Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Noviembre kata 2016

¿Lhuwa xtapalh akxilhaw xTachuwin Dios?

¿Lhuwa xtapalh akxilhaw xTachuwin Dios?

«Akxni makgamakglhtinantit xtachuwin Dios, nema kkawanin, [...] ni wantit pi xtachuwin lakchixkuwin, wata akxilhtit pi wa xtachuwin Dios» (1 TES. 2:13).

TAKILHTLIN: 37, 51

1-3. 1) ¿Tuku max titaxtukgolh Evodia chu Síntique? (Kaʼakxilhti xapulana dibujo). 2) ¿La natlawayaw xlakata ni nakatakgalhiyaw taʼakglhuwit natalan?

KSTALANINANIN Cristo lhuwa xtapalh liʼakxilhaw Biblia xlakata katsiyaw pi xTachuwin Dios. Xtastakyaw kinkamakgtayayan ni nakgalhiyaw taʼakglhuwit chu kinkastakyawayan akxni tlawayaw tuku nitlan. ¿La makgamakglhtinanaw uma tastakyaw? Kalilakpuwaw tuku kaʼakgspulalh chatiy natalan lakpuskatin tiku xatalaksakni kxapulana siglo xkawanikan Evodia chu Síntique. Biblia lichuwinan pi kgalhikgolh taʼakglhuwit, ni lichuwinan tuku xlakata. Kalilakpuwaw tuku max lalh.

2 Max Evodia katasanilh makgapitsi natalan kxchik xlakata nakatawayan pero ni wanilh Síntique. Alistalh, akxni Síntique kgaxmatli la lu tlan xkakitaxtuninit natalan, lu sitsilh. Max lakpuwa: «Nila kkanajla pi Evodia ni kiwanilh. ¡Klakpuwa pi amigas xaklitaxtuyaw!». Max Síntique lakpuwa pi xmakgasitsi chu wa xlakata nialh xtalalimputun. Wa xlakata watiya natalan  katasanilh kxchik, pero ni wanilh Evodia. Max uma tuku lalh nitlan akxilhkgolh makgapitsi natalan xalak congregación. Biblia wan pi Pablo kastakyawalh uma chatiy natalan chu kawanilh pi xlatapatikgolh. Xlikana pi umakgolh natalan kgaxmatkgolh tastakyaw chu chuntiya xatapaxuwan skujnanikgolh Jehová (Filip. 4:2, 3).

3 La uku, max na natakgalhiyaw taʼakglhuwit chatum tala kcongregación. Pero tlan nalakkaxtlawayaw o ni natakgalhiyaw taʼakglhuwit. ¿La natlawayaw? Natlawayaw xtastakyaw Biblia. Akxni kgaxmataw uma tastakyaw limasiyayaw pi lhuwa xtapalh liʼakxilhaw xTachuwin Dios (Sal. 27:11).

BIBLIA KINKAMASIYANIYAN NI LAKAPALA NASITSIYAW

4, 5. ¿Tuku tastakyaw kinkamaxkiyan xTachuwin Dios xlakata ni lakapala nasitsiyaw?

4 Min kilhtamaku lakapala sitsiyaw. Akgtum liʼakxilhtit, max nitlan nalimakgkatsiyaw akxni wi tiku kinkawaniyan tuku nitlan o nitlan kinkalikatsiniyan xlakata tanu kintalismaninkan, tanu kincolorkan o tanu la tasiyayaw. Tlakg nitlan limakgkatsiyaw akxni wa chatum tala xalak congregación chuna kinkalikatsiniyan. ¿Tuku tastakyaw xalak Biblia tlan nakinkamakgtayayan akxni chuna natitaxtuyaw?

5 Jehová katsi tuku nala komo ni namachokgoyaw kintasitsikan. Akxni nitlan kinkamamakgkatsinikanitan o sitsinitaw, max nawanaw o natlawayaw tuku alistalh nitlan katilimakgkatsiw. Anta kBiblia Jehová kinkawaniyan pi ni lakapala nasitsiyaw. Wan: «Ni lakapala kasitsi». Ni lhuwa taʼakglhuwit katikgalhiw komo natlawayaw uma tastakyaw chu ni lakapala nasitsiyaw (kalikgalhtawakga Eclesiastés 7:9 chu Proverbios 16:32). Biblia na kinkawaniyan pi katapatinaw. Jesús wa pi komo ni nakatapatiyaw, Jehová na ni kintikatapatin (Mat. 6:14, 15). ¿Talakaskin tlakg ni lakapala nasitsiyaw chu nakatapatiyaw amakgapitsin?

