Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Marzo kata 2015

Tuku kinkamasiyaniyan parábola xlakata talentos

Tuku kinkamasiyaniyan parábola xlakata talentos

«Chatum maxkilh akgkitsis talentos; achatum maxkilh akgtiy; chu achatum maxkilh akgtum.» (MAT. 25:15TNM)

1, 2. ¿Tuku xlakata Jesús lichuwinalh parábola xlakata talentos?

JESÚS lichuwinalh parábolas xla talentos xlakata kstalaninanin tiku kalaksakkanit xkatsikgolh tuku xlakaskin natlawakgo. Pero maski xatalaksakni akinin o ni, kimputumkan tlan litamakgtayayaw uma tuku talichuwinalh. Pero talakaskin naʼakgatekgsaw tuku wamputun.

2 ¿Tukuya kilhtamaku Jesús kalitachuwinalh kstalaninanin parábola xlakata talentos? Kawanilh akxni xkawanima tuku xʼama la akxni mapakgsina xwa chu xtsukulh xaʼawatiya kilhtamaku (Mat. 24:3). Wa xlakata parábola xlakata talentos na wa kilhchanima tuku xwankanit pi nala kxaʼawatiya kilhtamaku.

3. ¿Tuku kinkamasiyaniyan pulakatunu parábola nema talichuwinan kMateo 24 chu 25?

3 Akxni Jesús lichuwinalh tuku xʼama la kxaʼawatiya kilhtamaku, pulaktati tuku lichuwinalh xlakata xkamasiyanilh tuku xlitlawatkan kstalaninanin tiku xlatamakgolh ama kilhtamaku. Tlan nalikgalhtawakgayaw tuku lichuwinalh kMateo 24:45 asta 25:46. Xapulana tuku talichuwinan wa xlakata skujni  xalipaw, nema kilhchanima makgapitsi tiku kalaksakkanit chu lakgayakgo nakamasiyanikgo xlakskujnin Dios. Jesús lichuwinalh uma xlakata nakamasiyani tiku kalaksakkanit pi talakaskin ni namakgxtakgkgo Dios chu lakgskgalalan nawankgo. * (Kaʼakxilhti xapulana nota.) Xlipulaktiy tuku lichuwinalh wa xlakata kgalhkaw laktsuman. Uma kalimasiyanilh putum tiku kalaksakkanit pi xtalakaskin natakaxkgo chu skgalalh natawilakgo xlakata ni xʼamakgolh katsikgo tukuya kilhtamaku xʼama min. * (Kaʼakxilhti xliʼakgtiy nota.) Xlipulaktutu wa parábola xlakata talentos. Jesús lichuwinalh xlakata nakamasiyani tiku kalaksakkanit pi xtalakaskin lhuwa kskujkgolh xlakata xmakgantaxtikgolh tuku xkalimapakgsinit. Xlipulaktati tuku lichuwinalh wa xlakata borregos chu cabras. Uma kamasiyani tiku latamaputunkgo kKatiyatni pi talakaskin ni namakgxtakgkgo Dios chu nakamakgtayakgo tiku kalaksakkanit. * (Kaʼakxilhti xliʼakgtutu nota.) Kʼuma artículo nalichuwinanaw parábola xlakata talentos.

CHATUM CHIXKU KAMAXKI LHUWA TUMIN XLAKSKUJNIN

4, 5. 1) ¿Tiku kilhchanima chixku tiku talichuwinan kparábola? 2) ¿Tuku xkilhchanima akgtum talento? (Kaʼakxilhti nota.)

