Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Octubre kata 2016

Kakuentajtlawa mintakanajla akxni namakgtayanana ktanu tachuwin

Kakuentajtlawa mintakanajla akxni namakgtayanana ktanu tachuwin

«Nak kkinaku kkamakinit mintachuwin» (SAL. 119:11, Salmos Ixtatlincan ti Talipawan Dios, SXP).

TAKILHTLIN: 142, 47

1-3. 1) ¿Tuku tlakg xlakaskinka xliʼakxilhatkan putum kskujnin Dios? 2) ¿Tuku tuwa titaxtukgo natalan tiku katsinimakgolh atanu tachuwin? 3) ¿Tuku takgalhskinin nakgalhtiyaw kʼuma artículo? (Kaʼakxilhti xapulana dibujo).

LA UKU, lhuwa xtatayananin Jehová makgantaxtimakgolh tuku talichuwinanit kʼApocalipsis, o Revelación 14:6. Uma texto wan pi xtamakatsin Tamapakgsin xʼama kalitalichuwinankan «nkaniwa xalanin nkakgatunu tiyat, chu ni ntipalit kilhtsukut, chu lantla ni ntipalit tachuwin anan». Lhuwa la umakgolh xtatayananin Jehová katsinimakgolh atanu tachuwin. Makgapitsi misioneros ankgonit kpaíses niku talakaskin tamakgtay xlakata natalichuwinan Dios. Makgapitsin antiya kxpaiskan tsukukgonit ankgo kʼakgtum congregación niku tanu tachuwin maklakaskinkan.

2 Tuku tlakg xlakaskinka xliʼakxilhatkan kskujnin Dios wa xtakanajlakan chu xla xfamiliajkan (Mat. 5:3) (kaʼakxilhti recuadro «¿Tuku kilhchanima?»). Max lu lhuwa tuku kilitlawatkan chu lu tuwa makgkatsiyaw nalimaxtuyaw kilhtamaku xlakata liwana nalikgalhtawakgayaw Biblia. Pero natalan tiku makgtayanamakgolh kʼatanu tachuwin atanu tuku tuwa titaxtumakgolh.

 3 Ni kajwatiya talakaskin nakatsinikgo atanu tachuwin, na talakaskin ankgalhin nalikgalhtawakgakgo tuku tlakg tuwa masiya xTachuwin Dios (1 Cor. 2:10). ¿Tuku tlan natlawakgo xlakata tlakg liwana naʼakgatekgskgo tiku makgtayanamakgolh kʼatanu tachuwin? ¿Tuku xlakata natlatni tiku makgtayanamakgolh kʼatanu tachuwin liwana xliʼakxilhatkan pi xkamanankan kalakgchanima xaxlikana kxnakujkan?

TUKU KATUWA NAWILI LA TALALINAW JEHOVÁ

4. ¿Tuku katuwa nawili la talalinaw Jehová? Kalichuwinanti akgtum liʼakxilhtit.

4 Akxni ni liwana akgatekgskan xtamasiy Biblia kʼatanu tachuwin, katuwa wili la talalinaw Jehová. Kalichuwinaw akgtum liʼakxilhtit xala makgasa. Akxni Nehemías taspitpa kJerusalén, akxilhli pi makgapitsi xkamanankan judíos ni xkatsinikgo hebreo (kalikgalhtawakga Nehemías 13:23, 24). Wa xlakata, umakgolh kamanan nila xʼakgatekgskgo xtachuwin Dios. Uma xtlawanit pi nialh liwana xtalalinkgolh Jehová (Neh. 8:2, 8).

5, 6. ¿Tuku akxilhkgonit makgapitsi natlatni tiku makgtayanamakgolh kʼatanu congregación chu tuku xlakata chuna la?

5 Makgapitsi natlatni tiku makgtayanamakgolh kʼatanu tachuwin, akxilhkgonit pi xkamanankan taxlajwaninit xtakanajlakan. ¿Tuku xlakata? Xlakata xkamanankan ni liwana akgatekgskgo tuku lichuwinankan ktamakxtumit. Wa xlakata ni chan kxnakujkan tuku anta talichuwinan chu ni tlawa pi natlawaputunkgo tuku kgaxmatkgo. Pedro, chatum tlat tiku xkatawi xfamila kSudamérica chu ankgolh kʼAustralia wan: «Akxni lichuwinankan xlakata Dios talakaskin namakgtanu kinakujkan chu tuku makgkatsiyaw» [1] (kaʼakxilhti nota niku kgalhsputa artículo) (Luc. 24:32).

