Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Marzo kata 2015

Kakamakgtayaw xnatalan Cristo

Kakamakgtayaw xnatalan Cristo

«Chuna ntlawanikgotit nchatunu na yuma nkinatalan wa nti nkaj xachunata, kit nkimpalakata litlawanitantit.» (MAT. 25:40)

1, 2. 1) ¿Tukuya parábolas kawanilh Jesús xʼamigos? (Kaʼakxilhti xapulana dibujo.) 2) ¿Tuku lu xlakaskinka kilikatsitkan xlakata parábola xla borregos chu cabras?

JESÚS wi tuku lu xlakaskinka xkalitachuwinama xʼamigos, Pedro, Andrés, Santiago chu Juan. Kalitachuwinalh parábola xla skujni xalipaw, kgalhkaw laktsuman chu xlakata talentos. Alistalh kawanilh atanu parábola. Kalitachuwinalh chatum tiku wanikan «Xkam nchixku» chu akxni xʼama min kalakputsanani putum latamanin. Xla wa pi «Xkam nchixku» pulaktiy xʼama kamapitsi «xlipaks nchixkuwin», pulaktum tiku xʼamakgolh litaxtukgo la borregos chu atanu tiku xlitaxtukgolh la cabras. Chu na lichuwinalh xlipulaktutu grupo nema lu xlakaskinka: «[X]natalan» mapakgsina (kalikgalhtawakga Mateo 25:31-46).

2 Akinin na katsiputunaw tuku kilhchanima uma parábola. ¿Tuku xlakata? Xlakata Jesús wa pi makgapitsi namakglhtinankgo latamat nema nikxni sputa, pero amakgapitsi nakamalakgsputukan. Wa xlakata lu xlakaskinka nakatsiyaw tuku  wamputun uma parábola chu tuku kilitlawatkan xlakata namakglhtinanaw latamat nema ni kgalhi xlisputni. Na lu xlakaskinka nakatsiyaw xtakgalhtin umakgolh takgalhskinin: ¿La kinkamakgtayanitan Jehová naʼakgatekgsaw uma parábola? ¿La likatsiyaw pi uma parábola masiya pi talakaskin nalichuwinanaw Dios? ¿Tiku kalimapakgsikanit nalichuwinankgo Dios? ¿Tuku xlakata lu xlakaskinka ni namakgatsankgananiyaw chu namakgtayayaw mapakgsina chu xnatalan?

LA KINKAMAKGTAYANITAN JEHOVÁ NAʼAKGATEKGSAW UMA PARÁBOLA

3, 4. 1) ¿Tuku pulaktutu kilikatsitkan xlakata naʼakgatekgsaw tuku wamputun parábola xlakata borregos chu cabras? 2) Kkata 1881, ¿tuku wa uma revista pi xkilhchanima parábola xlakata borregos chu cabras?

3 Xlakata naʼakgatekgsaw tuku wamputun parábola xla borregos chu cabras, pulaktutu tuku kilikatsitkan. Pulana, ¿tiku «Xkam nchixku», mapakgsina, xnatalan mapakgsina, borregos chu cabras? Xlipulaktiy, ¿tukuya kilhtamaku «Xkam nchixku» kamapitsi o kalakputsanani borregos chu cabras? Chu xlipulaktutu, ¿tuku xlakata makgapitsi kalimapakuwi borregos chu amakgapitsi cabras?

4 Kkata 1881, uma revista wa pi «Xkam nchixku» o mapakgsina, wa Jesús. ¿Tiku kakilhchanima xnatalan? Revista xwan pi «[x]natalan» mapakgsina, xkakilhchanima tiku natamapakgsinankgo Jesús kʼakgapun, chu tiku nalatamakgo unu kkatiyatni akxni nialh nakgalhikgo talakgalhin. ¿Tukuya kilhtamaku xʼama kalakputsanani Jesús tiku litaxtukgo la borregos chu cabras? Akxni Cristo namapakgsinan akgtum mil kata. ¿Chu tuku xlakata makgapitsi xʼama kaliʼakxilha la borregos? Xlakata nachuna paxkinankgolh la Dios kputum tuku tlawakgolh.