6. ¿Tuku max nala komo lakapala nasitsiyaw?

6 Komo ni kuenta natlawayaw tuku makgkatsiyaw, max putum kilhtamaku nasitsiyaw chu max ni naʼakxilhputunaw achatum. Max asta natlawayaw pi amakgapitsi natalan nachuna namakgkatsikgo la akinin. Max ni nalimasiyaputunaw pi sitsinitaw. Pero akxni natitaxtu kilhtamaku nakatsikgo amakgapitsin chu max nakinkatamakgatlinikgoyan (Prov. 26:24-26). Komo chuna xkinkaʼakgspulan, lakgkgolotsin xalak congregación nakinkalimakgtayakgoyan Biblia xlakata namakgatlajayaw kintapuwankan chu nakatapatiyaw amakgapitsin (Lev. 19:17, 18; Rom. 3:11-18). Komo chuna xtitaxtuw, ¿xtlawaw xtastakyaw Biblia?

JEHOVÁ PULALIMA XKACHIKIN

7, 8. 1) ¿La pulalin Jehová xkachikin? 2) ¿Tuku tastakyaw kinkamaxkiyan Biblia chu tuku xlakata kilikgalhakgaxmatatkan?

7 La uku, Jehová pulalin xkachikin chu kamasiyani tiku anta makgtapakgsikgo chu wilakgolh kKatiyatni. ¿La tlawa? Wililh Jesucristo tiku «xpuxkukan nkgamputum nkanajlanin» (Efes. 5:23). Chu Cristo lakgayawalh «skujni xalipaw chu xaskgalala» nakamasiyani chu nakapulalin xkachikin Dios (Mat. 24:45-47). Xlakata Biblia wa xTachuwin Dios, skujni xalipaw lhuwa xtapalh liʼakxilha. Na wa uma tuku xtlawakgo lakgkgolotsin tiku xpulalinankgo  kxapulana siglo (kalikgalhtawakga 1 Tesalonicenses 2:13). ¿Tuku tastakyaw kinkamaxkiyan Biblia?

8 Biblia kinkawaniyan pi putum kilhtamaku kilitamakxtumitkan (Heb. 10:24, 25). Kinkawaniyan pi kimputumkan watiya takanajla kakgalhiw (1 Cor. 1:10). Na kinkawaniyan «pulana kaputsatit xTamapakgsin Dios» (Mat. 6:33). Na kinkalimapakgsiyan nalichuwinanaw Dios kʼakgatunu chiki, niku lamakgolh latamanin (Mat. 28:19, 20; Hech. 5:42; 17:17; 20:20). Jehová kawani lakgkgolotsin xlakata xaskulunku natawilakgo congregaciones (1 Cor. 5:1-5, 13; 1 Tim. 5:19-21). Chu kinkawaniyan pi xaskulunku xliwanat kimaknikan chu ni nalakpuwanaw tuku nitlan chu talismanin nema xkajni Jehová (2 Cor. 7:1).

9. ¿Tiku maklakaskima Jesús xlakata naʼakgatekgsaw xTachuwin Dios?

9 Makgapitsi latamanin max lakpuwankgo pi ni talakaskin nakawanikan tuku masiya Biblia. Pero lata kata 1919, Jesús limaklakaskima «skujni xalipaw chu xaskgalala» xlakata nakamakgtaya xkachikin Dios, naʼakgatekgskgo Biblia chu nakgalhakgaxmatkgo. Akxni tlawayaw xtastakyaw Biblia, congregación xaskulunku tawila, anan takaksni chu akxtum la. Kakinkakgalhskinkan: «¿Naktataya Jesús chu naktlawa tuku nakiwani skujni xalipaw chu xaskgalala?».

