Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Mayo kata 2015

Tlan natlajayaw Satanás

Tlan natlajayaw Satanás

«Ntliwakglh kalilakgapaxtokgtit mintakanajlakan.» (1 PED. 5:9)

1. 1) ¿Tuku xlakata lu xlakaskinka ni namastayaw talakaskin nakinkatlajayan Satanás? 2) ¿Tuku likatsiyaw pi tlan natlajayaw Satanás?

LA UKU, Satanás kinkatalachipayan putum tiku skujnaniyaw Jehová. Katalachipa kstalaninanin Jesús tiku kalaksakkanit naʼankgo kʼakgapun nema wilakgolhku kKatiyatni chu amakgapitsi borregos (Juan 10:16). Xlakata katsi pi nialh lhuwa kilhtamaku kgalhi, malakgsputuputun xtakanajlakan xlakskujni Jehová (kalikgalhtawakga Apocalipsis [Revelación] 12:9, 12). Wa xlakata lu xlakaskinka ni namastayaw talakaskin nakinkatlajayan. Pero ¿xlikana tlan natlajayaw? Tlan natlajayaw, xlakata Biblia wan: «Na kalakgapaxtokgtit [o katatlankaninitit] Akgskgawini, chuna nakatsalaniyan» (Sant. 4:7).

2, 3. 1) ¿Tuku xlakata Satanás lakaskin pi latamanin nalakpuwankgo pi ni xlikana lama? 2) ¿Tuku xlakata katsiyaw pi Satanás lama?

2 Lhuwa lakpuwankgo pi Satanás ni lama. Lakpuwankgo pi Satanás chu xdemonios kaj talichuwinan klibros, kpelículas xla terror chu kvideojuegos. Chu wankgo pi kajwatiya tiku xalaktontos kanajlanikgo nixatlan espíritus. Satanás lakgati akxni latamanin lakpuwankgo pi nitu lama.  ¿Tuku xlakata? Xlakata chuna tlakg ni tuwa kaʼakgskgawi (2 Cor. 4:4). Wa xlakata tlawa pi tlakg lhuwa tiku chuna nalakpuwankgo.

3 Pero xlakskujnin Jehová katsiyaw pi Satanás lama. ¿Tuku xlakata? Xlakata Biblia wan pi limaklakaskilh tantum luwa xlakata xtachuwinalh Eva (Gén. 3:1-5). Na tachuwinalh Jehová akxni wanilh pi Job kskujni xlakata wi tuku xmaxkikan (Job 1:9-12). Na tachuwinalh Jesús akxni xmatlawiputun tuku nitlan (Mat. 4:1-10). Chu akxni Jesús mapakgsina litaxtulh kkata 1914, Satanás tsukulh kaputsastalani tiku naʼankgo kʼakgapun chu xlamakgolh kKatiyatni (Apoc. 12:17). La uku, Akgskgawini chuntiyaku kinkaputsastalaniman putum tiku skujniyaw Dios. Xlakata natlajayaw, talakaskin natalachipayaw chu tliwakga natawila kintakanajlakan. Kʼuma artículo nakatsiyaw tuku kilitlawatkan xlakata ni napatiyaw pulaktutu tuku liʼakgskgawinan Satanás.

NI TLANKAJWA KALIKATSIW

4. ¿Tuku xlakata wanaw pi Satanás wa tiku tlakg tlankajwa makgkatsikan?

4 Satanás wa tiku tlakg tlankajwa makgkatsikan. ¿Tuku xlakata chuna wanaw? Xlakata wa pi Jehová ni lakgchan nakinkamapakgsiyan. Na xlakaskin pi latamanin wa xkakninanikgolh chu ni xkakninanikgolh Jehová. Chuna la akxilhaw, Satanás lu tlankajwa likatsi. Wa xlakata, komo tlajaputunaw, talakaskin ni tlankajwa nalikatsiyaw (kalikgalhtawakga 1 Pedro 5:5). Pero ¿tuku kilhchanima tatlankit? ¿Xlikana putum kilhtamaku nitlan tatlankit?

5, 6. 1) Kawanti tuku xlakata tatlankit ni putum kilhtamaku nitlan. 2) ¿Tuku max nala komo tlankajwa likatsiyaw? 3) Kalichuwinanti makgapitsi tiku tlankajwa likatsikgolh.

