Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Enero kata 2015

Kapaxtikatsiniw Jehová

Kapaxtikatsiniw Jehová

«Kapaxtikatsinitit Jehová, xlakata xla tlan likatsi.» (SAL. 106:1TNM)

1. ¿Tuku xlakata kilipaxtikatsinitkan Jehová?

JEHOVÁ kinkamaskiwiyan lhuwa tuku tlan (Sant. 1:17). Nachuna, kinkamasiyaniyan pi kinkapaxkiyan akxni kinkamaxkiyan tuku maklakaskinaw xlakata nalatamayaw, chuna la tlawa xkuentajtlawana borrego (Sal. 23:1-3). Chu komo kgalhiyaw taʼakglhuwit, kinkakuentajtlawayan chu kinkamaxkiyan litliwakga (Sal. 46:1). Akxni lilakpuwanaw putum tuku kinkamaxkiyan, makgkatsiyaw la salmista tiku wa: «Kapaxtikatsinitit Jehová, xlakata xla tlan likatsi». Na wa pi Dios putum kilhtamaku tlan nalikatsi (Sal. 106:1TNM). Liwana tasiya pi lakgchan napaxtikatsiniyaw Dios.

Texto xla kata 2015: «Kapaxtikatsinitit Jehová, xlakata xla tlan likatsi.» (Salmo 106:1TNM)

2, 3. 1) ¿Tuku nakitaxtu komo ni napaxtikatsininanaw? 2) ¿Tukuya takgalhskinin nakakgalhtiyaw kʼuma artículo?

2 ¿Tuku xlakata kililakpuwanatkan napaxtikatsiniyaw Jehová? Makgasa, Biblia wa pi latamanin xala uku ni xʼamakgo paxtikatsininankgo chu kgantaxtuma uma (2 Tim. 3:2). Lhuwa latamanin ni paxtikatsinikgo Jehová tuku tlawanit xpalakatakan. Lhuwa millón tiku kajwatiya tamawakgo  tuku ni maklakaskinkgo. Maski chuna, ni lipaxuwakgo tuku kgalhikgoya. Komo akinin na ni napaxtikatsiniyaw Jehová, nakinkaʼakgspulayan la israelitas. Max nialh xlakaskinka naʼakxilhaw tuku Jehová tlawanit kimpalakatakan chu nialh natalalinaw (Sal. 106:7, 11-13).

3 Komo ni paxtikatsininanaw, tlakg tuwa nakitaxtu natayaniyaw tuku tuwa. ¿Tuku xlakata? Xlakata tlakg naʼakxilhaw taʼakglhuwit nema kgalhiyaw nixawa tuku laktlan nema kgalhiyawa (Sal. 116:3). Kʼuma artículo nakakgalhtiyaw akgtiy takgalhskinin: ¿La natlawayaw xlakata chuntiya napaxtikatsininanaw? ¿Tuku nakinkamakgtayayan nakgalhiyaw tlan talakpuwan akxni titaxtumaw tuku tuwa?

JEHOVÁ LHUWA TUKU TLAWANIT KIMPALAKATAKAN

4. ¿Tuku kilitlawatkan xlakata chuntiya napaxtikatsiniyaw Jehová?

4 Kiliskujatkan xlakata chuntiya napaxtikatsiniyaw Jehová. Kililakpuwanatkan tuku tlawanit kimpalakatakan. Chu alistalh kililakpuwanatkan la limasiya pi lu kinkapaxkiyan uma tuku tlawanit. Akxni salmista chuna tlawalh, lu kaks lilakawa putum tuku Jehová xtlawanit xpalakata (kalikgalhtawakga Salmo 40:5 chu 107:43).

5. Komo paxtikatsininamputunaw la Pablo, ¿tuku kilitlawatkan?

5 Xliʼakxilhtit apóstol Pablo kinkamasiyaniyan la napaxtikatsiniyaw Jehová. Katsiyaw pi xla lu xlilakpuwan tasikulunalin nema xkgalhi xlakata xlismani xpaxtikatsini Dios kxoración. Pablo aktanks xkatsi pi pulana luku chu tlankajwa xmakgkatsikan, chu xkaputsastalaninit kstalaninanin Cristo chu xwanit taʼakgsanin xpalakatakan. Wa xlakata, xpaxtikatsini Dios pi xtapatinit chu xmaxkinit talakaskin nalichuwinan xTachuwin (kalikgalhtawakga 1 Timoteo 1:12-14). Na xpaxtikatsini xlakata xnatalan lu tlan tayat xkgalhikgo chu ni xmakgatsankgananikgo Dios (Filip. 1:3-5, 7; 1 Tes. 1:2, 3). Chu na xpaxtikatsini Dios xlakata akxni xkgalhi taʼakglhuwit xnatalan xmakgtayakgo (Hech. 28:15; 2 Cor. 7: 5-7). Wa xlakata, Pablo xkawani kstalaninanin Cristo pi xpaxtikatsinikgolh Dios, xkilhtlikgolh chu xmalankikgolh Dios xlakata xlalimatliwakglhkgolh (Col. 3:15-17).

