Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Febrero kata 2014

Jehová, tiku lhuwa tuku masta chu Kuentajtlawanan

Jehová, tiku lhuwa tuku masta chu Kuentajtlawanan

«Kumu akit kimpaxkij, akit na naklakgmaxtuj, y akit naklekgawa ama ti kilipawan.» (SAL. 91:14)

1, 2. ¿La talakgpali la kinkamakgastakkan chu la lakgapaswi Dios?

FAMILIA wi xlakata Jehová malakatsukilh (Efes. 3:14, 15). Maski watiya familia tapakgsiyaw tanu tanu la likatsiyaw chu tuku titaxtuyaw. Makgapitsi latamanin max akxtum xtawilakgo xnatlatnikan asta akxni lanklankata wankgolh. Amakgapitsi max nilh xnatlatnikan xlakata tajatat, wi tuku lakapala kaʼakgspulalh o atanu tuku nitlan. Chu makgapitsi nipara kalakgapaskgolh.

2 Chuna titaxtukgo xlakskujnin Jehová. Makgtapakgsiyaw kʼakgtum familia, pero tanu tanu tuku titaxtuyaw chu tanu la lakgapaswi Dios. Max xtatayananin Jehová xwankgonit minatlatni chu lata aktsujku xwanita masiyanikgon tuku xla Dios (Deut. 6:6, 7). O max chuna la amakgapitsi lakgapasti tuku xaxlikana xlakata wi tiku litachuwinan Dios (Rom. 10:13-15; 1 Tim. 2:3, 4).

3. ¿Tuku tlawa pi lakxtum nawanaw?

3 Maski ni lakxtum akinin chuna la lichuwinaw, kimputumkan wi tuku akxtum kgalhiyaw. Putum patinanaw xlakata Adán ni kgalhakgaxmatnalh, kinkamatitaxtinin talakgalhin chu linin (Rom. 5:12). Maski chuna, xlakata skujniyaw Jehová tlan lakgtalakatsuwiniyaw la kinTlatkan. Makgasa, xkachikin xatalaksakni  tlan xwankgo tuku tatsokgnit kʼIsaías 64:8: «Jehová, wix kinTlatkan». Nachuna Jesús limatsukilh xʼoración umakgolh tachuwin: «KinTlatikan nti wilapi nkaʼkgapun, katamasantujilh mintukuwini» (Mat. 6:9).

4, 5. ¿Tuku naʼakxilhaw xlakata tlakg napaxtikatsiniyaw kinTlatkan Jehová?

4 Kintlatkan xala talhman kinkakuentajtlawayan putum tiku kgalhiniyaw takanajla chu mapakuwiyaw. Xla kinkawaniyan: «Kumu akit kimpaxkij, [lakskujni tiku ni makgxtakgnan] akit na naklakgmaxtuj, y akit naklekgawa ama ti kilipawan» (Sal. 91:14). Jehová kalakgmaxtu xkachikin kxmakan xtalamakgasitsin chu kakuentajtlawa xlakata ni nakamasputukan.

5 Xlakata nastaka tapaxkit nema kgalhiniyaw Jehová, kaʼakxilhwi pulaktutu tuku tlawa:1) lhuwa tuku masta, 2) kinkakuentajtlawayan chu 3) tlakg xatlan kiʼAmigokan. Chuna la naʼakxilhtilhayaw pulakatunu, kalilakpuwaw la talalinaw kinTlatkan xalak akgapun chu tuku tlan natlawayaw xlakata namaxkiyaw kakni. Na kalilakapastakwi la kasikulunatlawa tiku talakatsuwinikgo (Sant. 4:8).

JEHOVÁ LHUWA TUKU KINKAMAXKIYAN

6. ¿Tuku limasiya pi wa Jehová tiku masta «xlipaks wa ntlan tatakin»?

