Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Octubre kata 2016

Kalimatliwakglhwi kintakanajlakan tuku kgalhkgalhimaw

Kalimatliwakglhwi kintakanajlakan tuku kgalhkgalhimaw

«Lapi xlikana lipawanaw Dios, pus tanks kilikanajlatkan pi namakglhtinanaw wantu kgalhkgalhimaw» (HEB. 11:1, Hua Xasasti Talaccaxlan, TXS [1999]).

TAKILHTLIN: 54, 55

1, 2. 1) ¿Tuku litalakgpali tuku kskujnin Dios kgalhkgalhimaw chu tuku kgalhkgalhimakgo latamanin? 2) ¿Tuku naʼakxilhaw kʼuma artículo?

JEHOVÁ kinkamalaknuniyan tuku lu tlan. Akgtum liʼakxilhtit, kinkawaniyan pi namasantujli xtukuwani chu natlawa pi kakgantaxtulh xtalakaskin kʼakgapun chu kKatiyatni (Mat. 6:9, 10). Wa uma tuku tlakg xlakaskinka nema kgalhkgalhimaw. Jehová na kinkamalaknuniyan latamat nema nikxni sputa, kʼakgapun o kKatiyatni (Juan 10:16; 2 Ped. 3:13). Nachuna, kskujnin Dios akxilhputunaw la nakinkapulalinan chu nakinkamakgtayayan kʼuma xaʼawatiya kilhtamaku.

2 Biblia wan pi takanajla kilhchanima «xlikana lipawanaw» pi namakglhtinanaw tuku kgalhkgalhimaw (kaʼakxilhti recuadro «¿Tuku kilhchanima?»). Uma wamputun pi tiku kgalhiyaw takanajla liwana katsiyaw pi tuku Jehová wanit, namakgantaxti (Heb. 11:1TXS [1999]). La uku lhuwa latamanin wi tuku kgalhkgalhimakgo o lakaskinkgo, pero ni katsikgo komo nakgalhikgo. Akgtum liʼakxilhtit, max wi tiku tlajaputun lotería. Pero  ni liwana katsi komo natlaja. Kʼuma artículo naʼakxilhaw la nalimatliwakglhaw kintakanajlakan tuku Dios malaknunit. Na nalichuwinanaw la kinkamakgtayayan komo tliwakga nakgalhiyaw kintakanajlakan.

3. ¿Tuku xlakata kanajlayaw pi nakgantaxtu tuku Dios wanit?

3 Niti talakachin xtakanajla. Komo kgalhiputunaw takanajla, kilimastatkan talakaskin pi xʼespíritu Dios kakinkapulalin (Gál. 5:22). Espíritu santo tlan nakinkamakgtayayan nalakgapasaw Jehová. Akxni akgatekgsaw pi wa tiku tlakg skgalala chu kgalhi xliputum litliwakga, lipawanaw pi tlan namakgantaxti putum tuku malaknu. Jehová liwana katsi pi namakgantaxti tuku malaknunit chu lichuwinan xtachuna la komo makgantaxtinita. Wa xlakata wan: «Wa yuma, tatlawanita» (kalikgalhtawakga Revelación o Apocalipsis 21:3-6). Jehová chatum Dios tiku ankgalhin makgantaxti tuku wan. Wa xlakata kanajlayaw putum tuku kinkawaniyan xlakata tuku aku mima (Deut. 7:9).

KSKUJNIN DIOS XALA MAKGASA TIKU TLIWAKGA XKGALHIKGO XTAKANAJLAKAN

4. ¿Tuku xkanajlakgo kskujnin Dios?

