Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2014

¿Lakapastaka?

¿Lakapastaka?

¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

Kstalaninanin Cristo, ¿tlan namastakgo xlakata nalhkuyukan tiku nilh?

Komo namastaya tiku nilh xlakata nalhkuyukan o ni, miʼakstu nalaksaka. Biblia ni wan pi chuna xlitatlawat, pero lichuwinan pi akxni mapakgsina Saúl chu xkgawasa Jonatán nikgolh, israelitas kalhkuyukgolh chu maknukgolh xlukutkan (1 Sam. 31:2, 8-13) (15/6, página 7).

¿Tuku likatsiyaw pi ni wa Dios tlawa pi kaʼanalh tuku nitlan?

Jehová putum kilhtamaku tlawa tuku akgstitum; ni makgxtakgnan, paxkinan chu lakgalhamanan (Deut. 32:4; Sal. 145:17; Sant. 5:11) (1/7, página 4).

¿Tuku tuwa titaxtukgo tiku ankgo kʼatanu país niku tlakg talakaskin tiku nalichuwinankgo Dios?

Pulaktutu tuku tuwa: 1) nialh lhuwa tuku nakgalhiputunkan, 2) lu lakapastakkan familia chu 3) nakatalalinkan tiku anta wilakgolh. Tiku tayanikgo uma tuku tuwa, lhuwa tasikulunalin makglhtinankgo (15/7, páginas 4 chu 5).

¿Tuku xlakata xnatalan José ni xakxilhputunkgo?

Pulaktum wa pi Jacob tlakg xpaxki, asta matlawinanilh maktum lhakgat. Xnatalan lu sitsinikgolh chu stakgolh xlakata skujni xlitaxtulh (1/8, páginas 11 asta 13).

¿Tuku xlakata xasasti tratados lu makgtayanankgo chu ni tuwa maklakaskinkan?

Putum xalaksasti tratados lakxtum la katlawakanit. Makatunu tratado kinkamakgpuwantiniyan nalikgalhtawakgayaw akgtum texto xalak Biblia chu tlawa takgalhskinin. Maski tanu tanu la nakinkakgalhtikgoyan latamanin tlan namalakgapitsiyaw tratado chu nakamasiyaniyaw tuku wan Biblia. Na tlan nalaksakaw akgtum takgalhskinin xlakata akxni nalakgamparayaw nakgalhtiyaw (15/8, páginas 13 chu 14).

¿Tuku Peshitta siríaca?

Tachuwin siríaco akgtum tachuwin nema taxtucha kʼarameo nema xmaklakaskinkan ksiglo II o III. Max makgapitsi tatsokgni kʼGriego xla xTachuwin Dios pulana tamatitaxtilh kʼuma tachuwin. Uma tatsokgni lilakgapaska Peshitta (1/9, páginas 13 chu 14).

¿Tuku xlitlawatkan natlatni xlakata nakakuentajtlawakgo xkamanankan?

Xlakaskinka nakakgaxmatnikgo, chuna tlan nakalakgapaskgo. Natlatni namatliwakglhkgo xtakanajla xkamanan chu nakapulalinkgo, tlakg chuna xlitlawatkan akxni ni liwana katsikgo tuku nakanajlakgo (15/9, páginas 18 asta 21).

¿Tuku natlawa xTamapakgsin Dios?

Namasputu tajatat chu linin, naʼanan taskujut, nialh katiʼanalh guerras, tatsinkstat chu nialh katiʼanalh tiku nitu kgalhi (1/10, páginas 6 chu 7).

¿Tuku talakkaxlan nema lichuwinan Biblia tlawa pi makgapitsi latamanin tlan natamapakgsinankgo Cristo?

Akxni xtatlawakgonita xʼapóstoles tiku ni xmakgxtakgkgo xaʼawatiya taway xla Pascua, Jesús katatlawalh akgtum talakkaxlan: talakkaxlan xla Tamapakgsin (Luc. 22:28-30). Uma talakkaxlan kalimasiyanilh pi xʼamakgolh tamapakgsinankgo kʼakgapun (15/10, páginas 16 chu 17).

Kawanti akgtiy liʼakxilhtit xalak Biblia nema limasiya pi Akgskgawini lama.

Biblia wan pi Akgskgawini tachuwinalh Jesús xlakata naʼakgskgawi. Akgskgawini na tachuwinalh Dios kxkilhtamaku Job. Uma pulaktiy masiya pi Satanás xlikana lama (1/11, páginas 4 chu 5).

¿Tiku xwankgonit akgtum kachikin nema «naliyankgoy xtukuwini» nema lichuwinalh Santiago kHechos 15:14?

Wa kanajlanin judíos chu ni judíos tiku Dios kamamakxtumilh chu kawanika: «Wixin, xatalaksaknin kilhtsukut, [...] lakimpi wixin naliakgchuwinanatit wa ntu xatlan ntlawanit wa nti yama nkatasaninitan» (1 Ped. 2:9, 10) (15/11, páginas 24 chu 25).

¿Niku xwi Timgad chu la xlikatsikgo makgapitsi tiku anta xlamakgolh?

Timgad akgtum kachikin xwanit xalak Roma nema xwi kxnorte África (la uku Argelia). Akgtum liʼakxilhtit xlakata tuku xkanajlakgo litasiya tuku tatsokgnit nema maʼakxtuka niku xwi Timgad: «Talatnankan, paxkan, kgamanankan, litsiyankan. ¡Uma xlikana latamat!». Uma talakapastakni xlakata latamat na xtachuna nema lichuwinan 1 Corintios 15:32 (1/12, páginas 8 asta 10).