6 Discípulo Santiago tsokgli: «Xlipaks wa ntlan tatakin o [tamaskiwin], chu ntu aktanks, anta ntalhman minacha ntu makaminacha xmakilhtsukina xlipaks xkgakganat» (Sant. 1:17). Latamat akgtum tamaskiwin, nema kinkamaxkiyan Jehová (Sal. 36:9). Akxni maklakaskinaw xlakata natlawayaw xtalakaskin, lipaxuwayaw lhuwa tasikulunalin chu na tlan nalatamayaw putum kilhtamaku kxasasti katiyatni (Prov. 10:22; 2 Ped. 3:13). Pero xlakata anan lhuwa tuku nitlan xlakata xtalakgalhin Adán, ¿la chuna nala uma?

7. ¿Tuku tlawalh Jehová xlakata tlan xtalaliw?

7 Jehová lu pulaklhuwa la masta. Akgtum liʼakxilhtit, limasiya pi lu tlan kinkalikatsiniyan xlakata kinkalakgmaxtun. Akinin lakgalhinanin xlakata Adán kinkamatitaxtinin (Rom. 3:23). Maski chuna, xlakata lu kinkapaxkiyan wi tuku tlawalh xlakata tlan xtalaliw. Apóstol Juan kinkawaniyan tuku tlawalh: «Wa yuma nkintikalitasiyunin xtapaxkit Dios, [...] timalakgachalh nkatuxawat nchastum xKam, lakimpi wa xpalakata, nalilatamayaw. Wa yuma liwi ntapaxkit: ni cha mpala kin nti xpaxkiw Dios, wampi wata wa nti nkintikapaxkin, na malakgachalh xKam, nakinkapalakgaxokgoyan xpalakata kintalakgalhinkan» (1 Juan 4:9, 10).

8, 9. ¿La litaxtulh Jehová tiku lhuwa tuku Masta, kxkilhtamaku Abrahán chu Isaac? (Kaʼakxilhti xapulana dibujo.)

8 Ksiglo XIX akxni nina xmin Jesús, wi tuku lalh kxlatamat Abrahán nema limasiyalh tuku xʼama tlawa Jehová xlakata tiku ni xmakgxtakgkgolh tlan xlatamakgolh putum kilhtamaku. Hebreos 11:17-19 wan: «Wa xpalakata xtakanajla, Abraham, akxni ntiliukxilhkaj, [...] Isaac xkam, wa yuma nti xmakgamakglhtinanit ntamalaknun, [...] nchastum xkam namakgniy xtachuna ntantum animalh ntu [makamastanikan] Dios. Na wa yuma xkam nti xwanikanit: “Xpalakata Isaac nalitapakuwiya minkilhtsukut”. Sampi xpuwan mpi maski xanina xwaj, xkgalhiy Dios litliwakga nalimastakwanipalay; chuna chi xtachuna mpala xninitta malakastakwanipaj». ¿Akxilhaw tuku xtalakxtum nema xʼama la? Jehová mastalh xKgawasa Jesucristo, xlakata putum latamanin tlan xkamakgtayalh (kalikgalhtawakga Juan 3:16, 36).

9 ¡Max lu tlan limakgkatsilh Isaac ama kilhtamaku xlakata ni nilh! Xlikana, lu paxtikatsinilh Dios xlakata mastalh atanu tuku xmakamastaka tantum borrego nema talakgnutayalh (Gén. 22:10-13). Wa xlakata ama tiyat wanika «Jehová-yiré», nema wamputun «Jehová namasta» (Gén. 22:14, nota).

 TUKU MASTALH XLAKATA TLAN XTALALIW DIOS

10, 11. ¿Tiku pulalimakgolh «ntaskujut lantla nalimalakatsuwikgo[...] amakgapitsin nti ni xputsakgoy Dios», chu la tlawakgonit?

10 Akxni lilakapastakaw putum tuku Jehová kinkamaxkinitan lu paxtikatsiniyaw, komo Jesús ni xkintikalakgmaxtun nila tlan xtalaliw Dios. Pablo nachuna wa akxni tsokgli: «Yuma ntu lu wa kakgatakgsnitaw: mpi lapi chatum nilh [xpalakgxokgo] lilhuwa [...]. Liputum mpalakanikgolh lakimpi wanti lamakgo, nialh wa akstu [ka]latamanikgokaj, wampi wa nkalatamanikgolh yama nti mpalakanikgolh, chu mpalakastakwanankgolh» (2 Cor. 5:14, 15).

