Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  2016, núm. 2

¡Nalakgmaxtuyan komo kuenta natlawaya tamakatsin!

¡Nalakgmaxtuyan komo kuenta natlawaya tamakatsin!

TACHIKILH tiyat kSimeulue 26 xla diciembre kata 2004, chu 9,1 xlitliwakga xwanit kʼisla knoreste xalak Sumatra (Indonesia). Putum tiku xyakgo kxkilhtun akxilhkgolh kpupunu makgat xʼamacha. Kaj lakapala, putum tsukukgolh tsalakgo kkasipijnin chu pixlanka xwankgo: «Smong! Smong!», anta chuna limapakuwikan «tsunami». Kaj 30 minutos lakgtliwakga takgayawana chinkgolh xkilhtun, masputukgolh lhuwa chiki chu laktsu kachikin.

Isla Simeulue wa xapulana kachikin nema masputuka akxni milh tsunami. Kaj kgalhtujun nikgolh xliputum 78,000 latamanin. ¿Tuku xlakata kaj tsinu? * Tiku xalak isla xwankgo: «Komo natachiki tiyat chu naʼanacha pupunu, kakgosnanti kkasipijnin xlakata pupunu lakapala nataspitpara». Xlakata tuku xtitaxtukgonit, xalak Simeulue lakapala katsikgo pi akxni talakgpali pupunu namin tsunami. Kgaxmatkan tamakatsinin lakgmaxtunan.

Biblia lichuwinan pi talakatsuwima tuku namasputunan, «ntlanka takatsanajwat, wa ntu ni ukxni analh xtachuna asta akxni kxkilhtsukut katuxawat asta chu, asta niukxni katiʼanalh» (Mateo 24:21). Ni katisputli putum katiyatni kaj xlakata latamanin ni kuenta tlawakgo o wi tuku namasputunan, xlakata Dios lakaskin pi katiyatni putum kilhtamaku katawi (Eclesiastés 1:4). Wata Dios “nakamalakgsputu wanti lakglakgalhikgo katuxawat”. Nakamasputukan putum tuku nitlan chu tapatin (Apocalipsis [Revelación] 11:18; Proverbios 2:22). ¡Lanka tasikulunalin nawan!

Uma nixtachuna la tsunamis, akxni tachiki tiyat o akxni pankga akgtum volcán xlakata ni katinikgolh latamanin tiku nitu tlawakgonit. Biblia wan pi «Dios, tapaxkit» chu xtukuwani wa Jehová, wan pi «tiku xa’akgstitum xlakan nawan katiyatni, chu putum kilhtamaku nalatamakgo anta» (1 Juan 4:8; Salmo 37:29). Pero ¿la tlan nalakgtaxtuya kʼuma lanka takatsanajwat chu nalipaxuwaya tasikulunalin nema nalimin? Kuenta natlawaya tamakatsin.

KUENTA KATLAWA TUKU TALAKGPALIMA

Akinin nila nawanaw tukuya kilhtamaku nachin xlisputni tuku nitlan chu tapatin, xlakata Jesús wa: «Wa mpi akxni yama nkilhtamaku nchuna nalay, chu xatu hora nawan tini katsiy, asta ni mpala wa ángeles xala kʼakgapun, chu na ni mpala wa xaKam, wampi xman wa nkinTlat». Pero, Jesús kinkawaniyan pi “skgalalh katawilaw” (Mateo 24:36; 25:13). ¿Tuku xlakata? Biblia kinkawaniyan la xʼama tawila kakilhtamaku akxni Dios xʼamaja limin lisputni. Chuna la akxni lakapala talakgpalilh pupunu katsikgolh tiku xwilakgo kSimeulue pi xʼama min tsunami, chuna la lakapala talakgpali tuku lama kkakilhtamaku wa tuku kinkamasiyaniyan pi lakatsu wi lisputni. Krecuadros xla umakgolh páginas tasiya  tuku lu xlakaskinka talakgpalima nema kBiblia xlichuwinanit.

