Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Mayo kata 2016

«Kapitit, na kamasiyunikgotit xlipaks akgmakgat chixkuwin»

«Kapitit, na kamasiyunikgotit xlipaks akgmakgat chixkuwin»

«Kapitit, na kamasiyunikgotit xlipaks akgmakgat chixkuwin, chu [k]alimunukgotit [...] na namasiyunikgoyatit mpi natlawakgoy xlipaks yuma ntu kkalimapakgsinitan» (MAT. 28:19, 20).

TAKILHTLIN: 141, 17

1, 2. ¿Tuku takgalhskinin taxtuyacha xlakata tuku tatsokgnit kMateo 24:14?

JESÚS wa pi kxaʼawatiya kilhtamaku, xalakwan tamakatsin xlakata Tamapakgsin xʼamaka kalitachuwinankan putum, o xlipaks, latamanin (Mat. 24:14). Xtatayananin Jehová kinkalakgapaskanan kxlikalanka Katiyatni xlakata lichuwinanaw xalakwan tamakatsin. Makgapitsi lakgatikgo taskujut nema tlawayaw chu makgapitsi ni, pero kinkamaxkikgoyan kakni xlakata kintaskujutkan. ¿Tlan nawanaw pi kajwatiya akinin tlawamaw taskujut nema Jesús wa pi xʼama tatlawa? ¿Tuku xlakata liwana katsiyaw pi chuna?

2 Lhuwa takanajla wankgo pi tlawamakgo tuku Jesús lichuwinalh. Pero xlakan kajwatiya lichuwinankgo Dios ksikulan, ktelevisión, o kʼInternet, o max kajwatiya kawanikgo amakgapitsin la katsinikgolh xlakata Jesús. Makgapitsi lakpuwankgo pi tlawamakgolh tuku wa Jesús xlakata kamakgtayakgo tiku ni kgalhikgo tumin o makgtayanankgo la makuchinanin,  enfermeras, o makgalhtawakgananin. Pero ¿wa uma taskujut nema Jesús lichuwinalh?

3. Xlakata tuku lichuwinan Mateo 28:19, 20, ¿tuku pulaktati xlitlawatkan kstalaninanin Cristo?

3 ¿Xlakaskin Jesús pi kstalaninanin xkgalhkgalhikgolh pi latamanin xkalakgminkgolh? Ni. Akxni xlakastakwananita, Jesús kawanilh kstalaninanin: «Kapitit, na kamasiyunikgotit xlipaks akgmakgat chixkuwin, chu [k]alimunukgotit [...] na namasiyunikgoyatit mpi natlawakgoy xlipaks yuma ntu kkalimapakgsinitan» (Mat. 28:19, 20). Anan pulaktati tuku kilitlawatkan kstalaninanin Cristo. Kilimakgalhtawakgatkan latamanin, nakamunuyaw, chu nakamasiyaniyaw. Pero pulana, kiliʼanatkan xlakata nakaputsayaw. Chatum tiku lakputsanani Biblia wa pi chatunu chatunu tiku kanajla xliʼanat niku wilakgolh latamanin, chuna xlitlawat maski naʼan xaʼalakgatu tiji o napatakuta pupunu (Mat. 10:7; Luc. 10:3).

4. ¿Tuku talakaskin xlakata nalitaxtukan «xchipananin chixkuwin»?

4 ¿Tuku xlakaskin Jesús pi xtlawakgolh kstalaninanin? ¿Xlakaskin pi xakstukan xlichuwinankgolh xalakwan xalaksasti, o xlakaskin pi xtalakkaxtawilakgolh la akgtum grupo? Xlakata chatum lataman nila xlichuwinalh xalakwan tamakatsin «kputum laklanka kachikinin», xtalakaskin pi kstalaninanin Jesús xtalakkaxtawilakgolh la akgtum grupo. Wa uma tuku Jesús xkilhchanima akxni kawanilh kstalaninanin pi xlitaxtukgolh «xchipananin chixkuwin» (kalikgalhtawakga Mateo 4:18-22). Jesús ni xkilhchanima chatum xchipana skiti tiku xakstu skuja chu kgalhkgalhi pi skiti naxkakgo anzuelo. Wata xlichuwinama skitinanin tiku maklakaskinkgo tsalh. Xlakata chuna naskitinankan xtalakaskin pi lhuwa latamanin lu kskujkgolh, makxtum xtawilakgolh chu liwana xtalakkaxtawilakgolh (Luc. 5:1-11).

