Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Febrero kata 2014

Kaʼakxilhwi «la makgapaxuwanan Jehová»

Kaʼakxilhwi «la makgapaxuwanan Jehová»

Akxni titaxtuyaw tuku tuwa, min kilhtamaku nialh tlan lakapastaknanaw, makgkatsiyaw pi nialh kgalhiyaw litliwakga asta nialh tlan akxilhaw latamat. Chuna akgspulalh mapakgsina David, tiku lhuwa tuku nitlan titaxtulh. ¿La tlawalh xlakata xtayanilh? Xtakgalhtin anta wi kʼakgtum lilakgatit salmo nema tsokgli: “Kkilhanilh Kintikukan Dios, kmakgskilh ixtalakgalhaman. Klitakgalhchuwinalh tu xakpatima nak ixlakatin, kwanilh tu xaklilakgaputsamaj. xakakxtakajnama y ni xakkatsi tu tlan naktlawaj, xla katsi la klama y kimasini tu kilitlawat”. Liwana tasiya pi David skinilh xtamakgtay Dios (Sal. 142:1-3).

Akxni David titaxtulh tuku tuwa, taʼaktujulh chu skinilh xtamakgtay Jehová

Kʼatanu salmo wa: «Kaj pulaktum tuku kskininit Jehová... chu wa tuku nakputsa, pi tlan naklatama kxchik putum kilatamat, xlakata nakakxilha la makgapaxuwanan Jehová chu xlakata nakpaxtikatsini akxni nakakxilha xtemplo» (Sal. 27:4TNM). Kalakpuwaw pi David akxilhma xkilhtin tabernáculo, lakatsu niku tlawanikan takaknin xaxlikana Dios xalak xkilhtamaku. Kaj lakgamakgat akxilhma xlakata ni xalak xfamilia Leví. Maski chuna, lu paxtikatsini chu anta latamaputun putum xlatamat xlakata “naʼakxilha la makgapaxuwanan Jehová”.

Tachuwin makgapaxuwanan kilhchanima tuku lu lilakgatit, tlan limakgkatsikan. David putum kilhtamaku paxtikatsinilh chuna la Jehová xlakkaxwilinit la nakakninanikgo xlakskujnin. ¿Nachuna paxtikatsiniyaw akinin?

XLAKASKINKA AKXILHKAN XTEMPLO

La uku, xlakata natalakatsuwiniyaw Jehová ni maklakaskinaw akgtum templo xtatlaw chixku, wata xalanka xtemplo xaʼespiritual, uma kilhchani tuku Jehová lakkaxwilinit xlakata nakakninaniyaw. * Komo “napaxtikatsiniyaw akxni akxilhaw” xtemplo Jehová xaʼespiritual, na tlan “naʼakxilhaw la makgapaxuwanan” Jehová chuna la tlawalh David.

Kalilakpuwaw tuku wamputun pumakamastan niku xmastakan xalhkun tamakamastan o pumakamastan xla cobre, nema xwi kxlakatin tabernáculo (Éx. 38:1, 2; 40:6). Uma pumakamastan xkilhchanima pi xʼama makgamakglhtinan xlatamat Jesús nema xʼama makamasta (Heb. 10:5-10) ¿Tuku kilhchanima kimpalakatakan? Apóstol Pablo tsokgli: «Sampi lapi akxni xtalatlawana Dios xwanitawku nkinkalimalakatsuwin xpalakata xlinin xKam» (Rom. 5:10). Komo nakanajlaniyaw xkgalhni Jesús nema stajtamakgalh, Jehová tlan nakinkaʼakxilhan chu lu tlan natalalinaw. Chu uma natlawa lu tlan xʼamigos nawanaw (Sal. 25:14).

Xlakata kinkaxapanikanan kintalakgalhinkan, «chuna nakaminiyan [o kgalhiyaw] ntakgsiyajna kxlakatin kimpuchinakan» (Hech. 3:19). Xlakata lakgalhinanin akinin tlan natamalakxtumiyaw kilatamatkan la akxni wi tiku wankanit pi namakgnikan pero nitlan limakgkatsi tuku xtlawama chu tsuku tlawa tuku tlan akxni nina chan kilhtamaku namakgnikan. Akxni akxilha uma, juez tiku xalakgalhamana lakpuwan pi wata naxapa tuku nitlan xtlawanit chu wata wan pi ni namakgnikan. ¡Lu tlan makgkatsi tiku xʼamaka makgnikan! Jehová xtachuna la uma juez, xlakata kalakgalhaman latamanin tiku makgxtakgkgo tuku nitlan xtlawamakgolh, chu tlawa pi tlan nalatamakgo.