5. Kkata 1923, ¿tuku wa revista pi xkilhchanima parábola xlakata borregos chu cabras?

5 Alistalh, Jehová kamakgtayalh xkachikin tlakg liwana naʼakgatekgskgo uma parábola. Kkata 1923, revista 15 xla octubre, maklakaskilh textos xalak Biblia xlakata nawan xasasti taʼakgatekgsni. ¿Tiku xkilhchanima «Xkam nchixku»? Wa Jesús. ¿Tiku xkakilhchanima xnatalan mapakgsina? Kajwatiya tiku natamapakgsinankgo Jesús kʼakgapun. ¿Tiku kakilhchanima borregos? Tiku nalatamakgo kKatiyatni akxni Jesús chu xnatalan namapakgsinankgo. ¿Tukuya kilhtamaku Jesús nakaliʼakxilha la borregos? Akxni xnatalan wilakgolhku nawan kKatiyatni, chu akxni nina tsuku tamapakgsin xaʼakgtum mil kata. ¿Tuku xlakata? Xlakata parábola wan pi tiku xlatamakgolh kKatiyatni xʼamakgolh makgtayakgo xnatalan mapakgsina, chu uma kajwatiya tlan chuna xlalh akxni xnatalan mapakgsina lamakgolhku xwa kKatiyatni. ¿Chu tuku xlakata xʼamaka kalimapakuwikan borregos? Revista wa pi borregos litaxtukgo xlakata kanajlanikgo Jesús chu kanajlakgo pi Tamapakgsin nakinkamaxkiyan tlakg xatlan latamat.

6. Kkata 1995, ¿la talakgpalilh la xʼakgatekgsaw uma parábola?

6 Akglhuwa kata xlakpuwanaw pi chuna la latamanin xkgaxmatkgolh akxni lichuwinanaw Dios kxaʼawatiya kilhtamaku, xʼama tlawa pi borregos o cabras xlitaxtukgolh. Komo xkgaxmatkgolh tamakatsin borrregos xlitaxtukgo, komo ni xkgaxmatkgolh cabras xlitaxtukgo. Pero kkata 1995 talakgpalilh la xʼakgatekgsaw uma parábola. Revista tamalakxtumilh Mateo 24:29-31 tuku wan Mateo 25:31, 32 (kakalikgalhtawakga). Chu wa pi  Jesús nakalakputsanani latamanin akxni «natamin xlipaks xlikakni» akxni lama nawan lanka takatsanajwat. * (Kaʼakxilhti nota.)

Lu paxtikatsiniyaw Jehová pi kinkamakgtayanitan naʼakgatekgsaw xparábolas Jesús

7. Kalichuwinanti tuku kilhchanima parábola xla borregos chu cabras.

7 La uku, liwana akgatekgsaw uma parábola. ¿Tiku «Xkam nchixku» chu mapakgsina? Wa Jesus. ¿Tiku kakilhchanima xnatalan mapakgsina? Wa tiku Jehová kalilaksakkanit espíritu santo. Xlakan natamapakgsinankgo Jesús kʼakgapun (Rom. 8:16, 17). ¿Tiku kakilhchanima borregos chu cabras? Wa latamanin xalak putum kachikinin. ¿Tukuya kilhtamaku nakalakputsananikan? Akxni sputmaja nawan lanka takatsanajwat nema nialh makgas natsuku. ¿Tuku xlakata nakalimapakuwikan borregos chu cabras? Jesús nakalaksaka tiku borrego o cabra nalitaxtu akxni naʼakxilha la kalikatsinikgonit tiku kalaksakkanit nema lamakgolhku nawan kKatiyatni. Lu paxtikatsiniyaw Jehová pi kinkamakgtayanitan naʼakgatekgsaw uma chu amakgapitsi parábolas nema talichuwinan kcapítulo 24 chu 25 xla Mateo.

UMA PARÁBOLA KINKAMASIYANIYAN PI LU XLAKASKINKA NALICHUWINANAW DIOS

8, 9. ¿Tuku xlakata Jesús wan pi borregos «xaʼakgstitum» litaxtukgo?

8 Jesús ni limaklakaskilh tachuwin kalichuwinantit Dios akxni lichuwinalh parábola xlakata borregos chu cabras. Pero katsiyaw pi uma parábola kinkamasiyaniyan pi lu xlakaskinka nalichuwinanaw Dios. ¿La likatsiyaw?

9 Xlakata naʼakgatekgsaw, pulana kalakapastakwi pi parábola nema Jesús lichuwinalh kaj akgtum liʼakxilhtit. Xla ni xlichuwinama xaxlikana borregos chu cabras. Chu na ni xwamputun pi latamanin tiku borrego litaxtuputunkgo, xlikana xʼamakgolh maxkikgo liwat chu lhakgat tiku kalaksakkanit, o xkakuentajtlawakgolh akxni xtatatlakgolh o xkalakgapaxialhnankgolh kpulachin. ¿Tuku xwamputun Jesús? Pi kajwatiya xkalimapakuwilh borregos tiku xliʼakxilhkgolh tiku xatalaksakni la xnatalan Jesús chu xkamakgtayakgolh kʼuma xatuwa xaʼawatiya kilhtamaku. Wa xlakata Jesús na kalimapakuwi tiku xaʼakgstitum (Mat. 10:40-42; 25:40, 46; 2 Tim. 3:1-5).

10. ¿La tlan nakamakgtayakgo xnatalan Cristo tiku litapakuwikgo borregos?

