Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Mayo kata 2016

¿Chuntiya lakgpalima Biblia mintayat?

¿Chuntiya lakgpalima Biblia mintayat?

«Kalakgpalitit mintalakapastaknikan» (ROM. 12:2TNM).

TAKILHTLIN: 29, 52

1-3. 1) ¿Tuku max tuwa namakgkatsiyaw nalakgpaliyaw akxni tamununitawa? 2) Komo lu tuwa makgkatsiyaw natalakgpaliyaw, ¿tuku takgalhskinin max nakinkatlawanikanan? (Kaʼakxilhti xapulana dibujo).

AKXNI nina xtatayana Jehová xwanit, Kevin akglhuwa kata xlismaninit nakgamanan xlakata natlaja tumin, kxkuli, xʼakgkgachitama chu xmaklakaskin drogas [1] (kaʼakxilhti nota niku kgalhsputa artículo). Akxni lakgapasli Jehová, xʼamigo litaxtuputulh. Pero akxni nina xtamunu, lu lhuwa tuku talakaskilh nalakgpali kxlatamat. Xlakata xtamakgtay Jehová chu xTachuwin, lakgpalilh xlatamat (Heb. 4:12).

2 Akxni xtamununita, chuntiya xtalakaskin pi Kevin xtalakgpalilh xlakata tlakg tlan kstalanina Cristo xwa (Efes. 4:31, 32). Akgtum liʼakxilhtit, lu lakapala ksitsi. Lu kaks malakawanilh akxni akxilhli pi lu tuwa xmakgkatsi ni tunkun nasitsi. Xla wan pi tlakg tuwa kitaxtunilh namakgatlaja nitlan xtayat nixawa namakgxtakga putum tuku nitlan  xtlawa akxni nina xtamunu. Wa xlakata tasaskinilh Jehová pi xmakgtayalh chu lakpuwa liwana nalikgalhtawakga Biblia. Uma makgtayalh natalakgpali.

3 Akxni nina xtamunuyaw, lhuwa akinin lu lakgpaliw kilatamatkan. Chuna tlan makgantaxtiw tuku wan Biblia. Pero max akxilhaw pi chuntiya talakaskin nalakgpaliyaw tuku nitlan kkintayatkan xlakata tlakg nalimasiyayaw xtayat Dios chu Cristo (Efes. 5:1, 2; 1 Ped. 2:21). Akgtum liʼakxilhtit, max lismaninitaw nitlan kalichuwinanaw amakgapitsi o tunkun wanaw tuku ni lakgatiyaw. O max min kilhtamaku ni tlawayaw tuku xaʼakgstitum xlakata tuku nalakpuwankgo o nawankgo amakgapitsin. Max lhuwa kata liskujnitaw, pero chuntiya tlawayaw. Wa xlakata max nakinkakgalhskinkanan: «¿Tuku xlakata lu tuwa kmakgkatsi naklakgpali uma? ¿Tuku kilitlawat xlakata chuntiya naklakgpali kintayat chuna la wan Biblia?».

TLAN MAKGAPAXUWAYAW JEHOVÁ

4. ¿Tuku xlakata nila makgapaxuwayaw Jehová putum kilhtamaku?

4 Akinin paxkiyaw Jehová chu makgapaxuwaputunaw xliputum kinakujkan. Pero ni putum kilhtamaku chuna tlawayaw, xlakata makglakgalhinanin akinin. Makglhuwa makgkatsiyaw la apóstol Pablo, tiku wa pi xtlawaputun tuku tlan, pero ni putum kilhtamaku tlan chuna xtlawa (Rom. 7:18; Sant. 3:2).

5. 1) ¿Tuku talakaskilh nalakgpaliyaw xlakata tlan xtamunuw? 2) ¿La chuntiya nitlan kinkatlawaniyan kintalakgalhinkan?

5 Xlakata xtamunuw chu xtatayananin Jehová xlitaxtuw, talakaskilh namakgxtakgaw tuku Jehová xkajni (1 Cor. 6:9, 10). Pero xlakata makglakgalhinanin akinin, chuntiya tlawayaw tuku nitlan, maski akglhuwata kata tamununitaw (Col. 3:9, 10). Max namin kilhtamaku natlawaputunaw tuku nitlan o nitlan namakgkatsiyaw, o max tuwa namakgkatsiyaw namakgatlajayaw nitlan kintayatkan. Max asta akglhuwata kata talatlawamaw uma kintalakgalhinkan.