11 Xapulana kstalaninanin Cristo lu xpaxkikgo Dios chu xpaxtikatsinikgo lanka talakgalhaman xlakata kskujnikgo. Wa xlakata, xatapaxuwan makgamakglhtinankgolh «ntaskujut lantla nalimalakatsuwikgo[...] amakgapitsin nti ni xputsakgoy Dios». Xlakata xlichuwinankgo Dios chu xkamakgalhtawakgekgo latamanin, uma mastalh talakaskin pi lhuwa tlan xlakgtalakatsuwikgolh chu xʼamigo Dios xlitaxtukgolh, chu alistalh tlan xkamanan xlitaxtukgolh. La uku tiku kalaksakkanit naʼankgo kʼakgapun nachuna lichuwinankgo Dios. Xlakata makgtayakgo Dios chu Cristo, tlawakgo pi latamanin tlan nalakgtalakatsuwikgo Jehová chu naskujnikgo (kalikgalhtawakga 2 Corintios 5:18-20; Juan 6:44; Hech. 13:48).

12, 13. ¿La tlan nalimasiyayaw pi paxtikatsiniyaw lhuwa tuku kinkamaxkiyan Jehová?

12 Xlakata lu paxtikatsinikgo tiku lhuwa tuku masta, putum kstalaninanin Cristo nema nalatamakgo kKatiyatni makgtayakgo tiku naʼankgo kʼakgapun xlakata nalichuwinankgo Tamapakgsin. Akxni anaw lichuwinanaw Dios maklakaskinaw Biblia, atanu lu xatlan tamaskiwin xla Jehová (2 Tim. 3:16, 17). Akxni liwana maklakaskinaw xTachuwin Dios, kamakgtayayaw latamanin na tlan putum kilhtamaku nalatamakgo. Pero ni kajwatiya umakgolh tamakgtay nema kgalhiyaw. Jehová kinkamaxkinitan xʼespíritu santo xlakata tlan natlawayaw uma taskujut (Zac. 4:6; Luc. 11:13). Akxni likgalhtawakgayaw Anuarios de los testigos de Jehová akxilhaw pi lhuwa tuku tlan kitaxtulh. ¡Lanka talakgalhaman namakgtlawayaw uma taskujut nema maxki kakni kinTlatkan tiku lhuwa tuku masta!

13 Xlakata Jehová lhuwa tuku kinkamaxkinitan, akstu kakinkakgalhskinkan: «¿Lu kliskujma tlakg naklichuwinan Dios xlakata naklimasiya pi kpaxtikatsini tuku kimaxkinit? ¿Talakaskin tlakg nakliskuja xlakata tlakg tlan naklichuwinan xalakwan xalaksasti?». Limasiyayaw pi lu paxtikatsiniyaw akxni pulana wiliyaw kkilatamatkan xTamapakgsin. Akxni chuna tlawayaw, Jehová kinkamaxkiyan tuku maklakaskinaw (Mat. 6:25-33). Akxni akxilhaw pi xla xatapaxuwan kinkakuentajtlawayan tlawa pi lu namakgapaxuwaputunaw (Prov. 27:11).

14. ¿Tukuya kilhtamaku kalakgmaxtunit Jehová xlakskujnin?

14 David kilhtlilh: «Klakgaputsama y snun klakaskima kakimakgtayakaj, pero kkatsi xlakata wix [Jehová] ni kiaktsonkgswanita [o kimpatsankganita]. Wix nakimakgtayaya y nakilakgmaxtuya» (Sal. 40:17). Jehová kalakgmaxtunit lhuwa xlakskujnin, liwaka akxni katlawanikan tuku nitlan chu lu kaputsastalanikgo xtalamakgasitsinkan. Akxni titaxtuyaw tuku tuwa la uma, xla kinkamakgtayayan xlakata ni namakgxtakgaw. Chu putum kilhtamaku matliwakglha kintakanajlakan. ¡Lu paxtikatsiniyaw!

