Tuku xlakata? Xlakata xmilagros kinkamasiyaniyan pi wi tuku tlan nala kilhtamaku nema aku mima. Kʼuma artículo nalichuwinanaw akgtati xmilagros Jesús.

«KLAKASKIN; KAPAKSTI»

4. ¿Tuku lalh akxni Jesús tatanokglhli tiku xkgalhi lepra?

4 Akxni Jesús xlichuwinama Dios, alh kkachikin niku xwanikan Galilea. Anta tatanokglhli chatum chixku tiku xkgalhi lu nitlan tajatat, nema wanikan lepra (Mar. 1:39, 40). Chixku lu xtatatla, asta makuchina Lucas wa pi putuminika xkgalhi «lepra» (Luc. 5:12). Biblia wan pi akxni chixku akxilhli Jesús, lakgtatsokgostalh chu wanilh: «Tlati, lapi xlakaskinti, tlan nakimapaksaya» Chixku xkatsi pi Jesús tlan xmapaksalh. Pero ni xkatsi komo Jesús xmapaksaputun. ¿Tuku xlakata? Xlakata xpulalinanin takanajla ni xkaʼakxilhputunkgo tiku xkgalhikgo lepra. Chu uma chixku max nialh tlan xtasiya xlakata lepra. ¿Tuku tlawalh Jesús? ¿Nachuna likatsinilh la xpulalinanin takanajla? ¿Tuku xtlawa wix?

5. ¿Tuku makgkatsilh Jesús xpalakata tiku xkgalhi lepra?

5 Limapakgsin nema xmaxkikanit Moisés xwan pi akxni xkatalakatsuwini amakgapitsin wantiku xkgalhi lepra, xtalakaskin pi pulana xmakatsininalh pi xtatatla. Pero uma chixku max ni chuna tlawalh (Lev. 13:43-46). ¿Lisitsilh Jesús? Ni. Wata makgtayaputulh. Xlakata xlakgalhamanan tlawalh tuku nitiku chuna xtlawa: xamalh tiku xkgalhi lepra. Alistalh wanilh: «Klakaskin; kapaksti» (Luc. 5:13). Xlikana pi Jehová maxkilh litliwakga Jesús xlakata xtlawalh ama milagro chu xlakata xlimasiyalh pi lu kapaxki latamanin (Luc. 5:17).

6. 1) ¿Tuku lu kaks kinkamalakawaniyan xlakata xmilagros Jesús? 2) ¿Tuku kinkamasiyaniyan xmilagros Jesús?

6 Xlakata Jesús xkgalhi xlitliwakga Dios, tlawalh lhuwa milagros nema kaks malakawaninan. Ni kajwatiya kamapaksalh tiku xkgalhikgo lepra, na kamapaksalh atanu tiku xkgalhikgo tanu tajatat. Biblia wan pi latamanin kaks xlilakawankgo akxni xʼakxilhkgo pi kgokgonin xchuwinankgo, xtlawankgo tiku nila xtlawankgo, chu xlakawanankgo lakgatsinin (Mat. 15:31). La uku, min kilhtamaku makuchinanin lakaskinkgo pi chatum lataman wi tuku namaxtunikan xlakata nalimakuchikan achatum. Pero Jesús ni xmaklakaskin uma. Xla tlan kaj lakapala xmakuchi putum tajatat. Asta tlan xkamapaksa tatatlanin maski makgat xwilakgolh (Juan 4:46-54). ¿Tuku kinkamasiyaniyan putum uma? Pi mapakgsina Jesucristo tlan putum kilhtamaku namasputu putum tajatat chu chuna tlawaputun. Akxni katsiyaw la xkalikatsini Jesús latamanin liwana kinkamasiyaniyan  pi kParaíso «nalakgalhaman ti nitu makaʼanan [o nitu kgalhi] y ti lakaskin kamakgtayakaj» (Sal. 72:13). Katsiyaw pi Jesús xlikana kamapaksaputun putum tiku patinamakgo.

«KATAKI, KATIYA MIXTIKAT, NA KATLAWANTI»

7, 8. ¿Tuku tlawalh Jesús akxni nina xʼan kʼestanque nema lu xlakgapaskan?

7 Ni lhuwa papaʼ titaxtulh lata xmakuchinit tiku xkgalhi lepra, Jesús taxtulh kʼGalilea chu alh kJerusalén xlakata chuntiya xlichuwinalh Dios. Miles latamanin kgaxmatnikgolh chu akxilhkgolh pi lu xkapaxki. Jesús tlan kamamakgkatsinilh tiku xpatinamakgolh chu kamakgtayalh naʼakxilhkgo tuku tlan nala alistalh (Is. 61:1, 2; Luc. 4:18-21).

8 Kpapaʼ xla nisán, Jesús alh kJerusalén xlakata natlawa Pascua nema xtlawakgo judíos. Lhuwa latamanin xʼankgo xlakata anta xtlawakgolh Pascua. Jesús alh kʼakgtum estanque nema lu xlakgapaskan chu xwi kxnorte templo. Anta tekgsli chatum chixku tiku nila xtlawan.