TUKU NAKINKAMAKGTAYAYAN NAPAXTIKATSININANAW

6. ¿Tuku xlakata paxtikatsiniya Dios?

6 Xtachuna la Pablo, akinin na tlan nalilakpuwanaw putum tuku Jehová tlawanit kimpalakatakan (Sal. 116:12). Kalakpuwaw: «¿Tuku xlakata kilipaxtikatsinit Dios?». Tlan nalilakpuwanaw la tlan talalinaw o xlakata makamastalh xKgawasa chu chuna xkinkatapatin kintalakgalhinkan. Na tlan nalilakpuwanaw la kinkamakgtayakgonitan kskujnanin akxni xtitaxtumaw tuku tuwa. Chu komo tamakgaxtokgnitaw o kgalhiyaw kinkamanankan na tlan lu napaxtikatsininanaw xlakata uma. Kalilakpuwaw la kinkamakgtayanitan. Komo chuna natlawayaw, chali chali napaxtikatsiniyaw (kalikgalhtawakga Salmo 92:1, 2).

Katlawaniw oración Dios xlakata napaxtikatsiniyaw tuku kinkamaxkinitan, chuna la tlawakgolh Ana chu Ezequías

7. 1) ¿Tuku xlakata kilitlawanitkan oración Dios xlakata napaxtikatsiniyaw? 2) ¿La nalitamakgtayayaw komo napaxtikatsiniyaw Dios kkioracioneskan?

7 Akxni nalilakpuwanaw putum tuku tlan nema kgalhiyaw, natlawaniputunaw oración Dios xlakata napaxtikatsiniyaw (Sal. 95:2; 100:4, 5). Makgapitsi latamanin tlawanikgo oración Dios kajwatiya akxni wi tuku skiniputunkgo. Pero xla na lakgati pi katlawaniw oración xlakata napaxtikatsiniyaw tuku kgalhiyawa. Lhuwa tiku kalichuwinan Biblia chuna tlawakgolh, la Ana chu Ezequías (1 Sam. 2:1-10; Is. 38:9-20). Na tlan napaxtikatsiniyaw Dios xlakata tuku tlawanit kimpalakatakan (1 Tes. 5:17, 18). Komo chuna natlawayaw, tlan namakgkatsiyaw, tlakg napaxkiyaw Dios chu tlakg tlan natalalinaw (Sant. 4:8).

¿Tuku xlakata napaxtikatsiniya Dios? (Kaʼakxilhti párrafos 6 chu 7)

8. ¿Tuku max natlawa pi nialh napaxtikatsininanaw?

8 Komo ni skgalalh natawilayaw, max nialh xtapalh katiʼakxilhwi tuku Jehová kinkamaskiwiyan. Pulaktiy tuku max natlawa pi nialh napaxtikatsininanaw. Pulana, akinin makglakgalhinanin chu xapulana kinatlatnikan kinkamatitaxtinikgon uma nitlan tapuwan, pi ni napaxtikatsininanaw. Akxni Dios kamalakatsukilh Adán chu Eva, kamaxkilh putum tuku xmaklakaskinkgo. Tlan xtilatamakgolh putum kilhtamaku kparaíso niku  ni xkgalhikgolh taʼakglhuwit (Gén. 1:28). Pero ni xlakaskinka akxilhkgolh tuku Jehová xkamaxkinit. Tlakg lhuwa tuku xkgalhiputunkgo, pero alistalh makgatsankgakgolh putum tuku xkgalhikgo (Gén. 3:6, 7, 17-19). Pulaktiy, lamaw kkakilhtamaku niku ni paxtikatsininankan. Chu uma max natlawa pi nialh xlakaskinka naʼakxilhaw tuku Jehová kinkamaskiwinitan, wa pi tlan natalalinaw chu namakgtapakgsiyaw kxkachikin xlikalanka katiyatni (1 Juan 2:15-17). ¿Tuku tlan natlawayaw xlakata ni chuna nakinkaʼakgspulayan? Chali chali kalilakpuwaw tuku Jehová tlawanit kimpalakatakan chu katlawaniw oración xlakata napaxtikatsiniyaw (kalikgalhtawakga Salmo 27:4).