5. ¿Tuku pulaktati takgalhskinin kilikgalhtitkan, chu tuku xlakata?

5 Komo katsiputunaw tiku lichuwinamakgolh xTamapakgsin Dios, kilikgalhtitkan umakgolh takgalhskinin:

  • ¿Tuku xlimakatsininatkan kstalaninanin Cristo?

  • ¿Tuku nakamatlawi chuna natlawakgo?

  • ¿La xlimakgantaxtitkan uma taskujut?

  • ¿Asta niku nalichuwinankgo Dios, chu la xlimakgas namakgapala?

Xtakgalhtin umakgolh takgalhskinin nakinkamakgtayayan nakatsiyaw tiku tlawamakgolh uma taskujut nema lakgmaxtunan. Chu uma nakinkamakgpuwantiniyan (1 Tim. 4:16).

¿TUKU XLIMAKATSININATKAN KSTALANINANIN CRISTO?

6. ¿Tuku xlakata liwana katsiyaw pi xtatayananin Jehová lichuwinamakgolh tuku Jesús limapakgsinalh?

6 (Kalikgalhtawakga Lucas 4:43). Jesús lichuwinalh «xalaksasti tamakatsin xla xtamapakgsin Dios». Chu lakaskin pi kstalaninanin na nalichuwinankgo uma. ¿Tuku takanajla lichuwinamakgolh uma tamakatsin? Kajwatiya xtatayananin Jehová. Uma katsikgo asta tiku ni kinkaʼakxilhputunkgoyan. Kaʼakxilhwi tuku wanilh chatum xtatayana  Jehová chixku tiku misionero chu sacerdote xlitaxtunit. Xla wanilh pi klhuwa países xlatamanit chu pi kʼakgatunu país xkakgalhskin xtatayananin Jehová tuku tamakatsin xlichuwinankgo. Chixku wa: «Xlakata putum lu laktontos xwankgonit, watiya tuku xkgalhtinankgo: “Xalaksasti tamakatsin xlakata Tamapakgsin”». Tuku uma chixku wa limasiya pi ni laktontos akinin, wata limasiya pi watiya tuku masiyayaw xlakata akinin xaxlikana kstalaninanin Cristo (1 Cor. 1:10). Nachuna, tuku tlakg xlakaskinka lichuwinan uma revista wa Tamapakgsin. Xatakgatsin xtítulo wa uma: Makatsinina. Lichuwinan xTamapakgsin Jehová. Tamakgpitsi k254 tachuwin, chu imprimirlikan 59 millones akgatunu papaʼ. Revista Makatsinina wa nema tlakg tamakgpitsi kxlikalanka katiyatni.

Kajwatiya xtatayananin Jehová lichuwinamakgolh xTamapakgsin Dios

7. ¿Tuku xlakata wanaw pi tiku kaj wankgo pi kstalaninanin Cristo ni makatsininankgo tuku Jesús lichuwinalh?

7 Tiku pulalinkgo ni xaxlikana takanajla ni lichuwinankgo xalakwan tamakatsin xlakata Tamapakgsin. Chu komo lichuwinankgo Tamapakgsin, wankgo pi linaw kkinakujkan (Luc. 17:21). Ni masiyakgo pi xTamapakgsin Dios akgtum limapakgsin nema wi kʼakgapun, chu ni masiyakgo pi wa Jesús xMapakgsina. Xlakan lichuwinankgo Jesús kNavidad o kSemana Santa. Ni masiyakgo pi Tamapakgsin nalakkaxtlawakgo putum taʼakglhuwit xalak kakilhtamaku chu pi nialh makgas namasputu tuku nitlan kKatiyatni (Apocalipsis [Revelación] 19:11-21). Liwana tasiya pi ni katsikgo tuku Jesús natlawa la xMapakgsina xTamapakgsin Dios. Chu komo ni akgatekgskgo tuku Jesús lichuwinalh, na ni akgatekgskgo tuku xlakata xlimakatsininatkan.