6, 7. 1) Maski makglakgalhinanin akinin, ¿tuku xlakata tlan xʼamigos Jehová nalitaxtuyaw? 2) ¿Tuku xlakata chuntiya naskiniyaw Jehová pi kakinkatapatin?

6 Maski makglakgalhinanin, tlan xʼamigos Jehová nalitaxtuyaw chu naskujnaniyaw. Kalakapastakwi pi xʼamigos litaxtuw xlakata wi tuku tlan kinkatekgsnin chu lakaskilh nalakgapasaw (Juan 6:44). Xkatsi pi akinin makglakgalhinanin chu wa xlakata tlawayaw tuku nitlan. Maski chuna, Jehová lakaskilh pi xʼamigos xlitaxtuw.

7 Xlakata Jehová lu kinkapaxkiyan, kinkamaskiwin tuku lu xtapalh. Malakgachacha xKgawasa kKatiyatni xlakata xmastalh xlatamat chu kxokgolh kintalakgalhinkan (Juan 3:16). Akxni tlawayaw tuku nitlan, tlan skiniyaw Jehová kakinkatapatin. Xlakata xtamakamastan Jesús, Dios kinkatapatiyan chu kinkamaxkiyan talakaskin chuntiya xʼamigos nalitaxtuyaw (Rom. 7:24, 25; 1 Juan 2:1, 2). Kalakapastakwi pi Jesús nilh xpalakatakan tiku makgxtakgkgo xtalakgalhinkan. Wa xlakata, komo lakpuwanaw pi tuku tlawaw lu nitlan, chuntiya kaskiniw Jehová kakinkatapatin. Komo ni kskiniw kakinkatapatin, xlitaxtulh la komo ni xmakgachakgamputuw akxni  lixkajni kimakankan. Lu paxtikatsiniyaw Jehová, xlakata kinkamaxkiyan talakaskin xʼamigos nalitaxtuyaw maski makglakgalhinanin akinin (kalikgalhtawakga 1 Timoteo 1:15).

Komo xʼamigos Dios litaxtuputunaw, talakaskin chuntiya naliskujaw xlakata natlawayaw la Jehová chu xKgawasa

8. ¿Tuku xlakata kiliskujatkan xlakata namakgatlajayaw tuku nitlan tlawaputunaw?

8 Xlikana, nila nawanaw pi akinin ni linaw kuenta xlakata kgalhiyaw talakgalhin. Jehová kinkawaninitan tuku tayat xlikgalhitkan xʼamigos (Sal. 15:1-5). Wa xlakata, komo xʼamigos Dios litaxtuputunaw, talakaskin chuntiya naliskujaw xlakata natlawayaw la Jehová chu xKgawasa. Na kiliskujatkan namakgatlajayaw tuku nitlan tlawaputunaw chu nakalakgmakganaw nema matlaniyaw. Maski akglhuwata kata tamununitawa, chuntiya talakaskin naliskujaw tlakg tlan tayat nakgalhiyaw (2 Cor. 13:11).

9. ¿Tuku xlakata katsiyaw pi tlan chuntiya nalilhakgananaw xasasti tayat?

9 Apóstol Pablo mastalh uma tastakyaw: «Milimakgaxtakgatkan wa ntu xamakgan mintayatkan, chu lantla xamakgan chixku xwanitantit ntu xmakgtsankganit ntu ni tlan lantla ntlaway wa ntu xtatlawaputu wa ntu akgskgawiy». Chu wampa: «Kalakgpalitit mintapuwankan lantla mintayatkan. Na kalilakgpalinantit xasasti chixku wa ntu litatlawanit xtachuna Dios xtapuwan, lantla ntu lu[...] wa talulokgtat ntu ntlaway, chu xasantujlani kxlatamat» (Efes. 4:22-24). Uma wamputun pi chuntiya kiliskujatkan xlakata natalakgpaliyaw chu nalilhakgananaw xasasti tayat. Wa xlakata, maski akglhuwata kata skujnanimaw Jehová, tlan tlakg nakatsiniyaw xlakata xtayat. Chu Biblia tlan kinkamakgtayayan xlakata tlakg nalimasiyayaw xtayat Jehová.

¿TUKU XLAKATA LU TUWA?

