Ankan kxpulakni

Ankan kliputsan

Xtatayananin Jehová

Laksakkan tachuwin totonaco

1 Makgtayanan ni nakgalhiyaw taʼakglhuwit

1 Makgtayanan ni nakgalhiyaw taʼakglhuwit

Biblia wan pi xtastakyaw wa Dios matsokgninalh chu tlan «nalimakgalhtawakganankan, chu nalimakgatakgsninankan, chu nalistakyawanankan» (2 Timoteo 3:​16). ¿Xlikana uma? Kalichuwinaw la xliskgalala Biblia kamakgtayanit makgapitsi latamanin ni tlakg nastaka xalaktuwa xtaʼakglhuwitkan.

MALAKATSALIKAN LA WAKAN KUCHU

Diana, nema lichuwinaw kʼartículo nema titaxtulh, xmakgkatsi pi xtalakgaputsit xtlawama pi tlakg lhuwa xwalh kuchu. Biblia ni wan pi nipara tsinu nawayaw kuchu, pero liwana wan: «Ni katawila kxlakgstipan tiku wakgo lhuwa kuchu» (Proverbios 23:​20). Akxni lhuwa wakan kuchu tlawa pi nachipayan xasnun tajatat, nialh tlan katalalinkan amakgapitsin chu akgatunu kata, lhuwa millón tiku sokg nikgo xlakata kuchu. Komo latamanin kstalanikgolh xalakwan xtastakyaw Biblia ni xkgalhikgolh umakgolh taʼakglhuwit.

Diana chuna tlawalh, chu xla wan la uku: «Kakxilhli pi kuchu ni xmapanuma kintalakgaputsit. Ktlawalh tuku wan Filipenses 4:​6, 7, niku wan: “Nitu xatu ntu ntililakgaputsayatit; chi wampi wata paks kamasiyutit kxlakatin Dios wa ntu lakaskinatit”. Akgatunu tsisni akxni xakmakgkatsi pi nila xtachokgo kintalakapastakni, xaktlawani oración Jehová chu xakwani tuku xakmakgkatsima: kintasitsi, kintakatsanajwat, nialh xakkatsi tuku naktlawa... chu xakskini Jehová pi xkimakgtayalh naktekgsa la tlakg tlan nakmakgkatsi. Lichali, xakliskuja xlakata nialh xaklakapastakli tuku xakmakgkatsima. Xlakata xaktlawani oración Jehová xkimakgtaya tlakg naklilakpuwan tuku xakkgalhi chu ni wa tuku ni xakkgalhi. Klakkaxwililh pi nialh xakama wapara kuchu xlakata takaksni nema xaktekgsnit lu xtapalh xwanit, chu ni xakmakgatsankgaputun».

 TALAKGXTUMIT NEMA NI XLITATLAWAT

Talakgxtumit nema ni xlitatlawat wa tuku tlakg limin talakgaputsit chu talipuwan. Pero xtastakyaw Biblia tlan nakinkamakgtayayan ni nakgalhiyaw umakgolh taʼakglhuwit chu kinkawaniyan makgapitsi tuku tlawa pi natlawakan talakgxtumit nema ni xlitatlawat, akgtum liʼakxilhtit, akxni limasiyanikan achatum pi lakgatikan chu pornografía. Chatum kgawasa tiku wanikan Samuel wan: «Lu ni tuwa xwanit wi tiku naklimasiyani pi xaklakgati. Xmin kilhtamaku nipara tsinu xaklakgati chatum tsumat, pero komo xakakxilha pi xkilakgati, uma xtlawa pi kaj naklimasiyani pi xaklakgati, maski ni chuna». Samuel makglhuwa limawakaka pi xkalakgati laktsuman maski ni chuna xlakpuwan, wa xlakata alistalh tlakg chuna tsukulh tlawa, pero xtalakapastakni xwani pi nitlan tuku xtlawama. Samuel wan la uku: «Uma lu nitlan kitaxtu, xlakata uma tlawa kaj miʼakstu napaxkikana».

Samuel likgalhtawakgalh akgtum artículo xla kamanan ksitio jw.org. Chu lilakpuwa Proverbios 20:​11, niku wan: «Chuna la likatsi kgawasa litasiya komo tuku tlawa skulunku chu akgstitum». ¿La makgtayalh? Samuel akxilhli pi nakalimasiyaniya amakgapitsin pi kalakgatiya, ni xaskulunku chu ni xaʼakgstitum. Xla wampara: «Kkatsinilh pi tiku chuna tlawa, nitlan chixku o puskat katilitaxtulh akxni natamakgaxtokga. Klilakpuwa la xʼama makgkatsi puskat tiku xaktatamakgaxtokgli komo xkiʼakxilhli pi klimasiyanima atanu puskat pi klakgati. Uma kimakgtayalh nakakxilha pi tuku xaktlawama lu nitlan tuku tlawaninan. Maski ni tuwa wi tiku nalimasiyaniya pi lakgatiya, ni wamputun pi tlan chuna natlawaya». Samuel lakgpalilh xtayat chu uma makgtayalh ni natlawa talakgxtumit nema ni xlitatlawat.

Tuku xtitaxtuma Antonio, tlakg tuwa xwanit: xlismaninit xakxilha pornografía. Maski lu xpaxki xpuskat, tuwa xmakgkatsi namakgxtakga uma talisma­nin. Antonio wan pi lu makgtayalh 1 Pedro 5:8. Anta wan: «Wa ntu lakatitum nalakapastakatit, chu na skgalalh natawilayatit, sampi wa akgskgawini, xtachuna xatsinksni lapanit, lama kmintuntamaknikan [o kalitastiliman], putsama wa nti nachipay, naway». Antonio wan: «Pornografía kinkalistiliyan, chu uma tlan natanu kkintalakapastaknikan. Uma texto xlikana kimakgtayalh naklilakpuwan niku xminacha uma taputsan. Na kkatsinilh lakapala naklakapastaka pi putum pornografía, xla Akgskgawini. La uku kkatsi pi kajwatiya Jehová tlan nakimakgtaya nakkgalhi lakatitum talakapastakni chu skgalalh naktawila, xlakata nakkuentajtlawa kintalakapastakni, kinaku chu kintamakgaxtokgat». Antonio makglhtinalh tamakgtay nema xmaklakaskin, chu makgxtakgli uma nixatlan talismanin. Chu uma makgtayanit ni nakgalhi tlakg laktuwa taʼakglhuwit.

Xlikana pi Biblia masta lakwan tastakyaw nema tlan nakinkamakgtayayan ni nakgalhiyaw laktuwa taʼakglhuwit. Pero ¿tuku tlan natlawayaw komo taʼakglhuwit tlakg nastaka chu nila lakkaxtlawayaw? Kaʼakxilhwi la xTachuwin Dios tlan nakinkamakgtayayan nalakkaxtlawayaw.

Xatlan xtastakyaw Biblia tlan nakinkamakgtayayan ni nakgalhiyaw makgapitsi taʼakglhuwit