6 Atanu tuku tuwa wa akxni kgalhtawakgayaw kʼatanu tachuwin, max ni chuna makgkatsiyaw la akxni kgalhtawakgayaw kkintachuwinkan. Nachuna, chuwinankan kʼatanu tachuwin lu tuwa. Uma nakinkamakgatlakgwanan chu nialh katikgalhiw litliwakga xlakata naskujnaniyaw Jehová. Wa xlakata, ni kajwatiya talakaskin chuntiya namakgtayanamputunaw kʼatanu tachuwin, na kilikuentajtlawatkan la talalinaw Jehová (Mat. 4:4).

KSKUJNIN JEHOVÁ TIKU KUENTAJTLAWAKGOLH LA XTALALINKGO

7. ¿Tuku tlawakgolh babilonios xlakata Daniel xtlawalh xtalismaninkan chu na watiya xkgalhilh xtakanajlakan?

7 Akxni Daniel chu xʼamigos kalinka kBabilonia, tiku xalak Babilonia xlakaskinkgo pi na xtlawakgolh xtalismaninkan chu na watiya takanajla xkgalhikgolh. ¿La tlawakgolh? Kamasiyanikgolh xtachuwinkan chu kawilinikgolh xtukuwanikan xalak Babilonia (Dan. 1:3-7). Tukuwani nema wilinika Daniel xtakilhtinit kxtukuwani dios Bel, tiku lu xlakaskinka xliʼakxilhkgo babilonios. Max mapakgsina xalak Babilonia xlakaskin pi Daniel xkanajlalh pi uma dios tlakg tliwakga xwanit nixawa Jehová, xDios Daniel (Dan. 4:8).

Daniel chuntiya talalilh Jehová xlakata xlikgalhtawakga xTachuwin Dios nema xtatsokgnit ktachuwin hebreo

8. ¿Tuku tlawalh Daniel xlakata chuntiya xtalalilh Jehová?

8 Anta kBabilonia Daniel malaknunika lhuwa lakgkgama liwat nema xwa mapakgsina. Pero xla liwana xlakkaxwilinit nakgalhakgaxmata xlimapakgsin Dios (Dan. 1:8). Maski kʼatanu país niku xlama chuntiya tlan talalilh Jehová. ¿Tuku tlawalh? Xlikgalhtawakga xTachuwin Dios nema xtatsokgnit ktachuwin  hebreo (Dan. 9:2). Max 70 kata xtitaxtunita lata xwi kBabilonia, chuntiya xlilakgapaskan Daniel, xtukuwani xahebreo (Dan. 5:13).

9. ¿La xakxilha xTachuwin Dios tiku tsokgli Salmo 119?

9 Na kgalhiyaw xliʼakxilhtit tiku tsokgli Salmo 119. Tayanilh pi makgapitsi tiku xwilakgolh kxchik mapakgsina nitlan xlichuwinankgolh. Pero putsalh tamakgtay kxTachuwin Dios, chu uma maxkilh litliwakga xlakata nichuna nalikatsi la amakgapitsin (Sal. 119:23, 61). Mastalh talakaskin pi xtamasiy Dios xchalh kxnaku (kalikgalhtawakga Salmo 119:11, 46).

KAKUENTAJTLAWAW LA TALALINAW JEHOVÁ

10, 11. 1) ¿Tuku kililakpuwanatkan akxni nalikgalhtawakgayaw xTachuwin Dios? 2) ¿La namakgantaxtiyaw? Kalichuwinanti akgtum liʼakxilhtit.

10 Maski lhuwa taskujut lakgayaw kcongregación chu kkintaskujutkan, kimputumkan kilimaxtutkan kilhtamaku xlakata nakgalhtawakgayaw chu nakakninaniyaw Dios kfamilia (Efes. 5:15, 16). Akxni nalikgalhtawakgayaw Biblia chu atanu likgalhtawakga o akxni nalakkaxwiliyaw kintakgalhtinkan xla tamakxtumit, ni kajwatiya nalakpuwanaw lhuwa páginas nalikgalhtawakgayaw. Wata xTachuwin Dios nachan kkinakujkan chu namatliwakglha kintakanajlakan.

11 Xlakata namakgantaxtiyaw tuku lakpuwanitaw akxni nakgalhtawakgayaw, pulana kililakpuwanatkan tuku maklakaskinaw, ni kajwatiya tuku maklakaskinkgo amakgapitsin (Filip. 1:9, 10). ¿Tuku xlakata chuna wanaw? Xlakata akxni lakkaxwiliyaw naʼanaw lichuwinanaw Dios, lakkaxwiliyaw tamakxtumit, akgtum taʼakgchuwin o liʼakxilhtit, min kilhtamaku ni lakpuwanaw la nakinkamakgtayayan tuku likgalhtawakgayaw. Kalichuwinaw tiku tlawa liwat. Maski xlikgalhwanat liwat nema kaxtlawa akxni nina kamaxki amakgapitsin, ni katililatamalh tuku kaj nakgalhwanan. Komo ni tatatlaputun xlikaxtlawat liwat nema nalitatliwakglha. Nachuna, komo lu tlan talalimputunaw Jehová, kilikgalhtawakgatkan Biblia putum kilhtamaku xlakata nakgalhiyaw tuku maklakaskinaw.

