Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Enero kata 2015

Katlawa pi mintamakgaxtokgat xatapaxuwan chu tliwakga nawan

Katlawa pi mintamakgaxtokgat xatapaxuwan chu tliwakga nawan

«Para ni Kintikukan Dios yawa akgtum [chiki], nitu limakwan ixtaskujutkan ti tamakgtayaninan.» (SAL. 127:1a)

1-3. ¿Tuku tuwa titaxtukgo tamakgaxtokgat? (Kaʼakxilhti xapulana dibujo.)

CHATUM chixku tiku lipaxuwanit xtamakgaxtokgat 38 kata, wan: «Komo xlikana lu liskuja chu limasiyaya pi lakaskina tlan katawilalh mintamakgaxtokgat, Jehová nasikulunatlawayan». Chuna, tiku tamakgaxtokgkgonit tlan xatapaxuwan natawilakgo maski natitaxtukgo tuku tuwa (Prov. 18:22).

2 Putum tamakgaxtokgat titaxtukgo tuku tuwa. Biblia wan pi «ntapatin nakgalhikgoy xchatuykan lantla nalatamakgoy» (1 Cor. 7:28). Akgtum liʼakxilhtit, tuku titaxtukgo chali chali tlawa pi nakgalhikgo taʼakglhuwit. Makgapitsi tamakgaxtokgat lu xliskujatkan chu xlikuentajtlawatkan xkamanan. Xachixku chu xapuskat makglakgalhinanin chu min kilhtamaku lawanikgo tuku nitlan limakgkatsikgo. Lakgachunin ni laʼakgatekgsni chu anan taʼakglhuwit (Sant. 3:2, 5, 8). Lu lhuwa tuku xlitlawatkan chu lu tlakgwankgo, o akgxunikgo chu wa xlakata ni kgalhikgo kilhtamaku namatliwakglhkgo xtamakgaxtokgatkan. Nachuna, taʼakglhuwit xlakata tumin, tajatat o atanu, tlawa pi nialh lu nalapaxki chu nialh  lu nalamaxki kakni. Biblia na lichuwinan «xtatlawaputu ntiyatliwa», uma kilhchanima akxni laʼakgskgawikan, tatalakgxtumikan tachixku o tapuskat, ni lakamaxanankan lakatsalakan xlimapakgsin Dios, lukunankan, lakgsitsinankan, lasitsinikan chu lakilhnikan (Gál. 5:19-21). Umakgolh max nalakxtlawa tamakgaxtokgat maski tasiya pi tliwakga wi.

3 Pero ni kajwatiya uma, kʼuma «xaʼawatiya kilhtamaku» latamanin xakstukan kapaxkikan chu ni maxkikgo kakni Dios (2 Tim. 3:1-4). Uma max nalaktlawa tamakgaxtokgat. Nachuna, Akgskgawini kalakxtlawaputun tamakgaxtokgat. Apóstol Pedro wan pi Akgskgawini «xtachuna xatsinksni [león], lama kmintuntamaknikan, putsama wa nti nachipay, naway» (1 Ped. 5:8; Apocalipsis [Revelación] 12:12).

4. ¿Tuku tlan natlawakgo tamakgaxtokgat xlakata natayanikgo taʼakglhuwit chu napaxuwakgo?

4 Chatum kstalanina Cristo xalak Japón, wan pi lakgachunin xtalakilhni xpuskat xlakata tuwa tuku xtitaxtumakgo. Xla xlilipuwan xlakata tumin pero ni xwani xpuskat. Xpuskat xʼakxilha tuku xlama chu na xlilipuwan. Nachuna, nina makgas xpuskat tatatlalh. Chuna la akxilhaw, tamakgaxtokgat nakgalhikgo taʼakglhuwit. Pero tlan natayanikgo chu napaxuwakgo. ¿La natlawakgo? Jehová nakamakgtaya (kalikgalhtawakga Salmo 127:1). Kʼuma artículo naʼakxilhaw pulakkitsis tuku tlawa pi tamakgaxtokgat xatapaxuwan chu tliwakga natawila. Na naʼakxilhaw la makgtayanan tapaxkit.

