Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 ARTÍCULO NEMA NATALIKGALHTAWAKGA 10

«¿Tu nkisokgaliy mpala nitlan naktamunuy?»

«¿Tu nkisokgaliy mpala nitlan naktamunuy?»

«Akxtum tajukgolh [...] kchuchut Felipe, chu eunuco, chuna nchu munulh» (HECH. 8:38).

TAKILHTLIN sjj 52 Ktamakamastani Dios

TUKU NATALICHUWINAN *

1. ¿Tuku kitaxtulh xlakata tuku laksakkgolh Adán chu Eva?

¿TIKU lakpuwana pi lakgchan nalaksaka tuku tlan chu tuku nitlan? Akxni Adán chu Eva wakgolh xtawakat kiwi nema lilakgapaskan tuku xatlan chu nixatlan, liwana limasiyakgolh pi ni xlipawankgo Jehová nipara wa xtastakyaw. Xʼakstukan laksakkgolh tuku tlan chu tuku nitlan (Gén. 3:22). Pero, ¿tuku kitaxtulh xlakata tuku tlawakgolh? Nialh talalinkgolh Jehová chu nialh kgalhikgolh takgalhkgalhin nalatamakgo putum kilhtamaku. Nachuna, kamatitaxtinikgolh talakgalhin chu linin xkamanan (Rom. 5:12). Tuku laksakkgolh kajwatiya limilh tapatin.

Akxni eunuco etíope makgamakglhtinalh Jesús, lakapala laksakli natamunu (Kaʼakxilhti párrafos 2 chu 3).

2, 3. 1) ¿Tuku tlawalh eunuco etíope akxni Felipe litachuwinalh xlakata Dios? 2) ¿Tuku tasikulunalin makglhtinanaw akxni tamunuyaw? 3) ¿Tuku takgalhskinin nakgalhtiyaw?

2 Wi tuku litalakgpali xlakata tuku tlawakgolh Adán chu Eva chu tuku tlawalh eunuco etíope akxni Felipe litachuwinalh xlakata Dios. Uma chixku lu xpaxtikatsininan tuku xtlawanit Jehová chu Jesús xpalakata, wa xlakata lakapala tamunulh (Hech. 8:34-38). Kimpalakatakan, akxni makamaxkiw Dios kilatamatkan chu chuna la etíope, tamunuw, chuna limasiyaw pi paxtikatsiniyaw tuku tlawakgolh Jehová chu Jesús kimpalakatakan. Nachuna, limasiyaw pi lipawanaw Jehová pi kajwatiya tiku lakgchan nalaksaka tuku tlan chu tuku nitlan.

3 Kalilakpuwanti tasikulunalin nema makglhtinanaw akxni skujnaniyaw Jehová. Kalilakpuwaw, kgalhiyaw takgalhkgalhin  pi xla nakinkamaxkiyan putum tuku Adán chu Eva makgatsankgakgolh, chuna la takgalhkgalhin xlakata nalatamayaw putum kilhtamaku. Takanajla nema kgalhiniyaw Jesús, Dios kinkatapatiyan kintalakgalhinkan chu kinkamaxkiyan akgtum xaskulunku talakapastakni (Mat. 20:28; Hech. 10:43). Nachuna, makgtapakgsiyaw kʼakgtum familia xla xtatayananin Jehová, tiku xla tlan kaʼakxilha chu kgalhikgo akgtum lu xatlan takgalhkgalhin (Juan 10:14-16; Rom. 8:20, 21). Pero maski kgalhiyaw umakgolh takgalhkgalhin, makgapitsi tiku lakgapaskgoya Jehová tuwa makgkatsikgo komo nastalanikgo xliʼakxilhtit eunuco etíope o ni. ¿Tuku kamalakgachokgo xlakata nina natamunukgo? Chu ¿la tlan namakgatlajakgo?

MAKGAPITSI TUKU KAMALAKGACHOKGO XLAKATA NI NATAMUNUKGO

Tuku xlimakgatlajatkan amakgapitsi xlakata tlan natamunukgo

Tapekua (Kaʼakxilhti párrafos 4 chu 5). *

4, 5. ¿Tuku taʼakglhuwit xkgalhikgo Avery chu Hannah?