¿TUKU TLAWA PI KSTALANINANIN CRISTO NALICHUWINANKGO DIOS?

8. Akxni nalichuwinanaw xalakwan tamakatsin, ¿tuku ni natlawayaw?

8 Kstalaninanin Cristo ni nalichuwinankgo xalakwan tamakatsin xlakata natlajakgo tumin o xlakata nalitlawakgo xalakswan laklanka chiki. Jesús wa: «Kaj chunata makgamakglhtinantit, pus na kaj chunata nkamastatit» (Mat. 10:8). Wa xlakata ni nakgalhkgalhiyaw kakinkamaxkikan tumin akxni nalichuwinanaw Dios (2 Cor. 2:17). Xlakata lichuwinankgo Dios, kstalaninanin Jesús ni xliskinatkan kakaxokgonika (kalikgalhtawakga Hechos 20:33-35). Maski ni tuwa taʼakgatekgsa tuku limapakgsinalh Jesús, lhuwa takanajla skinkgo tumin ksikulankan xlakata nakaxokgonikgo tiku pulalinankgo chu atanu tiku anta skujkgo. Wa xlakata lhuwa tiku pulalinkgo ni xaxlikana takanajla lhuwa tumin kgalhikgo (Apoc. 17:4, 5).

9. ¿Tuku tlawa pi xtatayananin Jehová nalichuwinankgo xalakwan tamakatsin?

9 ¿Nachuna tlawakgo xtatayananin Jehová? ¿Skinkgo tumin kxpukgalhtawakgakan o niku tlawakgo laklanka tamakxtumit? Ni. Taskujut nema tlawakgo lixokgokan tumin nema xatapaxuwan maskiwinankgo latamanin. Maski ni kaxokgonikan xlakata namasiyakgo xlakata Biblia, kata nema titaxtulh lichuwinankgolh Dios atsinu ni xtakgatsi 2,000 millón horas chu pulalinkgolh liwaka akgnajatsa millones takgalhtawakga xalak Biblia akgatunu papaʼ. Xatapaxuwan laktlawakgo xtuminkan xlakata natlawakgo uma taskujut. Chatum tiku lakputsanan wa pi tuku tlakg xlakaskinka tlawakgo xTatayananin Jehová wa nalichuwinankgo xalakwan  tamakatsin chu namasiyanankgo. Chu wa pi ni kgalhikgo pulalinanin tiku talakaskin nakaxokgonikan. Pero komo xtatayananin Jehová ni lichuwinanaw Dios xlakata nakinkaxokgonikanan, ¿tuku xlakata chuna tlawayaw? Xlakata paxkiyaw Jehová chu latamanin. Uma makgantaxti tuku wan Salmo 110:3 (kalikgalhtawakga).

¿TUKU MAKLAKASKINKGO KSTALANINANIN CRISTO XLAKATA NALICHUWINANKGO DIOS?

Lichuwinanaw Dios kaniwa niku wilakgolh latamanin. (Kaʼakxilhti párrafo 10).

10. ¿La tlawalh Jesús chu kstalaninanin xlakata nalichuwinankgo Dios?

10 ¿Tuku tlawalh Jesús chu kstalaninanin xlakata nalichuwinankgo Dios? Xʼankgo kaniwa niku xwilakgolh latamanin. Akgtum liʼakxilhtit, xlichuwinankgo ktiji chu kpustan. Chu xʼankgo kʼakgatunu chiki (Mat. 10:11; Luc. 8:1; Hech. 5:42; 20:20). Akxni liwana xlakkaxwilikgo naʼankgo kʼakgatunu chiki tlan xkalakgchankgo putum latamanin.

11, 12. Akxni tamalakxtumiyaw tuku tlawakgo xtatayananin Jehová chu tiku makgtapakgsikgo ni xaxlikana takanajla, ¿tuku tanu akxilhaw xlakata la lichuwinankgo Dios?