9, 10. 1) ¿Tuku xlakata xʼankgo latamanin kʼestanque xalak Jerusalén? 2) ¿Tuku tlawalh Jesús kʼestanque? (Kaʼakxilhti xapulana dibujo.) 3) ¿Tuku kinkamasiyaniyan uma milagro?

9 Anta kʼestanque lhuwa tiku xʼankgo. ¿Tuku xlakata? Xlakata xlakpuwankgo pi komo anta xpaxkgolh akxni xtatsuwi chuchut lakapala xpakskgolh. Kalakpuwanti la xwanit anta, lhuwa tiku xtajuputunkgo xlakata xpaksputunkgoya. Xlikana, xlakata Jesús ni xkgalhi talakgalhin ni xtalakaskin xʼalh kʼestanque xlakata napaksa. ¿Tuku xlakata xʼanit? Xlakata xkapaxki latamanin. Anta tekgsli chixku tiku nila xtlawan. Uma chixku xtatatla lata akxni Jesús nina xlakachin kKatiyatni (kalikgalhtawakga Juan 5:5-9).

Jesús xkaputsa tiku xlakaskinkgo tamakgtay

10 Jesús kgalhskilh chixku komo xpaksputun. Xla wanilh pi xpaksputun, pero nila xpaksa xlakata ni xʼanan tiku xmakgtayalh nataju kʼestanque. Wa xlakata Jesús wanilh pi xtlawalh tuku xtasiya pi nila xtlawalh uma chixku. Wanilh pi xtakilh, xtiyalh tuku xlakma chu xtlawalh. ¡Chu chixku chuna tlawalh! Uma milagro kinkamalakpuwaniyan tuku nialh makgas natlawa Jesús kParaíso. Pero na kinkamasiyaniyan pi Jesús lu kapaxki latamanin. Xla alh kʼestanque xlakata xkaputsama tiku xmaklakaskinkgo tamakgtay. Akinin nachuna kilitlawatkan chu kiliputsatkan tiku lilipuwankgo tuku nitlan lama kkakilhtamaku.

«TSUMAT, WA MINTAKANAJLA, MALAKGTAXTINITAN»

11. ¿La likatsiyaw pi Jesús xlikana xkapaxki tiku xtatatlakgo?

11 (Kalikgalhtawakga Marcos 5:25-34.) Xlama chatum puskat tiku xkgalhi akgtum lu nitlan tajatat chu 12 kata lata xtatatla. Klakalhuwa pumakuchin xkilanit chu xmakgasputnit putum xtumin, pero tlakg ksnunama. Xtajatat xtlawanit pi nialh xpaxuwalh chu nialhla xkakninanilh Dios. Nialh xkatsi tuku  natlawa, akgtum kilhtamaku kalakgstipatanulh latamanin xlakata xlakgchalh Jesús chu kxamalh klhakgat (Lev. 15:19, 25). ¡Chu puskat paksli! Jesús makgkatsilh pi xtaxtuninit xlitliwakga, wa xlakata talakgaspitli chu kgalhskininalh tiku kxamanit. Puskat xpekuanit chu klhpipima, lakgtatsokgostalh chu wanilh putum tuku xtlawanit. Jesús xkatsi pi Jehová xmapaksanit uma puskat. Wa xlakata wanilh: «Tsumat, wa mintakanajla, malakgtaxtinitan». Alistalh wanilh pi chapaxuwana xʼalh. Jesús xlikana lu xkapaxki latamanin tiku xtatatlakgo.

Xmilagros Jesús limasiyalh pi kinkamakgtayaputunan chu akxilha kintaʼakglhuwitkan (Kaʼakxilhti párrafos 11 chu 12)

12. 1) Xlakata tuku katsiniw, ¿tuku lakpuwana xlakata Jesús? 2) ¿Tuku lu tlan liʼakxilhtit kinkamasiyanin Jesús?

12 Lu tlan limakgkatsiyaw xlakata katsiyaw pi Jesús lu kapaxki latamanin, liwaka tiku tatatlakgo. ¡Satanás ni chuna likatsi! Xla lakaskin nalakpuwanaw pi ni xlakaskinka akinin chu ni tiku kinkapaxkiyan. Xmilagros Jesús limasiya pi xla kinkamakgtayaputunan chu akxilha taʼakglhuwit nema titaxtuyaw. Kilipaxtikatsinitkan pi kgalhiyaw chatum mapakgsina chu sacerdote tiku lu kinkapaxkiyan (Heb. 4:15). Komo ni tatatlayaw, max tuwa naʼakgatekgsaw tuku makgkatsikgo tiku makgasa tatatlakgo. Pero tlan natlawayaw chuna la Jesús. Maski xla nikxni tatatlalh, xkaʼakgatekgsni tiku xtatatlakgo chu xkalakgalhaman (1 Ped. 3:8). ¡Katlawaw chuna la tlawalh!