4 Capítulo 11 xla Hebreos kalichuwinan 16 lakchixkuwin chu lakpuskatin xala makgasa tiku lu xkanajlanikgo tuku Jehová xmalaknunit. Na kalichuwinan lhuwa atanu kskujnin Jehová tiku makgapaxuwakgolh xlakata «xkgalhikgo ntakanajla» (Heb. 11:39). Putum umakgolh latamanin xkgalhkgalhimakgo «xkam puskat» nema Jehová xmalaknunit. Xkatsikgo pi uma kam xʼama kamalakgsputu putum xtalamakgasitsin Dios chu xʼama tlawa pi Katiyatni akgtum paraíso xwampa (Gén. 3:15). Umakgolh kskujnin Dios lu xkanajlakgo pi Jehová xʼama kamaxkipara latamat komo xnikgolh. Xlikana, ni xkgalhkgalhimakgo pi xkamalakastakwanika kʼakgapun, xlakata Jesús nina xmasta uma takgalhkgalhin (Gál. 3:16). Wata xkgalhkgalhimakgo nalatamakgo putum kilhtamaku kKatiyatni akxni akgtum stlan paraíso xwa (Sal. 37:11; Is. 26:19; Os. 13:14).

5, 6. 1) ¿Tuku xkgalhkgalhimakgo Abrahán chu xfamilia? 2) ¿Tuku tlawakgolh xlakata tliwakga xkgalhikgolh xtakanajlakan? (Kaʼakxilhti xapulana dibujo).

5 Hebreos 11:13 kalichuwinan kskujnin Jehová tiku ni makgatsankgananikgolh: «Xkanajlakgo asta tinikgolh, maski ni xʼamakgamakglhtinankgoy ntamalaknun, wampi kaj xlimakgat ntiliukxilhkgolh, na lipaxuwakgolh mpi nakgalhikgoy». Xlakan xkgalhkgalhimakgo xasasti kakilhtamaku chu xlakpuwankgo pi anta xlamakgolha. Chatum tiku chuna xlakpuwan wa Abrahán. Jesús wa pi Abrahán «tipaxuwalh mpi naukxilha» ama kilhtamaku (Juan 8:56). Sara, Isaac, Jacob chu lhuwa amakgapitsin xkgalhkgalhimakgo kilhtamaku akxni xTamapakgsin Dios xmapakgsinalh kKatiyatni (Heb. 11:8-11).

6 ¿Tuku tlawakgolh Abrahán chu xfamilia xlakata tliwakga nakgalhikgo xtakanajlakan? Chuntiya katsinikgolh xlakata Jehová. Lakgachunin ángeles kamasiyanikgolh, wi tuku Dios kamaʼakxilhnilh o kamamanixnilh. Max na katsinikgolh xpalakata tiku tlakg laklankata xwankgonit o katsinikgolh xlakata tuku xtatsokgnit. Abrahán chu xfamilia putum kilhtamaku lakapastakkgolh xtamalaknun Dios. Xlakan lu xlakgatikgo xlilakpuwankgo. Wa xlakata nikxni lakpuwankgolh pi Jehová ni xʼama makgantaxti tuku xwanit. Uma kamakgtayalh ni namakgxtakgkgo Dios maski titaxtukgolh taʼakglhuwit o kaputsastalanika.

7. ¿Tuku kinkamaxkinitan Jehová xlakata nakinkamakgtayayan natatliwakglha kintakanajlakan chu tuku kilitlawatkan?

 7 ¿Tuku nakinkamakgtayayan tliwakga nakgalhiyaw kintakanajlakan? Jehová kinkamaxkinitan Biblia. Anta kinkamasiyaniyan tuku wanit natlawa chu tuku kilitlawatkan xlakata napaxuwayaw. Wa xlakata kilikgalhtawakgatkan Biblia chali chali chu natlawayaw xtastakyaw (Sal. 1:1-3; kalikgalhtawakga Hechos 17:11). Jehová limaklakaskin «skujni xalipaw chu xaskgalala» xlakata nakinkamaxkiyan taway kilhtamaku akxni maklakaskinaw (Mat. 24:45). Chuna la tlawakgolh kskujnin Dios xala makgasa, chali chali nalikgalhtawakgayaw xtamalaknun Dios chu liwana nalilakpuwanaw. Uma nakinkamakgtayayan ni namakgxtakgaw chu chuntiya nakgalhkgalhiyaw akxni xTamapakgsin namapakgsinan kKatiyatni.

Kintakanajlakan tatliwakglha akxni Jehová kgalhti kioracioneskan

8. ¿La kinkamakgtayayan oración tliwakga nakgalhiyaw kintakanajlakan?