4 (Kalikgalhtawakga Mateo 25:14-30.) Kparábola xlakata talentos, Jesús lichuwinalh chatum chixku tiku alh makgat. Kʼatanu kilhtamaku Jesús na lichuwinalh atanu chixku tiku alh makgat xlakata mapakgsina xlitaxtulh (Luc. 19:12). * (Kaʼakxilhti xapulana nota.) Akglhuwa kata, kilikgalhtawakgakan wankgonit pi uma chixku nema talichuwinan kʼuma pulaktiy parábolas kilhchanima Jesús chu xla alh kʼakgapun kkata 33. Pero Jesús ni mapakgsina litaxtulh ama kilhtamaku. Talakaskilh nakgalhkgalhi asta kata 1914, akxni kawilika «xtalatlawananin xtuwaxtikat nawankgoy» (Heb. 10:12, 13).

5 Akxni uma chixku nina xʼan, katasanilh xlakskujnin chu kamaxkilh akgtsayan talentos. Lu lhuwa tumin xwanit. * (Kalikgalhtawakga xliʼakgtiy nota.) Kawanilh pi xliskujkgolh uma akgtsayan talentos xlakata xmalhuwikgolh xtumin. Uma chixku lu xlakaskinka xʼakxilha uma akgtsayan talentos. Chu Jesús na wi tuku lu xlakaskinka xakxilha. ¿Tuku lu xlakaskinka xakxilha? Wa taskujut nema tlawalh akxni xlama kKatiyatni.

«Kalakapitit, na kaʼukxilhtit nkapukuxtun, sampi lhmukukuta, na lixkganatta»

6, 7. ¿Tuku kilhchanima talentos?

6 Jesús lu xlakaskinka xakxilha natalichuwinan  Dios. Akxni lichuwinalh Dios, tlawalh pi lhuwa kstalaninanin xlitaxtukgolh (kalikgalhtawakga Lucas 4:43). Pero xkatsi pi xtalakaskin tlakg natalichuwinan Dios. Wa xlakata kawanilh kstalaninanin: «Kalakapitit, na kaʼukxilhtit nkapukuxtun, sampi lhmukukuta, na lixkganatta» o tlantiya namakikan tuku tamakgalanit (Juan 4:35-38). Jesús xtamalakxtumima akxni lichuwinankan Dios xtachuna akxni makikan tuku tamakgalanit. Chu xla litaxtu la chatum lu tlan chanana tiku akxilha pi katamakilh putum tuku tamakgalanit. Wa xlakata akxni nina xʼan kʼakgapun kalakgayawalh kstalaninanin akgtum lu xlakaskinka taskujut, nalichuwinankgo Dios (2 Cor. 4:7). Kawanilh: «Kapitit, na kamasiyunikgotit xlipaks akgmakgat chixkuwin» (Mat. 28:18-20).

7 Chuna la uma chixku kamaxkilh talentos xlakskujnin, Jesús kalakgayawalh tiku kalaksakkanit nalichuwinankgo Dios (Mat. 25:14). Wa xlakata, talentos kilhchanima taskujut nema kalakgayawaka, nalichuwinankgo Dios chu namakgalhtawakganankgo.

8. Maski chatunu skujni ni lakxtum la xlilhuwa talentos makglhtinankgolh, ¿tuku xlakaskin chixku pi xtlawakgolh?

8 Chixku tiku talichuwinan kparábola maxkilh akgkitsis talentos xapulana skujni, xlichatiy maxkilh akgtiy chu xlikgalhtutu maxkilh akgtum (Mat. 25:15). Chuna la akxilhaw, ni lakxtum la xlilhuwa kamaxkika talentos chatunu skujni.  Pero uma chixku xlakaskin pi xkgalhtutukan xliskujkgolh xlakata tlakg xmalhuwikgolh xtumin. Jesús na xlakaskin pi tiku kalaksakkanit lu xliskujkgolh xlakata nalichuwinankgo Dios (Mat. 22:37; Col. 3:23). Kpascua xla judíos kPentecostés kata 33, kstalaninanin Cristo tsukukgolh litachuwinankgo Dios latamanin xalak lakalhuwa países. Libro xla Hechos limasiya pi xlakan lhuwa skujkgolh (Hech. 6:7; 12:24; 19:20). * (Kalikgalhtawakga nota.)