5 Tatlankit ni putum kilhtamaku nitlan. Akgtum liʼakxilhtit, nila nawanaw pi nitlan tsinu nalitatlankiyaw akxni wi tuku tlan tlawakgo amakgapitsi. Apóstol Pablo makgtum chuna makgkatsilh. Wa pi xlitatlanki xnatalan xalak Tesalónica, xlakata ni xmakgxtakgkgonit Dios maski xtitaxtukgonit taʼakglhuwit chu xkaputsastalanikanit (2 Tes. 1:4). Na nila wanaw pi nitlan akxni litatlankiyaw xlakata wi tuku tlan kgalhiyaw o tlawanitaw. Ni xlilat nalimaxananaw kifamiliajkan, la kinkamakgastakkanitan o kachikin niku minitanchaw (Hech. 21:39).

6 Pero komo tlankajwa kinkamakgkatsikanan max natlawa pi nialh nakatalalinaw kiʼamigoskan, chu tuku tlakg xlakaskinka, nialhla natalalinaw Jehová. Tatlankit tlawa pi ni namakglhtinamputunaw tastakyaw chu nalakgmakganaw (Sal. 141:5). Tiku tlankajwa likatsikgo lakpuwankgo pi lu xlakaskinka litaxtukgo nixawa amakgapitsin. Jehová ni kaʼakxilhputun tiku chuna likatsikgo (Ezeq. 33:28; Amós 6:8). Pero Satanás lakgati pi latamanin nalikatsikgo la xla. Max lu lipaxuwalh pi Nemrod, mapakgsina xalak Egipto chu Absalón tlankajwa likatsikgolh (Gén. 10:8, 9; Éx. 5:1, 2; 2 Sam. 15:4-6). Caín na tlanka xmakgkatsikan. Makgtum Jehová stakyawalh pero xla ni kgalhakgaxmatninalh. Tsakatnalh chu lakgalhinalh kxlakatin Jehová. Wa xlakata nialh xʼamigo Jehová litaxtulh (Gén. 4:6-8).

7, 8. 1) ¿Tuku wamputun akxni wi tiku lakpuwan pi tlakg xlakaskinka litaxtu? 2) ¿Tuku xlakata lhuwa tiku lakpuwankgo pi tlakg xlakaskinka litaxtukgo? 3) ¿Tuku xlakata lu nitlan akxni wi tiku tlanka namakgkatsikan kcongregación?

 7 Tatlankit na tlawa pi latamanin nalatlawani tuku nitlan. Akgtum liʼakxilhtit, tiku tlankajwa likatsikgo lakpuwankgo pi tlakg xlakaskinka litaxtukgo nixawa amakgapitsin. Uma wamputun pi lakpuwankgo pi chuna la tasiyakgo tlakg tlan nixawa amakgapitsin o lakpuwankgo pi tiku xalak akgtum país putum wi tuku nitlan tlawakgo. ¿Tuku xlakata lhuwa tiku chuna likatsikgo? Xlakata tatlankit tlawa pi nalakpuwankgo pi tlakg xlakaskinka litaxtukgo. Akxni chuna lakpuwankgo tlawa pi nalatalachipa, nalamakgni kʼguerras o lhuwa tiku nakamakgnikan.

Tatlankit natlawa pi nialh tlan nalatalalinkan kcongregación

8 Pero kcongregación nichuna xlitatlawat. Pero max xlakata wi tiku tlanka makgkatsikan wi tiku natsuku lakilhni chu lanka taʼakglhuwit natsuku. Chuna kaʼakgspulalh makgapitsi kstalaninanin Cristo xla xapulana siglo. Wa xlakata apóstol Santiago kakgalhskilh: «¿Niku lakatsukuyacha guerras chu niku lakatsukuyacha talachipat nema kgalhiyatit?» (Sant. 4:1TNM). Komo kalakgmakganaw amakgapitsin chu lakpuwanaw pi tlakg tlan akinin, max nakatlawaniyaw o nakawaniyaw tuku nitlan nakatlawani (Prov. 12:18). Uma masiya pi tatlankit natlawa pi nialh tlan nalatalalinkan kcongregación.

9. ¿La kinkamakgtayayan Biblia xlakata ni tlankajwa nalikatsiyaw chu ni nalakpuwanaw pi tlakg tlan akinin? (Kaʼakxilhti xapulana dibujo.)