LAKAPALA AMA XPUTLAW JEHOVÁ

10. ¿La limasiyakan kxlibro Ezequiel xkachikin Jehová nema wi kʼakgapun?

10 Biblia masiya pi kskujnin Jehová xalak akgapun na liwana talakkaxtawilakgonit. Akgtum liʼakxilhtit, Ezequiel akxilhli la akgtum tamanixni niku xtasiya Jehová kʼakgtum putlaw nema lu lakapala xʼama niku xlakaskin naʼan (Ezeq. 1:4-28). Uma putlaw kilhchanima apulaktu xkachikin Dios nema wi kʼakgapun. Uma apulaktu xkachikin Dios putum kilhtamaku skgalalh wi xlakata natlawa tuku nawanikan. Nachuna, pulalin xkachikin Dios nema wi kKatiyatni. Kalilakpuwaw putum tuku talakgpalinit kxkachikin Dios uma akgkaw kata nema titaxtunit. Kalakapastakwi pi wa Jehová tlawa uma talakgpalit xlakata wa pulalima xkachikin. Cristo chu xʼángeles nialh makgas namasputukgo uma lixkajni kakilhtamaku. Chuna putum namaxkikgo kakni Jehová, xtukuwani chu xlakata wa lakgchan namapakgsinan.

Lu kapaxtikatsiniyaw natalan xlakata lhuwa taskujut tlawakgonit chu lhuwa liskujkgonit. (Kaʼakxilhti párrafo 11).

11, 12. ¿Tuku tlawanit xkachikin Dios k’uma xa’awatiya kilhtamaku?

11 Kalilakpuwaw tuku tlawanit xkachikin Jehová kʼuma xaʼawatiya kilhtamaku. Pulana, putum pukgalhtawakga o atanu nema tatlawanit. Lhuwa ciento natalan lu skujkgonit xlakata natlawakgo xasasti niku pulalinkan taskujut xliputum katiyatni xla xtatayananin Jehová, kWarwick (Nueva York, Estados Unidos). Atanu lhuwa miles natalan makgtlawamakgolh Pukgalhtawakga xla xTatayananin Jehová chu sucursales xlikalanka kKatiyatni. Umakgolh natalan kapulalin Departamento Mundial de Diseño y Construcción. ¿Ni xlikana pi putum kapaxtikatsiniyaw lanka xtaskujutkan umakgolh natalan? Tlan tatlawa umakgolh laklanka chiki xlakata xatapaxuwan chu xliputum xlitliwakgakan mastakgolh tumin xlakskujnin Dios xlikalanka katiyatni. Jehová sikulunatlawa xkachikin xlakata ni tlankajwanan chu  ni makgxtakgnan akxni masta xtamakgtay (Luc. 21:1-4).

12 Xlipulaktiy, kaʼakxilhwi tuku tatlawanit akxni tamasiya. Jehová lu lakgati masiyani xkachikin (Is. 2:2, 3). Kalilakpuwaw escuelas nema limaklakaskin xlakata nakinkamasiyaniyan. Kgalhiyaw Escuela xla Precursores, Escuela xla Tiku lichuwinankgo xTamapakgsin Dios, Escuela de Galaad, Escuela nema kgalhikgo Xalaksasti Betelitas, Escuela xla superintendentes viajantes xla circuito chu xlakpuskatinkan, Escuela xla Lakgkgolotsin xalak Congregación, Escuela niku ankgo putum Lakgkgolotsin chu Siervos Ministeriales chu Escuela niku ankgo Comité de Sucursal chu xlakpuskatinkan. Na chuna kgalhiyaw kisitiojkan xla Internet jw.org, niku tlan natekgsaw Biblia chu likgalhtawakga klhuwa ciento tachuwin. Uma sitio na kgalhi akgtum sección xla laktsu kamanan chu xla familias chu akgtum sección xla noticias. ¿Maklakaskimaw kisitiojkan xla Internet jw.org akxni lichuwinanaw Dios chu akxni kakninaniyaw Dios kfamilia?

 NI KAMAKGXTAKGWI JEHOVÁ CHU KATATAYAW XKACHIKIN

13. ¿Tuku kilitlawatkan kskujnin Jehová?