11 ¿Chu tuku tlawakgo tiku makgtapakgsikgo ni xaxlikana takanajla? ¿Lichuwinankgo xalakwan tamakatsin xlakata Tamapakgsin chuna la tlawalh Jesús? Lhuwa wata kaxokgonikgo xpulalinanin xlakata namastakgo taʼakgchuwin. Pero xlakan ni kamasiyanikgo latamanin xlakata Dios, chuna la xtlawa Jesús. Kaj kuentajtlawakgo ni nataxtukgo ksikulan tiku makgtapakgsikgoya. Minit kilhtamaku kamakgpuwantinikgonit tiku ankgo ksikulan nalichuwinankgo Dios. Akgtum liʼakxilhtit, kkata 2001, papa Juan Pablo II tsokgli kmaktum carta pi católicos xlimakatsininatkan  xalakwan tamakatsin chuna la apóstol Pablo, tiku wa: «Kgoxuta nkit lapi ni xakliakgchuwinalh yuma xatlan tamakatsinin». Papa na wa pi ni nalichuwinankgo Dios kaj makgapitsi tiku liwana kamasiyanikanit, wata putum tiku makgtapakgsikgo ksikulan. Pero kaj makgapitsi kgalhakgaxmatkgolh.

12 Kajwatiya xtatayananin Jehová lichuwinankgo pi Jesús mapakgsinama lata kata 1914. Tuku tlakg xlakaskinka akxilhkgo kxlatamatkan wa nalichuwinankgo Dios, chuna la limapakgsinalh Jesús (Mar. 13:10). Maktum libro nema lichuwinan takanajla wa pi xtatayananin Jehová lu xlakaskinka akxilhkgo nalichuwinankgo Dios. Wa pi kamakgtayakgo tiku tsinksnimakgolh, tiku xakstukan wilakgolh o tatatlakgo, pero chuntiya lakapastakkgo pi tuku tlakg xlakaskinka xlitlawatkan wa nalichuwinankgo pi uma kakilhtamaku namasputukan chu tuku kilitlawatkan xlakata nalakgtaxtuyaw. Chu uma xlikana, xtatayananin Jehová chuntiya lichuwinamaw uma tamakatsin chu tlawayaw chuna la tlawalh Jesús chu kstalaninanin.

¿ASTA NIKU NALICHUWINANKAN DIOS, CHU LA XLIMAKGAS NAMAKGAPALA?

13. ¿Asta niku nalichuwinankan Dios?

13 Jesús wa pi kstalaninanin xʼamakgo lichuwinankgo Dios chu xʼamakgo masiyakgo xalakwan tamakatsin «xliputum katiyatni». Kalimapakgsilh pi xkamakgalhtawakgakgolh latamanin «kputum laklanka kachikinin» (Mat. 24:14; 28:19, 20). Uma kilhchanima pi xʼama talichuwinan xalakwan tamakatsin kxlikalanka katiyatni (kaʼakxilhti recuadro «¿Tuku kilhchanima?»). Kstalaninanin Cristo xlimakatsininatkan xalakwan tamakatsin kputum katiyatni.

14, 15. ¿Tuku xlakata tlan wanaw pi chuna la xtatayananin Jehová lichuwinamakgolh Dios, makgantaxti tuku wa Jesús? (Kaʼakxilhti xapulana dibujo).

14 Chuna la akxilhwi, Jesús wa pi tamakatsin xlakata Tamapakgsin xʼama talichuwinan kxlikalanka Katiyatni. ¿Tuku xlakata wanaw pi chuna la xtatayananin Jehová lichuwinamakgo Dios, makgantaxti uma tuku Jesús wa? Anta kʼEstados Unidos, tiku kaj wankgo pi kstalaninanin Cristo kgalhikgo max 600,000 xpulalinanin takanajla. Pero kʼuma país max 1,200,000 xtatayananin Jehová lichuwinamakgolh xtamakatsin Jesús. Chu kxlikalanka katiyatni wilakgolh max 400,000 sacerdotes católicos, pero anan liwaka akgtsayan millones xtatayananin Jehová tiku lichuwinamakgolh Dios k240 países chu kachikinin. Liwana tasiya pi xtatayananin Jehová lichuwinamakgo Dios kxlikalanka Katiyatni. Uma malanki chu maxki kakni Jehová (Sal. 34:1; 51:15).

