Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Mayo kata 2017

 BIOGRAFÍA

Maski akgatapa akit uma ni tlawa pi ni naklichuwinan tuku xaxlikana

Maski akgatapa akit uma ni tlawa pi ni naklichuwinan tuku xaxlikana

Ktamunulh kata 1941, akxni xakkgalhi akgkutiy kata. Pero ni liwana xakʼakgatekgsa xaxlikana xalak Biblia asta kata 1946. ¿La lalh uma? Wa uma tuku lalh kkilatamat.

Kata 1910, kinatlatni makgxtakgkgolh kachikin Tiflis (Georgia) chu ankgolh tawilakgo niku xkakuentajtlawakan animales lakatsu kPelly (Saskatchewan, kxʼoeste Canadá). Akit klakachilh kata 1928, kgalhilh kgalhchaxan kinatalan chu akit tlakg xaktsuku xakwanit. Kintlat nilh akxni akit kajku akgchaxan papa xakkgalhi, chu kintse nilh akxni akit skgataku xakwanit. Chu alistalh nilh kintala tiku pulana lakachilh, Lucy kajku akgkutujun kata xkgalhi. Wa xlakata kinkuku Nick kinkakuentajtlawan akit chu kinatalan.

Akgtum kilhtamaku kifamilia kiʼakxilhli pi xakchipanima kstajan kinkawayujkan. Kaj akgtiy kata xakkgalhi. Lu pekuankgolh xlakata lakpuwankgolh pi xʼama kilaktaya, wa xlakata pixlanka kiwanikgolh pi nialh chuna xaktlawalh. Kaj xakachakgeʼaninit chu ni kkakgaxmatnilh. Maski nitu klanilh, ama kilhtamaku kifamilia katsikgolh pi akit akgatapa xakwanit.

Chatum amigo xalak kifamilia wa pi xakkalh kʼakgtum pukgalhtawakga niku xʼankgo kamanan tiku akgatapanin. Wa xlakata kinkuku Nick kimalakgachalh kʼakgtum pukgalhtawakga niku ankgo tiku akgatapanin kSaskatoon (Saskatchewan). Lu xakpekwama xlakata pukgalhtawakga lu makgat xwi la xwilakgo kifamilia chu akit kaj akgkitsis kata xakkgalhi. Kaj watiya tlan xakakxilhli kifamilia akxni xtawila paskua  chu akxni xakkgalhi vacaciones. Titaxtulh kilhtamaku katsinilh tachuwin xla señas chu lu xaklipaxuwa akxni xakkatakgamanan amakgapitsin laktsu kamanan.

KATSINI TUKU XAXLIKANA XALAK BIBLIA

Kintala Marion tatamakgaxtokgli Bill Danylchuck kata 1939, chu xchatiykan kinkakuentajtlawakgon akit chu kintala Frances. Wa tiku pulana xalak kifamilia tsukukgolh katakgalhtawakgakgo xtatayananin Jehová. Akxni xkgalhikgo vacaciones xliskujkgo xlakata nakimasiyanikgo tuku xkatsinimakgo xalak Biblia. Tuwa xwanit xlakata ni xkatsikgo tachuwin xla señas. Maski chuna, akxilhkgolh pi akit xaklakgati tuku xakkatsinima xlakata Jehová. Kkatsinilh pi tuku xtlawamakgolh chuna xmasiya Biblia, wa xlakata kalh katalichuwinan Dios. Ni makgas kilhtamaku klakpuwa pi naktamunu. Akxni 5 xla septiembre kata 1941, Bill kimunulh kʼakgtum tambo xla likan niku xlitsama chuchut. ¡Chuchut lu, lu kgawiwi xwanit!

Kʼakgtum lanka tamakxtumit kkataya tiku akgatapakgo kCleveland (Ohio) kata 1946

Akxni ktaspitli kkinchik kata 1946, kilaw kʼakgtum lanka tamakxtumit kCleveland (Ohio, Estados Unidos). Xapulana kilhtamaku, kinatalan tsokgwilikgolh tuku lichuwinanka xlakata akit na xakkatsilh tuku lichuwinanka. Chu xliʼakgtiy kilhtamaku lu kpaxuwalh xlakata katsilh pi xʼamaka matitaxtikan taʼakgchuwin kseñas. Chuna tlan klipaxuwalh chu kkakgatekgsli tuku masiya Biblia. ¡Lu klakgatilh!