Komo nalilakpuwanaw tuku Jehová kinkamaxkiyan, lu tlan nalimakgkatsiyaw chu natayaniyaw tuku tuwa

AKXNI TITAXTUMAW TUKU TUWA

9. Akxni titaxtumaw tuku lu tuwa, ¿tuku xlakata kililakpuwanatkan tuku Jehová kinkamaxkiyan?

9 Komo lismaniyaw paxtikatsiniyaw Jehová, na kinkamakgtayayan akxni titaxtumaw tuku lu tuwa. Min kilhtamaku ni katsiyaw tuku natlawayaw akxni kaj lakapala talakgpali kilatamatkan. Max tiku tatamakgaxtokgnitaw nakinkaʼakgskgawiyan, max lu natatatlayaw, max nani tiku lu paxkiyaw o natitaxtuyaw tuku nitlan xlakata tuku masputunan. Komo nalilakpuwanaw tuku Jehová kinkamaxkiyan, lu tlan nalimakgkatsiyaw chu natayaniyaw tuku tuwa. Kaʼakxilhwi la litamakgtayakgonit makgapitsi natalan akxni chuna tlawakgonit.

10. ¿La makgtayanit Irina nalilakpuwanan la sikulunatlawa Jehová?

10 Irina * chatum precursora regular tiku lama kNorteamérica. (Kaʼakxilhti nota.) Xchixku kgolotsin xalak congregación xlitaxtu, pero akgskgawilh chu akgxtakgwililh xla chu xkamanan. ¿Tuku makgtayalh chuntiya naskujnani Jehová? Irina wan: «Kpaxtikatsini Jehová pi kimpaxki chu kinkuentajtlawa. Akxni chali chali klilakpuwan la kisikulunatlawa, kakxilha pi kkgalhi lu lanka talakgalhaman xlakata kgalhi chatum Tlat tiku kilakgapasa chu kinkuentajtlawa. Kkatsi pi nikxni kintimakgxtakgli». Irina lu laktuwa tuku titaxtunit kxlatamat, pero xlakata tlan talakapastakni kgalhi makgtayanit natayani chu na nakamakgpuwantini amakgapitsin.

11. ¿Tuku makgtayanit chatum tala xalak Asia natayani lu nitlan tajatat?

11 Kyung-sook lama kʼAsia. Xla chu xchixku liwaka 20 kata precursores xlitaxtukgonit. Pero akgtum kilhtamaku, doctores wanikgolh pi xkgalhi cáncer kxpulmón chu lu snun xwanit, wanika pi akgtutu o asta akgchaxan papaʼ xʼama latama. Maski xkgalhikgonita atanu taʼakglhuwit, nikxni lu xtatatlakgonit. Xla wan: «Lu tuwa tuku ktitaxtulh. Kmakgkatsilh pi xakmakgatsankganit putum tuku xakkgalhi chu lu kpekualh». ¿Tuku makgtayanit natayani?  Akgatunu tsisni, akxni amaja lhtata, tawaka kxakgstin xchik xlakata natlawani oración Jehová. Pixlanka paxtikatsini pulakkitsis tuku tlan nema titaxtunit tantaku. Uma tlan mamakgkatsini chu tlawa pi nalimasiyani Jehová pi paxki. Uma oraciones nema tlawa, makgtayanit naʼakxilha pi Jehová putum kilhtamaku kinkamakgtayayan akxni titaxtumaw tuku tuwa chu akxilhnit pi kkilatamatkan tlakg kgalhiyaw tasikulunalin nixawa taʼakglhuwit.

«Kkilatamatkan tlakg kgalhiyaw tasikulunalin nixawa taʼakglhuwit.» (Kyung-sook)

Sheryl chu John, xtala tiku ni nilh (Kaʼakxilhti párrafo 13)

12. ¿Tuku makgtayalh natayani Jason akxni xninita xpuskat?

12 Jason skujnanima Dios ksucursal xalak África. Liwaka 30 kata la skujnanima Dios xaputum kilhtamaku. Pero, titaxtunit akgtujun kata lata nilh xpuskat xlakata xkgalhi cáncer. Lu nitlan xlimakgkatsi akxni xlakpuwan la lu xpatinanit xpuskat. ¿Tuku makgtayalh? Akgtum kilhtamaku lakapastakli pulaktum tuku stlan tatitaxtulh xpuskat chu paxtikatsinilh Jehová xlakata uma tuku lakapastakli. Lu tlan limakgkatsilh, wa xlakata lata ama kilhtamaku tsukulh paxtikatsini Jehová xlakata tuku xatapaxuwan xtatitaxtunit xpuskat nema xlakapastaka. Jason wan pi xlakata paxtikatsininan, tlawanit pi tlakg nakgalhi xatlan tapuwan. Chuntiya lilipuwan xlakata nilh xpuskat, pero la uku tlakg tlan makgkatsi. Tuku makgtayanit wa napaxtikatsini Jehová xlakata lipaxuwalh xtamakgaxtokgat chu xlakata xpuskat tiku lu xpaxki Jehová akxtum taskujnanilh.