KALIPAXUWA XAXLIKANA TAKAKNIN

David akxilhli pulaklhuwa la xtlawakan xatlan takaknin anta kxchik Jehová, la akxni kachikin xtlawakgo laklanka tamakxtumit, xkgalhtawakgakan, xmasiyakan xlimapakgsin Dios, akxni klhkuyukan limajinin chu xasanto taskujut nema xtlawakgo sacerdotes chu levitas (Éx. 30:34-38; Núm. 3:5-8; Deut. 31:9-12). La uku, na kgalhiyaw tipalhuwa la tlawayaw takaknin.

Tachuwin «¡[lu] tlan chu tlan tamakgkatsi akxni ti tapakgsini Dios akxtum tarapaxki la litakam!» akxni akxtum lakgo natalan, lu xlikana la uku chuna  la makgasa kakninanikan Dios (Sal. 133:1). Xliputum katiyatni tlakg talhuwinitaw «xlipaks natalanin» (1 Ped. 2:17). Kkintamakxtumitkan likgalhtawakgakan chu masiyakan xTachuwin Dios. Jehová limaklakaskin xkachikin xlakata tlawa programas nema xatakgatsin xlakata tamasiy xalak Biblia. Chu kgalhiyaw lhuwa taway xaʼespiritual nema tatsokgnit nema tlan nalimaklakaskinaw kTakaknin xalak familia o akxni akstu kgalhtawakgayaw. Chatum tala tiku na anta tapakgsi tiku pulalimakgolh xTatayananin Jehová wa: «Akxni klilakapastaka xTachuwin Dios, akxni klilakpuwan xlakata tuku kilhchanima chu liskgalala nema kgalhi chu tuku makgatekgsninan lu tlan klimakgkatsi kkilatamat chu lhuwa tuku kkgalhi xaʼespiritual». Xlikana, ¡takatsin tlawa pi lu tlan namakgkatsi latamat! (Prov. 2:10.)

Chuna la makgasa, xʼoraciones kskujnin Dios chali chali lakgchan kintlatkan xalak akgapun. Jehová akxilha uma oraciones la lu muksun incienso (Sal. 141:2). ¡Lu tlan limakgkatsiyaw pi Jehová lu lakgati kinkakgaxmatniyan akxni xataktujun tachuwinanaw!

Moisés skilh kxʼoracion: «Kintikukan Dios, kakilamaxkgakgeniw kon mintalakgalhaman nak kilatamatkan kanikxniwaj. Kakilamakgtayaw xlakata lata tu naktlawayaw, nakinkataxtuniyachan» (Sal. 90:17). Jehová sikulunatlawa kintaskujutkan xlakata lichuwinanaw xtamapakgsin chu ni anan tajaxni la tlawayaw (Prov. 10:22). Max kamakgtayanitaw makgapitsi latamanin nalakgapaskgo xaxlikana takanajla, o max lhuwata kata lichuwinamaw Dios niku ni kgaxmatputunkan, max tatatlayaw o nitlan makgkatsiyaw kkintalakapastaknikan o kinkaputsatalanimakan (1 Tes. 2:2). Maski tanu tanu tuku titaxtuyaw makgkatsinitaw «la makgapaxuwanan Jehová» chu akxilhnitaw pi Jehová lu makgapaxuwa la skujnaniyaw.

David kilhtlilh: «Dios, akit wata wix [kintiyat nema kilakgchan], porque wix kimaxkipat wakg tu kmaklakaskin, y matliwekglhtilhaya kilatamat. Snun tlan latamat kimaxkinita, snun lilakgatit wakg lata tu kkamakglhtinanit» (Sal. 16:5, 6). Xla lu paxtikatsinilh xlakata tiyat nema xlakgchan, uma wamputun naskujnani Jehová chu Jehová xpaxki. Xlikana max natitaxtuyaw tuku tuwa la David; pero chuna la David lhuwa tasikulunalin xaʼespiritual makglhtinanitaw. Wa xlakata chuntiya kalipaxuwaw xaxlikana takaknin chu putum kilhtamaku “kapaxtikatsiniw” akxni akxilhaw xtemplo xaʼespiritual Jehová.

^ par. 6 Kaʼakxilhti La Atalaya 1 xla julio kata 1996, kpáginas 14 asta 24.