Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Chatum Dios tiku kgalhi lhuwa litliwakga pero xaʼakgatekgsnina

Chatum Dios tiku kgalhi lhuwa litliwakga pero xaʼakgatekgsnina

«Porque [Jehová] katsi tuku litsukunitaw y [...], katsi xlakata akin pokgxni» (SAL. 103:14, Salmos Ixtatlincan ti Talipawan Dios, SXP).

TAKILHTLIN: sjj 30, sjj 10

1, 2. 1) ¿Tuku litalakgpali la likatsikgo latamanin chuna la Jehová kalikatsini latamanin? 2) ¿Tuku nalichuwinanaw k’uma artículo?

LHUWA latamanin tiku kgalhikgo litliwakga, xmalanakan litaxtuputunkgo amakgapitsin o asta kamakgapatinankgo (Mat. 20:25; Ecl. 8:9). ¡Pero Jehová lu tanu la likatsi! Maski xla chatum Dios tiku kgalhi putum litliwakga, ka’akgatekgsni putum latamanin maski makglakgalhinanin. Lu tlan kinkalikatsiniyan, kuenta tlawa tuku makgkatsiyaw chu tuku lilakgaputsayaw. Nachuna, nikxni kinkaskiniyan tuku nila tlawayaw, «katsi xlakata akin pokgxni» (Sal. 103:13, 14SXP).

2 Anta kBiblia makglhuwa lichuwinan la Jehová kalimasiyaninit xlakskujnin pi kaʼakgatekgsni. Ka’akxilhwi pulaktutu. Pulana, akxni makgtayalh Samuel namaxki akgtum tamakatsinin xapuxku sacerdote Elí xlakata tuku x’ama akgspula. Xlipulaktiy, akxni limasiyanilh Moisés pi ni lakapala ksitsi xlakata xla ni xtlawaputun tuku xwanimaka, akxni xwanima pi xpulalilh kachikin Israel. Chu xlipulaktutu, akxni kalakgmaxtulh israelitas k’Egipto.  Akxni nalilakpuwanaw umakgolh li’akxilhtit, kalilakpuwaw tuku kinkamasiyaniyan xlakata Jehová chu tuku tlan nakatsiniyaw.

JEHOVÁ LIWANA AKGATEKGSNILH CHATUM AKTSU KGAWASA

3. 1) ¿Tuku titaxtulh Samuel akgtum tsisni? (Kaʼakxilhti xapulana dibujo). 2) ¿Tuku takgalhskinin tlan nakinkatlawanikanan?

3 Samuel tsukulh skujnani Jehová anta ktabernáculo akxni kajku aktsu kgawasa xwanit (1 Sam. 3:1). Akgtum tsisni, akxni alh lhtata, wi tuku lalh (kalikgalhtawakga 1 Samuel 3:2-10). * Kgaxmatli pi xmapakuwimaka chu lakpuwa pi wa sacerdote Elí tiku xmapakuwima. Xlakata xla ankgalhin xkgalhakgaxmatnan, lakapala alh chu wanilh: «Unu kwi xlakata kintasani». Elí wanilh pi xla nitu xtasanima. Chuna titaxtupa xlimakgtiy. Akxni Samuel alh xlimakgtutu, Elí katsilh pi wa Dios tiku kxakgatlima uma aktsu kgawasa. Wa xlakata wanilh la nakgalhtinan chu Samuel chuna tlawalh. ¿Tuku xlakata Jehová ni tunkun wanilh Samuel pi wa kxakgatlima? Biblia ni lichuwinan. Pero tuku lalh limasiya pi Jehová x’akgatekgsni Samuel. ¿Tuku xlakata chuna wanaw?

4, 5. 1) ¿Tuku tlawalh Samuel akxni Jehová wanilh pi xmaxkilh akgtum tamakatsinin Elí? 2) ¿Tuku kinkamasiyaniyan xpalakata Jehová uma tuku lalh?

4 (Kalikgalhtawakga 1 Samuel 3:11-18). Anta kxLimapakgsin Jehová xwan pi laktsu kamanan xkalimasiyanikgolh kakni tiku tlakg xkgalhikgoya kata, liwaka tiku xkgalhi limapakgsin o tiku xpulalin kachikin (Éx. 22:28; Lev. 19:32). Wa xlakata, tuwa nalilakpuwanaw pi Samuel xlakgalh Elí xlakata namaxki tamakatsinin xlakata tuku x’ama akgspula. Biblia lichuwinan pi xpekuan xlakata na’an wani uma tamakatsinin Elí. Pero Dios liwana makatsinilh Elí pi wa tiku xtasanima Samuel. Wa xlakata Elí wanilh Samuel pi xwanilh putum tuku xwanikanit. Samuel kgalhakgaxmatnalh chu wanilh putum tuku xwanikanit.

