Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Octubre kata 2016

Kakanajlaniw xtamalaknun Jehová

Kakanajlaniw xtamalaknun Jehová

«Lapi xlikana lipawanaw Dios [...] lakatanks kilikatsitkan pi xlikana wi, chu anan wantu lipawanaw maski ni ukxilhmaw» (HEB. 11:1, Hua Xasasti Talaccaxlan, TXS [1999]).

TAKILHTLIN: 54, 43

1. ¿La kilimakgkatsikan xlakata kgalhiyaw takanajla?

NI PUTUM latamanin kgalhikgo takanajla (2 Tes. 3:2). Pero Jehová kamaxki takanajla putum tiku kakninanikgo (Rom. 12:3; Gál. 5:22). Kilipaxtikatsinitkan pi Jehová kinkamaxkiyan takanajla.

2, 3. 1) ¿Tuku tasikulunalin makglhtinanaw xlakata kgalhiyaw takanajla? 2) ¿Tuku takgalhskinin nakgalhtiyaw?

2 Jehová mastalh xKgawasa tiku lu xpaxki xlakata putum tiku nakanajlani natapatikan xtalakgalhin. Komo kanajlaniyaw Jesús, tlan xʼamigos Jehová nawanaw chu tlan nalatamayaw putum kilhtamaku (Juan 6:44, 65; Rom. 6:23). Jehová lu tlan kinkalikatsininitan. Maski makglakgalhinanin akinin chu kinkalakgchanan naniyaw, xla akxilhli pi tlan natlawayaw tuku tlan (Sal. 103:10). Wa xlakata kinkamasiyanin tamakatsin xlakata Jesús chu xtamakamastan. Akxni kanajlaniw Jesús chu kstalaninanin litaxtuw, tsukuw kgalhiyaw takgalhkgalhin pi nalatamayaw putum kilhtamaku (kalikgalhtawakga 1 Juan 4:9, 10).

3 Pero ¿tuku atanu tlan nakatsiniyaw xlakata takanajla? Komo kgalhiputunaw takanajla, ¿kajwatiya kilikatsitkan tuku Dios  tlawanit kimpalakatakan chu tuku natlawa? Wi atanu tuku kilitlawatkan. Kaʼakxilhwi tuku uma.

KALIMASIYAW TAKANAJLA NEMA KGALHIYAW KKINAKUJKAN

4. ¿Tuku natlawaputunaw komo kgalhiyaw takanajla?

4 Komo kanajlaniyaw Jehová chu Jesús, ni kajwatiya katikatsiw tuku xlakan tlawakgonit chu tuku natlawakgo kimpalakatakan. Xliputum kinakujkan nalatamaputunaw chuna la kinkamasiyanikgoyan chu nakamakgtayaputunaw amakgapitsin na nalakgapaskgo. Apóstol Pablo wa: «Sampi lapi wa minkilhni wa nalikgalhapalaya mpi wa nCristo wa mimalana, chu wa minaku, nalikanajlaya mpi wa Dios nti ntimalakastakwanilh klinin, naliakgaputaxtuya. Sampi anta kminaku [...] nalikanajlaya, lakimpi nalitamalulokgniya, cha nchu wa minkilhni, nalikgalhapalaya, lakimpi nalikgalhiya akgaputaxtut» (Rom. 10:9, 10; 2 Cor. 4:13).

5. ¿Tuku xlakata lu xlakaskinka takanajla chu tuku kilitlawatkan xlakata tliwakga nawan? Kalichuwinanti akgtum liʼakxilhtit.

5 Komo latamaputunaw kxasasti kakilhtamaku, kilikgalhitkan takanajla chu tliwakga xliwanat. Takanajla xtachuna akgatum tachanan. Xlakata ni naskaka chu chuntiya nastaka, ankgalhin kilimunuwilitkan. Komo ni chuna natlawayaw naxnekga chu naskaka. Xtachuna kintakanajlakan, kuenta kilitlawatkan pi ni nataxlajwani chu chuntiya nastaka (Tito 2:2; 2 Tes. 1:3; Luc. 22:32; Heb. 3:12).