«Lu kpaxtikatsini Jehová xlakata kimakgtaya.» (Sheryl)

13. ¿Tuku makgtaya Sheryl ni lu nalipuwan chu naʼakgsitsi?

13 Sheryl kajku 13 kata xkgalhi akxni lanka huracán Haiyan masputunalh kxlakitat islas xalak Filipinas, akxni ksputma kata 2013. Akxni milh uma xalipekua un chu sen lakgsputli xchik. Nachuna nilh xtlat, xtse chu kgalhtutu xnatalan. ¿Tuku makgtaya Sheryl ni lu nalipuwan chu naʼakgsitsi? Lilakpuwan putum tuku tlan kgalhi, chu uma  tlawa pi lu napaxtikatsini Dios. Xla akxilhli pi natalan xkamakgtayakgo chu xkamakgpuwantinikgo tiku xmaklakaskinkgo. Na xkatsi pi putum kstalaninanin Cristo xlikalanka katiyatni xtlawamakgo oración xpalakata. Sheryl wan: «Lu kpaxtikatsini Jehová xlakata kimakgtaya. Xla kinkamaxkiyan putum tuku maklakaskinaw». Xlikana, akxni mastayaw tapaxtikatsinit xlakata tuku xatlan kgalhiyaw, kinkamakgtayayan ni lu nalipuwanaw. Na tlan natayaniyaw kaxatukawa taʼakglhuwit nema nakgalhiyaw (Efes. 5:20; kalikgalhtawakga Filipenses 4:6, 7).

KALIPAXUWAW XLAKATA JEHOVÁ KINKAMAKGTAYAYAN

14. ¿Tuku lu tlan takgalhkgalhin kinkamaxkiyan Jehová? (Kaʼakxilhti xapulana dibujo.)

14 Kskujnin Jehová putum kilhtamaku maxkikgonit paxtikatsinit xlakata kamakgtaya. Akgtum liʼakxilhtit, akxni kalakgmaxtulh israelitas kxaSpinini pupunu kxmakan mapakgsina xalak Egipto, israelitas paxtikatsinikgolh (Éx. 15:1-21). La uku, Dios kinkamaxkiyan akgtum lu lilakgatit takgalhkgalhin. Kinkawaniyan pi nialh makgas namasputu putum tuku kinkamakgapatinanan (Sal. 37:9-11; Is. 25:8; 33:24). Kalilakpuwaw la namakgkatsiyaw akxni Dios nakamasputu putum xtalamakgasitsin chu nalatamayaw niku naʼanan tuku xaʼakgstitum chu nialh naʼanan taʼakglhuwit. ¿Ni xlikana pi lu napaxtikatsiniputuna Jehová? (Apocalipsis [Revelación] 20:1-3; 21:3, 4.)

Dios kinkamaxkiyan akgtum lu lilakgatit takgalhkgalhin: nialh makgas namasputu putum tuku kinkamakgapatinanan

15. ¿Tuku tlawaputunaw kkata 2015?

15 Liwana katsiyaw pi Jehová lhuwa natlawa tuku tlan kimpalakatakan kkata 2015. Max nakgalhiyaw taʼakglhuwit, pero katsiyaw pi Jehová nikxni kintikamakgxtakgni (Deut. 31:8; Sal. 9:9, 10). Xla nakinkamakgtayayan xlakata ni namakgatsankgananiyaw. Wa xlakata katlawaw la Habacuc. Xla wa pi maski ni lhuwa taway xkgalhilh chu xkgalhilh laklanka taʼakglhuwit, xʼama paxuwa xlakata Jehová xʼama makgtaya (Hab. 3:17, 18). Kʼuma kata 2015 kalilakpuwaw tuku tlan nema Dios kinkamaxkiyan chu kastalaniw xtastakyaw texto xla uma kata, nema wan: «Kapaxtikatsinitit Jehová, xlakata xla tlan likatsi» (Sal. 106:1TNM).

Max nakgalhiyaw taʼakglhuwit, pero katsiyaw pi Jehová nikxni kintikamakgxtakgni

^ par. 10 Kʼuma artículo kalakgpalikanit makgapitsi tukuwani.