4 Tapekua. Xnatlatni chatum kgawasa tiku wanikan Avery xtatayananin Jehová. Xtlat lu tlan lichuwinankan la komo kgolotsin kcongregación chu la xatlat. Maski chuna, Avery xmamakgapalima xtamunut. Xla lichuwinan: «Xaklakpuwan pi nikxni chuna xakama litaxtu la kintlat». Nachuna, Avery xlakpuwan pi nila xmakgantaxtilh taskujut nema xmaxkika alistalh. Xla wan: «Xaklilakgaputsa pi xkiwanika pi naktlawa oración niku lhuwa wilakgoka, xakmatitaxtilh akgtum taʼakgchuwin o kaj xlakata nakmaxtu grupo xlakata naʼankan lichuwinankan Dios».

5 Hannah, tiku kgalhi 18 kata, xmakgkatsi pi nila xʼakstu xlipawankan. Maski makgastakka kʼakgtum familia niku putum xtatayananin Jehová, xmakgkatsi pi nitu xlitaxtu chu xmakgkatsi pi nila xlilatamalh tuku wan Biblia. Xmin kilhtamaku, lu nitlan xmakgkatsi chu asta xʼakstu xtlawanikan tuku nitlan. Wan: «Niti klitachuwinalh tuku xaktlawa, nipara kinatlatni. Xaklakpuwan pi Jehová nikxni xʼama kimakgamakglhtinan xlakata tuku kiʼakstu xkintlawanikan».

Tuku matlawikgoyan tiku katalalipina (Kaʼakxilhti párrafo 6). *

6. ¿Tuku xlakata nila xtamunu Vanessa?

6 Tuku matlawikgoyan tiku katalalipina. Vanessa, tiku kgalhi 22 kata, lakapastaka: «Xakkgalhi chatum kiʼamiga tiku liwaka atsinu akgkaw kata la xaklakgapasaw». Pero uma xʼamiga nitu xkatsiputun xlakata xtakanajla chu ni xmakgpuwantini natamunu, chu uma lu nitlan xlimakgkatsi. Lichuwinan: «Tuwa xakmakgkatsi nakkgalhi amigos chu xakpekuan komo xakmakgxtakgli, nikxni xakamapa tekgsa chatum amiga chuna la xla».

Pekuankan xlakata lakpuwana pi natlawaya akgtum talakgalhin (Kaʼakxilhti párrafo 7). *

7. ¿Tuku xpekuani Makayla chu tuku xlakata?

7 Pekuankan xlakata lakpuwana pi natlawaya akgtum lanka talakgalhin.  Makayla xkgalhi akgkitsis kata akxni xtala tamakxtuka kcongregación. Titaxtulh kilhtamaku, xakxilha pi nitlan xlimakgkatsikgo xnatlatni tuku xtlawa xtala. Lichuwinan: «Xakpekuan chu ni xaktamunuputun xlakata xaklakpuwan komo naktlawa akgtum talakgalhin, xaktaxtulh kcongregación chu uma tlakg nitlan xlimakgkatsikgolh kinatlatni».

Pekuankan akxni kinkalakatakikanan (Kaʼakxilhti párrafo 8). *

8. ¿Tuku xpekuani Miles?

8 Pekuankan akxni kinkalakatakikanan. Kaʼakxilhwi xliʼakxilhtit chatum kgawasa tiku wanikan Miles. Xtlat chu xtutse xtatayananin Jehová litaxtukgo, pero xtse ni. Miles lichuwinan: «Liwaka akgkutsayan kata ktatamakgxtakgli kintse. Chu nila xakwani pi xaktamunuputun. Xaklakapastaka tuku lalh akxni kintlat xtatayana Jehová litaxtulh. Xakpekuan pi nachuna xkintlawalh».

LA TLAN NAMAKGATLAJAYA TUKU MALAKGACHOKGOYAN

9. ¿Tuku namatlawiyan akxni nakatsiya pi Jehová lu xakgalhkgalhina chu xapaxkina?