JEHOVÁ KINKAKUENTAJTLAWAYAN

15. Kawili akgtum liʼakxilhtit la akxni chatum tlat xapaxkina putum kilhtamaku kakuentajtlawaputun xkamanan.

15 Chatum tlat tiku xapaxkina ni kajwatiya  kamaxki xkamanan tuku maklakaskinkgo, wata na kakuentajtlawaputun. Katsi pi lakapala nakamakgtaya komo wi tuku nalanikgo. Chatum tala wan pi akgtum kilhtamaku akxni aktsu kgawasa xwanit, xtlat chu uma tala xkitaspitmakgolh xlakata kilichuwinankgolh Dios, akxilhkgolh pi kstaknit chuchut chu nialhla xpatakutkgo. Puxkga lu kstaknit xlakata lu senalh tsisa, chu xlakata tlan xpatakutkgolh xtalakaskin xlaktayatilhakgolh chiwix akxni xʼakgpakgoskgolh. Uma tala xpulatilha chu xtlat kstalanima, pero xalan ni liwana tayacha kʼakgtum chiwix chu makgtiy tsankgalh kchuchut. Xtlat lakapala pakgxtuchipalh chu ni muxtulh. ¡Lu paxtikatsinilh xtlat! Nachuna kinTlatkan xalak akgapun kinkakuentajtlawayan kʼuma xalixkajni kakilhtamaku chu nitu nakinkatlawaniyan xmapakgsina, Satanás. Xlikana pi Jehová wa tlakg xatlan kuentajtlawana nema kgalhiyaw (Mat. 6:13; 1 Juan 5:19).

16, 17. ¿La kakuentajtlawalh Jehová israelitas akxni xkatalachipama amalequitas?

16 Xlakata Jehová xatapaxuwan kinkakuentajtlawayan litasiya tuku titaxtukgolh israelitas akxni xkalakgmaxtunit xlakata nialh skujnin xlitaxtukgolh kʼEgipto, kkata 1513 akxni nina xmin Jesús. Dios kamakgtayalh xpatakutkgolh xaSpinini pupunu chu xʼamakgolh ksipi Sinaí akxni chankgolh niku xwanikan Refidim.

17 Xlakata tuku xwankanit kʼGénesis 3:15, Satanás lu xkatlawaniputun tuku nitlan israelitas, chu akxni akxilhli pi tlan xtlawa, chuna tlawalh. Kamaklakaskilh amalequitas, tiku xwankgonit xtalamakgasitsinkan xkachikin Dios (Núm. 24:20). Kaʼakxilhwi la Jehová kakuentajtlawalh kskujnin akxni kamaklakaskilh kgalhtati lakchixkuwin tiku ni xmakgxtakgkgo: Josué, Moisés, Aarón chu Hur. Josué alh katalachipa amalequitas, pero Moisés, Aarón chu  Hur tayakgolh talhman ksipi nema lakatsu xwi. Akxni Moisés chuntiya xmatalhmani xmakxpan, israelitas xtlajanankgo. Wa xlakata, akxni xmakxpan Moisés tlakgwalh, o xakgxunit, Aarón chu Hur matalhmaninikgolh. Chuna, xlakata Jehová kamakgtayalh chu kakuentajtlawalh, «Josué tlajalh Amaleq chu [...] xkachikin» (Éx. 17:8-13). Moisés tlawalh anta akgtum pumakamastan, nema mapakuwilh «Jehová-nisí», nema kʼhebreo wamputun «Jehová Wa Kimputatsekgni» (kalikgalhtawakga Éxodo 17:14, 15; nota).

KALAKGMAXTU KXMAKAN SATANÁS

18, 19. ¿La kinkakuentajtlawanitan Jehová la uku?