10 Pero ¿tuku xlakata xtalakaskin nakamakgtayakan xnatalan Jesús? Kaʼakxilhwi. Akxni Jesús nina xlichuwinan parábola xlakata borregos chu cabras, xlichuwinama tuku xʼama la kxaʼawatiya kilhtamaku (Mat. 24:3). Kawanilh pi ama kilhtamaku xʼama talichuwinan Tamapakgsin kxlikalanka Katiyatni (Mat. 24:14). Na kalitachuwinalh parábola xlakata talentos. Jesús lichuwinalh uma parábola xlakata nakamasiyani tiku kalaksakkanit pi lu xtalakaskin  lhuwa nalichuwinankgo Dios. Pero xlakata tiku kalaksakkanit nialh lhuwa lamakgo la uku, ¿la tlan xlichuwinankgolh Dios xlikalanka Katiyatni kʼuma xaʼwatiya kilhtamaku? Kparábola xlakata borregos chu cabras, Jesús wa pi borregos nakamakgtayakgo xnatalan Cristo. ¿La xkamakgtayakgolh? Pulaktum tuku tlakg tlan nakalimakgtayakgo, wa pi nalichuwinankgo Dios. Pero ¿kajwatiya talakaskin namastakgo tumin xlakata natatlawa uma taskujut, o nakawanikgo pi chuntiya kalichuwinankgolh Dios?

¿TIKU NALICHUWINANKGO DIOS?

11. ¿Tukuya takgalhskinin max akstu natlawanikana?

11 La uku, akgtsayan millón kstalaninanin Jesús. Chu tlakg lhuwa tiku ni xatalaksakni. Jesús ni kamaxkilh talentos, uma wamputun pi ni kalakgayawalh nalichuwinankgo Dios. Xla kamaxkilh talentos kaj tiku kalaksakkanit (Mat. 25:14-18). Xlakata Jesús ni kamaxkilh talentos max nakgalhskinkana: «¿Talakaskin pi na nalichuwinankgo Dios?». Chuna. Kaʼakxilhwi pulaktati tuku xlakata.

12. ¿Tuku kinkamasiyaniyan tuku wa Jesús kMateo 28:19, 20?

12 Pulana, Jesús kalimapakgsilh putum kstalaninanin nalichuwinankgo Dios. Akxni Jesús xlakastakwanita, kawanilh kstalaninanin xlichuwinankgolh Dios chu xkamasiyanikgolh amakgapitsin putum tuku xkalimapakgsinit. Wa xlakata tiku na kstalaninanin Cristo xwankgolh na xlimakgantaxtitkan xwanit tuku limapakgsinalh (kalikgalhtawakga Mateo 28:19, 20). ¿Tuku kinkamasiyaniyan uma? Pi kimputumkan nalichuwinanaw Dios, maski kʼakgapun o kKatiyatni nalatamayaw (Hech. 10:42).

Kimputumkan nalichuwinanaw Dios, maski kʼakgapun o kKatiyatni nalatamayaw

13. ¿Tuku kinkamasiyaniyan libro xla Apocalipsis?

13 Xlipulaktiy, libro xla Apocalipsis, masiya pi ni kaj tiku xatalaksakni xʼamakgolh lichuwinankgo Dios. Jesús maʼakxilhnilh apóstol Juan «ntsumat litatawilat» tiku xkawanima latamanin xlikgotnakgolh «nchuchut xla latamat». Tsumat litatawilat kilhchanima 144,000 tiku kalaksakkanit natamapakgsinankgo Jesús kʼakgapun (Apocalipsis [Revelación] 14:1, 3; 22:17). Chuchut kilhchanima xtamakamastan Jesús, nema nakalakgmaxtu latamanin ktalakgalhin chu klinin (Mat. 20:28; Juan 3:16; 1 Juan 4:9, 10). Xatalaksakni kamasiyanikgo latamanin la tlan nalitamakgtayakgo talakgmaxtut (1 Cor. 1:23). Pero apóstol na maʼakxilhnika atanu latamanin tiku ni xatalaksakni, tiku nalatamakgo unu kKatiyatni. Xlakan na kalimapakgsikan nakawanikgo atanu latamanin nalikgotnankgo chuchut xla latamat. ¿La chuna tlawakgo? Akxni lichuwinankgo Dios. Tuku apóstol akxilhli masiya pi putum tiku makgamakglhtinankgo xalakwan tamakatsin, talakaskin nalichuwinankgo Dios.

14. ¿Tuku kilitlawatkan xlakata kgalhakgaxmataw «xlimapakgsin nCristo»?