KUENTAJKATLAWANITIT JEHOVÁ KMINTAMAKGAXTOKGATKAN

5, 6. ¿Tuku xlitlawat xachixku chu xapuskat xlakata Jehová nakapulalin?

5 Komo xachixku chu xapuskat lakaskinkgo pi xtamakgaxtokgatkan xatapaxuwan chu tliwakga katawilalh, xlipaxkitkan chu xlikgalhakgaxmatatkan Jehová.  Biblia wan pi xlikuentajtlawanitkan Jehová kxtamakgaxtokgatkan (kalikgalhtawakga Eclesiastés 4:12). Wa xlakata xlimastatkan talakaskin pi Jehová kakapulalilh. Isaías 30:20, 21 wan pi Dios kinkapulalinan chu kinkawaniyan tukuya tiji kilistalanitkan. Xlakata Jehová nakapulalin, xachixku chu xapuskat akxtum xlikgalhtawakgatkan Biblia (Sal. 1:1-3). Na xlikakninanitkan Dios kfamilia akgatunu semana chuna la nalalimakgpuwantini chu chali chali akxtum xlitlawatkan oración. Chuna namatliwakglhkgo xtamakgaxtokgatkan chu natayanikgo tuku xkakilhtamaku Satanás katlawaniputun.

Akxni xachixku chu xapuskat akxtum skujnanikgo Jehová, tlakg tlan latalalinkgo, tlakg talalinkgo Dios chu xtamakgaxtokgatkan xatapaxuwan chu tliwakga tawila (Kaʼakxilhti párrafos 5 chu 6)

6 Kalichuwinaw xliʼakxilhtit chatum kstalanina Cristo xalak Alemania. Wan pi akxni xla chu xpuskat kgalhikgo akgtum taʼakglhuwit o ni liwana laʼakgatekgsni stalanikgo xtastakyaw Biblia. Chuna katsinikgonit ni lakapala nalasitsinikgo chu tlakg nalatapatikgo. Wankgo pi uma tayat lu xlakaskinka xlakata tlan natawila tamakgaxtokgat. Akxni xachixku chu xapuskat liskujkgo xlakata nakuentajtlawanikgo Dios kxtamakgaxtokgatkan, tlakg tlan latalalin.

LAKCHIXKUWIN, KATAPAXKIT KAPULALIPITIT MIFAMILIAJKAN

7. Chixku ¿la nalikatsini xpuskat?

7 Atanu tuku na tlawa pi tamakgaxtokgat tlakg xatapaxuwan chu tliwakga katawilalh, wa la likatsini xpuskat tiku pulalin familia. Biblia wan: «Wa nCristo, xapuxku lantla xlipaks nchixkuwin; chu wa nchixku, na wa xpuxku mpuskat» (1 Cor. 11:3). Uma kilhchanima pi xachixku nalikatsini xpuskat chuna la Cristo kalikatsinilh kstalaninanin. Xla ni lixkajnit kalikatsinilh. Putum kilhtamaku kapaxkilh, tlan kalikatsinilh, kaʼakgatekgsnilh chu ni tlankajwa xwanit (Mat. 11:28-30).

8. ¿Tuku xlitlawat xachixku xlakata xpuskat napaxki chu namaxki kakni?

8 Xachixku ni skini xpuskat pi kamaxkilh kakni. Wata maxki kakni xlakata «lakskalajwan xlakan» (1 Ped. 3:7). ¿Tuku kilhchanima uma? Pi xla putum kilhtamaku tlan nalikatsini xpuskat. Na nalimasiyani pi maxki kakni akxni tachuwinan chu lakgalhaman akxni xakstukan wilakgo chu kxlakatin amakgapitsin. Chuna limasiya pi lu xlakaskinka akxilha xpuskat (Prov. 31:28). Akxni xachixku limasiyani tapaxkit xpuskat, xla paxki chu maxki kakni, chu Jehová sikulunatlawa xtamakgaxtokgatkan.

LAKPUSKATIN, KATAKTUJUTIT CHU KAMAXKITIT KAKNI XLIMAPAKGSIN JEHOVÁ

9. ¿La limasiya xapuskat pi kgalhakgaxmata Jehová?