13 Lanka talakgalhaman makgtapakgsikan kxkachikin Jehová chu katsikan tuku lakaskin natlawayaw. Xlakata katsiyaw tuku makgapaxuwa, kilikgalhakgaxmatatkan chu kilitlawatkan tuku xa’akgstitum. Lhuwa latamanin lakgatikgo tlawakgo tuku nitlan. Pero akinin kilixkajnitkan tuku ni xatlan, chuna la Jehová xkajni (Sal. 97:10). Ni kililakpuwanatkan la tiku «wankgo pi tuku tlan nitlan chu tuku nitlan xatlan» (Is. 5:20). Makgapaxuwaputunaw Jehová. Wa xlakata liwana lakpuwanitaw nitu nalixkajwananaw kkimaknikan, kkintalakapastaknikan chu kkintakanajlakan (1 Cor. 6:9-11). Katsiyaw pi tuku kinkawaniyan kBiblia kaj xlakata tlan nakinkakitaxtuniyan. Nachuna, paxkiyaw Jehová chu ni makgxtakgputunaw. Wa xlakata kgalhakgaxmataw xlimapakgsin kkinchikkan, kcongregación, ktaskujut, kʼescuela o alakatanu (Prov. 15:3). Kalichuwinaw apulaktu niku tlan nalimasiyayaw pi ni makgxtakgaw Jehová.

Natlatni tiku paxkikgo Jehová lakaskinkgo pi xkamanankan tlan katalalinkgolh

14. ¿La nalimasiyakgo natlatni pi ni makgxtakgkgo Jehová?

14 Akxni kastakyawakan kamanan. Anta kBiblia, Jehová kawani natlatni la xlistakyawatkan xkamanankan. Akxni natlatni kgalhakgaxmatkgo Jehová limasiyakgo pi ni makgxtakgkgo. Kuenta xlitlawatkan xlakata nichuna nalakpuwankgo la latamanin xalak kakilhtamaku (Efes. 2:2). Akgtum li’akxilhtit, max kmakgapitsi kachikinin xatlat lakpuwan pi wa lakpuskatin tiku nakamasiyani kamanan. Pero Biblia liwana wan pi wa xatlat tiku lakgchan nakamasiyani xlakata Jehová (Efes. 6:4). Natlatni tiku paxkikgo Jehová lakaskinkgo pi xkamanankan tlan katalalinkgolh Jehová, chuna la talalilh Samuel lata akxni aktsujku xwanit (1 Sam. 3:19).

15. ¿La limasiyaniyaw Jehová pi ni makgxtakgaw akxni wi tuku lu xlakaskinka natlawaputunaw?

15 Akxni wi tuku natlawaputunaw. Akxni wi tuku xlakaskinka natlawaputunaw, pulana kililakapastakatkan tuku lakpuwan Jehová. ¿La natlawayaw? Naputsayaw tastakyaw nema masta kBiblia chu kxkachikin. Chuna nalimasiyaniyaw Jehová pi ni makgxtakgaw. Akgtum li’akxilhtit, makgapitsi latamanin tiku ankgo skujkgo k’atanu país chu kgalhikgo xkamanankan, lakpuwankgo nakamalakgachakgo kxpaiskan xkamanankan akxni aku lakachinkgonit, xlakata wa namakgastakkgo xfamiliajkan. Akxni chuna tlawakgo kamaxki talakaskin chuntiya naskujkgo k’atanu país. Xlikana, chatunu nalaksaka tuku natlawa. Pero natlatni nakakgalhskinkan la akxilha Jehová tuku tlawakgo (kalikgalhtawakga Romanos 14:12). Kalakapastakwi pi akxni wi tuku xlakaskinka tlawaputunaw xlakata kifamiliajkan chu taskujut, kililakpuwanatkan tuku wan Biblia. Lakaskinaw pi kinTlatkan xalak akgapun  nakinkamakgtayayan akxni wi tuku nalaksakaw (Jer. 10:23).

16. ¿Tuku tlawalh chatum tse akxni lakachilh xkgawasa? ¿Tuku makgtayalh xlakata nakatsi laksaka tuku tlan?