SKUJNIN MAKLAKASKINKGO TALENTOS

9. 1) ¿Tuku tlawakgolh chatiy lakskujni tiku ni xmakgxtakgnankgo? 2) ¿Tuku kinkamasiyaniyan uma? 3) ¿Tuku xlitlawatkan tiku kgalhkgalhimakgolh nalatamakgo kParaíso?

9 Chatiy lakskujnin tiku tlakg tlajakgolh tumin, kakilhchanima tiku xatalaksakni nema ni makgxtakgkgo Dios uma kxaʼawatiya kilhtamaku. Xlakan lhuwa lichuwinamakgolh Dios, chu tlakg lichuwinamakgolh lata kata 1919. Jesús lichuwinalh pi chatiy skujni ni lakxtum la xlilhuwa talentos makglhtinankgolh. Pero uma ni wamputun pi anan pulaktiy tiku kalaksakkanit chu ni makgxtakgkgo Dios. Kalakapastakwi pi chatiy lakskujni pulaktiy la xlilhuwa nema xkamaxkikanit maspitnikgolh xmalanakan. Uma masiya pi xchatiykan lhuwa skujkgolh. Pero ¿kajwatiya tiku kalaksakkanit kalakgchan lhuwa nalichuwinankgo Dios? Ni. Tuku talichuwinan xlakata borregos chu cabras kinkamasiyaniyan pi tiku latamaputunkgo kParaíso, talakaskin ni namakgxtakgkgo tiku kalaksakkanit chu nakamakgtayakgo natalichuwinan Dios. Akgtum lanka talakgalhaman akxilhkgo. Tlan nawanaw pi xputumkan litaxtukgo «nkgamputum» tiku liskujkgo xlakata nalichuwinankgo Dios chu namakgalhtawakganankgo (Juan 10:16).

10. ¿Tuku atanu na lu xlakaskinka limasiya pi lamaw kxaʼwatiya kilhtamaku?

 10 Jesús lakaskin pi kstalaninanin lhuwa kaliskujkgolh xlakata namakgalhtawakganankgo. Wa tuku tlawakgolh kstalaninanin Cristo kxapulana siglo. Chu uma xʼawatiya kilhtamaku akxni kgantaxtuma tuku talichuwinan xlakata talentos, ¿lhuwa skujmakgolh kstalaninanin Cristo? Chuna. Nikxni lu talichuwinanit Dios chuna la tatlawama la uku. Xlakata lhuwa lichuwinankgo Dios, lhuwa miles tamunukgo akgatunu kata. Chu na lichuwinankgo Dios. ¡Jesús lu lipaxuwa! Putum uma masiya pi xlakata talichuwinama Dios, kgantaxtuma tuku Jesús lichuwinalh xlakata xaʼawatiya kilhtamaku.

Jesús kalakgayawanit kskujnin tuku lu xlakaskinka, nalichuwinankgo Dios (Kaʼakxilhti párrafo 10)

CHIXKU NAMIN

11. ¿La likatsiyaw pi Jesús namin akxni natawila lanka takatsanajwat?

11 Jesús wa: «Akxni nchu xlimakgas kilhtamaku, timilh xmalanakan yama skujnin, na tatlawakgolh nkuintaj» (Mat. 25:19). ¿Tukuya kilhtamaku namin malana, Jesús? Namin akxni sputmaja nawan lanka takatsanajwat. ¿La likatsiyaw? Tuku talichuwinan kMateo 24 chu 25, Jesús makglhuwa lichuwinalh xlakata akxni xʼama min. Akgtum liʼakxilhtit, wa pi latamanin xʼamakgolh akxilhkgo akxni xʼama min «xkam nchixku, napumin mpuklhni anta nkakgapun». Uma nakgantaxtu akxni natawila lanka takatsanajwat, akxni Jesús namin kalakputsanani latamanin. Jesús na kawanilh kstalaninanin tiku xlatamakgolh kxaʼawatiya kilhtamaku pi skgalalh xtawilakgolh. Kawanilh: «Ni katsiyatit ntu hora, akxni namin mimPuchinakan». Chu na kawanilh: «Xkam nchixku, namin akxni yama hora ni kgalhkgalhipatit» (Mat. 24:30, 42, 44). Wa xlakata, kparábola xla talentos Jesús na xlichuwinama kilhtamaku akxni namin kalakputsanani latamanin chu namalakgsputu xkakilhtamaku Satanás. * (Kaʼakxilhti nota.)

