Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2014

¿Mililakgpalit tuku lakpuwana?

¿Mililakgpalit tuku lakpuwana?

MAKGAPITSI lakgkgawasan chu laktsuman tiku kstalaninanin Cristo ankgolh kcine xlakata naʼakxilhkgo akgtum película. Lhuwa xcompañeros xalak escuela akxilhkgonita, chu lu lakgatikgonit. Akxni chankgo, akxilhkgo kcarteles tuku limakgninankan chu lakpuskatin tiku ni xlilat la lhakganankgonit. ¿Tuku natlawakgo? ¿Naʼakxilhkgo película?

Uma liʼakxilhtit masiya pi putum kilhtamaku laksakaw tuku natlawayaw nema max natlawa pi tlan natawila o nitlan natawila kintakanajlakan chu la talalinaw Jehová. Min kilhtamaku max wi tuku lakpuwanitaw natlawayaw, pero akxni lilakpuwamparayaw, lakgpaliyaw tuku xlakpuwanaw. ¿Wamputun uma pi ni liwana lakapastaknanaw? ¿O tlan kitaxtu lakgpalikan tuku lakpuwankanit?

Akxni nitlan nalakgpaliyaw tuku lakpuwanaw

Xlakata paxkiyaw Jehová tamakamastaniw chu tamunuw. Waniw pi nikxni xʼamaw makgxtakgaw chu makgantaxtiputunaw uma. Pero, kintalamakgasitsinkan, Satanás, tlawaputun pi kamakgatsankgananiw (Apocalipsis [Revelación] 12:17). Liwana lakpuwanitaw naskujnaniyaw Jehová chu nakgalhakgaxmataw xlimapakgsin; komo xlakgpaliw tuku lakpuwanitaw max natlawa pi namakgatsankgayaw kilatamatkan. ¡Uma lu nitlan xkinkakitaxtunin!

Titaxtunita liwaka akgtiy mil akgchaxan ciento kata, akxni Nabucodonosor, xmapakgsina Babilonia, tlawalh akgtum lanka imagen xla oro chu limapakgsinalh pi putum latamanin xkakninanikgolh. Wantiku ni xkakninanilh, xʼamaka makankan khorno nema xkgalhi lhuwa lhkuyat. Sadrac, Mesac chu Abednego xkakninanikgo Jehová chu wata wa xkgalhakgaxmatputunkgo. Xlakata ni tatsokgostanikgolh imagen, kamakanka khorno. Maski Jehová kalakgmaxtulh, xlakpuwankgonit pi maski xkamakgnika ni xʼamakgo makgatsankgananikgo Dios (Dan. 3:1-27).

Palakachuwina Daniel na xlakkaxwilinit  nakakninani xaxlikana Dios chu ni lakgpalilh xtalakpuwan. Xkatsi pi komo xʼakxilhka akxni xtlawama oración, xʼamaka mujukan niku xtajumakgolh leones. Pero chuna la xlismaninit, Daniel chuntiya tlawanilh oración Dios makgtutu akgtum kilhtamaku. Xlakata ni makgatsankgananilh, Jehová sikulunatlawalh chu lakgmaxtulh akxni «nitu tlawanikgolh leones» (Dan. 6:1-27).

Kskujnanin Jehová xala uku na makgantaxtikgo tuku wanikgolh akxni tamakamastanikgolh. Makgapitsi xtatayananin Jehová tiku ankgo kʼakgtum escuela xalak África, ni saludartlawaputunkgolh tuku litalakgapasa akgtum país. Kawanika pi komo ni ksaludartlawakgolh chuna la amakgapitsi xcompañeros, xʼamaka katamakxtukan kʼescuela. Ni makgas titaxtulh, ministro de educación alh kkachikin chu katachuwinalh makgapitsi lakgkgawasan chu laktsuman xtatayananin Jehová, chu xlakan ni pekuankgolh chu liwana wanikgolh tuku xlakata ni ksaludartlawakgo. Lata ama kilhtamaku, natalan nialh kgalhikgo taʼakglhuwit chu akxni ankgo kʼescuela nialhti tlawaputun pi namakgatsankgananikgo Jehová.