16 Akgtum tamakgaxtokgat ankgolh tawilakgo k’atanu país chu anta lakachilh xkgawasakan. Alistalh lakpuwankgolh namalakgachakgo niku xwilakgolh xnatlatnikan. Pero ama kilhtamaku, xapuskat tsukulh katakgalhtawakga xtatayananin Jehová. Katsinilh pi wa xlakgchan namasiyani xkgawasa xlakata Jehová (Sal. 127:3; Prov. 22:6). Wa xlakata lakpuwa komo x’ama malakgacha aktsu xkgawasa niku xwilakgolh xnatlatni. Chuna la wan Biblia tuku kilitlawatkan, uma tsumat tasaskinilh tamakgtaya Jehová xlakata xkatsilh tuku natlawa (Sal. 62:7, 8). Na litachuwinalh xta’akglhuwit tala tiku xmakgalhtawakgema chu amakgapitsi natalan xalak congregación. Amakgapitsi xalak xfamiliajkan kawanikgolh pi xmalakgachakgolh xkgawasakan niku xwi xnatlatnikan. Pero xla katsilh pi uma nitlan. Xchixku akxilhli pi natalan lu xmakgtayakgo xpuskat chu xkgawasa. Lu lakgatilh wa xlakata tsukulh kgalhtawakga Biblia chu tsukulh kata’an xfamilia ktamakxtumit. Kalilakpuwaw la paxuwalh ama tse akxni akxilhli pi Jehová xkgalhtinit x’oración.

17. ¿Tuku kilitlawatkan akxni limakgalhtawakgenanaw Biblia?

17 Akxni nakinkawanikanan tuku natlawayaw. Pulaktum la nalimasiyayaw pi ni makgxtakgaw Dios wa pi nakgalhakgaxmataw tuku nakinkawaniyan xkachikin. Akgtum li’akxilhtit, kalilakpuwaw tuku kilitlawatkan akxni aku tsukumaw limakgalhtawakgenanaw libro Masiya Biblia. Kinkawanikanitan pi kilimaxtutkan kilhtamaku xlakata nakamasiyaniyaw tiku kamakgalhtawakgemaw tlakg liwana nalakgapaskgo xkachikin Jehová. Tlan nakalimakgtayayaw video ¿Tuku tatlawa kPukgalhtawakga? chu folleto ¿Tiku tlawakgo xtalakaskin Jehová la uku? Kinkawanikanitan pi akxni nalimakgalhtawakgekgoyaw libro Masiya Biblia kakalitakgalhtawakgaw libro «Katamakgxtakgtit kxtapaxkit Dios», maski tamunukgonita. Chuna nakamakgtayayaw xlakata «lakatanks» natawilakgo xtakanajlakan (Col. 2:7). ¿Chuntiya tlawayaw tuku kinkawaniyan xkachikin Jehová?

18, 19. ¿Tuku xlakata kilipaxtikatsinitkan Jehová?

18 Lhuwa tuku xlakata kilimaxkitkan paxtikatsinit Jehová. Pulana, xlakata «wa lilamaw, na wa litatsuwajiyaw, chu na wa liʼananaw» (Hech. 17:27, 28). Xlipulaktiy, xlakata wa kinkamaxkin xtachuwin. Chuna la xapulana kstalaninanin Cristo xalak Tesalónica, na lhuwa xtapalh li’akxilhaw xtamaskiwin, xlakata wa «xtachuwin Dios» (1 Tes. 2:13).

19 Xlipulaktutu, kilimaxkitkan paxtikatsinit Jehová xlakata kinkawaninitan kxtachuwin la xʼamigos nalitaxtuyaw (Sant. 4:8). Chu xlipulaktati, kilipaxtikatsinitkan xlakata makgtapakgsiyaw kxkachikin. Nachuna makgkatsiyaw la makgkatsilh xtsokgna Salmo 136, tiku wa: «Kapaxtikatsinitit Jehová, xlakata tlan likatsi; Putum kilhtamaku paxkinan» (Sal. 136:1). Kʼakgatunu versículo xla uma salmo, makglhuwa wan «putum kilhtamaku paxkinan». Komo ni namakgxtakgaw Jehová chu natlawayaw tuku kinkawaniyan xkachikin, nalipaxuwayaw xtapaxkit xliputum kilhtamaku.