12, 13. 1) ¿Tuku kawanilh chixku xapulana chatiy xlakskujnin? 2) ¿Tuku xlakata chuna kawanilh? 3) ¿Tukuya kilhtamaku namakglhtinankgo xaʼawatiya sello tiku kalaksakkanit? (Kaʼakxilhti recuadro « Dios kamakgamakglhtinan akxni nikgo».) 4) ¿Tuku nakamaxki Jesús tiku kamakgtayakgo xatalaksakni xlakata natalichuwinan Dios?

12 Akxni chixku xla parábola taspitli, kawanilh xapulana xchatiykan  xlakskujnin: «Lu[...] tlan, tlan skujni; makgantaxtinita mintaskujut, kaj tsinu ntaskujut kmaxkin, na masputu, wampi tlakg lhuwa nchu ntu nakliwiliyan» (Mat. 25:21, 23). ¿Tuku xlakata chuna kawanilh? Xlakata akxilhli pi xapulana skujni xtlajanit akgkitsis talentos chu xlichatiy xtlajanit akgtiy. ¿Tuku kilhchanima putum uma? ¿Tuku natlawa Jesús akxni namin?

13 Akxni atsinu tsankga natsuku lanka takatsanajwat, Jehová xaʼawatiya nakasellarli tiku kalaksakkanit nema wilakgolhku nawan kKatiyatni. Uma wamputun pi Jehová nakamakgamakglhtinan (Apocalipsis [Revelación] 7:1-3). Wa xlakata, akxni nina tsuku armagedón, Jesús nakalin kʼakgapun. Pero ¿tuku nakakitaxtuni tiku latamaputunkgo kParaíso chu kamakgtayakgo tiku kalaksakkanit xlakata natalichuwinan Dios? Jesús nakalakputsanani chu la borregos nakaʼakxilha. Uma wamputun pi nakamaxki talakaskin nalatamakgo kParaíso akxni natawila xTamapakgsin Dios (Mat. 25:34).

XALHKITIT CHU NIXATLAN SKUJNI

14, 15. ¿La likatsiyaw pi Jesús ni xwamputun pi lhuwa tiku kalaksakkanit xalaklhkitit chu nitlan xʼamakgolh likatsikgo?

14 Kalakapastakwi pi kparábola na talichuwinan xlikgalhtutu skujni. ¿Tuku akgspulalh? Jesús wa pi uma skujni ni limaklakaskilh talento xlakata tlakg xlitlajalh tumin. Na ni lilh kbanco xlakata xmaxkika xaskgata tumin. Wata kaj maknulh talento. Chixku wanilh uma skujni pi xalhkitit chu nitlan xlikatsi. Wa xlakata makglhtilh talento chu maxkilh xapulana skujni. Alistalh putlakgaxtulh uma nixatlan skujni «nkilhtin nkapakglhtutaj».  Anta uma skujni tsukulh tasa (Mat. 25:24-30; Luc. 19:22, 23).