9 Komo xlikana paxkiyaw Jehová, nataktujuyaw chu nakgalhakgaxmatniyaw (1 Ped. 5:6). Dios limapakgsinan: «Wixin puchuwa lakchajan, kalakgachixkuwitit minchixkukan» (Col. 3:18). Komo xapuskat limasiyaputun pi kgalhakgaxmata Jehová, xlimakgtayat xchixku. Max ni putum kilhtamaku katilakgatilh tuku xchixku nalaksaka. Maski chuna, akxni xchixku laksaka natlawa tuku ni lakatsala xlimapakgsin Dios, xla xlimakgtayat (1 Ped. 3:1).

10. ¿Tuku xlakata lu xlakaskinka pi xapuskat nalakgachixkuwili tuku xchixku nalaksaka?

10 Jehová lakgayawanit puskat akgtum taskujut kfamilia nema maxki kakni chu lu xlakaskinka. Wa xmakgtayana xchixku  (Mal. 2:14). Wa xlakata, akxni kfamilia wi tuku laksakkan natlawakan, xapuskat tlan wan tuku lakpuwan chu tuku makgkatsi, pero xlimasiyat kakni akxni chuna natlawa chu xlimakgtayat xchixku akxni wi tuku nalaksaka. Xlikana, chixku tiku tlan likatsi kgaxmata tuku xpuskat wan (Prov. 31:10-31). Komo xapuskat paxki chu makgtaya, putum familia lu tlan kitaxtuni. Xputumkan xatapaxuwan tawilakgo chu ni latataʼakglhuwikgo. Xachixku chu xapuskat na tlakg paxuwakgo xlakata katsikgo pi Jehová lipaxuwa tuku tlawamakgo (Efes. 5:22).

KAKATSINITIT NALATAPATIYATIT

11. ¿Tuku xlakata xlikatsinitkan nalatapatikgo xachixku chu xapuskat?

11 Tamakgaxtokgat na tatliwakglha akxni xachixku chu xapuskat katsinikgo latapatikgo. Biblia kinkastakyawayan pi nakatapatiyaw tuku nitlan tlawakgo amakgapitsin (Col. 3:13). Komo xachixku chu xapuskat putum kilhtamaku lakapastakkgo tuku nitlan latlawaninit chu limaklakaskinkgo xlakata nitlan nalalimamakgkatsini, uma laktlawa tamakgaxtokgat. Chuna la akgtum chiki nema talakgskganit tsuku lakxla, akxni latlawanikan tuku nitlan chu tasitsi tlawa pi xachixku chu xapuskat tuwa namakgkatsikgo nalatapati chu chuntiya akxtum naskujkgo. Tlakg tlan nawan nalatapati chuna la Jehová katapati. Chuna tamakgaxtokgat tlakg natatliwakglha (Miq. 7:18, 19).

12. ¿Tuku wamputun pi tapaxkit «lakatsalay ntipalhuwa talakgalhin»?

12 Komo wi tiku xlikana paxkiyaw, ni putum kilhtamaku lakapastakaw tuku nitlan kinkatlawaninitan. Tapaxkit nema kgalhiniyaw «lakatsalay ntipalhuwa talakgalhin» (1 Cor. 13:4, 5; kalikgalhtawakga 1 Pedro 4:8). Uma wamputun pi putum kilhtamaku kilitapatinatkan. Milh kilhtamaku, apóstol Pedro kgalhskininalh la makglit nakatapatiyaw amakgapitsin. Jesús wa: «Asta tutumpuxamakaw makgtujun» (Mat. 18:21, 22). Jesús xwamputun pi putum kilhtamaku kilitapatinatkan (Prov. 10:12). * (Kaʼakxilhti nota.)

13. ¿La katsinikan latapatikan?