9 Biblia kinkamakgtayayan xlakata ni tlankajwa nalikatsiyaw chu ni tlakg xlakaskinka nakinkamakgkatsikanan nixawa amakgapitsin. Akgtum liʼakxilhtit, Proverbios 16:5 wan pi Jehová xkajni «putum tiku lanka makgkatsikan kxnaku». Chu Hechos 17:26 wan pi Dios tlawalh pi tanu tanu latamanin kaj chatum xkilhtsukutkan xwa. Wa xlakata tlan nawanaw pi kimputumkan lakxtum xlakata Adán kintlatkan. Ni xlilat nalakpuwanaw pi Dios katlawalh makgapitsi tiku tlakg xlakaskinka nixawa amakgapitsin. Wa xlakata kakinkakgalhskinkan: «¿Klakpuwan pi tlakg tlan akit nixawa amakgapitsin o tiku xalak atanu país?». Komo chuna lakpuwanaw, mastamaw talakaskin pi Satanás namasputu tapaxkit chu la tlan latalalinaw kcongregación (Juan 13:35). Pero komo tlajaputunaw Satanás, kiliskujatkan xlakata ni tlankajwa nawanaw (Prov. 16:18).

NI KAPAXKIW KAKILHTAMAKU CHU TUMIN

10, 11. 1) ¿Tuku tlawa Satanás xlakata napaxkiyaw kakilhtamaku? 2) ¿Tuku akgspulalh Demas xlakata paxkilh kakilhtamaku?

10 Satanás wa mapakgsi kakilhtamaku niku lamaw (Juan 12:31; 1 Juan 5:19). Lhuwa tuku anan kkakilhtamaku nitlan. Xlikana, ni wamputun pi putum nitlan. Pero Satanás nalimaklakaskin putum tuku anan kakilhtamaku xlakata nakinkamatlawiyan tuku lakgatiyaw chu natlawa pi nialh nakgalhakgaxmataw Dios.  Natlawaputun pi tlakg kapaxkiw kakilhtamaku chu nialh naliskujaw xlakata nakgalhakgaxmataw Jehová (kalikgalhtawakga 1 Juan 2:15, 16).

11 Chuna kaʼakgspulalh makgapitsi kstalaninanin Cristo kxapulana siglo. Akgtum liʼakxilhtit, apóstol Pablo xkgalhi xmakgtayana tiku xwanikan Demas. Pero Pablo wa pi Demas makgxtakgli xlakata xpaxki kakilhtamaku (2 Tim. 4:10). ¿Tuku xpaxki Demas? Biblia ni kinkawaniyan. Max tlakg xpaxki tumin nixawa la kskujnima Jehová. Wa xlakata, Demas nila tlawalh tuku lu tlan xlimakgkatsilh kxtaskujut Jehová. ¿Tlan kitaxtunilh? Ni. Kakilhtamaku nila xmaxki tuku tlakg tlan nixawa tuku Jehová xmakilh (Prov. 10:22).

Nikxni kalakpuwaw pi tlakg xlakaskinka natlajayaw tumin nixawa xʼamigo Jehová nalitaxtuyaw

12. ¿La limaklakaskin Satanás tuku lakaskinaw xlakata nakinkaʼakgskgawiyan?

12 Xlakata kstalaninanin Cristo litaxtuyaw, tlajaputunaw tumin xlakata liwana nakuentajtlawayaw kifamiliajkan (1 Tim. 5:8). Chu Jehová lakaskin kalipaxuwaw latamat. Chuna wanaw, xlakata akxni kamalakatsukilh Adán chu Eva, kawililh kʼakgtum xastlan paraíso (Gén. 2:9). Pero Satanás tlan nalimaklakaskin tuku lakaskinaw chuna la tlawalh xpalakata Demas. ¿La natlawa? Limaklakaskin «xlitliwakga tumin nema akgskgawinan» (Mat. 13:22TNM). Xla lakaskin pi kalakpuwaw pi komo natlajayaw lhuwa tumin chu lhuwa tuku natamawayaw, tlakg napaxuwayaw. Pero komo nakanajlayaw uma, namakgatsankgayaw tuku tlakg xtapalh, wa pi tlan talalinaw Jehová. Jesús wa: «Ti ni lay lakgachixkuwiy nchatuy malana, sampi mpala nalakgmakgan nchatum, wata wa nchu achatum napaxkiy; su wata nalakgachixkuwiy nchatum, chi nchu wa achatum nalakgachixkuwimakgan. Ni lay lakgachixkuwiyatit Dios chu wa ntumin» (Mat. 6:24). Komo tlakg xlakaskinka akxilhaw tumin, la kskujni tumin litaxtumaw. Chuna nialhla katiskujnaniw Jehová. Chu wa uma tuku Satanás lakaskin. Komo tlajaputunaw, nikxni kalakpuwaw pi tlakg xlakaskinka natlajayaw tumin o lhuwa tuku natamawayaw nixawa xʼamigo Jehová nalitaxtuyaw (kalikgalhtawakga 1 Timoteo 6:6-10).