15 Xtatayananin Jehová, lhuwa latamanin kalitachuwinamputunaw xalakwan tamakatsin akxni nina min lisputni. Wa xlakata, tlawanitaw traducción chu tlawanitaw lhuwa millón libros, revistas, tratados chu invitaciones kliwaka 700 tachuwin. Chu nikxni matajinanaw xlakata likgalhtawakga nema makgpitsiyaw. Kata nema titaxtulh tlawaw 4,500 millones likgalhtawakga nema takilhtinit kBiblia. Na tlawanitaw liwaka 200 millones copias xla Traducción del Nuevo Mundo de las Santas Escrituras kliwaka 130 tachuwin. Chu kkisitiojkan xla Internet wi likgalhtawakga kliwaka 750 tachuwin. Kajwatiya xtatayananin Jehová tlawamaw uma lu lanka taskujut.

16. ¿Tuku xlakata katsiyaw pi xtatayananin Jehová kgalhikgo xʼespíritu santo Dios?

16 ¿La xlimakgas namakgapala taskujut  nema lichuwinalh Jesús? Xla wa pi namakgapala asta akxni namin lisputni (Mat. 24:14). Xtatayananin Jehová chuntiya lichuwinamaw xalakwan tamakatsin kʼuma xaʼawatiya kilhtamaku xlakata kgalhiyaw xʼespíritu santo Dios (Hech. 1:8; 1 Ped. 4:14). Makgapitsi tiku xala atanu takanajla wankgo pi na kgalhikgo espíritu santo. Pero ¿na tlan tlawakgo tuku tlawamakgo xtatayananin Jehová kʼuma xaʼawatiya kakilhtamaku? Makgapitsi litsakgsakgonit nalichuwinankgo Dios la akinin, pero nila chuna tlawakgonit. Amakgapitsi lichuwinankgonit Dios, pero ni makgas. Chu amakgapitsi ankgo kʼakgatunu chiki, pero ni lichuwinankgo xTamapakgsin Dios. Wa xlakata ni tlawamakgolh taskujut nema Jesús matsukilh.

¿TIKU LICHUWINANKGO XTAMAPAKGSIN DIOS LA UKU?

17, 18. 1) ¿Tuku likatsiyaw pi wa xtatayananin Jehová tiku lichuwinamakgolh xTamapakgsin Dios? 2) ¿Tuku xlakata tlan makgantaxtiyaw uma taskujut?

17 Wa xlakata ¿tiku lichuwinamakgo xalakwan tamakatsin la uku? Kajwatiya xtatayananin Jehová. ¿Tuku xlakata liwana katsiyaw? Pulana, xlakata lichuwinamaw tamakatsin nema xlilat, tamakatsin xlakata Tamapakgsin. Pulaktiy, xlakata lichuwinamaw chuna la xlilat, uma wamputun pi anaw kaputsayaw latamanin. Pulaktutu, xlakata xlilat tuku chuna kinkamatlawiyan, xlakata paxkiyaw Jehová chu latamanin. Pulaktati, kintaskujutkan tatlawama asta niku lu makgat, xlakata kalitachuwinanaw Dios latamanin kputum kachikinin chu tachuwin. Chu pulakkitsis, xlakata chuntiya nalichuwinanaw Dios asta akxni namin lisputni.

18 Lu kaks kinkamalakawaniyan tuku tlawama xkachikin Jehová xlakata nalichuwinan xalakwan tamakatsin kʼuma xaʼawatiya kilhtamaku. ¿La chuna tlawayaw? Apóstol Pablo wa pi Dios kinkamakgtayayan, tlawa pi wi tuku natlawaputunaw chu kinkamaxkiyan litliwakga xlakata namakgantaxtiyaw (Filip. 2:13). Wa xlakata skiniyaw Jehová pi kakinkamaxkin litliwakga xlakata lu naliskujaw nalichuwinanaw Dios (2 Tim. 4:5).