13 Chatum tala puskat xalak Alemania tiku wanikan Annette, wan tuku xlakata xlakaskinka natapatinankan. Wan pi komo xachixku chu xapuskat ni latapatikgo, tlakg lasitsinikgo chu nialh lalipawankgo. Chu uma tlawani tuku nitlan tamakgaxtokgat. Pero komo latapatikgo, tlakg tlan latalalinkgo chu tatliwakglha xtamakgaxtokgatkan. Wa xlakata, ¿la katsinikan tapatinankan? Xchatiykan xlikatsinitkan napaxtikatsininankgo. Xchatunukan xliskujatkan xlakata naʼakxilhkgo tlan tayat nema kgalhi achatum chu nalawani (Col. 3:15). Komo nakatsinikgo latapatikgo tlan natawila xtalakapastaknikan, tlakg nalatalalin chu nakatsikgo pi Jehová lipaxuwa tuku tlawamakgo (Rom. 14:19).

KAMAKGANTAXTIW REGLA DE ORO

14, 15. 1) ¿Tuku kilhchanima Regla de Oro? 2) ¿La makgtayanan ktamakgaxtokgat namakgantaxtikan uma tastakyaw?

14 Putum lakaskinaw pi kankimaxkikan kakni chu tlan kakinkalikatsinikan.  Lakgatiyaw pi kankinkakgaxmatnikan chu kuenta katlawaka tuku makgkatsiyaw. Maski chuna, minit kilhtamaku kgaxmatnitaw pi wi tiku wan: «Naktlawani tuku xla kintlawanilh». Chu min kilhtamaku akgatekgsaw tuku xlakata makgapitsi chuna wankgo. Pero Biblia wan: «Ni tlan natamakgapuspitniyatit achatum» (1 Tes. 5:15). Wa xlakata, ¿tuku tlan natlawayaw xlakata nalakkaxtlawayaw tuku tuwa? Jesús wa: «Wa lantla nalakaskinatit nakatlawanikgoyan nchixkuwin, na chuna wixin natlawanikgoyatit» (Luc. 6:31). Jesús xmasiyama pi nakalikatsiniyaw amakgapitsin chuna la lakaskinaw kakinkalikatsinikan chu ni chuna la kinkalikatsinikgoyan. Lhuwa tiku limapakuwikgo uma tastakyaw, Regla de Oro. ¿La makgantaxtikan uma tastakyaw ktamakgaxtokgat? Xchatunukan nalalikatsini chuna la lakaskin kakalikatsinika.

Ktamakgaxtokgat xchatunukan nalalikatsini chuna la lakaskinkgo kakalikatsinika

15 Komo xchatunukan naliskujkgo xlakata ni nalatlawani tuku nitlan, tamakgaxtokgat tlakg natatliwakglha. Chatum tala xalak Sudáfrica wan pi xla chu xpuskat putum kilhtamaku liskujkgo namakgantaxtikgo Regla de Oro. Xla wan: «Min kilhtamaku ksitsiyaw, pero kliskujaw naklalikatsiniyaw chuna la klakaskinaw kankinkalikatsinikan: kakinkamaxkikan kakni chu tlan kakinkalikatsinikan».

16. ¿Tuku ni xlilat natlawa xachixku o xapuskat?

16 Kʼakgtum tamakgaxtokgat nitlan pi xachixku o xapuskat nakawani amakgapitsin tuku nitlan tlawa o nawan tuku nitlan xpalakata tiku tamakgaxtokga, maski kaj xatakgalhkgaman. Tiku tamakgaxtokgkgonit ni limasiyaputunkgo tiku tlakg tliwakga, tiku tlakg pixlanka chuwinan o tiku tlakg nitlan mamakgkatsini achatum. Xlikana pi putum akinin makglakgalhinanin chu min kilhtamaku tlawayaw chu wanaw tuku lisitsikgo amakgapitsin. Pero ni xlilat pi xachixku chu xapuskat nalamamaxani o nalawani tuku nitlan nalalimamakgkatsini. Chu tuku tlakg nitlan wa pi nalakgaxi (kalikgalhtawakga Proverbios 17:27; 31:26).

17. ¿Tuku ni katitlawalh chixku tiku makgantaxti Regla de Oro?