9 Adán chu Eva laksakkgolh pi ni naskujnanikgo Jehová xlakata nikgalhinikgolh tapaxkit. Maski chuna, Dios kamaxkilh talakaskin pi nalatamakgo xlakata nakgalhikgo kamanan chu xʼakstukan xlaksakkgolh la nakamakgastakkgo xkamanankan. Tuku kitaxtulh alistalh xlakata lakgmakgankgolh Jehová limasiyakgolh pi ni lakgskgalalan xwankgonit. Xapuxku xkgawasakan makgnilh xtala, titaxtulh kilhtamaku latamanin lu lixkajni tsukukgolh likatsikgo chu xʼakstukan tsukuka kapaxkikan (Gén. 4:8; 6:11-13). Pero Jehová wi tuku xʼama maklakaskin xlakata xkalakgmaxtulh xkamanan Adán chu Eva tiku kskujnaniputunkgolh (Juan 6:38-40, 57, 58). ¿Nixlikana pi Jehová lu xapaxkina chu lu xakgalhkgalhina? Akxni tlakg nalakgapasa, tlakg napaxkiya. Ni katitlawaputu tuku tlawakgolh Adán chu Eva, wata namakamaxkiya milatamat.

La tlan namakgatlajaya tuku malakgachokgoyan

(Kaʼakxilhti párrafos 9 chu 10). *

10. ¿Tuku xlakata akxni lilakpuwankan Salmo 19:7 tlan nakinkamakgtayayan naskujnaniyaw Jehová?

10 Chuntiya kakatsini xlakata Jehová. Akxni tlakg nalakgapasa, tlakg nalipawana pi tlan naskujnaniya. Avery lichuwinan pi lu makgtayalh akxni likgalhtawakgalh  chu lilakpuwa tuku wan Salmo 19:7 (kalikgalhtawakga). Akxni akxilhli pi kxlatamat xkgantaxtuma uma tachuwin, tapaxkit nema xkgalhini Jehová tatliwakglhli. Uma tapaxkit ni kajwatiya tlawa pi nalipawanaw, wata kinkamakgtayayan natlawayaw tuku Jehová kinkaskiniyan. Hannah lichuwinan xlakata uma: «Xlakata klikgalhtawakga Biblia, kʼakgatekgsli pi akxni kiʼakstu xkintlawanikan tuku nitlan kmamakgkatsini Jehová» (1 Ped. 5:7). Xla liskujli xlakata natlawa tuku wan xTachuwin Dios (Sant. 1:22). ¿Tuku kitaxtulh? Xla wan: «Akxni kakxilhli pi tlan kinkitaxtunilh nakkgalhakgaxmata Jehová, tapaxkit nema xakkgalhini tlakg tatliwakglhli. Chu liwana kkatsi pi xla nakimpulalin akxni nakmaklakaskin xtamakgtay». Hannah nialh masipanilh xmakni, tamakamastanilh Jehová chu tamunulh.

(Kaʼakxilhti párrafo 11). *

11. 1) ¿Tuku tlawalh Vanessa xlakata nakgalhi xalakwan amigos? 2) ¿Tuku kinkamasiyaniyan uma liʼakxilhtit?

11 Liwana kalaksakti miʼamigos. Vanessa akxilhli pi xʼamiga ni xmakgtayama naskujnani Jehová. Wa xlakata nialh talalilh. Pero ni kajwatiya uma tuku tlawalh: liskujli naputsa xasasti xʼamigos kcongregación. Xla wan pi xliʼakxilhtit Noé chu xfamilia makgtayalh: «Xlakan xlamakgolh kxlakgstipankan latamanin tiku ni xpaxkikgo Jehová, wa xlakata xlakan tlan xlatalalin kxfamilia». Akxni tamunulh, precursora litaxtulh. Chu uku lichuwinan: «Uma kimakgtayanit nakkgalhi xasasti amigos, chu ni kajwatiya kincongregación nachuna amakgapitsi». Wix na tlan nakgalhiya xalakwan amigos komo naliskuja tlakg nalichuwinana xtachuwin Jehová (Mat. 24:14).

(Kaʼakxilhti párrafos 12 asta 15). *

12. ¿Tuku tapekua ni kgalhikgolh Adán chu Eva, chu tuku kakitaxtunilh?