10. 1) ¿Tuku kilitlawatkan xlakata Biblia chuntiya nakinkamakgtayayan natalakgpaliyaw? 2) ¿Tuku takgalhskinin kitaxtu xlakata uma?

10 Putum akinin kgalhakgaxmatputunaw tuku wan Biblia. Pero komo chuntiya talakgpaliputunaw, talakaskin lu naliskujaw. ¿Tuku xlakata talakaskin lu naliskujaw? ¿Nila tlawa Jehová pi ni tuwa namakgkatsiyaw natlawayaw tuku tlan?

11-13. ¿Tuku xlakata lakaskin Jehová kaliskujwi namakgatlajayaw tuku nitlan tlawaputunaw?

11 Akxni lilakpuwanaw putum tuku Jehová malakatsukinit, liwana kanajlayaw pi kgalhi litliwakga xlakata natlawa tuku nalakaskin. Kalilakpuwaw Chichini. Akgatunu segundo maxtu lhuwa maxkgakget chu lhkakna. Chu ni lhuwa lakgchan Katiyatni, pero lakgchan nema xlilat xlakata naʼanan latamat (Sal. 74:16; Is. 40:26). Jehová na kamaxki litliwakga kskujnanin kKatiyatni akxni maklakaskinkgo (Is. 40:29). Xlikana, komo Jehová xlakaskilh xtlawalh pi  ni tuwa xmakgkatsiw namakgatlajayaw tuku nitlan tlawaputunaw. Pero ¿tuku xlakata ni chuna tlawa?

12 Jehová kinkamaxkinitan talakaskin kiakstukan nalaksakaw tuku natlawayaw. Kinkamaxkiyan talakaskin nalaksakaw komo nakgalhakgaxmatniyaw o ni. Akxni laksakaw nakgalhakgaxmatniyaw chu liskujaw natlawayaw tuku lakaskin, limasiyaniyaw pi paxkiyaw chu makgapaxuwaputunaw. Satanás wan pi Jehová ni lakgchan nakinkamapakgsiyan. Pero akxni kgalhakgaxmataw Dios, limasiyayaw pi lakaskinaw kakinkamapakgsin. Chu kinTlatkan tiku lu kinkapaxkiyan lu xlakaskinka akxilha tuku tlawayaw (Job 2:3-5; Prov. 27:11). Akxni lu liskujaw namakgatlajayaw tuku nitlan tlawaputunaw, maski tuwa makgkatsiyaw, limasiyayaw pi ni makgxtakgaw Jehová chu lakaskinaw kakinkamapakgsin.

13 Jehová kinkawaniyan pi kaliskujwi nalimasiyayaw xtayat (Col. 3:12; kalikgalhtawakga 2 Pedro 1:5-7). Lakaskin kaliskujwi namakgatlajayaw kintalakapastaknikan chu tuku makgkatsiyaw (Rom. 8:5; 12:9). Komo liskujaw xlakata natalakgpaliyaw chu tlan kinkakitaxtuniyan, lu napaxuwayaw.

KAMASTAW TALAKASKIN PI BIBLIA CHUNTIYA NAKINKAMAKGTAYAYAN

14, 15. ¿La nakgalhiyaw tayat nema Dios lakgati? (Kaʼakxilhti recuadro « Biblia chu oración kalakgpalinilh xtayatkan»).

14 ¿Tuku kilitlawatkan xlakata nakgalhiyaw tayat nema Jehová lakgati? Ni kiakstukan kililaksakatkan tuku talakaskin nalakgpaliyaw. Kilimastatkan talakaskin pi Jehová nakinkapulalinan.  Romanos 12:2 Traducción del Nuevo Mundo wan: «Chu nialh kalakpuwantit la uma kakilhtamaku, wata kalakgpalitit mintalakapastaknikan, xlakata liwana nakatsiyatit xtalakaskin Dios nema xatlan, nema xaʼakgstitum chu nema tlan akxilha». Komo katsiputunaw tuku lakgati Jehová, kilimaklakaskinatkan tuku kinkalimakgtayayan. Talakaskin nalikgalhtawakgayaw Biblia chali chali, nalilakpuwanaw tuku likgalhtawakgayaw chu naskiniyaw xʼespíritu santo (Luc. 11:13; Gál. 5:22, 23). Komo chuna natlawayaw, Jehová nakinkamakgtayayan naʼakgatekgsaw tuku makgapaxuwa, chu nakatsiniyaw la lakpuwan. Chuna, tuku nalakpuwanaw, tuku nawanaw chu tuku natlawayaw tlakg namakgapaxuwa Jehová. Xlikana, natalakaskin pi chuntiya natalatlawayaw tuku nitlan tlawaputunaw (Prov. 4:23).