BIBLIA WAN TUKU TAKANAJLA

6. Chuna la wan Hebreos 11:1, ¿tuku pulaktiy kilhchanima takanajla?

6 Anta kHebreos 11:1 (kalikgalhtawakga), Biblia lichuwinan pi pulaktiy tuku kilhchanima takanajla. Pulana wan pi kilhchanima pi «tanks kilikanajlatkan pi namakglhtinanaw wantu kgalhkgalhimaw». Tuku kgalhkgalhimaw na kilhchanima tuku Dios kinkamalaknuninitan natlawa. Akgtum liʼakxilhtit, liwana katsiyaw pi putum tuku nitlan nialhtu katiʼanalh chu natawila xasasti kakilhtamaku. Chu xlipulaktiy, takanajla wa pi «lakatanks kilikatsitkan pi xlikana wi, chu anan wantu lipawanaw maski ni ukxilhmaw». Makgapitsi umakgolh tuku xlikana wilakgo pero ni akxilhaw wa Jehová, Jesucristo, ángeles chu Tamapakgsin kʼakgapun (Heb. 11:3). ¿La limasiyayaw pi xlikana kanajlaniyaw xtamalaknun Dios chu tuku ni akxilhaw? Limasiyayaw latamayaw, tuku wanaw chu tuku tlawayaw.

7. ¿La kinkamakgtayayan xliʼakxilhtit Noé naʼakgatekgsaw tuku wamputun kgalhikan takanajla? (Kaʼakxilhti xapulana dibujo).

7 Xliʼakxilhtit Noé kinkamakgtayayan naʼakgatekgsaw tuku kilhchanima takanajla. Apóstol Pablo wa pi «akxni xalimakatsininitta Dios wa ntu ni makgtum xataukxilha xtachuna», uma wamputun, tuku nikxni xʼakxilhnit. Xlakata Noé xmakgapaxuwaputun Dios, «tilikaxtlawalh [arca] ntu napulakgtaxtukgoy nti xala kxchik» (Heb. 11:7). Noé kanajlalh tuku Jehová xwaninit, wa xlakata tlawalh akgtum lanka arca. Max xtalakatsu kgalhskinkgolh tuku xlakata xtlawama. Liwana katsiyaw pi Noé, kalitachuwinalh xlakata Biblia wan pi «ntiliakgchuwinalh lantla Dios natlaway ntalulokgtat» (2 Ped. 2:5). Xla kamakatsinilh pi Dios xʼama limin munkaklat xlakata namasputu tuku nitlan. Max kawanilh tuku Jehová xwaninit: «Putum tuku staknan chilha xlisputni kkilakatin, xlakata katiyatni litatsamanit tuku nitlan». Jehová na xwaninit Noé: «Naktlawa pi kamilh munkaklat kkatiyatni xlakata nakmasputu putum tuku staknan  nema anan kxtampin akgapun. Putum tuku anan kkatiyatni nani». Alistalh, Noé kawanilh latamanin tuku xlitlawatkan xwanit xlakata xlakgtaxtukgolh. Jehová xwaninit: «Militanut kʼarca» (Gén. 6:13, 17, 18).

8. ¿Tuku wa Santiago xlakata takanajla?

8 Santiago na lichuwinalh xlakata takanajla. Max chuna tlawalh akxni nina makgas xtitaxtunit lata Pablo katsokgnilh carta kstalaninanin Cristo tiku hebreos xwankgonit. Santiago wa: «Kakimasiyuni chu mintakanajla, nixawa lakwan mintatlaw lapi tlan, wampi naklimasiyaniyan nkintakanajla xpalakata lakwan kintatlaw» (Sant. 2:18). Xla lichuwinalh pi komo kgalhiputunaw takanajla ni kajwatiya kilikatsitkan pi wi Dios. Demonios katsikgo pi Dios lama, pero ni kanajlanikgo. Wata talalakatawakakgo (Sant. 2:19, 20). Tiku kgalhi takanajla makgapaxuwaputun Dios chu tlawa tuku tlan. Wa tuku tlawalh Abrahán. Santiago tsokgli: «¿Tu wa xpalakata lakwan xtatlaw ntlan tilitaxtulh Abraham nkintlatkan kxlakatin Dios, akxni ntilisawa Isaac xkam namakgniy, nalhkuy kxokgspun [pumakamastan]? ¿Tu ukxilha mpi wa ntakanajla, litasiyunilh lakwan tatlaw, chu mpi wa ntakanajla, aktanks kilitaxtulh lakwan tatlaw?». Alistalh Santiago lichuwinalh pi takanajla nitu litaxtu komo ni limasiyakan ktatlaw. Santiago wa: «Lantla ntiyatliwa, lapi ni kgalhiy xlistakna, kaj xanin ma, pus na chuna ntakanajla, lapi ni kgalhiy lakwan tatlaw, ni tu xlakgasi» (Sant. 2:21-23, 26).

9, 10. ¿Tuku kilitlawatkan komo kanajlaniputunaw xaKam?

9 Akxni xtitaxtunita liwaka 30 kata lata Santiago xtsokgnit xlakata takanajla, Juan tsokgli xʼEvangelio chu maktutu cartas. Xtachuna la amakgapitsi tiku tsokgkgolh Biblia, Juan xʼakgatekgsa tuku takanajla. Xla makglhuwa maklakaskilh tachuwin xagriego nema kxatotonaco tlan wankan «kanajlakan».