5 Tuku wanilh Samuel ni kaks xmalakawanilh xlakata chatum xlakskujni Dios xmaxkinita akgtum tamakatsinin nema xtachuna (1 Sam. 2:27-36). Uma tuku lichuwinaw kinkamasiyaniyan pi Jehová lu skgalala chu kinka’akgatekgsniyan.

6. ¿Tuku katsiniyaw xlakata la Dios makgtayalh Samuel?

6 Tuku titaxtulh Samuel, nachuna kinkamasiyaniyan pi Jehová akgatekgsa tuku titaxtukgo kamanan chu tuku makgkatsikgo. ¿Wix chatum kgawasa tiku maxanana chu tuwa makgkatsiya nakalitachuwinana Dios tiku tlakg linkgoya kata o tuwa makgkatsiya nichuna nalikatsiya la mincompañeros xalak escuela? Liwana kakatsi pi Jehová makgtayaputunan, wa xlakata kamaxki talakaskin namakgtayayan chu kawani putum tuku makgkatsiya (Sal. 62:8). Kalilakpuwanti xli’akxilhtitkan kamanan tiku kalichuwinan Biblia chuna la xla Samuel chu kakatachuwinanti amakgapitsi natalan, tiku na watiya kata kgalhikgo chuna la wix chu tiku linkgoya kata, tiku chuna titaxtukgolh tuku titaxtupat. Max nalitachuwinankgoyan la Jehová kamakgtayalh chuna max la nikxni xlakpuwankgonit.

JEHOVÁ LIWANA AKGATEKGSNILH MOISÉS

7, 8. ¿La limasiyalh Jehová pi xlakaskinka xʼakxilha tuku Moisés xmakgkatsi?

7 Akxni Moisés xkgalhi 80 kata, Jehová lakgayawalh akgtum lu xatuwa taskujut: nakalakgmaxtu israelitas kʼEgipto. Xlakata Moisés xkuentajtlawana borrego xwanit kMadián liwaka 40 kata, uma taskujut nema maxkika max lu kaks lilakawa. Wa xlakata wanilh Jehová: «¿Tiku klitaxtu akit xlakata naklakgan  Faraón chu nakkamaxtu xkamanan Israel kʼEgipto?». Dios liwana wanilh: «Akit naktatawilayan» (Éx. 3:11, 12). Nachuna malaknunilh pi lakgkgolotsin xalak Israel xʼamakgo kgaxmatnikgo tuku xkawanilh. Maski chuna, Moisés kgalhtinalh: «Pero kalakpuwaw pi ni nakinkanajlanikgo chu ni nakgaxmatkgo tuku nakkawani» (Éx. 3:18; 4:1). Tuku xtlawama Moisés wa pi nitu xkgalhakgaxmatma tuku Dios xwanima. Pero Jehová ni kaj xman limasiyanilh pi ni lakapala sitsi, wata na maxkilh litliwakga xlakata natlawa milagros. Xlikana, Moisés wa tiku xapulana lataman tiku lichuwinan Biblia tiku maxkika uma litliwakga (Éx. 4:2-9, 21).

8 Pero maski maxkika uma litliwakga, Moisés chuntiya ni xlakaskin chu wanilh pi nila liwana xchuwinan. Jehová kgalhtilh: «Akit nakmakgtayayan akxni nachuwinana chu nakmasiyaniyan tuku nawana». ¿Xlikana Moisés xʼama tlawa tuku wanika akxni wanikgoka umakgolh tachuwin? Ni chuna, xlakata tasaskinilh Dios pi xmalakgachalh atanu lataman. Wa xlakata Jehová sitsilh chu xlilat tuku lisitsilh. Pero akgatekgsnilh chu wanilh pi Aarón xʼama makgtaya (Éx. 4:10-16).

9. ¿La makgtayalh Moisés xlakata Jehová limasiyanilh pi ni lakapala sitsi chu xlakata akgatekgsnilh?

9 ¿Tuku kinkamasiyaniyan xlakata Jehová uma tuku lalh? Xlakata Dios kgalhi lhuwa litliwakga, tlan xmaklakaskilh xlitliwakga xlakata namakgapekuan Moisés chu fuerza xtlawalh pi xkgalhakgaxmatnilh. Pero ni chuna tlawalh, wata ni lakapala sitsilh chu tlan likatsinilh, chu wi tuku tlawalh xlakata tlan namamakgkatsini uma xlakskujni. ¿Tlan kitaxtulh xlakata limasiyanilh taʼakgatekgsni? Xlikana pi chuna, xlakata Moisés lu tlan pulalina litaxtulh chu liskujli xlakata nachuna nakalikatsini amakgapitsin chuna la likatsinilh Jehová (Núm. 12:3).