Kakamakiw artículos o textos xalak Biblia nema nakinkamakgtayayan natalakgpaliyaw chu alistalh nalimaxtuyaw kilhtamaku xlakata nakalikgalhtawakgaparayaw. (Kaʼakxilhti párrafo 15).

15 Nachuna ni kajwatiya chali chali nalikgalhtawakgayaw Biblia, na talakaskin nalilakputsananiyaw Makatsinina chu ¡Despertad! Lhuwa xʼartículos umakgolh revistas kinkamasiyanikgoyan nalimasiyayaw xtayat Jehová chu namakgatlajayaw tuku nitlan tlawaputunaw. Max makgapitsi artículos o textos xalak Biblia wa tuku akinin maklakaskinaw. Tlan nakamakiyaw chu alistalh nalimaxtuyaw kilhtamaku xlakata nakalikgalhtawakgaparayaw.

16. ¿Tuku xlakata ni xlilat nalilipuwanaw komo ni lu lakapala talakgpaliyaw?

 16 Talakaskin kilhtamaku xlakata nalimasiyayaw xtayat Jehová. Wa xlakata, komo makgkatsiyaw pi ni lu lakapala talakgpaliyaw chuna la xlakaskiw, ni kalilakgaputsaw. Pulana max natalakaskin fuerza natlawayaw namakgantaxtiyaw tuku wan Biblia. Pero komo tlakg naliskujaw nalakpuwanaw chu natlawayaw tuku Jehová lakaskin, tlakg ni tuwa namakgkatsiyaw nalakpuwanaw chu natlawayaw tuku xaʼakgstitum (Sal. 37:31; Prov. 23:12; Gál. 5:16, 17).

KALILAKPUWAW LU TLAN KILHTAMAKU NEMA AKU MIMA

17. Komo ni namakgxtakgaw Jehová, ¿la nawan kilatamatkan kkilhtamaku nema aku mima?

17 Lakaskinaw kachalha kilhtamaku akxni nialh nakgalhiyaw talakgalhin chu naskujnaniyaw Jehová putum kilhtamaku. Amacha kilhtamaku, nialh natalakaskin natalatlawayaw tuku nitlan tlawaputunaw. Tlakg ni tuwa namakgkatsiyaw nalimasiyayaw xtayat Jehová. Pero asta la uku akxni makglakgalhinaninku akinin, tlan kakninaniyaw xlakata kinkamakgtayayan talakgmaxtut. Namakgapaxuwayaw Jehová komo chuntiya naliskujaw natalakgpaliyaw chu nakgalhakgaxmataw tuku kinkamasiyaniyan kBiblia.

18, 19. ¿Tuku limasiya pi Biblia kgalhi litliwakga xlakata chuntiya nalakgpali kintayatkan?

18 Kxapulana párrafos lichuwinaw Kevin, chatum tala tiku xliskujma ni lakapala nasitsi. Lilakpuwa tuku likgalhtawakgalh kBiblia chu liskujli natalakgpali. Nachuna, kgaxmatli tastakyaw nema maxkikgolh natalan. Maski talakaskilh kilhtamaku xlakata natalakgpali, titaxtulh kilhtamaku siervo ministerial litaxtulh. Chu titaxtunit 20 kata kgolotsin xalak congregación litaxtunit. Pero makgkatsi pi chuntiya xlimakgatlajat tuku nitlan tlawaputun.

19 Xtachuna Kevin, na tlan chuntiya nalakgpaliyaw kintayatkan. Komo chuna natlawayaw, tlakg tlan xʼamigos Jehová nalitaxtuyaw (Sal. 25:14). Chu akxni lu naliskujaw natalakgpaliyaw chu namakgapaxuwayaw, xla nakinkamakgtayayan. Liwana katsiyaw pi Biblia nakinkamakgtayayan chuntiya nalakgpaliyaw kintayatkan (Sal. 34:8).

^ [1] (párrafo 1): Talakgpalinit tukuwani.