Kaʼakxilhwi tuku na titaxtulh Joseph. Xpuskat xkgalhi cáncer chu xalan nilh. Xfamilia Joseph xlakgachixkuwili tuku xlakaskin pi xtatlawalh akxni nina xmaknukan, o xmujukan xpuskat. Pero xfamilia xpuskat ni xTatayananin Jehová chu xtlawaputunkgo makgapitsi talismanin nema Dios ni lakgati. Joseph wan: «Xlakata ni kmastalh talakaskin, tlawaputunkgolh pi kinkamanan xmastakgolh talakaskin, pero xlakan na ni lakaskinkgolh. Xfamilia na xtlawaputunkgo pi kkinchikkan xlakgatawilaka kimpuskat chu xtlawakgolh la xlismanikgo. Pero akit kkawanilh pi komo chuna xtlawaputunkgo ni kkinchik xʼamakgo tlawakgo. Xkatsikgo pi xtalismaninkan ni xtachuna tuku kkanajla chu tuku xkanajla kimpuskat. Makgas klikgalhchuwinaw uma chu alistalh alakatanu niku chuna tlawakgolh.

»Akxni xaktitaxtuma uma tuku lu nitlan xkimamakgkatsini, xaktasaskini Jehová pi xkinkamakgtayan akit chu kifamilia xlakata chuntiya xakkgalhakgaxmatwi xlimapakgsin. Jehová kgaxmatli kioraciones chu kinkamakgtayan ni nakmakgatsankgananiyaw maski xkinkamatlawiputunkanan tuku nitlan». Joseph chu xkamanan chuntiya kgalhakgaxmatkgolh Dios, nipara tsinu lakpuwankgolh nalakgpalikgo tuku xlakpuwankgo.

Akxni max tlan nalakgpaliyaw tuku lakpuwanaw

Akxni aku xtitaxtunit Pascua xla kata 32, chatum puskat xalak Fenicia talakatsuwinilh Jesús akxni xwi kSidón chu makglhuwa skinilh pi xmaxtulh demonio nema xlaktanunit xtsumat. Pulana Jesús ni kgalhtilh chu kawanilh xlimakgalhtawakgat: «Ni tanu ntu nkilimalakgachakanit, wampi wa naklakgminkgoy [borregos] xatsankgan nti xala [...] Israel». Xlakata puskat chuntiya xwanima, wampa: «Ni tlan ntiyanikgokan xkaxtalanchujkan lakgskgatan, na wa nchu namakanikgokan laktsu chichi». Pero uma puskat limasiyalh pi lu xkanajlani akxni wanilh: «Chuna Tlati, wampi wa laktsu chichi, wa xlakan wakgoy nkgatxtakgma ntu ntamakgwasa kxmesajkan xpuchina». Jesús kgaxmatnilh chu mapaksalh xtsumat (Mat. 15:21-28).

Akxni chuna tlawalh, Jesús likatsilh la Jehová, wa tiku lakgpali tuku lakpuwan natlawa akxni tlan. Akgtum liʼakxilhtit, akxni israelitas tlawakgolh aktsu toro xla oro, Dios xlakpuwanit nakamasputu, pero lakgpalilh tuku xlakpuwanit akxni Moisés tasaskinilh pi xkatapatilh kachikin (Éx. 32:7-14).

Apóstol Pablo tlawalh la Jehová chu Jesús. Milh kilhtamaku lakpuwa pi ni xlilat xwanit pi Juan Marcos xkataʼalh kalitachuwinantapuli Dios alakatanu, xlakata akxni Pablo chu Bernabé xapulana ankgolh lichuwinantapulikgo Dios xkamakgxtakgnit. Pero alistalh akxilhli pi xlakgpalinit xtayat chu lu kskujninit Dios. Wa xlakata skinilh Timoteo: «Kamakaxti Marcos, na katata; sampi lu[...] kmaklakaskin kxtaskujut nkinTlatikan» (2 Tim. 4:11).

¿Chu akinin? Max min kilhtamaku naʼakxilhaw pi natalakaskin nalakgpaliyaw tuku lakpuwanaw, chuna la tlawa kinTlatkan xalak akgapun tiku xapaxkina  chu ni tunkun sitsi. Akgtum liʼakxilhtit, max natalakaskin nalakgpaliyaw la kaʼakxilhaw amakgapitsin. Komo Jehová chu Jesús tiku ni kgalhikgo talakgalhin chuna tlawakgolh, liwaka akinin tiku makglakgalhinanin. Kiliʼakxilhatkan tuku titaxtumakgo amakgapitsin chu komo natalakaskin nalakgpaliyaw la kaʼakxilhaw, chuna kilitlawatkan.