¿Stalaniyaw xliʼakxilhtit Jehová xlakata la kalikatsiniyaw amakgapitsin? (Kaʼakxilhti párrafo 10).

10. ¿La kinkamakgtayayan namakglhkatiyaw Jehová chu nakaʼakgatekgsniyaw amakgapitsin?

10 Uma tuku lichuwinaw wi atanu tuku xlakaskinka kinkamasiyaniyan. Komo akinin tamakgaxtokgnitawa, o natlatni akinin  o lakgkgolotsin xalak congregación, kgalhiyaw limapakgsin. Komo chuna, lu xlakaskinka pi nachuna nakaʼakgatekgsniyaw, tlan nakalikatsiniyaw chu ni lakapala nasitsiyaw chuna la Jehová (Col. 3:19-21; 1 Ped. 5:1-3). Komo naliskujaw xlakata nalikatsiyaw chuna la Jehová chu xaPuxku Moisés, Jesucristo, amakgapitsin ni tuwa katimakgkatsikgolh nakinkatachuwinankgoyan chu tlan nakamakgpuwantiniyaw (Mat. 11:28, 29). Nachuna akgtum tlan liʼakxilhtit nalitaxtuyaw (Heb. 13:7).

CHATUM LAKGMAXTUNA TIKU TLAN TUKU TLAWA PERO KINKAʼAKGATEKGSNIYAN

11, 12. Akxni Jehová katamakxtulh israelitas kʼEgipto, ¿tuku tlawalh xlakata ni xpekuankgolh?

11 Akxni israelitas taxtukgolh kʼEgipto, kkata 1513 akxni nina xmin Jesús, max liwaka akgtutu millón xwankgonit. Xwilakgo lhuwa latamanin, tiku laktsu kamanan asta tiku xlinkgoya kata chu nachuna tiku max xtatatlakgo. Xlakata napulalinkan lhuwa latamanin, xtalakaskin nakaʼakgatekgsnikan. Chuna tlawalh Jehová akxni maklakaskilh Moisés. Xlakata uma, israelitas ni pekuankgolh akxni taxtukgocha kʼama kachikin nema kajwatiya xlakgapaskgo (Sal. 78:52, 53).

12 ¿Tuku tlawalh Jehová xlakata ni xpekuankgolh? Tuku tlawalh akxni kamaxtulh kʼEgipto wa pi liwana kamamakxtumikgolh chuna la komo xʼamakgolh talatlawanankgo (Éx. 13:18). Xlakata liwana makxtum taxtukgolh, uma kamakgtayalh nakatsikgo pi Jehová xkapulalima. Nachuna Jehová tlawalh pi xkatsikgolh pi anta xkatawi akxni maklakaskilh akgtum «puklhni» kakuwani chu «lhkuyat» katsisni (Sal. 78:14SXP). Xtachuna la komo xkawanima: «Ni kapekuantit. Unu kwi xlakata nakkapulalinan chu nakkakuentajtlawayan». Ni makgas xʼamakgo katsikgo komo xlikana xkakuentajtlawamaka.

¿La kalimasiyanilh Jehová taʼakgatekgsni israelitas kxaSpinini pupunu? (Kaʼakxilhti párrafo 13).

13, 14. 1) ¿Tuku tlawalh Jehová xpalakatakan israelitas anta kxaSpinini pupunu? 2) ¿La kalimasiyanilh Jehová egipcios pi xla kgalhi lhuwa litliwakga?

13 (Kalikgalhtawakga Éxodo 14:19-22). Kalilakpuwaw pi na anta wilaw, xlakgstipankan ksoldados faraón chu kxaSpinini pupunu. Chu Dios lakapala wi tuku tlawa. Puklhni an kxchakgenkan anta niku wilakgolh egipcios chu kamalakgachokgo. Xlakan kapukswa tawilakgo, pero anta niku akinin wilaw anan xkgakganat. Chu akxilhaw Moisés stonkga xmakan anta niku wi pupunu chu akgtum tliwakga un mapitsi pupunu asta kxaʼakilhtutu. Chu akinin makxtum chu liwana titaxtuyaw, kifamiliajkan chu kiʼanimaleskan tsukukgo tlawankgo kxitat pupunu chu nachuna amakgapitsin latamanin. Pero akxilhaw pi: nitu wi putlun chu ni kaxlitwa, wata kaskakni chu tlan lakapala tlawankan. Asta tiku ni lakapala tlawankgo tlan chankgo kxaʼakilhtutu.