Limasiyaniyaw takanajla xaKam, akxni kgalhakgaxmataw xlimapakgsin

10 Akgtum liʼakxilhtit, Juan wa: «Wa nti nkanajlaniy xaKam, kgalhiy xlatamat wa ntu xaliankgalhin; wampi wa nti ni kgalhakgaxmata xaKam, ni katiukxilhli latamat, wampi ni anan xmakwa mpala ni napatiy xtasitzi liakgastakyawan Dios» (Juan 3:36). Xlakata nalimasiyaniyaw takanajla xaKam, talakaskin nakgalhakgaxmataw xlimapakgsin (kaʼakxilhti recuadro «¿Tuku kilhchanima?»). Akxni likgalhtawakgayaw putum tuku Juan tsokgli, akxilhaw pi Jesús makglhuwa masiyalh pi xlakata nakgalhiyaw latamat nema nikxni sputa kilikanajlanitkan xTlat chu Jesús (Juan 3:16; 6:29, 40; 11:25, 26; 14:1, 12).

11. ¿La limasiyayaw pi paxtikatsiniyaw Jehová xlakata kinkamasiyanin xaxlikana?

11 Jehová maklakaskilh xʼespíritu santo xlakata nakinkamakgtayayan naʼakgatekgsaw xaxlikana xlakata xla chu xKgawasa, chu nakakgalhiniyaw takanajla (kalikgalhtawakga Lucas 10:21). ¿La limasiyayaw pi paxtikatsiniyaw tuku tlawanit Jehová? Akxni putum kilhtamaku paxtikatsiniyaw pi xʼamigos litaxtuyaw xpalakata Jesús, «nti nkimpulaliyanakan, chu nkiliukxilhtitkan lantla nakanajlayaw» (Heb. 12:2). Nachuna, chuntiya kilimatliwakglhatkan kintakanajlakan. ¿La  natlawayaw? Putum kilhtamaku natlawayaw oración chu nalikgalhtawakgayaw Biblia (Efes. 6:18; 1 Ped. 2:2).

Akxni matlaniyaw, kalimasiyaw pi kgalhiyaw takanajla chu kakalitachuwinaw amakgapitsin xlakata Tamapakgsin. (Kaʼakxilhti párrafo 12).

12. ¿Tuku natlawayaw komo kgalhiyaw takanajla?

12 Komo lu kanajlaniyaw xtamalaknun Jehová, putum kilhtamaku nalimasiyayaw tuku natlawayaw. Akgtum liʼakxilhtit, chuntiya nakalitachuwinanaw xTamapakgsin Dios latamanin chu nakamakgtayayaw nastalanikgo Jesús. Na chuntiya «ntu ntlan nkatlawanikgow xlipaks amakgapitsin, na tlakg xaliwaka wa nti makxtum tawanitaw ktakanajla» (Gál. 6:10). Chuntiya naliskujaw xlakata nalakgmakganaw xamakgan kintayatkan chu xtatlaw xlakata ni tlawaputunaw tuku natlawa pi nialh natalalinaw Jehová (Col. 3:5, 8-10).

KANAJLANIKAN DIOS PULAKTUM TUKU XLAKASKINKA

13. 1) ¿Tuku xlakata lu xlakaskinka kanajlanikan Dios? 2) ¿Tuku wan Biblia xlakata takanajla, chu tuku xlakata?

13 Biblia wan pi komo ni kgalhiyaw takanajla nila katimakgapaxuwaw Dios, «sampi xlakaskinka mpi wa nti xlakgtalakatsuwinilh Dios, nakanajlay [...] mpi wi nchatum Dios, chu mpi na wa nti mputsakgoy lakgalhamankgoy» (Heb. 11:6). Biblia na wan pi kanajlanikan Dios wa xapulana tuku xlikgalhit xaxlikana kstalanina Cristo. Uma lu xlakaskinka (Heb. 6:1). Pero ni kajwatiya lakaskinaw takanajla, maklakaskinaw atanu xlakaskinka tayat nema nakinkamakgtayayan tlan natalalinaw Dios (kalikgalhtawakga 2 Pedro 1:5-7; Jud. 20, 21).

14, 15. ¿Tuku xlakata tlakg xlakaskinka nakgalhiyaw tapaxkit nixawa takanajla?

14 Xtsokgnanin Biblia tlakg lichuwinankgo takanajla nixawa atanu tayat. ¿Wamputun uma pi takanajla wa tuku tlakg xlakaskinka tayat nema xlikgalhit kstalanina Cristo? Kaʼakxilhwi.