Min kilhtamaku max natalakaskin nalakgpaliyaw kintapuwankan xlakata tlan wi tuku natlawayaw kxkachikin Jehová. Makgapitsi tiku likgalhtawakgamakgo Biblia chu ankgo ktamakxtumit lakpuwankgo pi tlan alistalh natamunukgo. Wilakgo tiku ni precursores wamputunkgo maski tlan chuna tlawakgo. Chu makgapitsi natalan ni lu liskujkgo xlakata tlakg nakalakgayawakan taskujut kcongregación (1 Tim. 3:1). ¿Nachuna wix la umakgolh natalan? Komo chuna, kalakapastakti pi Jehová makgpuwantiniyan wi tuku tlan nalakgatayaya kxkachikin. Wa xlakata, ¿tlan xwa xlakgpali mintapuwan chu tlakg xliskujti xlakata naskujnaniya Dios chu amakgapitsin?

Min kilhtamaku tlakg tlan kitaxtu lakgpalikan tuku xlakpuwankanit natlawakan

Ella chatum tala puskat tiku skujma kʼakgtum sucursal xalak África xla xtatayananin Jehová, uma tuku wan xlakata xtaskujut: «Akxni kchalh kBetel nixakkatsi komo lhuwa kilhtamaku xakama tamakgxtakga. Xakskujnaniputun Jehová xliputum kinaku, pero lu xakkatasmaninit kifamilia. Xapulana lu xakkalakapastaka... Pero kincompañera nema lakxtum xaktawi lu kimakgpuwantinilh, wa xlakata anta ktamakgxtakgli. Titaxtunita akgkaw kata lata kwi kBetel chu liwana klakpuwanit anta naktamakgaxtakga xlakata nakkaskujani natalan».

Akxni lu xlakaskinka nalakgpaliyaw tuku lakpuwanaw

¿Lakapastaka tuku akgspulalh Caín akxni wi tuku lu lakgsitsinilh xtala? Jehová akxilhli pi xtasitsi wi tuku nitlan xʼama matlawi, wa xlakata  wanilh pi nialh xsitsilh chu Jehová chuntiya tlan xʼakxilhli. Wanilh pi «talakgalhin [x]wi anta niku laktanukan». Caín tlan xtilakgpalilh xtapuwan pero ni kuenta tlawanilh xtastakyaw Dios. Chu lu nitlan tuku kitaxtulh xlakata makgnilh xtala, chuna wa tiku xapulana makgnina litaxtulh (Gén. 4:2-8).

¿La xtikitaxtulh komo Caín xtilakgpalilh xtapuwan?

Tuku akgspulalh mapakgsina Uzías na wi tuku lu xlakaskinka kinkamasiyaniyan. Maski pulana tlawalh tuku tlan kxlakatin Jehová chu tlan xtalalin, alistalh lanka tsukuka makgkatsikan. Biblia lichuwinan pi tanulh ktemplo xlakata namakamasta incienso, maski kajwatiya sacerdotes tlan xmakamastakgo. Chu akxni wanikgolh pi ni lanka xmakgkatsika chu ni chuna xtlawalh, ni lakgpaliputulh xtapuwan. Wata «sitsilh» chu ni kakgalhakgaxmatli sacerdotes. ¿Tuku kitaxtulh? Jehová tlawalh pi xchipalh lepra (2 Crón. 26:3-5, 16-20).

Umakgolh liʼakxilhtit masiya pi min kilhtamaku lu xlakaskinka nalakgpaliyaw tuku lakpuwanitaw. Kalilakpuwaw tuku titaxtulh Joachim, tiku tamunulh kata 1955, pero maxtuka kcongregación kata 1978. Titaxtulh akgpuxam kata, limasiyalh pi nitlan xlimakgkatsi tuku xtlawanit chu xlakgpalinit xtayat chu xtatayana Jehová litaxtupa. Nina makgas chatum kgolotsin xalak congregación kgalhskilh tuku xlakata lu makgapalalh xlakata kskilh pi xtamaknuparaka. Joachim wa: «Xaksitsinit chu tlankajwa xakwanit. Lu nitlan pi lu makgas titaxtulh xlakata xaklakgpalilh kintapuwan. Putum kilhtamaku nema ni xakmakgtapakgsi kcongregación, xakkatsi pi xtatayananin Jehová xmasiyakgo tuku xaxlikana». Joachim xʼakxilhnit pi xtalakaskin xmakgxtakgli tuku nitlan xtlawama chu xlakgpalinit xtalakpuwan.

Max namin kilhtamaku, na kililakgpalitkan nawan tuku lakpuwanitaw natlawayaw chu na nalakgpaliyaw chuna la lismaninitaw tlawayaw. Komo chuna natlawayaw namakgapaxuwayaw Jehová (Sal. 34:8).