Xlikana, makgapitsi tuku nala o chuna la natawila, pulakatunu latilhanit makgasa. Pero Jesús wa pi akxni naʼakxilhaw «nalay xlipaks yuma nkatuwaj», xkatsiw pi talakatsuwanita lisputni (Mateo 24:33). Miʼakstu kakgalhskinka tukuya kilhtamaku nala putum tuku lichuwinalh Jesús, 1) akxni chuna la xlikalanka katiyatni, 2) akxnitiya kilhtamaku nalakgo chu 3) tlakg nitlan tawilatilhanit. Liwana tasiya pi lamaw kʼuma kilhtamaku.

LIMASIYA XTAPAXKIT DIOS

Chatum tiku presidente xwanit xalak Estados Unidos wa: «Tuku pulana makatsininan [...] lakgmaxtu latamat». Akxni xtitaxtunit tsunami kata 2004, wilika tuku xmakatsininalh kʼuma kachikinin xlakata nialhti xnilh komo xlapa tuku nitlan. Dios na kinkamaxkinitan tuku nakinkalimakatsiniyan akxni nina min lisputni. Biblia wan: «Chu umakgolh xalakwan tamakatsinin xla Tamapakgsin natalichuwinan xliputum katiyatni xlakata natamakatsininan kputum laklanka kachikinin, chu alistalh namin lisputni» (Mateo 24:14TNM).

Kaj katata, xtatayananin Jehová liwaka 1,900 millones horas lichuwinankgolh xalakwan xalaksasti k240 kachikinin kliwaka 700 tachuwin. Uma taskujut liwana limasiya pi lakatsuwanita lisputni. Xlakata kapaxkikgo xtalatamankan, xtatayananin Jehová lu kamakatsinikgo amakgapitsin akxni Dios nakaputsanani nema lu lakapala talakatsuwima (Mateo 22:39). Xlakata likgalhtawakgapat uma tamakatsinin limasiya pi Jehová paxkiyan. Kalakapastakti pi «[Dios] lakaskin pi nipara chatum kalakgsputli; wata, lakaskin pi putum kamakgxtakgkgolh tuku nitlan tlawamakgo» (2 Pedro  3:9TNM). ¿Napaxtikatsiniya xtapaxkit Dios chu kuenta natlawaya uma tamakatsinin?

¡KATSALA XLAKATA NITU NAʼAKGSPULAYAN!

Kakalakapastakwi pi tiku xwilakgolh kxkilhtun pupunu Simeulue tsalakgolh kkasipijni akxni akxilhkgolh pi xtaspitmapa pupunu; xlakan ni kgalhkgalhikgolh asta akxni xtaspitli. Lakgtaxtukgolh xlakata tunkun wi tuku tlawakgolh. Xlakata tlan nalakgtaxtuya klanka takatsanajwa, xtachuna la kaj natsalaya kkasipijni, akxni wijku kilhtamaku. ¿La natlawayaw? Palakachuwina Isaías matsokgnika tamakatsin nema talichuwinama asta «kxa’awatiya kilhtamaku», kilhtamaku nema akinin lamaw. Wan: «Katantit chu katakxtuw kxsipi Jehová, [...] xla nakinkamasiyaniyan xtiji, chu liwana natlawanaw klaktsu xtiji» (Isaías 2:2, 3).

Akxni ankan asta kxakgspun sipi liwana akxilhkan chu tlan natamakgtayaya anta. Nachuna, lakgapaskan Dios xpalakata Biblia kamakgtayama la uku lhuwa millón latamanin xlikalanka katiyatni xlakata lu tlan natawila xlatamatkan (2 Timoteo 3:16, 17). Akxni chuna tlawakgo, tsukukgo “tlawankgo klaktsu xtiji” Dios chu tlan kaʼakxilha chu kakuentajtlawa.

¿Namakgamakglhtinana uma xtamakatsinin Dios chu nakgalhiya xtamakgtay uma xakatuwa kilhtamaku? Kkawaniyan pi liwana kaʼakxilhti tuku wan Biblia krecuadro xla uma artículo nema lichuwinan putum tuku limasiya pi lamaw «kxa’awatiya kilhtamaku» (2 Timoteo 3:1). Xtatayananin Jehová xalak minkachikin xatapaxuwan namakgtayakgoyan liwana nakatsiya xlakata Biblia chu la nalilatapaya. O wix tlan natekgsa xtakgalhtin mintakgalhskinin ksitio www.jw.org.

^ párr. 3 Tsunami xla kata 2004, kamasputulh 220,000 latamanin, wa tuku na tlakg masputunanit xliputum katiyatni.