15 Pablo malakxtumilh takanajla chu tapaxkit. Xla wa: «Lapi xakkgalhilh lu[...] tlanka takanajla, asta tlan xakamalakxilhli nkgastinin, wampi ni xakkgalhilh ntapaxkit, ni tu kilakgasi xtiwaj» (1 Cor. 13:2). Chu Jesús wa pi napaxkiyaw Dios wa «limapakgsin ntlakg xatlanka» (Mat. 22:35-40). Tapaxkit kinkamakgtayayan nakgalhiyaw tayat nema makgapaxuwa Dios, akgtum liʼakxilhtit, Biblia wan pi tapaxkit «paks kanajlay». Wa  xlakata tapaxkit kinkamakgtayayan nakanajlayaw putum tuku Dios kinkawaniyan kBiblia (1 Cor. 13:4, 7).

16, 17. 1) ¿La limasiya Biblia pi takanajla chu tapaxkit lu xlakaskinka tayat? 2) ¿Pero tuku tayat tlakg xlakaskinka chu tuku xlakata?

16 Biblia masiya pi takanajla chu tapaxkit lu xlakaskinka tayat. Wa xlakata xtsokgnanin Biblia makglhuwa akxtum kalichuwinankgo. Akgtum liʼakxilhtit, Pablo kamakgpuwantinilh amakgapitsin kstalaninanin Cristo nalilhakganankgo «ntakanajla, chu ntapaxkit» (1 Tes. 5:8). Pedro wa xlakata Jesús: «Wa nti ni aukxilhatit paxkiyatit; chu wa nti maski ni ukxilhpatit nchiyuj kilhtamaku, wampi kanajlaniyatit» (1 Ped. 1:8). Santiago kawanilh xnatalan tiku na xatalaksakni xwankgonit: «¿Tu wa Dios laksakgonit limaxkganin, xala yunu nkatuxawat, mpi wa nalitaxajkgoy ntakanajla, chu nalakgchankgoy kxtapakgsin Dios wa ntu malaknunikgonit wa nti mpaxkikgoy?» (Sant. 2:5). Chu Juan wa pi Dios kinkalimapakgsiyan «nakanajlaniyaw kxtukuwini Jesucristo xKam, chu nalapaxkiyaw nchatunu amakgapitsin» (1 Juan 3:23).

17 Pero Pablo na wa pi kkinkilhtamakujkan «namakgapalay ntakanajla, chu ntakgalhkgalhitin, chu ntapaxkit, wa yuma ntipatutu; wampi wa ntu ntlakg kgalhiy xkakni lantla xlipaks, wa ntapaxkit» (1 Cor. 13:13). ¿Tuku xlakata Pablo wa pi tapaxkit wa tuku tlakg xlakaskinka? Xlakata kilhtamaku nema aku mima nialh katitalakaskilh nakgalhiniyaw takanajla tuku Dios malaknunit xlakata xasasti kakilhtamaku. Lipaxuwamawa nawan xastlan latamat nema lichuwinan Biblia. Pero putum kilhtamaku natalakaskin napaxkiyaw Dios chu latamanin. Tapaxkit nema kakgalhiniyaw chuntiya nastaktilha.

JEHOVÁ SIKULUNATLAWANIT XTAKANAJLA XKACHIKIN

18, 19. ¿Tuku tlan kitaxtunit xlakata kskujnin Dios kgalhikgo takanajla, chu tiku kilimalankitkan xlakata uma?

18 Kskujnin Dios xala uku mastakgo talakaskin pi xʼespíritu santo Dios kakapulalilh kxlatamatkan. Wa xlakata kanajlanikgo xTamapakgsin Dios chu tatayakgo. Nachuna, lapaxkikgo chatunu chatunu (Gál. 5:22, 23). Uma tlawanit pi xlikalanka katiyatni anankgo liwaka akgtsayan millones natalan tiku tlan latalalinkgo chu makxtum wilakgo kcongregaciones. Liwana tasiya pi takanajla chu tapaxkit kgalhikgo litliwakga.

19 Wa Jehová tiku tlawanit pi tlan makxtum natawilakgo. Lakgchan namalankiyaw xlakata uma (Is. 55:13). Lu paxtikatsiniyaw Jehová xlakata kinkamaxkinitan talakaskin nalilakgtaxtuyaw xpalakata kintakanajlakan (Efes. 2:8). Jehová chuntiya nakamakgtaya lhuwa latamanin nakanajlanikgo. Chu nachan kilhtamaku, putum Katiyatni nalitatsama tiku ni nakgalhikgo talakgalhin, xaʼakgstitum, tiku napaxuwakgo chu namalankikgo Jehová putum kilhtamaku.