KKAMASIYANI TUKU XAXLIKANA AMAKGAPITSIN LATAMANIN

Aku ksputnit xliʼakgtiy Guerra xLikalanka Katiyatni, chu latamanin xlimasiyaputunkgo pi xtatayakgo xpaískan. Pero akxni sputli lanka tamakxtumit ktaspitli kʼescuela chu xaklakpuwanit pi nikxni xakama makgxtakga Jehová. Wa xlakata nialh kmaxkilh kakni bandera, chu nialh kilhtlilh himno nacional nachuna nialh kmakgtlawalh paskua. Chu nialh kataʼalh kpusikulan amakgapitsi kamanan. Uma ni lakgatikgolh tiku kskujkgo kʼescuela, wa xlakata fuerza kintlawanikgolh xaklakgpalilh tuku xaklakpuwan chu kiwanikgolh taʼakgsanin. Kincompañeros akxilhkgolh tuku xaklakpuwama, chu chuna tlan kalitachuwinalh Dios. Titaxtulh kilhtamaku makgapitsi makgamakglhtinankgolh tuku xaxlikana. Wa tiku makgamakglhtinankgolh wa Larry Androsoff, Norman Dittrick chu Emil Schneider, tiku skujnanimakgolhku Jehová la uku.

Akxni xakan kʼatanu kachikin, ankgalhin xakkalitachuwinan Dios amakgapitsi tiku xʼakgatapakgo. Akgtum liʼakxilhtit kMontreal kilalh niku xtamakxtumikgo tiku xʼakgatapakgo. Anta ktachuwinalh Eddie Tager, chatum kgawasa tiku pandillero xwanit. Eddie la uku makgtayanama kʼakgtum congregación ktachuwin xla señas xla kLaval (Quebec). Nachuna klakgapasli chatum kgawasa xwanikan Juan Ardanez. Chuna la latamanin xalak Berea xalak pulana siglo, Juan liwana lakputsananilh Biblia xlakata liwana nakatsi pi tuku xkatsinima xaxlikana xwanit (Hech. 17:10, 11). Xla xtatayana Jehová litaxtulh chu liskujli la kgolotsin kʼOttawa (Ontario) asta akxni nilh.

Klichuwinanaw Dios kkatijin xkilhtsukut kata 50

Kata 1950, kalh tawila kVancouver. Maski xaklakgati xakkalitachuwinan Dios tiku xʼakgatapakgo, ankgalhin klakapastaka tuku kiʼakgspulalh ktiji akxni ktachuwinalh chatum puskat tiku ni xʼakgatapa. Xwanikan Chris Spicer. Tlan tlawalh pi akgatunu papa namakglhtinan likgalhtawakga chu xkimalakgapasniputun xchixku, Gary. Kilalh  kxchik chu klimaklakaskiw notas xlakata naklatachuwinanaw. Nialh klaʼakxilhwi asta max akgtiy kata titaxtulh, kʼakgtum lanka tamakxtumit klaʼakxilhparaw kToronto (Ontario). ¡Lu kaks kimalakawanilh! Gary xʼama tamunu ama kilhtamaku. Uma kimalakapastakalh pi lu xlakaskinka chuntiya naklichuwinan Dios. Ni katsiyaw komo tiku litachuwinanaw Dios, max alistalh namakgamakglhtinan tuku xaxlikana.

Alistalh ktaspitli kSaskatoon. Anta klakgapasli chatum puskat tiku kiwanilh pi xakkamakgalhtawakgelh chatiy xlaktsuman tiku stiyun xwankgonit chu xʼakgatapakgo. Xkawanikan Jean chu Joan Rothenberger. Xchatiykan xkgalhtawakgamakgolh kpukgalhtawakga niku akit kkgalhtawakgalh. Ni makgas kilhtamaku kalitachuwinankgolh xcompañeros tuku xkatsinimakgolh, chu kgalhkitsis laktsuman xtatayananin Jehová wankgolh. Chatum wa Eunice Colin. Klakgapasli akxni xaʼawatiya kata kkilalh kʼescuela. Ama kilhtamaku kimaxkilh akgtum dulce chu kinkgalhskilh komo tlan xʼamigo xaklitaxtulh. Eunice lu xlakaskinka litaxtulh kilatamat: kimpuskat.