12 Kamakgatlaja tuku pekuaniya chu kaj xman Dios kapekuani. Ni putum tuku pekuaniya nitlan. Akgtum liʼakxilhtit, tlan pekuankan akxni tlawaputunaw tuku namakgalipuwan Jehová (Sal. 111:10). Komo Adán chu Eva xkgalhikgolh uma xatlan tapekua, ni xtalalakatawakakgolh Dios. Pero akxni chuna tlawakgolh «talakinikgolh xlakgastapukan», uma kilhchanima pi liwana  akgatekgskgolh pi xmakglakgalhinankgonit. Chu xkamatitaxtininit xkamanan talakgalhin chu linin. Akxni akxilhkgolh akgatekgskgolh la xkakitaxtuninit, maxanankgolh xlakata nitu klhakganankgonit chu tamakgtlapakgolh (Gén. 3:7, 21).

13, 14. 1) Chuna la wan 1 Pedro 3:21, ¿tuku xlakata ni napekuaniyaw linin? 2) ¿Tuku xlakata paxkiyaw Jehová?

13 Tlan nakgalhiniyaw xatlan tapekua Jehová. Xlakata ni makgalipuwamputunaw. Wa tuku ni napekuaniyaw wa linin. ¿Tuku xlakata? Xlakata Dios kinkamaxkinitan tamakgtay xlakata tlan putum kilhtamaku nalatamayaw. Komo nialh natlawayaw lanka talakgalhin, xla nakinkatapatiyan xlakata kanajlaniyaw xtamakamastan xKgawasa. Chu pulaktum la nalimasiyayaw pi kanajlaniyaw wa namakamaxkiyaw kilatamatkan chu natamunuyaw (kalikgalhtawakga 1 Pedro 3:21).

14 Pulaklhuwa tuku xlakata tlan nalipaxkiyaw Jehová. Ni kaj xman wa kinkamaxkiyan tuku maklakaskinaw chali chali, wata kinkamaxkiyan xaxlikana xpalakata chu tuku lakpuwanit natlawa (Juan 8:31, 32). Kinkamaxkinitan congregación xlakata nakinkalipulalinan chu nakinkamakgtayayan. Kinkamakgtayayan akxni kgalhiyaw taʼakglhuwit chu kinkamaxkiyan takgalhkgalhin xlakata tlan nalatamayaw kxakastlan katiyatni kkilhtamaku nema aku mima (Sal. 68:19; Rev. 21:3, 4). Akxni lilakpuwanaw putum tuku tlawanita xlakata kinkalimasiyaniyan xtapaxkit, lu paxkiyaw chu ni tlawaputunaw tuku nitlan nalimakgkatsi. Wa uma tapaxkit nema kilikgalhitkan.

15. ¿La tlawalh Makayla xlakata nialh napekuan komo natlawa akgtum lanka talakgalhin?

15 Makayla nialh pekualh xlakata xlakpuwan pi natlawa lanka talakgalhin akxni akgatekgsli pi Jehová skgalalh wi xlakata nakinkatapatiyan. Wan: «Kʼakgatekgsli pi kimputumkan makglakgalhinanin chu tlawayaw tuku nitlan. Pero nachuna kʼakgatekgsli pi Jehová kinkapaxkiyan chu kinkatapatiyan xlakata talakgmaxtut». Xlakata xpaxki Jehová tlawalh pi namakamaxki xlatamat chu natamunu.

(Kaʼakxilhti párrafo 16). *

16. ¿Tuku makgtayalh Miles nialh napekuan?

16 Miles, tiku xpekuani xtse chu ni xwaniputun pi natamunu, skinilh tamakgtay superintendente de circuito. Wan: «Xla nachuna xtitaxtunit, xlakata xtse na nixtatayana Jehová xwanit. Kimakgtayalh tlan nakwani kintse pi xlakata xaktamunuputun kiʼakstu chuna xaklaksaknit chu ni wa kintlat xkiwanima». Xtse Miles lu sitsilh. Alistalh, Miles taxtulh kxchik xtse, xlakata tlan xtamunulh. Lichuwinampara: «Lu tlan klimakgkatsilh xlakata kkatsinilh pi Jehová lhuwa tuku tlawanit kimpalakata. Akxni klilakpuwan xtamakamastan Jesús, kʼakgatekgsli pi Jehová lu kimpaxki.  Uma tlawalh pi nakmakamaxki kilatamat chu naktamunu».

KAMAKGANTAXTI TUKU LAKSAKNITA

Tlan nalimasiyayaw pi paxtikatsiniyaw Dios tuku tlawanit kimpalakatakan (Kaʼakxilhti párrafo 17).