12, 13. ¿Tuku xlakata lhuwa kstalaninanin Cristo wankgo pi xlakaskinka nalikgalhtawakgakan Biblia kxtachuwinkan?

12 Lhuwa kstalaninanin Cristo tiku makgtayanamakgolh kcongregaciones nema chuwinankan tanu tachuwin akxilhkgonit pi tlan kitaxtu akxni likgalhtawakgakgo Biblia kxtachuwinkan (Hech. 2:8). Asta misioneros wankgo pi xlakata natayanikgo niku lichuwinamakgolh Dios, ni kajwatiya maklakaskinkgo tuku kgaxmatkgo ktamakxtumit.

13 Alain liwakaya akgtsayan kata katsinima tachuwin persa chu wan: «Akxni klakkaxtlawa tamakxtumit ktachuwin persa, kajwa kkuentajtlawa tachuwin nema kkatsinima. Komo kajwatiya kmaklakaskin kintalakapastakni, ni putum kilhtamaku lakgchan kinaku  tuku klikgalhtawakga. Wa xlakata klismaninit klikgalhtawakga Biblia chu atanu likgalhtawakga kkintachuwin».

NATLATNI KALAKGCHIPITIT XNAKUJKAN MINKAMANANKAN

14. ¿Tuku liwana xlikatsitkan natlatni tiku kstalaninanin Cristo chu tuku xlakata?

14 Natlatni tiku kstalaninanin Cristo liwana xlikatsitkan pi xkamanankan akgatekgskgo chu paxkikgo xaxlikana. ¿Tuku xlakata? Kalichuwinaw Serge chu xpuskat tiku wanikan Muriel. Xlakan xmakgtayanamakgolh kʼatanu tachuwin liwaka akgtutu kata. Milh kilhtamaku, akxilhkgolh pi xkgawasakan tiku xkgalhi 17 kata nialh xlakgati xlichuwinan Dios chu nialh xʼamputun ktamakxtumit. Muriel wan: «Lu ni xlakgati lichuwinan Dios kʼatanu tachuwin, pero xapulana lu xlakgati lichuwinan Dios ktachuwin francés, tachuwin nema klimakgastakwi». Serge wan pi akxni xmakgtayanamakgo kʼatanu tachuwin xtlawama pi xkgawasakan nialh xmatliwakglhli xtakanajla. Wa xlakata taspitkgolh kcongregación niku xtapakgsikgo xapulana.

Kuenta katlawa pi xaxlikana tuku masiya Biblia kalakgchalh xnakujkan minkamanan. (Kaʼakxilhti párrafos 14 chu 15).

15. 1) ¿Tuku xlilakpuwanatkan natlatni komo lakpuwamakgo natalakgpalikgo kʼatanu congregación? 2) ¿Tuku tastakyaw kamaxki natlatni Deuteronomio 6:5-7?

15 Makgapitsi natlatni max lakpuwamakgo nataspitkgo kcongregación niku chuwinankan tachuwin nema xkamanankan akgatekgskgo. ¿Tuku xlilakpuwanatkan akxni nina laksakkgo tuku natlawakgo? Pulana, xliʼakxilhatkan komo kgalhikgo kilhtamaku chu litliwakga xlakata nakamasiyanikgo xkamanankan napaxkikgo Jehová chu na nakamasiyanikgo atanu tachuwin. Xlipulaktiy,  xliʼakxilhatkan komo xkamanankan lichuwinamputunkgo Dios, amputunkgo ktamakxtumit o makgtayanamputunkgo kcongregación niku tanu tachuwin chuwinankan. Akxni akxilhkgonita uma, makgapitsi natlatni max nataspitkgo kcongregación ktachuwin nema akgatekgskgo xkamanankan. Chu akxni kamanan tlakg tlan talalinkgo Jehová, natlatni max nalakpuwankgo naʼamparakgo kcongregación niku tanu tachuwin chuwinankan (kalikgalhtawakga Deuteronomio 6:5-7).

16, 17. ¿Tuku tlawakgonit makgapitsi natlatni xlakata nakamasiyanikgo xkamanankan xlakata Jehová?