«¡LÁZARO, KATAXTU!»

13. ¿Tuku kinkamasiyaniyan xlakata Jesús xtalakastakwanat Lázaro?

13 Jesús lu xlilipuwan akxni xakxilha pi amakgapitsi xpatinamakgo. Akgtum liʼakxilhtit, akxni nilh xʼamigo Lázaro, lu lipuwa akxni akxilhli pi xfamilia chu xʼamigos Lázaro lu xlipuwamakgo (kalikgalhtawakga Juan 11:33-36). Jesús tasalh maski xkatsi pi xʼama malakastakwani Lázaro. Ni xmaxanan nalimasiya tuku xmakgkatsi kxlakatin amakgapitsin. Lu xpaxki Lázaro chu xfamilia,  chu wa xlakata limaklakaskilh xlitliwakga Dios xlakata xmalakastakwanilh xʼamigo (Juan 11:43, 44).

14, 15. 1) ¿Tuku masiya pi Jehová masputuputun putum tuku kinkamakgapatinanan? 2) ¿Tuku xkilhchanima Jesús akxni lichuwinalh «nti aknukgoy [tiku kalakapastakkan, TNM]»?

14 Biblia wan pi Jesús chuna likatsi la xTlat (Heb. 1:3). Wa xlakata xmilagros Jesús kinkamasiyaniyan pi Dios na masputuputun putum tuku kinkamakgapatinanan, la tajatat, takatsanajwat chu linin. Nialh makgas, Jehová chu Jesús nakamalakastakwanikgo millones latamanin. Jesús wa pi nalakastakwanankgo «xlipaks nti aknukgoy [tiku kalakapastakkan, TNM]» (Juan 5:28, 29).

15 ¿Tuku xkilhchanima Jesús akxni lichuwinalh «nti aknukgoy [tiku kalakapastakkan, TNM]»? Tachuwin kalakapastakkan wamputun pi «kxtalakapastakni» Dios wilakgolh. Wa xlakata Jesús xwamputun pi Jehová tlan lakapastaka la xtasiyakgo tiku nikgonit, asta lakapastaka la xlikatsikgo (Is. 40:26). Chu ni kajwatiya tlan kalakapastaka, xlikana kalakapastakputun. Talakastakwanat nema lichuwinan Biblia liwana masiya tuku nala kParaíso.

Jehová tlan lakapastaka la xtasiyakgo tiku nikgonit

TUKU MASIYA XMILAGROS JESÚS

16. ¿Tukuya milagro naʼakxilhkgo kskujnin Dios?

16 Komo putum kilhtamaku kgalhakgaxmataw Dios tlan nalakgtaxtuyaw akxni namin Armagedón. Uma tlakg xalanka milagro nawan. Ni makgas katititaxtulh naʼakxilhaw atanu lhuwa milagros. Putum latamanin tsinu tsinu nialh katikgalhikgolh talakgalhin (Is. 33:24; 35:5, 6; Apocalipsis [Revelación] 21:4). Nialh katimaklakaskinkgolh lentes, lixtokgo, muletas, audífonos chu nipara sillas de ruedas. Jehová katsi pi tiku nalakgtaxtukgo kʼArmagedón natalakaskin tliwakga nawankgo chu nialh natatatlakgo xlakata lhuwa taskujut nakgalhikgo. Xlakan natlawakgo pi xlikalanka Katiyatni akgtum Paraíso nawan (Sal. 115:16).

17, 18. 1) ¿Tuku xlakata Jesús tlawalh milagros? 2) ¿Tuku xlakata tlawaputunaw putum tuku natalakaskin xlakata nalatamayaw kParaíso?

17 Akxni likgalhtawakgakgo xlakata xmilagros Jesús, tiku kalilakgapaskan «lhuwa tachixkuwitat» tatliwakglha xtakanajlakan pi nialh makgas nialh katitatatlakgolh (Apoc. 7:9). Umakgolh milagros kinkamasiyaniyan pi Jesús lu kinkapaxkiyan (Juan 10:11; 15:12, 13). Akxni Jesús kalakgalhamalh latamanin, kinkamalakapastakayan pi Jehová lu kapaxki tiku skujnikgo.

18 Uma kakilhtamaku litsama linin, takatsanajwat chu tapatin (Rom. 8:22). Wa xlakata lakaskinaw Paraíso. Malaquías 4:2 kinkawaniyan pi kParaíso lu napaxuwayaw xlakata nialh katitatatlaw. Akxni lilakpuwanaw uma, paxtikatsiniyaw Jehová chu kanajlayaw tuku wanit natlawa. Wa xlakata tlawaputunaw putum tuku natalakaskin xlakata tlan nalatamayaw kParaíso. Lipaxuwayaw akxni katsiyaw pi xmilagros Jesús limasiya tuku tlan nala nialh makgas akxni namapakgsinan.