8 ¿Tuku atanu na kamakgtayalh kskujnin Dios xala makgasa namatliwakglhkgo xtakanajlakan? Kskinikgo Jehová xtamakgtay chu xʼakxilhkgo pi xla xkakgalhti (Neh. 1:4, 11; Sal. 34:4, 15, 17; Dan. 9:19-21). Nachuna, kintakanajlakan tatliwakglha akxni skiniyaw xtamakgtay Jehová chu akxilhaw pi kinkakgaxmatniyan chu kinkamaxkiyan tuku maklakaskinaw akxni maklakaskimaw (kalikgalhtawakga 1 Juan 5:14, 15). Chuntiya kaskiniw Jehová xʼespíritu santo xlakata tlakg nakgalhiyaw takanajla (Luc. 11:9, 13).

9. Kalichuwinanti makgapitsi tuku tlan naskinaw kiʼoracioneskan.

9 Akxni tlawaniyaw oración Jehová, ni kajwatiya kiliskinitkan tuku maklakaskinaw. Na kilitlawatkan oración xlakata napaxtikatsiniyaw chu namalankiyaw chali chali, xlakata lhuwa tuku lu tlan tlawanit (Sal. 40:5). Na kilitlawatkan oración xpalakata natalan xlikalanka katiyatni, la tiku «mpatikgoy mpulachin». Nachuna, natlawayaw oración xpalakata natalan tiku pulalinkgo congregación. Akxni akxilhaw pi Jehová kinkakgalhtiyan, tlakg talakatsuwiniyaw chu tlakg tatliwakglha kintakanajlakan (Heb. 13:3, 7).

KSKUJNIN DIOS TIKU NIKXNI MAKGXTAKGKGOLH

10. ¿Tuku xlakata lhuwa kskujnin Dios ni pekuankgolh chu nikxni makgxtakgkgolh?

10 Kcapítulo 11 xla Hebreos, apóstol Pablo wa: «Lakchajan, timakgamakglhtinankgolh xnininkan mpi tilakastakwanampalakgolh; makgapitsin ntimakatsajwanikgokaj, ni pikuankgolh maski namakgnikgokan, lakimpi wa ntu ntlakg tlan talakastakwan xkgalhikgolh» (Heb. 11:35). Lhuwa kskujnin Dios nikxni makgxtakgkgolh maski lhuwa tuku kaliʼakxilhka xlakata xkanajlanikgo talakastakwanat nema Dios xmalaknunit. Xkatsikgo pi Jehová xʼama kamalakastakwani chu xʼamakgo latamakgo kKatiyatni putum kilhtamaku. Kalilakpuwaw tuku kaʼakgspulalh Nabot chu Zacarías. Xchatiykan kaʼaktalamakgnika xlakata kgalhakgaxmatkgolh xlimapakgsin Dios (1 Rey. 21:3, 15; 2 Crón. 24:20, 21). Daniel mujuka niku xtajumakgo leones nema xtsinksmakgolh, chu kgalhtutu xʼamigos katamaknuka khorno.  Xmakgamakglhtinankgo linin nixawa namakgatsankgananikgo Jehová. Umakgolh lakchixkuwin kanajlakgolh pi Jehová xʼama kamaxki xʼespíritu chu xkamakgtayalh natayanikgo lhuwa tapatin (Dan. 3:16-18, 20, 28; 6:13, 16, 21-23; Heb. 11:33, 34).

Kskujnin Dios ni makgxtakgkgo xlakata lu kanajlanikgo talakastakwanat tuku malaknunit

11. ¿Tuku tayanikgolh makgapitsi palakachuwinanin xlakata xtakanajlakan?

11 Lhuwa palakachuwinanin tayanikgolh maski kalikgalhkgamananka o katamaknuka kpulachin, la Micaya chu Jeremías. Chu chuna la Elías, amakgapitsi palakachuwinanin «xlapulakgoy ntani ntsilis kawan, chu nkakiwin, chu kxtampin sipij, chu nkapulhman ntani lhukunkgo ntiyat». Xputumkan tayanikgolh tuku kaliʼakxilhka chu ni makgxtakgkgolh Dios xlakata xkanajlakgo pi xʼamakgo makglhtinankgo tuku xkawanikanit (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2).