16 Makgapitsi natlatni tekgskgonit la natlawakgo xlakata nakamasiyanikgo xkamanankan xlakata Jehová kxtachuwinkan, maski makgtayanamakgo kʼakgtum congregación o grupo nema tanu tachuwin. Kalichuwinaw chatum tlat tiku wanikan Charles. Xla kgalhi kgalhtutu xlaktsuman tiku kgalhikgo 9 chu 13 kata. Putum familia makgtayanamakgo kʼakgtum grupo ktachuwin lingala. Charles wan: «Klakkaxwiliw pi xakamaw katalikgalhtawakgayaw Biblia kilaktsumankan chu xakamaw kakninaniyaw Dios kfamilia kkintachuwinkan». Na wan pi makgatawakgakgo chu kgamanankgo ktachuwin lingala xlakata xlaktsuman xatapaxuwan nakatsinikgo uma tachuwin.

Kaliskujti xlakata nakatsiniya tachuwin nema maklakaskinkan kcongregación niku wila chu xlakata namastaya mintakgalhtin. (Kaʼakxilhti párrafos 16 chu 17).

17 Kalichuwinaw xliʼakxilhtit Kevin. Xla kgalhi chatiy xlaktsuman, chatum kgalhi akgkitsis kata chu achatum akgtsayan kata. Kevin liskuja xlakata nakamasiyani xlaktsuman tuku xlikana masiya Biblia, xlakata xlaktsuman nina liwana akgatekgskgo tachuwin  nema chuwinankan kcongregación niku makgtayanamakgo. Kevin wan: «Kimpuskat chu akit kkatakgalhtawakgayaw kilaktsumankan kfrances, tachuwin nema kkalimakgastakmaw. Na klakkaxwilinitaw nakanaw kʼakgtum tamakxtumit ktachuwin frances akgatunu papaʼ. Chu akxni kgalhiyaw vacaciones kanaw kʼakgtum asamblea regional kkintachuwinkan».

18. 1) ¿La tlan nakamakgtaya natlatni Romanos 15:1, 2 xlakata nalaksakkgo tuku tlakg tlan xpalakata xkamanankan? 2) ¿Tuku wankgonit makgapitsi natlatni? (Kaʼakxilhti nota niku kgalhsputa artículo).

18 Akgatunu familia xlilaksakat tuku tlakg tlan xlakata xkamanankan tlan natalalinkgo Jehová [2] (kaʼakxilhti nota niku kgalhsputa artículo) (Gál. 6:5). Kparráfo 14 lichuwinaw xlakata Muriel chu Serge. Muriel wan pi xla chu xchixku chuntiya xmakgtayanamputunkgo kcongregación niku xwilakgo. Maski chuna, laksakkgolh naʼankgo kʼatanu congregación xlakata namakgtayakgo xkgawasakan tlakg napaxki Jehová (kalikgalhtawakga Romanos 15:1, 2). La uku Serge lakpuwan pi tlan tuku laksakkgolh. Wan pi akxni taspitkgolh kcongregación ktachuwin francés xkgawasakan matliwakglhli la xtalalin Jehová chu tamunulh. La uku xkgawasa precursor litaxtu chu asta lakpuwama naʼampara makgtayanan kʼakgtum grupo kʼatanu tachuwin.

KAMASTAW TALAKASKIN PI XTACHUWIN DIOS KACHAʼALH KKINAKUJKAN

19, 20. ¿La nalimasiyayaw pi paxkiyaw xTachuwin Dios?

19 Jehová kapaxki putum latamanin. Mastanit talakaskin pi xTachuwin kamatitaxtika ktipalhuwa tachuwin xlakata «lakaskin mpi paks» latamanin nalakgapaskgo tuku xaxlikana (1 Tim. 2:4). Jehová katsi pi tatliwakglha la talalinaw akxni likgalhtawakgayaw Biblia ktachuwin nema tlakg akgatekgsaw.

20 Putum kiliskujatkan xlakata tlan natalalinaw Jehová. Xlakata chuna nala, kilismanitkan nalikgalhtawakgayaw Biblia ktachuwin nema tlakg akgatekgsaw. Chuna nakamakgtayayaw kifamiliajkan namatliwakglhkgo xtakanajlakan chu nalimasiyayaw pi xlikana paxkiyaw xTachuwin Dios (Sal. 119:11).

^ [1] (párrafo 5): Kʼuma artículo, kalakgpalikanit makgapitsi tukuwani.

^ [2] (párrafo 18): Kaʼakxilhti artículo «La crianza de los hijos en un país extranjero: desafíos y galardones», krevista La Atalaya 15 xla octubre kata 2002. Anta natekgsa tastakyaw xalak Biblia nema nakamakgtaya mifamilia.