Akit chu Eunice kkata 1960 chu kkata 1989

Akxni xtse Eunice katsilh pi xlimakgalhtawakgemaka Biblia, wanilh director xalak escuela pi xwanilh xtsumat pi xmakgxtakgli takgalhtawakga. Maski chuna tlawalh chu makglhtilh makgapitsi likgalhtawakga, Eunice liwana xlakpuwanit pi ni namakgxtakga Jehová. Akxni lakpuwa pi natamunu, xnatlatni wanikgolh: «Komo xtatayana Jehová nalitaxtuya nialh unu katitawila». Wa xlakata akxni xkgalhi akgkutujun kata Eunice alh katatawila akgtum familia tiku xtatayananin Jehová. Chuntiya xlimakgalhtawakgemaka Biblia chu tamunulh. Ktamakgaxtokgwi kata 1960, chu xnatlatni ni minkgolh akxni ktamakgaxtokgwi. Chuna la titaxtulh kata, xnatlatni kimpuskat tsukukgolh maxkikgo kakni kintakanajlakan chu la xakkamakgastakmaw kinkamanankan.

 JEHOVÁ KINKUENTAJTLAWANIT

Kinkgawasa Nicholas chu xpuskat, Deborah, kBetel xla Londres

Kgalhtujun kamanan kkgalhiw chu xlakan ni xʼakgatapakgo. Tuwa kkamakgastakwi. Pero kliskujwi xlakata xkatsinikgolh tachuwin xla señas xlakata tlan xakkatachuwinaw chu xakkamasiyaniw tuku xaxlikana. Natalan xalak congregación lu kinkamakgtayakgon. Akgtum liʼakxilhtit chatum tlat kinkatsokgnin pi chatum kinkgawasakan lixkajnit xchuwinama anta kPukgalhtawakga. Tunkun anta klakkaxtlawaw. Kgalhtati kinkamanan James, Jerry, Nicholas chu Steven kgolotsin litaxtukgo kxcongregacionkan chu akxtum skujnanimakgolh Jehová. Nicholas chu xpuskat Deborah, makgtayanamakgolh ksucursal xla Gran Bretaña ktachuwin xla señas. Steven chu xpuskat, Shannan makgtayanamakgolh ksucursal xla Estados Unidos ktachuwin xla señas.

Kinkamanan chu xlakpuskatin tanu tanu la makgtayanankgo la talichuwinan Dios ktachuwin xla señas

Lu nitlan, pero Eunice nilh xlakata xkgalhi cancer akxni nina xakmakgatsiyaw 40 kata lata xaktamakgaxtokgnitaw. Lata ama kilhtamaku la xtatatla, xtakanajla ankgalhin tliwakga tawi xlakata talakastakwanat. Lu kkgalhkgalhima ama kilhtamaku akxni nakakxilhpara.

Faye chu James, Jerry chu Evelyn, Shannan chu Steven

 Febrero kata 2012 ktamakgwasli chu ktatankilhtlakgelh. Chu kakxilhli pi xtalakaskin wi tiku nakimakgtaya, wa xlakata kalh niku wi kinkgawasa chu xpuskat. Kanaw kʼakgtum congregación ktachuwin xla señas kCalgary (Alberta), anta kliskuja la kgolotsin. Xlikana pi kajku xlimakgtum kwi kcongregación xla señas. Wa xlakata, ¿la ktlawalh xlakata chuntiya xtatliwakglhli la xaktalalin Jehová putum ama kata akxni xakwi kʼakgtum congregación xaʼinglés? Xlakata wa Jehová kimakgtayalh. Xla makgantaxtilh xtamalaknun xlakata nakakuentajtlawa tiku nitu kgalhi (Sal. 10:14). Lu kapaxtikatsini tiku katsinikgolh señas chu kintsokgnikgolh, nachuna tiku kimatitaxtinikgolh taʼakgchuwin kʼseñas xlakata tlan xakakgatekgsnilh.

Kʼescuela xla precursores ktachuwin xla señas, akxni xakkgalhi 79 kata

Milh kilhtamaku lu xaklipuwan chu lu xaktaxlajwanima, xlakata ni xakʼakgatekgsa tuku xlichuwinankan chu xakmakgkatsi pi niti xkatsi la makgtayakan tiku akgatapakgo. Ama kilhtamaku xaklilakpuwan tuku wanilh Pedro Jesús: «Tlati, ¿xati naklakganaw? Man wix nkgalhiya ntachuwin xla latamat wa ntu xaliankgalhin» (Juan 6:66-68). Chuna la lhuwa tiku akgatapakgo chu akglhuwa kata la skujnanimakgolh Jehová, kkatsininit ni lakapala naksitsi. Nachuna kkatsininit naklipawan Jehová chu xkachikin. Uma lu kimakgtayanit. La uku anan lhuwa likgalhtawakga kkintachuwin, chu tlan klitamakgtaya tamakxtumit chu laklanka tamakxtumit ktachuwin xla señas americano. Xlikana pi lu kpaxuwanit kkilatamat chu lhuwa tasikulunalin kgalhinit xlakata klakskujnanima Jehová, kiDioskan.