NI KATLAWAW TALAKGXTUMIT NEMA NI XLITATLAWAT

13. ¿Tuku lakpuwankgo la uku lhuwa latamanin?

13 Atanu tuku Satanás liʼakgskgawinan, wa talakgxtumit nema ni xlitatlawat. La uku, lhuwa tiku lakpuwankgo pi ni naʼakgskgawikan tiku tatamakgaxtokgkanit chu tamakgaxtokgkan nialh xlakaskinka chu tlawa pi nialh nalipaxuwakan latamat. Akgtum liʼakxilhtit, chatum puskat tiku titaxtu ktelevisión, wa pi nila ni naʼakgskgawikan chatum lataman chu wa pi ni lakgapasa tiku ni akgskgawi tiku tatamakgaxtokgkgonit o ni akgskgawiputun. Chu chatum chixku tiku titaxtu ktelevisión, lakpuwan pi ni xlilat kaj chatum tiku natatamakgaxtokgkan. Satanás max lu lipaxuwa akxni tiku lu kalakgapaskan, nitlan lichuwinankgo tamakgaxtokgat, akgtum xtamaskiwin Dios. Satanás  lakaskin pi putum tamakgaxtokgat nitlan kakakitaxtunilh. Komo tlajaputunaw, talakaskin naʼakxilhaw tamakgaxtokgat chuna la akxilha Jehová.

14, 15. Komo makgkatsiya pi tlawaputuna talakgxtumit nema ni xlitatlawat, ¿tuku tlan natlawaya?

14 Kstalaninanin Cristo tiku tamakgaxtokgkgonit chu tiku ni, talakaskin naliskujkgo xlakata ni natlawakgo talakgxtumit nema ni xlitatlawat. Pero uma tuwa. Akgtum liʼakxilhtit, lhuwa lakgkgawasan kgaxmatkgo pi xcompañeros xalak escuela lichuwinankgo pi katatalakgxtumikgo tiku katatalakgxtumiputunkgo. Na kgaxmatkgo pi makgapitsi lichuwinankgo pi limaklakaskinkgo xtelefonojkan xlakata namalakgachakgo mensajes niku lichuwinan talakgxtumit chu fotos niku tasiya tiku ni lhakganankgonit. Kmakgapitsi países wankan pi malakgachakan umakgolh mensajes, xtachuna la malakgachakan pornografía infantil. Biblia na wan pi tiku tlawa talakgxtumit nema ni xlitatlawat, «xtiyatliwa lakgalhiy» (1 Cor. 6:18). Lhuwa tiku nikgonit o patinamakgo xlakata tajatat nema lamapasikan akxni talakgxtumikan. Chu lhuwa lakgkgawasan chu laktsuman tiku talakgxtumikgo akxni nina tamakgaxtokgkgo, alistalh nitlan limakgkatsikgo. Lhuwa libros, películas, chu tatlin, lakaskinkgo nalakpuwanaw pi nitu katilalh komo nalakatsalayaw xlimapakgsin Dios. Pero uma  ni xlikana. Komo ni kuenta natlawayaw, max nakinkalaktlawayan «ntakgskgawin xla talakgalhin» (Heb. 3:13).

15 Komo makgkatsiya pi tlawaputuna talakgxtumit nema ni xlitatlawat, ¿tuku tlan natlawaya? Kalitaya pi tlawaputuna tuku nitlan (Rom. 7:22, 23). Katlawani oración Jehová chu kaskini litliwakga (Filip. 4:6, 7, 13). Katamakgatlini tuku max namatlawiputunan talakgalhin (Prov. 22:3). Chu akxni wi tuku namatlawiputunan tuku nitlan, tunkun kalakgmakganti (Gén. 39:12).