17 Kmakgapitsi países, latamanin lakpuwankgo pi chixku tiku pixlanka chuwinan chu kgaxi xpuskat xlikana chixku. Pero Biblia ni chuna masiya. Wan pi chixku tiku ni lakapala sitsi tlakg tlan nixawa tliwakga chixku. Na wan pi tiku machokgo xtasitsi tlakg tlan nixawa tiku akgchipa lanka kachikin (Prov. 16:32). Talakaskin lhuwa litliwakga xlakata namachokgokan tasitsi chu nitiku nakgaxikan. Jesús, wa tiku tlakg xlakaskinka chixku nema latamanit kKatiyatni, chu xla nikxni malakatsalilh xtasitsi. Mapakgsina David lu tliwakga chixku xwanit chu ni xpekuan. Xla wa: «Kasitsitit pero ni kalakgalhinantit. Kawantit tuku wixin wamputunatit kminakujkan, akxni patit kminputamakan chu nitu kawantit» (Sal.  4:4TNM). Wa xlakata, chixku tiku kgaxi xpuskat ni tliwakga chixku litaxtu xlakata nila machokgo xtasitsi. Chu Jehová ni talalin tiku chuna likatsi.

TAPAXKIT LU XLAKASKINKA

18. ¿Tuku xlakata lu xlakaskinka tapaxkit ktamakgaxtokgat?

18 (Kalikgalhtawakga 1 Corintios 13:4-7.) Ktamakgaxtokgat lu xlakaskinka nalalakgalhamankan, tlan nalalikatsinikan, nataktujukan chu ni lakapala nalasitsinikan. Pero Biblia wan tuku tlakg xlakaskinka: «Nalakgalhiniyatit ntapaxkit, sampi wa yuma ntu lakatanks makxtum tlawanan» (Col. 3:12, 14). Ktamakgaxtokgat tapaxkit wa tayat nema tlakg xlakaskinka. Jesús lu xkapaxki amakgapitsin wa xlakata asta kapalakamastalh xlatamat. Tiku tamakgaxtokgkgonit talakaskin chuna nalapaxki. Chuna, tamakgaxtokgat tliwakga natawila maski anan talismanin nema ni lakgatikan, tajatat, taʼakglhuwit xlakata tumin o tuku tuwa natitaxtukan xlakata xfamilia xachixku o xapuskat.

19, 20. 1) ¿Tuku talakaskin xlakata tamakgaxtokgat tliwakga chu xatapaxuwan natawila? 2) ¿Tuku naʼakxilhaw kʼartículo nema aku mima?

19 Xlakata tamakgaxtokgat xatapaxuwan chu tliwakga natawila, talakaskin lu naliskujkan, nalapaxkikan chu ni nalamakgxtakgkan. Komo naʼanan taʼakglhuwit, xachixku chu xapuskat ni xlalimakgxtakgatkan chu ni xlilakxtlawatkan xtamakgaxtokgatkan, wata tlakg nalatalakatsuwini. Akxni xchatiykan paxkikgo Jehová chu lapaxkikgo, lu liskujkgo xlakata nalakkaxtlawakgo xtaʼakglhuwitkan. ¿Tuku xlakata? Xlakata tapaxkit nikxni sputa (1 Cor. 13:8; Mat. 19:5, 6; Heb. 13:4).

20 La uku lu tuwa nakgalhikan akgtum tamakgaxtokgat nema tliwakga chu xatapaxuwan (2 Tim. 3:1). Pero chuna la akxilhwi, xlakata xtamakgtay Jehová tlan chuna nawan. Maski chuna, tamakgaxtokgat xlikuentajtlawatkan ni nakapasa talakpuwan xlakata talakgxtumit tuku anan kakilhtamaku. Kʼartículo nema aku mima naʼakxilhaw tuku tlan natlawa xachixku chu xapuskat xlakata chuntiya tliwakga natawila xtamakgaxtokgatkan.

^ par. 12 Xachixku chu xapuskat liskujkgo xlakata nalakkaxtlawakgo xtaʼakglhuwitkan. Pero akxni xachixku o xapuskat laʼakgskgawi, tiku akgskgawikanit tlan nalaksaka komo natapati o ni, chu komo nalaktlawa xtamakgaxtokgat kxlakatin mapakgsinanin (Mat. 19:9). Kaʼakxilhti artículo «El punto de vista bíblico. Adulterio: perdonar o no perdonar», krevista ¡Despertad! 8 xla agosto kata 1995.