14 (Kalikgalhtawakga Éxodo 14:23, 26-30). Pero faraón tiku xatlankajwa chu xatsakat, nachuna titaxtukgo kxitat pupunu xlakata nakinkastalaniyan. Wa xlakata Moisés stonkgpara xmakan anta niku wi pupunu. Chu lata xtapitsinit chuchut tsukulh talakxtumipara chu laklanka takgayawana tawila. Faraón chu ksoldados nila xʼamakgo lakgtaxtukgo (Éx. 15:8-10).

15. ¿Tuku katsiniya wix akxni lilakpuwana uma tuku lalh?

15 Uma tuku lalh kinkamasiyaniyan pi Jehová liwana lakkaxwili tuku tlawa, uma kinkamakgtayayan ni lu napekuanaw (1 Cor. 14:33). Nachuna kinkamasiyaniyan pi xla xapaxkina mapuchwayanina tiku liwana kinkakuentajtlawayan. Jehová kinkalakgmaxtuyan chu kinkakuentajtlawayan xlakata tiku nitlan tuku kinkatlawaniputunkgoyan. Xlakata katsiyaw uma, lu tlan makgkatsiyaw xlakata lakatsu wilanaw  la namasputukan uma kakilhtamaku (Prov. 1:33).

16. ¿La kinkamakgtayayan liwana nakatsiyaw la Jehová kalakgmaxtulh israelitas?

16 La uku Jehová nachuna kakuentajtlawa xlakskujnin chu nachuna kuentajtlawa xtakanajlakan. Chu chuntiya natlawa akxni nala lanka takatsanajwat, nema lakatsuwa wi (Rev. 7:9, 10). Wa xlakata, maski kamanan akinin o linawa kata, tatatlayaw o ni tatatlayaw, ni katipekuaw akxni natsuku lanka takatsanajwat. * Wata kalakapastakwi umakgolh xtachuwin Jesús: «Katalakayawatit, na ka’ukxilhtit nkatalhman, sampi wa mintalakgtaxtunkan, lakatsuwa wi nawan» (Luc. 21:28). Ni kapekuaw akxni nakinkatalatlawayan Gog, tiku litaxtukgo lhuwa kachikinin nema tlakg tliwakga nixawa faraón (Ezeq. 38:2, 14-16). ¿Tuku xlakata ni katipekuaw? Xlakata katsiyaw pi Jehová nikxni talakgpali. Xla chatum lakgmaxtuna nema xapaxkina chu nakinka’akgatekgsniyan (Is. 26:3, 20).

17. 1) ¿Tuku kilitlawatkan xlakata nalitamakgtayayaw liʼakxilhtit nema lichuwinan Biblia xlakata la Jehová kakuentajtlawa xkachikin chu tuku tlan nakitaxtu? 2) ¿Tuku nalichuwinan artículo nema aku mima?

17 K’uma artículo, kajwatiya pulaktutu akxilhnitaw la Jehová limasiyanit xtapaxkit chu pi ka’akgatekgsni xlakskujni, liwana kapulalin chu kalakgmaxtu xkachikin. Kalilakpuwaw putum uma. Akxni chuna natlawayaw, liwana ka’akxilhwi tuku kinkamasiyaniyan xpalakata xtayat Jehová. Chu uma natlawa pi xalakwan xtayat namatliwakglha kintakanajlakan chu tapaxkit nema kgalhiniyaw. Kʼartículo nema aku mima naʼakxilhaw la tlan namakglhkatiyaw xliʼakxilhtit chuna la nakaʼakgatekgsniyaw kifamiliajkan, congregación chu akxni lichuwinanaw Dios.

^ párr. 3 Chuna la wan historiador judío wanikan Josefo, ama kilhtamaku Samuel xkgalhi akgkutiy kata.

^ párr. 16 Max makgapitsi latamanin tiku nalakgtaxtukgo k’Armagedón max kgalhikgo akgtum tajatat. Akxni Jesús xlama kKatiyatni, kamapaksalh putum tiku xkgalhikgo akgtum tajatat (Mat. 9:35). Uma kinkamalakpuwaniyan tuku natlawa xpalakatakan tiku nalakgtaxtukgo k’Armagedón chu ni wa tiku nalakastakwanankgo. ¿Tuku xlakata? Xlakata xlakan nialh katikgalhikgolh tajatat.