16. 1) ¿Tuku tlawalh Jesús akxni Satanás xmatlawiputun tuku nitlan? 2) ¿Tuku kinkamasiyaniyan xliʼakxilhtit Jesús?

16 ¿Tuku tlawalh Jesús akxni Satanás xmatlawiputun tuku nitlan? Ni litaʼakgskgawilh tuku malaknunilh. Nipara lakpuwa pi tlan tuku xmalaknunimaka. Wata lakapala likgalhtilh tuku wan xtachuwin Dios: «Chuna ntatsokgnit» (kalikgalhtawakga Mateo 4:4-10). ¿Tuku kinkamasiyaniyan Jesús? Xla liwana xlakgapasa xTachuwin Dios. Wa xlakata, akxni Satanás xmatlawiputun tuku nitlan, lakapala lakapastakli tuku xtatsokgnit kxtachuwin Dios. Komo tlajaputunaw Satanás, talakaskin nalakgmakganaw putum tuku nakinkamatlawiputunan talakgxtumit nema ni xlitatlawat (1 Cor. 6:9, 10).

NI KAMASTAW TALAKASKIN NAKINKATLAJAKANAN

17, 18. 1) ¿Tuku atanu limaklakaskin Satanás xlakata nakinkaʼakgskgawiyan? 2) ¿Tuku xlakata ni kaks lilakawanaw tuku Satanás limaklakaskin? 3) ¿Tuku naʼakgspula Satanás? 4) ¿Tuku xlakata kinkamatliwakglhan akxni katsiyaw pi Satanás nitu kgalhi lakgtaxtut?

17 Kʼuma artículo akxilhwi pulaktutu tuku Satanás liʼakgskgawinan: tatlankit, paxkikan kakilhtamaku chu tumin, chu talakgxtumit nema ni xlitatlawat. Pero anan lhuwa tuku liʼakgskgawinan. Akgtum liʼakxilhtit, xfamiliajkan makgapitsi natalan ni lakaskinkgo pi kaskujnanikgolh Jehová. Amakgapitsi, xcompañeros xalak escuela kalikgalhkgamanankgo. Chu atanu natalan lamakgo kpaíses niku mapakgsinanin ni kamaxkikgo talakaskin nalichuwinankgo Dios. Pero uma ni kaks kinkamalakawaniyan, xlakata Jesús kinkamakatsinin pi chuna xʼama kinkaʼakgspulayan. Xla wa: «Na paks nakaxkajnikgoyan nchixkuwin nkaj xpalakata kintukuwini. Wampi wa nti [natayani, TNM] asta kxlikgatsputni, wa yuma naʼakgaputaxtuy» (Mat. 10:22).

Satanás ni kgalhi lakgtaxtut (Kaʼakxilhti párrafo 18)

18 ¿La tlan natlajayaw Satanás? Jesús wa pi komo natayaniyaw, nalakgtaxtuyaw (Luc. 21:19). Niti la kintikatlawanin tuku nitlan nema Jehová nila nalakkaxtlawa. Komo ni namakgxtakgaw Dios, ni tiku katitlawalh pi nialh xʼamigo nalitaxtuyaw (Rom. 8:38, 39). Chu komo naniyaw pero ni namakgxtakgaw Dios, Satanás ni kintikatlajan, xlakata Jehová nakinkamalakastakwaniyan (Juan 5:28, 29). Pero, ¿tuku naʼakgspula Satanás? Akxni Dios masputunita nawan uma kakilhtamaku, Cristo nalakgachinu Satanás 1,000 kata xlakata nialh nakatlawani tuku nitlan latamanin (Apoc. 20:1-3). Alistalh, Satanás namakgxtakgkan chu xaʼawatiya nakaʼakgskgawiputun latamanin. Chu alistalh namasputukan (Apoc. 20:7-10). Chuna la akxilhaw, Satanás ni kgalhi lakgtaxtut. ¡Pero wix kgalhiya takgalhkgalhin! Wa xlakata, ni kataxlajwani, chuntiya katalachipa Akgskgawini chu tliwakga kakgalhi mintakanajla. Liwana kakatsi pi tlan natlajaya Satanás.