17. ¿Tuku tlan natlawayaw kimputumkan?

17 Akxni Eva walh xtawakat kiwi nema xwanikanit pi ni nawa kjardín xaʼEdén, lakgmakgalh xTlat. Chu akxni Adán nachuna tlawalh limasiyalh pi ni xpaxtikatsini Jehová tuku xtlawanit xpalakata. Kimputumkan tlan nalimasiyayaw pi nitlan tuku laksakkgolh. Akxni tamunuyaw, limasiyaniyaw Jehová pi kanajlayaw pi xla kgalhi limapakgsin nalaksaka tuku tlan chu tuku nitlan. Nachuna limasiyaniyaw pi paxkiyaw chu lipawanaw.

18. ¿Tuku militlawat xlakata tlan nakitaxtuniyan la skujnanipat Jehová?

18 Akxni tamununitawa, talakaskin pi chali chali nastalaniyaw xtastakyaw Jehová, chu ni wa kilakan. Xlikana pi uma tuwa, pero lhuwa millones latamanin chuna tlawakgo akgatunu kata. Wix na tlan chuna natlawaya. Xlakata tlan chuna natlawaya, chuntiya kalikgalhtawakga Biblia, kalismani xlakata akxtum nakatatawilaya natalan chu xatapaxuwan kakalitachuwinanti amakgapitsin tuku katsininita xlakata Jehová (Heb. 10:24, 25). Chu akxni wi tuku nalaksaka natlawaya, kakgaxpati tastakyaw nema maxkiyan Jehová kxTachuwin chu kxkachikin (Is. 30:21). Chuna, tlan nakitaxtuniyan kmilatamat (Prov. 16:3, 20).

19. ¿Tuku ankgalhin mililakapastakat chu tuku xpalakata?

19 Komo ankgalhin nalakapastaka la makgtayayan xtapulalit Jehová, tapaxkit nema kgalhiniya chu tapaxkit nema kgalhiniya xlimapakgsin tlakg natatliwakglha. Wa xlakata, maski Satanás lhuwa tuku namalaknuniyan wix ni katimakgxtakgti la skujnanipat Jehová. Akxni natitaxtuya akgtum mil kata, chu nalilakpuwana akxni titamunu chu nawana: «Lu tlan tuku klaksakli kkilatamat».

TAKILHTLIN sjj 28 La tlan xʼamigo Jehová nawanaw

^ párr. 5 Tuku tlakg xlakaskinka nalaksaka kmilatamat wa komo natamunuya o ni. ¿Tuku xlakata lu xlakaskinka? Uma artículo namasta xatakgalhtin. Nachuna, nakamakgtaya tiku lakapastakmakgo komo natamunukgo o ni, chu tuku kamalakgachokgo ni natamunukgo.

^ párr. 56 TUKU TASIYA KDIBUJO: Pekuankan: Chatum kgawasa pekuan chu ni mastaputun xtakgalhtin ktamakxtumit.

^ párr. 58 TUKU TASIYA KDIBUJO: Amigos: Chatum tsumat kalimaxanan natalan akxni taʼan atanu tsumat, tiku nitlan xtayat.

^ párr. 60 TUKU TASIYA KDIBUJO: Tlawakan talakgalhin: Akxni xtala tamakxtukan kcongregación chu taxtu kxchik, chatum tsumat pekuan xlakata lakpuwan pi natlawa lanka talakgalhin.

^ párr. 62 TUKU TASIYA KDIBUJO: Lakatakinankan: Chatum kgawasa pekuan akxni tlawa xʼoración kxlakatin xtse, tiku ni xtatayana Jehová.

^ párr. 65 TUKU TASIYA KDIBUJO: Pekuankan: Chatum kgawasa liskuja tlakg nakgalhtawakga.

^ párr. 67 TUKU TASIYA KDIBUJO: Amigos: Chatum tsumat katsini pi lipaxuwakan xtatayana Jehová nawana.

^ párr. 69 TUKU TASIYA KDIBUJO: Tlawakan talakgalhin: Chatum tsumat paxki tuku xaxlikana chu tamunu.

^ párr. 71 TUKU TASIYA KDIBUJO: Lakatakinankan: Chatum kgawasa nialh pekuan chu liwana wani xtse tuku kanajla.