12. ¿Tiku tlakg xatlan kiliʼakxilhtitkan chu tuku makgtayalh natayani?

12 Jesucristo wa tiku tlakg xatlan kiliʼakxilhtitkan. Xla tayanilh tuku tlakg tuwa chu ni makgxtakgli Jehová. ¿Tuku makgtayalh natayani? Pablo wa: «Xlakata tapaxuwan nema xwi kxlakatin tayanilh tapatin kkgantum kiwi, lakgmakgalh tamaxana, chu paxtutawilanit kxpakgstakat kxlaktawilh Dios» (Heb. 12:2). Wa xlakata Pablo kawanilh kstalaninanin Cristo pi kuenta xtlawakgolh xliʼakxilhtit Jesús (kalikgalhtawakga Hebreos 12:3). Chuna la Jesús, lhuwa xapulana kstalaninanin Cristo nikgolh xlakata ni makgxtakgkgolh Jehová. Chatum tiku chuna tlawalh wa Antipas (Apoc. 2:13). Umakgolh kstalaninanin Cristo makgamakglhtinankgolha xtatlajakan, nixawa amakgapitsi kskujnin Dios tiku pulana latamakgolh chu xkgalhkgalhimakgolh nalatamakgo kKatiyatni (Heb. 11:35). Akxni nina makgas xtitaxtunit lata tsukulh mapakgsinan Jesús kkata 1914, kstalaninanin Cristo tiku xatalaksakni nema xkamakgnikanit, kamalakastakwanika chu kamaxkika latamat nema nila lakgsputa. Xlakan natamapakgsinankgo Jesús chu nakamapakgsikgo latamanin (Apoc. 20:4).

KSKUJNIN DIOS XALA UKU TIKU TLIWAKGA XTAKANAJLAKAN KGALHIKGO

13, 14. 1) ¿Tuku tuwa titaxtulh Rudolf Graichen? 2) ¿Chu tuku makgtayalh ni namakgxtakga Jehová?

13 La uku lhuwa millón xtatayananin Jehová stalanikgo xliʼakxilhtit Jesús. Lilakpuwankgo xtamalaknun Jehová chu ni makgxtakgkgo maski tuwa tuku titaxtukgo. Kalilakpuwaw xliʼakxilhtit Rudolf Graichen, tiku lakachilh kʼAlemania kata 1925. Xla lakapastaka pi akxni aktsujku xwanit, xakxilha kxchik xlakan patsaps cuadros niku xtasiyakgo tuku Biblia lichuwinan. Rudolf wan: «Kʼakgtum cuadro xdibujarlikanit tantum lobo chu borrego, aktsu cabra chu leopardo, aktsu toro chu león: putum akxtum xwilakgo chu aktsu kgawasa xkapulalima» (Is. 11:6-9). Uma makgtayalh Rudolf nalilakpuwan Paraíso chu nalimatliwakglha xtakanajla uma tamalaknun. Xlakata uma,  ni makgaxtakgli Jehová maski akglhuwa kata lu putsastalanilh policía xalak Alemania nazi chu alistalh policía xalak Alemania comunista.

14 Rudolf lhuwa atanu tapatin tayanilh. Xtse nilh akxni chipalh akgtum tajatat nema wanikan tifus kʼakgtum campo de concentración nazi. Xtlat firmarlilh akgtum kapsnat niku xwan pi nialh xtatayana Jehová xʼama litaxtu. Pero Rudolf chuntiyaku tliwakga xkgalhi xtakanajla. Akxni taxtulh kpulachin, superintendente de circuito litaxtulh. Alistalh kilalh kʼEscuela de Galaad chu malakgachaka kChile. Anta superintendente de circuito litaxtupa chu tatamakgaxtokgli chatum misionera tiku xwanikan Patsy. Kgalhikgolh chatum aktsu xtsumatkan, pero kaj akgtum kata titaxtulh aktsu tsumat nilh. Chu ni makgas titaxtulh, Patsy na nilh. Kajku 43 kata xkgalhi. Maski titaxtulh uma tuku lu tuwa, Rudolf chuntiya skujnanilh Jehová. Asta akxni xlina kata chu xtatatla, precursor regular chu kgolotsin xalak congregación xlitaxtu. Tlan nalikgalhtawakgayaw xbiografía krevista La  Atalaya 1 xla agosto kata 1997, kpáginas 20 asta 25 [1] (kaʼakxilhti nota niku kgalhsputa artículo).