18 Jehová kakuentajtlawa tiku paxkikgo chu kgalhakgaxmatkgo. Chuna la tlawakgolh israelitas kʼRefidim, nachuna naputsayaw xtamakgtay akxni kinkatlawaniputunkanan tuku nitlan. Xlikana pi makglhuwata kinkakuentajtlawanitan xlakata litaxtuyaw xkachikin chu kinkalakgmaxtuyan kxmakan Satanás. Kalakpuwanti la kakuentajtlawanit Jehová tiku ni makgxtakgkgo xtakanajlakan. Chuna titaxtukgolh lhuwa natalan tiku latamakgolh kʼAlemania chu atanu países kkata 1930 chu 1940 akxni xmapakgsinamakgo nazis. Akxni likgalhtawakgayaw kbiografías chu kʼAnuarios la Jehová kakuentajtlawalh xlakskujnin akxni xkaputsastalanimaka chu lilakpuwanaw umakgolh, lu tlakg kanajlayaw pi tlan wa nalitatsekgaw (Sal. 91:2).

Jehová tlan kamaklakaskin kinatalankan xlakata ni namakgxtakgaw akxni titaxtuyaw tuku tuwa (Kaʼakxilhti párrafos 18 asta 20)

19 Jehová kinkalikuentajtlawayan kxkachikin chu likgalhtawakga nema kinkamaxkiyan, anta liwana kinkawaniyan tuku kilitlawatkan. Umakgolh tastakyaw lu kinkamakgtayakgoyan kkinkilhtamakujkan. Kakilhtamaku tlakg lhuwa kgotkgo, talakgxtumiputunkgo, chu lakgatikgo pornografía, pero Jehová makglhuwa kinkamaxkiyan tastakyaw xlakata ni nakinkaliʼakgskgawikanan uma. Akgtum liʼakxilhtit, la chatum Tlat, Jehová kinkawaninitan ni kakatalaliw tiku ni xlilat nakatalalinaw chu katekgsaw kredes sociales (1 Cor. 15:33). *

20. ¿La kinkapulalinkanan chu kinkakuentajtlawakanan kcongregación?

20 ¿La tlan nalimasiyayaw pi wa “Jehová kinkamasiyaniman”? Akxni liwana kgalhakgaxmataw xlimapakgsin (Is. 54:13). Anta congregación tlan natamakgtayayaw, kinkapulalinkanan xlakata lakgkgolotsin tiku ni makgxtakgkgo Dios kinkakuentajtlawakgoyan chu kinkalistakyawakgoyan Biblia (Gál. 6:1). Jehová “kinkamaxkiyan lakchixkuwin” xlakata nakinkalikuentajtlawayan (Efes. 4:7, 8). ¿Tuku kilitlawatkan? Komo natlawayaw tuku nakinkawanikanan Dios nakinkasikulunatlawayan (Heb. 13:17).

21. 1) ¿Tuku lakpuwanitaw natlawayaw? 2) ¿Tuku naʼakxilhaw kʼartículo nema aku mima?

21 Kamastaw talakaskin pi espíritu santo chu xtastakyaw kinTlatkan xalak akgapun kakinkapulalin. Kalilakapastakwi xKgawasa Jesucristo, liʼakxilhtit nema tlakg stalaniputunaw. Kgalhakgaxmatnalh asta maski makgnika chu Jehová lu sikulunatlawalh (Filip. 2:5-11). Nachuna nakinkamaxkiyan komo xliputum kinakujkan nalipawanaw (Prov. 3:5, 6). Kalakapastakwi pi Jehová lhuwa tuku masta chu Kuentajtlawanan. ¡Lu lipaxuwayaw skujniyaw xlakata uma lanka talakgalhaman! Pero ¿tuku xlakata tlan wanaw pi wa tlakg xatlan kiʼAmigokan? Tlakg napaxkiyaw akxni naʼakxilhaw xtakgalhtin uma takgalhskinin kʼartículo nema aku mima.

^ par. 19 Tlakg natekgsa tastakyaw kʼartículos: «Internet: cómo usar la red sin caer en ella», xla La Atalaya 15 xla agosto kata 2011, páginas 3 asta 5, nachuna «¡Ni kakinkaʼakgskgawin Akgskgawini!» chu «Ni katamastaniw xliʼakgsiyat Satanás», Makatsinina 15 xla agosto kata 2012, páginas 20 asta 29.