15 Akxni Jesús wa pi xlikgalhtutu skujni chatum nitlan xlikatsi, ¿xwamputun pi chatum xlikgalhtutu tiku kalaksakkanit namakgxtakga Dios? Ni. ¿La likatsiyaw? Katsiyaw akxni tamalakxtumiyaw uma parábola xla xatlan skujni chu kgalhkaw laktsuman. Akxni Jesús lichuwinalh xatlan skujni, wa pi nixatlan skujni xkaputsastala atanu skujnin. Jesús ni xwamputun pi tiku kalaksakkanit nema litaxtukgo skujni xalipaw nitlan xʼamakgo likatsikgo. Kaj xkawaniputun pi ni xlikatsikgolh la nixatlan skujni. Jesús na watiya tuku xmasiyaputun akxni lichuwinalh kgalhkaw laktsuman. Wa pi kgalhkitsis laktsuman xalaktontas xwankgonit. Pero ni xwamputun pi itat tiku kalaksakkanit xalaktontos xaʼamakgolh litaxtukgo. Kaj xkawaniputun putum tiku kalaksakkanit pi xtalakaskin xtakaxkgolh chu skgalalh xtawilakgolh. * (Kaʼakxilhti nota.) Na xtachuna tuku talichuwinan kparábola xla talentos. Jesús ni xwamputun pi kxaʼawatiya kilhtamaku nitlan xʼamakgolh likatsikgo tiku kalaksakkanit. Wata xkawaniputun tiku kalaksakkanit pi lhuwa kskujkgolh chu ni xlitaxtukgolh la nixatlan skujni (Mat. 25:16).

Jesús nakasikulunatlawa putum tiku chuntiyaku nalichuwinankgo Dios

16. 1) ¿Tuku kinkamasiyaniyan parábolas xlakata talentos? 2) Xlakata likgalhtawakganitawa uma artículo, ¿tuku kilhchanima parábola xlakata talentos? (Kaʼakxilhti recuadro « ¿Tuku kilhchanima parábola xlakata talentos?».)

16 ¿Tuku kinkamasiyaniyan parábola xlakata talentos? Pulana, Jesús kalakgayawalh tuku lu xlakaskinka tiku kalaksakkanit. ¿Tuku uma? Nalichuwinankgo Dios chu namakgalhtawakganankgo. Xlipulaktiy, Jesús lakaskin pi kimputumkan lhuwa kalichuwinaw Dios. Komo chuntiya nalichuwinanaw chu natlawayaw putum tuku Jesús kinkalimapakgsiyan, xla nakinkasikulunatlawayan (Mat. 25:21, 23, 34).

^ par. 3 Xlakata nakatsiya tiku skujni xalipaw, kalikgalhtawakga Makatsinina 15 xla julio kata 2013, páginas 21 chu 22, párrafos 8 asta 10.

^ par. 3 Xlakata nakatsiya tiku kilhchanima laktsuman, kalikgalhtawakga artículo xla uma revista: «¿Tlan skgalalh natawilaya?».

^ par. 3 Xlakata nakatsiya tuku kilhchanima tuku talichuwinan xlakata borregos chu cabras, kalikgalhtawakga kʼuma revista artículo «Kakamakgtayaw xnatalan Cristo» chu Makatsinina 1 xla septiembre kata 2010, página 32, párrafo 15.

^ par. 5 Kxkilhtamaku Jesús, akgtum talento wa tuku xtlaja chatum skujni akgpuxam kata.

^ par. 8 Akxni aku xnikgonit apóstoles, lhuwa tiku nialh kgalhakgaxmatnankgolh chu tsukukgolh masiyakgo kcongregaciones tuku ni xaxlikana. Chu lhuwa ciento kata, kaj ni lhuwa tiku xlichuwinankgo Dios. Pero Jesús xlichuwinanit pi kstalaninanin xʼamakgolh lichuwinamparakgo Dios kxaʼawatiya kilhtamaku (Mat. 13:24-30, 36-43). Uma talichuwinan krevista Makatsinina 15 xla julio kata 2013, páginas 9 asta 12.

^ par. 11 Kaʼakxilhti Makatsinina 15 xla julio kata 2013, páginas 7 chu 8, párrafos 14 asta 18.

^ par. 15 Kaʼakxilhti artículo xla uma revista «¿Tlan skgalalh natawilaya?», párrafo 13.