14 Pulaktutu, putum tiku kgalhakgaxmatkgo «xlimapakgsin nCristo»  talakaskin nalichuwinankgo Dios (Gal. 6:2). Jehová lakaskin pi putum tiku kakninanikgo lakxtum kakgalhakgaxmatkgolh xlimapakgsin. Makgasa, Jehová xlakaskin pi Israelitas chu tiku anta xkatalamakgo maski xala alakatanu kachikin xwankgonit xkgalhakgaxmatkgolh xlimapakgsin (Ex. 12:49; Lev. 24:22). Xlikana, la uku nialh kilimakgantaxtitkan limapakgsin nema Jehová xkamaxkinit Israelitas. Pero kilikgalhakgaxmatatkan «xlimapakgsin nCristo», maski xatalaksakni o ni xtalaksakni akinin. Pulaktum limapakgsin nema lu xlakaskinka masiyalh Jesús, wa nalimasiyayaw tapaxkit (Juan 13:35; Sant. 2:8). Kilipaxkitkan Jehová, Jesús chu latamanin. Chu pulaktum la tlan nalimasiyayaw pi kapaxkiyaw latamanin, wa nakalitachuwinanaw xTamapakgsin Dios (Juan 15:10; Hech. 1:8).

15. ¿Tuku likatsiyaw pi Jesús lakaskin pi putum kstalaninanin nalichuwinankgo Dios?

15 Pulaktati, makgapitsi tuku Jesús kawanilh ni lhuwa kstalaninanin, na xlimakgantaxtitkan xwanit amakgapitsi kstalaninanin. Akgtum liʼakxilhtit, Jesús katatlawalh talakkaxlan 11 xʼapóstoles xlakata xtamapakgsinankgolh kʼakgapun. Pero 144,000 xlilhuwa tiku natamapakgsinankgo (Luc. 22:29, 30; Apoc. 5:10; 7:4-8). Chu akxni xlakastakwananita, Jesús kaj ni lhuwa kstalaninanin kalimapakgsilh nalichuwinankgo Dios (Hech. 10:40-42; 1 Cor. 15:6). Pero kxapulana siglo putum kstalaninanin lichuwinankgolh Dios (Hech. 8:4; 1 Ped. 1:8). Wa xlakata  akinin na talakaskin nalichuwinanaw Dios, maski ni anta xwilaw akxni Jesús chuna wa. Chu la uku, max akgtsayan millón xTatayananin Jehová tiku lichuwinamaw Dios chu chuna limasiyayaw pi xlikana kanajlaniyaw Jesús (Sant. 2:18).

KAKAMAKGTAYAW LA UKU XNATALAN CRISTO

16-18. 1) ¿La tlan nakamakgtayayaw xnatalan Cristo? 2) ¿Tuku xlakata la uku talakaskin nakamakgtayayaw tiku xatalaksakni?

16 Satanás tlakg kaputsastalanima tiku kalaksakkanit chu lamakgolhku unu kkatiyatni. Na katsi pi «kaj tsinu kilhtamaku nkgalhiy» (Apoc. 12:9, 12, 17). Pero nila tlawa pi tiku kalaksakkanit nialh napulalinkgo natalichuwinan Dios. Chu la uku tlakg lhuwa tiku kalitachuwinamaka Dios. Liwana tasiya pi Jesús kamakgtayama tiku xatalaksakni chu kapulalima (Mat. 28:20).

Akgtum lanka talakgalhaman akxilhaw nakamakgtayayaw xnatalan Cristo

17 Lanka talakgalhaman akxilhaw tlan kamakgtayayaw xnatalan Cristo xlakata natalichuwinan Dios. ¿La atanu tlan nakamakgtayayaw? Akgtum liʼakxilhtit, tlan xatapaxuwan namastayaw kintuminkan chu lhuwa naskujaw akxni tatlawa niku tamakxtumikan chu sucursales. Na tlan kamakgtayayaw xnatalan Cristo, akxni kakgalhakgaxmataw lakgkgolotsin xalak congregación chu amakgapitsi natalan nema «skujni xalipaw chu xaskgalala» wi tuku kalakgayawanit (Mat. 24:45-47TNM; Heb. 13:17).

18 Nialh makgas, xatalaksakni tiku lamakgolhku kKatiyatni namakglhtinankgo xaʼawatiya sello. Chu natsuku lanka takatsanajwat (Apoc. 7:1-3). Akxni nina tsuku nawan Armagedón, Jesús nakalin kʼakgapun tiku xatalaksakni (Mat. 13:41-43). Wa xlakata komo lakaskinaw pi Jesús nakinkaʼakxilhan la borregos, kakamakgtayaw xnatalan la uku.

Pulaklhuwa la tlan kamakgtayayaw xnatalan Cristo (Kaʼakxilhti párrafo 17)

^ par. 6 Uma talichuwinalh kʼartículos «¿En qué condición se hallará usted cuando esté de pie delante del trono de juicio?» chu «¿Qué les depara el futuro a las ovejas y las cabras?» xla revista La Atalaya 15 xla octubre kata 1995.