15. Kakalichuwinanti makgapitsi natalan tiku xatapaxuwan skujnanimakgo Jehová maski kaputsastalanimaka.

15 La uku, lhuwa kinatalankan xatapaxuwan skujnanimakgo Jehová maski lhuwa taputsastalanit kgalhikgo. Lhuwa ciento tiku katamaknukanit kpulachin anta kʼEritrea, kSingapur chu kCorea del Sur. ¿Tuku xlakata? Xlakata ni maklakaskimputunkgo likan (Mat. 26:52). Akgtum liʼakxilhtit, Isaac, Negede chu Paulos liwaka 20 kata lata tanumakgo kpulachin kpaís xalak Eritrea. Anta lu nitlan kalikatsinikanit. Putum umakgolh kata nila tamakgaxtokgkgonit chu na nila kuentajtlawakgo xnatlatnikan. Maski chuna, ni makgxtakgkgo Jehová chu tliwakga kgalhikgo xtakanajlakan. Asta tiku kuentajtlawakgo pulachin kamaxkikgo kakni. Kpágina jw.org wi xfotojkan, niku tasiya pi lakalitsinkgonit maski patinamakgolh.

¿La tlawakgonit natalan xalak congregación xlakata chuntiya tliwakga nakgalhikgo xtakanajlakan? (Kaʼakxilhti párrafos 15 chu 16).

16. Komo tliwakga kgalhiyaw kintakanajlakan, ¿tuku tlan natlawayaw?

16 Atsinu ni putum xtatayananin Jehová nitu katamaknumaka kpulachin chu ni chuna titaxtumakgo la natalan tiku aku kalichuwinaw. Pero lhuwa tiku patinamakgolh xlakata talimaxkget, wi tuku masputunan o xlakata anan guerras. Amakgapitsi natalan stalanikgo xliʼakxilhtit Abrahán, Isaac, Jacob chu Moisés chu ni lakaskinkgonit lhuwa nakalakgapaskan o lhuwa tumin nakgalhikgo, wata tlakg skujnanimakgo Jehová. ¿Tuku kamakgtaya kinatalankan pi xatapaxuwan naskujnanikgo Jehová? Tapaxkit nema kgalhinikgo chu lu kanajlanikgo tuku xla kinkamalaknuniyan. Katsikgo pi Jehová nakamaxki kskujnin tiku ni makgatsankgananikgo, latamat nema nikxni sputa kxasasti kakilhtamaku. Anta nialh katiʼanalh tuku ni xalakatitum (kalikgalhtawakga Salmo 37:5, 7, 9, 29).

17. 1) ¿Tuku kilitlawatkan komo tliwakga kgalhiputunaw kintakanajlakan? 2) ¿Tuku nakatsiniyaw kʼartículo nema aku mima?

17 Kʼuma artículo akxilhnitaw pi takanajla wa pi «xlikana lipawanaw» pi namakglhtinanaw wantu kgalhkgalhimaw. Komo tliwakga kgalhiputunaw kintakanajlakan, kilitlawanitkan Jehová oración chu chuntiya nalilakpuwanaw xtamalaknun. Komo chuna natlawayaw natayaniyaw putum tuku nakinkaliʼakxilhkanan. Kʼartículo nema aku mima tlakg nakatsiniyaw xlakata tuku kilhchanima kgalhikan takanajla.

^ [1] (párrafo 14): Na kaʼakxilhti xbiografía Andrej Hanák, xalak Eslovaquia, nema wanikan «Mi esperanza sigue brillante a pesar de las pruebas». Taxtulh krevista ¡Despertad! 22 xla abril kata 2002.